माणिक्यवाचकाष्टोत्तरशतनामस्तोत्रम् Manikyavachaka Ashtottarashata Nama Stotram

अक्षस्रक्पुस्तकोद्भासिहस्तं माणिक्यवाचकम् ।काश्यपं समयाचार्यं दाक्षिणात्यं उपास्महे ॥ १॥

akṣasrakpustakodbhāsihastaṃ māṇikyavācakam |kāśyapaṃ samayācāryaṃ dākṣiṇātyaṃ upāsmahe || 1||

ॐ । मार्ताण्डतेजा माणिक्यवाचको माननिर्भरः ।महेन्द्रवरदो मन्त्री मायाविरहितात्मवान् ॥ २॥

oṃ | mārtāṇḍatejā māṇikyavācako mānanirbharaḥ |mahendravarado mantrī māyāvirahitātmavān || 2||

मारबाधाविनिर्मुक्तो मारतूणीरजङ्घिकः ।मारुताशफणाभूषो महेश्वरजनेश्वरः ॥ ३॥

mārabādhāvinirmukto māratūṇīrajaṅghikaḥ |mārutāśaphaṇābhūṣo maheśvarajaneśvaraḥ || 3||

मातृकान्यासनिरतो मातृपादाब्जपूजकः ।मायापायविनिर्मुक्तो मानदो मार्गदर्शकः ॥ ४॥

mātṛkānyāsanirato mātṛpādābjapūjakaḥ |māyāpāyavinirmukto mānado mārgadarśakaḥ || 4||

मारवैरिकृपापात्रायमानोत्तमवाग्झरः ।मायावादविनिर्जेता महातीर्थकृतादरः ॥ ५॥

māravairikṛpāpātrāyamānottamavāgjharaḥ |māyāvādavinirjetā mahātīrthakṛtādaraḥ || 5||

निरन्तरो नित्यतपा नित्यतृप्तो निधीश्वरः ।निष्कलङ्को निरीहश्च नियतो निरहङ्कृतिः ॥ ६॥

nirantaro nityatapā nityatṛpto nidhīśvaraḥ |niṣkalaṅko nirīhaśca niyato nirahaṅkṛtiḥ || 6||

निमित्तज्ञो निराधारो निर्ममो नित्यरञ्जनः ।नित्योत्साहो निरातङ्को नियतिज्ञो नियामकः ॥ ७॥

nimittajño nirādhāro nirmamo nityarañjanaḥ |nityotsāho nirātaṅko niyatijño niyāmakaḥ || 7||

नियन्ता निगमार्थाब्धिवर्धनोत्थनिशापतिः ।कर्मण्यः करुणापूर्णः कारणज्ञः कवीश्वरः ॥ ८॥

niyantā nigamārthābdhivardhanotthaniśāpatiḥ |karmaṇyaḥ karuṇāpūrṇaḥ kāraṇajñaḥ kavīśvaraḥ || 8||

कालज्ञः कुलकृत्कल्यः कलानाथमुखोज्ज्वलः ।कम्बुकण्ठः कलाज्ञानः कैवल्यपदबोधकः ॥ ९॥

kālajñaḥ kulakṛtkalyaḥ kalānāthamukhojjvalaḥ |kambukaṇṭhaḥ kalājñānaḥ kaivalyapadabodhakaḥ || 9||

करपद्मधृताक्षस्रक्पुस्तकः कनकाम्बरः ।कटीतटीलसत्सूत्रः कौपीनवरधारकः ॥ १०॥

karapadmadhṛtākṣasrakpustakaḥ kanakāmbaraḥ |kaṭītaṭīlasatsūtraḥ kaupīnavaradhārakaḥ || 10||

कीर्तिमान्कामारिभक्तः कामपाशविवर्जितः ।वातग्रामाधिपो वाग्मी वातूलागमपारगः ॥ ११॥

kīrtimānkāmāribhaktaḥ kāmapāśavivarjitaḥ |vātagrāmādhipo vāgmī vātūlāgamapāragaḥ || 11||

वाय्वाहारेशवचनो वाचस्पति समानधीः ।वाराणसीवासरतो वाङ्माधुर्यजितामृतः ॥ १२॥

vāyvāhāreśavacano vācaspati samānadhīḥ |vārāṇasīvāsarato vāṅmādhuryajitāmṛtaḥ || 12||

वातापितापनसखो वायुरोगविवर्जितः ।वाचालको वाहिनीशो वाच्यवाचकसुन्दरः ॥ १३॥

vātāpitāpanasakho vāyurogavivarjitaḥ |vācālako vāhinīśo vācyavācakasundaraḥ || 13||

वाङ्मनोतीतविभवो वासुदेवपदप्रियः ।वाराहीमन्त्रराड्जप्ता वामदेवस्तुतिप्रियः ॥ १४॥

vāṅmanotītavibhavo vāsudevapadapriyaḥ |vārāhīmantrarāḍjaptā vāmadevastutipriyaḥ || 14||

वामाङ्गसुन्दरतनुर्वाण्याराधनतत्परः ।चतुरश्चण्डवीर्यश्च चण्डाज्ञश्चन्द्रशीतलः ॥ १५॥

vāmāṅgasundaratanurvāṇyārādhanatatparaḥ |caturaścaṇḍavīryaśca caṇḍājñaścandraśītalaḥ || 15||

चण्डांशुसदृशज्योतिश्चतुर्वेदाब्धिपारगः ।चाञ्चल्यभिच्चमत्कारी चातुर्वर्ण्यानुपालकः ॥ १६॥

caṇḍāṃśusadṛśajyotiścaturvedābdhipāragaḥ |cāñcalyabhiccamatkārī cāturvarṇyānupālakaḥ || 16||

चन्द्रशेखरभक्तश्च चन्द्रार्काग्निसमप्रभः ।चराचरजगन्मित्रं चिन्मूर्तिश्चञ्चलाद्युतिः ॥ १७॥

candraśekharabhaktaśca candrārkāgnisamaprabhaḥ |carācarajaganmitraṃ cinmūrtiścañcalādyutiḥ || 17||

चतुर्वक्त्रमुखोत्पन्नश्चरणाश्रितभूपतिः ।चन्द्रचूडनिभौजाश्च चण्डेश्वरसमानधीः ॥ १८॥

caturvaktramukhotpannaścaraṇāśritabhūpatiḥ |candracūḍanibhaujāśca caṇḍeśvarasamānadhīḥ || 18||

कञ्जदृक्कल्याणशीलः काषाय वसनोज्ज्वलः ।कवाटकठिनोरस्कः कन्दर्पसमकान्तिमान् ॥ १९॥

kañjadṛkkalyāṇaśīlaḥ kāṣāya vasanojjvalaḥ |kavāṭakaṭhinoraskaḥ kandarpasamakāntimān || 19||

कार्पासयज्ञोपवीती कलिदोषनिकृन्तनः ।करीन्द्रमन्दगमनः करुणारसशेवधिः ॥ २०॥

kārpāsayajñopavītī kalidoṣanikṛntanaḥ |karīndramandagamanaḥ karuṇārasaśevadhiḥ || 20||

कलुषघ्नः कलालापः कवची काश्यपस्तथा ।कनकाङ्गदधारी च कर्मग्रन्थिविमोचकः ॥ २१॥

kaluṣaghnaḥ kalālāpaḥ kavacī kāśyapastathā |kanakāṅgadadhārī ca karmagranthivimocakaḥ || 21||

कमलद्विट्पदद्वन्द्वः कमनीयः कुलेश्वरः ।अष्टोत्तरमिदं नाम्नां शतं वातपुरीशितुः ॥ २२॥

kamaladviṭpadadvandvaḥ kamanīyaḥ kuleśvaraḥ |aṣṭottaramidaṃ nāmnāṃ śataṃ vātapurīśituḥ || 22||

त्रिसन्ध्यं यः पठेन्नित्यं वातरोगाद्विमुच्यते ।योगाम्बिकासनाथस्य कृपापात्रं भवेच्च सः ॥ २३॥

trisandhyaṃ yaḥ paṭhennityaṃ vātarogādvimucyate |yogāmbikāsanāthasya kṛpāpātraṃ bhavecca saḥ || 23||

इति श्रीमाणिक्यवाचकाष्टोत्तरशतनामस्तोत्रं सम्पूर्णम् ।

iti śrīmāṇikyavācakāṣṭottaraśatanāmastotraṃ sampūrṇam |