शिवतीर्थक्षेत्रमाहात्म्यम् २ Kashisthitan Shivatirthakshetramahatmyam 2

शिवपार्वतीसंवादेकाश्य मन्यन्महत्स्थानं केदाराभिधमुत्तमम् ।तत्रापि लिङ्गमस्त्येकं केदारेश्वरनामकम् ॥ १॥

śivapārvatīsaṃvādekāśya manyanmahatsthānaṃ kedārābhidhamuttamam |tatrāpi liṅgamastyekaṃ kedāreśvaranāmakam || 1||

कुण्डमस्न्येकममलं तत्रैव विमलोदकम् ।सत्र स्नात्वा विधानेन केदारेशं प्रपूजयेत् ॥ २॥

kuṇḍamasnyekamamalaṃ tatraiva vimalodakam |satra snātvā vidhānena kedāreśaṃ prapūjayet || 2||

तत्रापि मुनयो भक्त्या कृत्वा मल्लिङ्गपूजनम ।तिष्ठन्ति कोटिशः शुद्धास्तपोध्यानपरायणाः ॥ ३॥

tatrāpi munayo bhaktyā kṛtvā malliṅgapūjanama |tiṣṭhanti koṭiśaḥ śuddhāstapodhyānaparāyaṇāḥ || 3||

तत्कुण्डस्नानमनिशं कर्तव्यं प्रीतिपूर्वकम् ।तिलैस्तु पितरो नित्यं तर्पणीयाः प्रयत्नतः ॥ ४॥

tatkuṇḍasnānamaniśaṃ kartavyaṃ prītipūrvakam |tilaistu pitaro nityaṃ tarpaṇīyāḥ prayatnataḥ || 4||

तत्कुण्डकुहरान्नित्यं सोत्साहं नागकन्यकाः ।मत्प्रियार्थं समायान्ति नानाभरणभूषिताः ॥ ५॥

tatkuṇḍakuharānnityaṃ sotsāhaṃ nāgakanyakāḥ |matpriyārthaṃ samāyānti nānābharaṇabhūṣitāḥ || 5||

सहस्रजिह्वः शेषोऽपि प्रत्यहं भक्तिपूर्वकम् ।सबन्धुस्तेन मार्गेण समायाति मदर्चकः ॥ ६॥

sahasrajihvaḥ śeṣo'pi pratyahaṃ bhaktipūrvakam |sabandhustena mārgeṇa samāyāti madarcakaḥ || 6||

कार्कोटकोऽपि तेनैव मार्गेणायाति सादरम् ।अन्येऽपि बहवो नागाः समायान्त्यनिशं मुदा ॥ ७॥

kārkoṭako'pi tenaiva mārgeṇāyāti sādaram |anye'pi bahavo nāgāḥ samāyāntyaniśaṃ mudā || 7||

तत्कुण्डद्वारि सततं तीक्ष्णशूलासिपाणयः ।साष्टकोटगणाधीशास्तिष्ठन्ति क्रूरविक्रमाः ॥ ८॥

tatkuṇḍadvāri satataṃ tīkṣṇaśūlāsipāṇayaḥ |sāṣṭakoṭagaṇādhīśāstiṣṭhanti krūravikramāḥ || 8||

तानग्रे पूर्जायत्वैव प्रसाद्य तदनन्तरम् ।नागलोकात्समायान्ति सर्वे शेषादयः सदा ॥ ९॥

tānagre pūrjāyatvaiva prasādya tadanantaram |nāgalokātsamāyānti sarve śeṣādayaḥ sadā || 9||

मामभ्यर्च्य यथाशास्त्रं कृत्वा चान्तर्गृहादिकम् ।कुर्वन्ति कालनाथस्य पूजनं भक्तिपूर्वकम् ॥ १०॥

māmabhyarcya yathāśāstraṃ kṛtvā cāntargṛhādikam |kurvanti kālanāthasya pūjanaṃ bhaktipūrvakam || 10||

नृत्यन्ति नाट्यनिपुणास्सर्वास्ता नागकन्यकाः ।कुर्वन्ति नागममलं नागशास्त्रानुरोधतः ॥ ११॥

nṛtyanti nāṭyanipuṇāssarvāstā nāgakanyakāḥ |kurvanti nāgamamalaṃ nāgaśāstrānurodhataḥ || 11||

नागचम्पकपुन्नागरत्नबिल्वादिमाधवैः ।मामभ्यर्च्य पुनर्यान्ति पुनरायान्ति यान्ति च ॥ १२॥

nāgacampakapunnāgaratnabilvādimādhavaiḥ |māmabhyarcya punaryānti punarāyānti yānti ca || 12||

तस्य केदारनाथस्य श्रावणे सोमवासरे ।पूजा कार्या विशेषेण साधनैर्विविधैः शुभैः ॥ १३॥

tasya kedāranāthasya śrāvaṇe somavāsare |pūjā kāryā viśeṣeṇa sādhanairvividhaiḥ śubhaiḥ || 13||

सोमवारव्रतं कार्यं प्रयत्नेन यथाविधि ।शक्तेनोपोषणं कार्यमन्यथा निशि भोजनम् ॥ १४॥

somavāravrataṃ kāryaṃ prayatnena yathāvidhi |śaktenopoṣaṇaṃ kāryamanyathā niśi bhojanam || 14||

तस्य दक्षिणदिग्भागे तिष्ठत्यर्कविनायकः ।तस्मिन्नेव दिने सोऽपि पूजनीयः प्रयत्नतः ॥ १५॥

tasya dakṣiṇadigbhāge tiṣṭhatyarkavināyakaḥ |tasminneva dine so'pi pūjanīyaḥ prayatnataḥ || 15||

सर्वविघ्ननिवृत्त्यर्थं पूर्वमर्केण सादरम् ।तपस्तप्तं महद्घोरमेकपादेन सादरम् ॥ १६॥

sarvavighnanivṛttyarthaṃ pūrvamarkeṇa sādaram |tapastaptaṃ mahadghoramekapādena sādaram || 16||

अर्केणैव कृतं कुण्डमेकं तिष्ठति निर्मलम् ।तत्तु रत्नौघखचितसोपानैस्तेन निर्मितम् ॥ १७॥

arkeṇaiva kṛtaṃ kuṇḍamekaṃ tiṣṭhati nirmalam |tattu ratnaughakhacitasopānaistena nirmitam || 17||

लोलार्केशाभिधं लिङ्गं तत्रास्ति सकलार्थदम् ।तत्पूजा विधिवत्कार्या भानुषष्ठि (?) दिने शुभे ॥ १८॥

lolārkeśābhidhaṃ liṅgaṃ tatrāsti sakalārthadam |tatpūjā vidhivatkāryā bhānuṣaṣṭhi (?) dine śubhe || 18||

तत्प्रान्ते सन्ति लिङ्गानि सर्वाभीष्टप्रदानि च ।तेषामपि यथायोग्यं पूजा कार्या प्रयत्नतः ॥ १९॥

tatprānte santi liṅgāni sarvābhīṣṭapradāni ca |teṣāmapi yathāyogyaṃ pūjā kāryā prayatnataḥ || 19||

सिद्धेश्वराभिषं लिङ्गं काश्यां तिष्ठति कामदम् ।तत्र पूजा विधानेन कर्तव्या प्रत्यहं जनैः ॥ २०॥

siddheśvarābhiṣaṃ liṅgaṃ kāśyāṃ tiṣṭhati kāmadam |tatra pūjā vidhānena kartavyā pratyahaṃ janaiḥ || 20||

तत्रैव पूज्याविमला तिष्ठत्यमललोचने ।सर्वदुर्गहरा नित्यं स्वभक्ताभयदायिनी ॥ २१॥

tatraiva pūjyāvimalā tiṣṭhatyamalalocane |sarvadurgaharā nityaṃ svabhaktābhayadāyinī || 21||

अश्विनी शुक्लपक्ष(आश्वयुक्च्छुक्लपक्ष)प्रतिपत्प्रभृति प्रिये ।नवमीदिनपर्यन्तं पूजा कार्या प्रयत्नतः ॥ २२॥

aśvinī śuklapakṣa(āśvayukcchuklapakṣa)pratipatprabhṛti priye |navamīdinaparyantaṃ pūjā kāryā prayatnataḥ || 22||

सा सर्वातिहरा देवि नित्यं काशीनिवासिनाम् ।पूजिता भक्तवरदा भवत्येव न संशयः ॥ २३॥

sā sarvātiharā devi nityaṃ kāśīnivāsinām |pūjitā bhaktavaradā bhavatyeva na saṃśayaḥ || 23||

अत्रैवामृतकुण्डाख्यं तीर्थमस्त्येकमुत्तमम् ।तत्र स्नानेन दुःखानि न भविष्यन्ति सर्वथा ॥ २४॥

atraivāmṛtakuṇḍākhyaṃ tīrthamastyekamuttamam |tatra snānena duḥkhāni na bhaviṣyanti sarvathā || 24||

कामाक्षीस्थानमनघमेकमस्ति वरानने ।तत्र कुण्डमभूद्दिव्यं तज्जलं चामृतोपमम् ॥ २५॥

kāmākṣīsthānamanaghamekamasti varānane |tatra kuṇḍamabhūddivyaṃ tajjalaṃ cāmṛtopamam || 25||

तत्रापि श्रावणे मासे प्रत्यहं विधिवज्जनैः ।पूजा कार्या विधानेन सर्वथा भौमवासरे ॥ २६॥

tatrāpi śrāvaṇe māse pratyahaṃ vidhivajjanaiḥ |pūjā kāryā vidhānena sarvathā bhaumavāsare || 26||

तत्रापि शिवलिङ्गानि सन्ति कोट्यवधि प्रिये ।कुण्डान्यपि मनोज्ञानि निर्मलानि भवन्ति हि ॥ २७॥

tatrāpi śivaliṅgāni santi koṭyavadhi priye |kuṇḍānyapi manojñāni nirmalāni bhavanti hi || 27||

तान्यपि श्रद्ध्या नित्यं पूजनीयानि यत्नतः ।निर्मलेषु च कुण्डेषु स्नानं कार्यं यथाविधि ॥ २८॥

tānyapi śraddhyā nityaṃ pūjanīyāni yatnataḥ |nirmaleṣu ca kuṇḍeṣu snānaṃ kāryaṃ yathāvidhi || 28||

आदिढुण्ढीश्वरो नाम गणेशस्तिष्ठति प्रिये ।सर्वविघ्नहरो नित्यं सर्वाभीष्टप्रदायकः ॥ २९॥

ādiḍhuṇḍhīśvaro nāma gaṇeśastiṣṭhati priye |sarvavighnaharo nityaṃ sarvābhīṣṭapradāyakaḥ || 29||

प्रतिशुक्लचतुर्थ्यां तु सदूर्वालड्डुकादिभिः ।पूजनीयः प्रयत्नेन काशी वासेप्सुभिर्नरैः ॥ ३०॥

pratiśuklacaturthyāṃ tu sadūrvālaḍḍukādibhiḥ |pūjanīyaḥ prayatnena kāśī vāsepsubhirnaraiḥ || 30||

कालेश्वराभिधं लिङ्गमेकमस्ति वरानने ।तत्पूजा सर्वथा कार्या प्रत्यहं विधिवज्जनैः ॥ ३१॥

kāleśvarābhidhaṃ liṅgamekamasti varānane |tatpūjā sarvathā kāryā pratyahaṃ vidhivajjanaiḥ || 31||

गोकर्णाभिधमस्त्येकं लिङ्गं पापौघनाशनम् ।तत्रापि कुण्डमस्त्येकं तत्र स्नानमघापहम् ॥ ३२॥

gokarṇābhidhamastyekaṃ liṅgaṃ pāpaughanāśanam |tatrāpi kuṇḍamastyekaṃ tatra snānamaghāpaham || 32||

शिवरात्रिदिने तत्र स्नानं कार्यं प्रयत्नतः ।तल्लिङ्गपूजनं चापि कर्तव्यं तद्दिने शुभे ॥ ३३॥

śivarātridine tatra snānaṃ kāryaṃ prayatnataḥ |talliṅgapūjanaṃ cāpi kartavyaṃ taddine śubhe || 33||

दिव्यलिङ्गान्यनन्तानि काश्यां तिष्ठन्ति सर्वथा ।तेषां प्रभावः केनापि वक्तुमेव न शक्यते ॥ ३४॥

divyaliṅgānyanantāni kāśyāṃ tiṣṭhanti sarvathā |teṣāṃ prabhāvaḥ kenāpi vaktumeva na śakyate || 34||

अग्रेऽपि मुनिभिर्दिव्यैर्भौंमैश्च कमलानने ।स्थापनीयानि लिङ्गानि काश्यामन्यैरपि ध्रुवम् ॥ ३५॥

agre'pi munibhirdivyairbhauṃmaiśca kamalānane |sthāpanīyāni liṅgāni kāśyāmanyairapi dhruvam || 35||

कुण्डान्यपि च कार्याणि तैरेव मुनिसत्तमैः ।तपश्चर्यां करिष्यन्ति तथैवात्र सदा शुभे ॥ ३६॥

kuṇḍānyapi ca kāryāṇi taireva munisattamaiḥ |tapaścaryāṃ kariṣyanti tathaivātra sadā śubhe || 36||

॥ इति शिवरहस्यान्तर्गते काशीस्थितान् शिवतीर्थक्षेत्रमाहात्म्यं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः १२ । १३६॥

|| iti śivarahasyāntargate kāśīsthitān śivatīrthakṣetramāhātmyaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 12 | 136||

– ॥ श्रीशिवरहस्यम् ।उग्राख्यः सप्तमांशः ।अध्यायः १२ ।१-३६॥

– || śrīśivarahasyam |ugrākhyaḥ saptamāṃśaḥ |adhyāyaḥ 12 | 1-36||