विश्वनाथ सुप्रभातं Morning salutations to shiva

उत्तिष्ट भैरवस्वामिन् काशिकापुरपालक ।श्रीविश्वनाथभक्तानां सम्पूरय मनोरथम् ॥ १॥

uttiṣṭa bhairavasvāmin kāśikāpurapālaka |śrīviśvanāthabhaktānāṃ sampūraya manoratham || 1||

स्नानाय गाङ्गसलिलेऽथ समर्चनाय विश्वेश्वरस्य बहुभक्तजना उपेताः ।श्रीकालभैरव लसन्ति भवन्निदेशं उत्तिष्ट दर्शय दशां तव सुप्रभातम् ॥ २॥

snānāya gāṅgasalile'tha samarcanāya viśveśvarasya bahubhaktajanā upetāḥ |śrīkālabhairava lasanti bhavannideśaṃ uttiṣṭa darśaya daśāṃ tava suprabhātam || 2||

यागव्रतादिबहुपुण्यवशं यथा त्वं पापात्मनामपि तथा सुगतिप्रदाऽसि ।कारुण्यपूरमयि शैलसुतासपत्नि मातर्भगीरथसुते तव सुप्रभातम् ॥ ३॥

yāgavratādibahupuṇyavaśaṃ yathā tvaṃ pāpātmanāmapi tathā sugatipradā'si |kāruṇyapūramayi śailasutāsapatni mātarbhagīrathasute tava suprabhātam || 3||

दुग्धप्रवाहकमनीयतरङ्गभङ्गे पुण्यप्रवाहपरिपाथितभक्तसङ्गे ।नित्यं तपस्विजनसेवितपादपद्मे गङ्गे शरण्यशिवदे तव सुप्रभातम् ॥ ४॥

dugdhapravāhakamanīyataraṅgabhaṅge puṇyapravāhaparipāthitabhaktasaṅge |nityaṃ tapasvijanasevitapādapadme gaṅge śaraṇyaśivade tava suprabhātam || 4||

वाराणसीस्थितगजानन धुण्ढिराज सम्प्रार्थितेऽष्टफलदानसमर्थमूर्ते ।उत्तिष्ट विघ्नविरहाय भजामहे त्वां श्रीपार्वतीतनय भोस्तव सुप्रभातम् ॥ ५॥

vārāṇasīsthitagajānana dhuṇḍhirāja samprārthite'ṣṭaphaladānasamarthamūrte |uttiṣṭa vighnavirahāya bhajāmahe tvāṃ śrīpārvatītanaya bhostava suprabhātam || 5||

पूजास्पद प्रथममेव सुरेशु मध्ये सम्पूरणे कुशल भक्तमनोरथानाम् ।गीर्वाणवृन्दपरिपूजितपादपद्म संजायतां गणपते तव सुप्रभातम् ॥ ६॥

pūjāspada prathamameva sureśu madhye sampūraṇe kuśala bhaktamanorathānām |gīrvāṇavṛndaparipūjitapādapadma saṃjāyatāṃ gaṇapate tava suprabhātam || 6||

कात्यायनी प्रमथनाथशरीरभागे भक्तालिगीतमुखरीकृतपादपद्मे ।ब्रह्मादिदेवगणवन्दितदिव्यशौर्ये श्रीविश्वनाथदयिते तव सुप्रभातम् ॥ ७॥

kātyāyanī pramathanāthaśarīrabhāge bhaktāligītamukharīkṛtapādapadme |brahmādidevagaṇavanditadivyaśaurye śrīviśvanāthadayite tava suprabhātam || 7||

प्रातः प्रसीद विमले कमलायताक्षि कारुण्यपूर्णहृदये नमतां शरण्ये ।निर्धूतपापनिचये सुरपूजितांघ्रे श्रीविश्वनाथदयिते तव सुप्रभातम् ॥ ८॥

prātaḥ prasīda vimale kamalāyatākṣi kāruṇyapūrṇahṛdaye namatāṃ śaraṇye |nirdhūtapāpanicaye surapūjitāṃghre śrīviśvanāthadayite tava suprabhātam || 8||

सस्यानुकूलजलवर्षणकार्यहेतोः शाकम्भरीति तव नाम भुवि प्रसिद्दम् ।सस्यातिजातमिह शुष्यति चान्नपूर्णे उत्तिष्ट सर्वफलदे तव सुप्रभातम् ॥ ९॥

sasyānukūlajalavarṣaṇakāryahetoḥ śākambharīti tava nāma bhuvi prasiddam |sasyātijātamiha śuṣyati cānnapūrṇe uttiṣṭa sarvaphalade tava suprabhātam || 9||

सर्वोत्तमं मानवजन्म लब्ध्वा हिनस्ति जीवान् भुवि मर्त्यवर्गः ।तद्दारणायाशु जहीहि निद्रां देव्यन्नपूर्णे तव सुप्रभातम् ॥ १०॥

sarvottamaṃ mānavajanma labdhvā hinasti jīvān bhuvi martyavargaḥ |taddāraṇāyāśu jahīhi nidrāṃ devyannapūrṇe tava suprabhātam || 10||

श्रीकण्ठ कण्ठधृतपन्नग नीलकण्ठ सोत्कण्ठभक्तनिवहोपहितोपकण्ठ ।उत्तिष्ट सर्वजनमङ्गलसाधनाय विश्वप्रजाप्रथितभद्र जहीहि निद्राम् ॥ ११॥

śrīkaṇṭha kaṇṭhadhṛtapannaga nīlakaṇṭha sotkaṇṭhabhaktanivahopahitopakaṇṭha |uttiṣṭa sarvajanamaṅgalasādhanāya viśvaprajāprathitabhadra jahīhi nidrām || 11||

गङ्गाधराद्रितनयाप्रिय शान्तमूर्ते वेदान्तवेद्य सकलेश्वर विश्वमूर्ते ।कूटस्थनित्य निखिलागमगीतकीर्ते देवासुरार्चित विभो तव सुप्रभातम् ॥ १२॥

gaṅgādharādritanayāpriya śāntamūrte vedāntavedya sakaleśvara viśvamūrte |kūṭasthanitya nikhilāgamagītakīrte devāsurārcita vibho tava suprabhātam || 12||

श्रीविश्वनाथकरुणामृतपूर्णसिन्धो शीतांशुखण्डसमलंकृतभव्यचूड ।भस्माङ्गरागपरिशोभितसर्वदेह वाराणसीपुरपते तव सुप्रभातम् ॥ १३॥

śrīviśvanāthakaruṇāmṛtapūrṇasindho śītāṃśukhaṇḍasamalaṃkṛtabhavyacūḍa |bhasmāṅgarāgapariśobhitasarvadeha vārāṇasīpurapate tava suprabhātam || 13||

देवादिदेव त्रिपुरान्तक दिव्यभाव गङ्गाधर प्रमथवन्दित सुन्दराङ्ग ।नागेन्द्रहार नतभक्तभयापहार वाराणसीपुरपते तव सुप्रभातम् ॥ १४॥

devādideva tripurāntaka divyabhāva gaṅgādhara pramathavandita sundarāṅga |nāgendrahāra natabhaktabhayāpahāra vārāṇasīpurapate tava suprabhātam || 14||

वेदान्तशास्त्रविशदीकृतदिव्यमूर्ते प्रत्यूषकालमुनिपुङ्गवगीतकीर्ते ।त्वय्यर्पितार्जितसमस्तसुरक्षणस्य वाराणसीपुरपते तव सुप्रभातम् ॥ १५॥

vedāntaśāstraviśadīkṛtadivyamūrte pratyūṣakālamunipuṅgavagītakīrte |tvayyarpitārjitasamastasurakṣaṇasya vārāṇasīpurapate tava suprabhātam || 15||

कैलासवासमुनिसेवितपादपद्म गङ्गाजलौघपरिषिक्तजटाकलाप ।वाचामगोचरविभो जटिलत्रिनेत्र वाराणसीपुरपते तव सुप्रभातम् ॥ १६॥

kailāsavāsamunisevitapādapadma gaṅgājalaughapariṣiktajaṭākalāpa |vācāmagocaravibho jaṭilatrinetra vārāṇasīpurapate tava suprabhātam || 16||

श्रीपार्वतीहृदयवल्लभ पञ्चवक्त्र श्रीनीलकण्ठ नृकपालकलापमाल ।श्रीविश्वनाथमृदुपंकजमंजुपाद श्रीकाशिकापुरपते तव सुप्रभातम् ॥ १७॥

śrīpārvatīhṛdayavallabha pañcavaktra śrīnīlakaṇṭha nṛkapālakalāpamāla |śrīviśvanāthamṛdupaṃkajamaṃjupāda śrīkāśikāpurapate tava suprabhātam || 17||

काशी त्रितापहरणी शिवसद्मभूता शर्मेश्वरी त्रिजगतां सुपुरीषु हृद्या ।विद्याकलासु नवकौशलदानशीला श्रीकाशिकापुरपते तव सुप्रभातम् ॥ १८॥

kāśī tritāpaharaṇī śivasadmabhūtā śarmeśvarī trijagatāṃ supurīṣu hṛdyā |vidyākalāsu navakauśaladānaśīlā śrīkāśikāpurapate tava suprabhātam || 18||

श्रीविश्वनाथ तव पादयुगं स्मरामि गङ्गामघापहरणीं शिरशा नमामि ।वाचं तवैव यशसाऽनघ भूषयामि वाराणसीपुरपते तव सुप्रभातम् ॥ १९॥

śrīviśvanātha tava pādayugaṃ smarāmi gaṅgāmaghāpaharaṇīṃ śiraśā namāmi |vācaṃ tavaiva yaśasā'nagha bhūṣayāmi vārāṇasīpurapate tava suprabhātam || 19||

नारीनतेश्वरयुतं निजचारुरूपं स्त्रीगौरवं जगति वर्धयितुं तनोषि ।गङ्गां हि धारयसि मूर्ध्नि तथैव देव वाराणसीपुरपते तव सुप्रभातम् ॥ २०॥

nārīnateśvarayutaṃ nijacārurūpaṃ strīgauravaṃ jagati vardhayituṃ tanoṣi |gaṅgāṃ hi dhārayasi mūrdhni tathaiva deva vārāṇasīpurapate tava suprabhātam || 20||

त्वमेव माता च पिता त्वमेव त्वमेव बन्धुश्च सखा त्वमेव ।त्वमेव विद्या द्रविणं त्वमेव त्वमेव सर्वं मम देवदेव ॥ॐ मङ्गलं भगवान् शम्भो मङ्गलम् वॄषभध्वज ।मङ्गलं पार्वतीनाथ मङ्गलं भक्तवत्सल ॥। एतत् श्लोकद्वयं प्राचीनकविकृतम् ।इति श्रीविश्वनाथसुप्रभातं सम्पूर्णम् ।

tvameva mātā ca pitā tvameva tvameva bandhuśca sakhā tvameva |tvameva vidyā draviṇaṃ tvameva tvameva sarvaṃ mama devadeva ||oṃ maṅgalaṃ bhagavān śambho maṅgalam vṝṣabhadhvaja |maṅgalaṃ pārvatīnātha maṅgalaṃ bhaktavatsala ||| etat ślokadvayaṃ prācīnakavikṛtam |iti śrīviśvanāthasuprabhātaṃ sampūrṇam |