भैरवमाहात्म्यम् अथवा कालभैरवमाहात्म्यम् काश्याः Kashyah Bhairavamahatmyam Kalabhairavamahatmyam

शिवपार्वतीसंवादेअशैवं भैरवो वीक्ष्य दावानलसमप्रभः ॥ ४०३॥

śivapārvatīsaṃvādeaśaivaṃ bhairavo vīkṣya dāvānalasamaprabhaḥ || 403||

दहिष्यति न सन्देहस्तमशैवं दुरासदम् ।अशैवनाशनार्थाय काश्यां श्रीकालभैरवः ॥ ४०४॥

dahiṣyati na sandehastamaśaivaṃ durāsadam |aśaivanāśanārthāya kāśyāṃ śrīkālabhairavaḥ || 404||

स्थापितोऽस्ति मया देवि सुरगन्धर्वपूजितः ।दृश्यते भैरवः काश्यामशैवप्रलयानलः ॥ ४०५॥

sthāpito'sti mayā devi suragandharvapūjitaḥ |dṛśyate bhairavaḥ kāśyāmaśaivapralayānalaḥ || 405||

चतुर्दशेऽपि भुवने तत्तुल्यो नास्ति शासकः ।हन्त्यहं ब्रह्मविष्ण्वादीन् क्रोधसङ्कुलितेक्षणः ॥ ४०६॥

caturdaśe'pi bhuvane tattulyo nāsti śāsakaḥ |hantyahaṃ brahmaviṣṇvādīn krodhasaṅkulitekṣaṇaḥ || 406||

महाकालानलप्रख्यो दुराधर्षो ममाप्ययम् ।यातनास्तम्भनिकटे यदा शूलधरः स्थितः ॥ ४०७॥

mahākālānalaprakhyo durādharṣo mamāpyayam |yātanāstambhanikaṭe yadā śūladharaḥ sthitaḥ || 407||

तदा ममापि सुभगे दुर्निरीक्षो हि भैरवः ।एकोऽप्यनेकधा भूत्वा विश्वरूपोऽतिभीषणः ॥ ४०८॥

tadā mamāpi subhage durnirīkṣo hi bhairavaḥ |eko'pyanekadhā bhūtvā viśvarūpo'tibhīṣaṇaḥ || 408||

सञ्चरत्यस्त्रहस्तोऽयं यातनास्तम्भवीथिषु ।विग्रहं कालनाथस्य प्रज्वलद्भूधरा इव ॥ ४०९॥

sañcaratyastrahasto'yaṃ yātanāstambhavīthiṣu |vigrahaṃ kālanāthasya prajvaladbhūdharā iva || 409||

यातनास्तम्भपार्श्वेषु दृश्यन्ते भैरवाः शिवे ।अवापुर्भैरवं क्रुद्धं पुरा विष्णुपुरोगमाः ॥ ४१०॥

yātanāstambhapārśveṣu dṛśyante bhairavāḥ śive |avāpurbhairavaṃ kruddhaṃ purā viṣṇupurogamāḥ || 410||

ते तत्क्रोधानलहताः निपेतुर्भुवि मूर्च्छिताः ।ततस्ते युगपर्यन्तं पतिताः पुनरुत्थिताः ॥ ४११॥

te tatkrodhānalahatāḥ nipeturbhuvi mūrcchitāḥ |tataste yugaparyantaṃ patitāḥ punarutthitāḥ || 411||

शान्ते क्रोधानले नो चेद्यास्यन्ते तेऽपि भस्मताम् ।प्रत्याश्रमं प्रतिगृहं प्रविश्यायं तु भैरवः ॥ ४१२॥

śānte krodhānale no cedyāsyante te'pi bhasmatām |pratyāśramaṃ pratigṛhaṃ praviśyāyaṃ tu bhairavaḥ || 412||

अशैवान्पातयेत्प्राज्ञः शिवार्चनपराङ्मुखान् ।भस्मोद्धूलितरुद्राक्षधारणादिपराङ्मुखान् ॥ ४१३॥

aśaivānpātayetprājñaḥ śivārcanaparāṅmukhān |bhasmoddhūlitarudrākṣadhāraṇādiparāṅmukhān || 413||

लिङ्गपूजाविहीनांश्च दृष्ट्वा क्रुद्धो भवत्ययम् ।तत्क्रोधो विफलो नैव भविष्यति कदाचन ॥ ४१४॥

liṅgapūjāvihīnāṃśca dṛṣṭvā kruddho bhavatyayam |tatkrodho viphalo naiva bhaviṣyati kadācana || 414||

यस्मिन् क्रोधोऽस्य तं धोरे पातयत्यस्त्रमण्डले ।देवानामपि सर्वेषां शास्ता श्रीकालभैरवः ॥ ४१५॥

yasmin krodho'sya taṃ dhore pātayatyastramaṇḍale |devānāmapi sarveṣāṃ śāstā śrīkālabhairavaḥ || 415||

तदन्ये तृणभूतास्तु गन्धर्वा मुनयो नराः ।भैरवो भीमवेषोऽयं दुर्निरीक्ष्यः सुरैरपि ॥ ४१६॥

tadanye tṛṇabhūtāstu gandharvā munayo narāḥ |bhairavo bhīmaveṣo'yaṃ durnirīkṣyaḥ surairapi || 416||

यदा क्रोधसमाक्रान्तस्तदा द्रष्टुं न शक्यते ।अशैवशासकं क्रूरं प्राप्य श्रीकालभैरवम् ॥ ४१७॥

yadā krodhasamākrāntastadā draṣṭuṃ na śakyate |aśaivaśāsakaṃ krūraṃ prāpya śrīkālabhairavam || 417||

सुखेन संवसाम्यत्र काश्यां नित्यं वरानने ।यदा तु शैवधर्माणां सङ्क्षयः सम्भविष्यति ॥ ४१८॥

sukhena saṃvasāmyatra kāśyāṃ nityaṃ varānane |yadā tu śaivadharmāṇāṃ saṅkṣayaḥ sambhaviṣyati || 418||

अशैवानां तु दुष्टानां दुःखदो भैरवो भवेत् ।अशैवानां तदन्यस्तु शासको न भविष्यति ॥ ४१९॥

aśaivānāṃ tu duṣṭānāṃ duḥkhado bhairavo bhavet |aśaivānāṃ tadanyastu śāsako na bhaviṣyati || 419||

माहात्म्यं भैरवस्येदं समाख्यातं मया शिवे ।सर्वपापक्षयकरं पठतां शृण्वतामपि ॥ ४२०॥

māhātmyaṃ bhairavasyedaṃ samākhyātaṃ mayā śive |sarvapāpakṣayakaraṃ paṭhatāṃ śṛṇvatāmapi || 420||

येनेदं पठ्यते प्रातर्माहात्म्यं भैरवस्य तु ।न तस्य सर्वथा दुःखं स्वप्नेऽपि कमलानने ॥ ४२१॥

yenedaṃ paṭhyate prātarmāhātmyaṃ bhairavasya tu |na tasya sarvathā duḥkhaṃ svapne'pi kamalānane || 421||

इदं माहात्म्यममलमादित्याभिमुखो यदि ।पठति प्रीतिह्रदयो स न प्राप्नोति यातनाम् ॥ ४२२॥

idaṃ māhātmyamamalamādityābhimukho yadi |paṭhati prītihradayo sa na prāpnoti yātanām || 422||

बालग्रहादिरोगेषु रक्षाकरममुत्तमम् ।कुष्ठापस्माररोगादिविनाशकमपि प्रिये ॥ ४२३॥

bālagrahādirogeṣu rakṣākaramamuttamam |kuṣṭhāpasmārarogādivināśakamapi priye || 423||

भूर्जपत्रे लिखित्वेदं माहात्म्यं प्रत्यहं शिवे ।यः पूजयिष्यति प्राज्ञः स दुःखानि न पश्यति ॥ ४२४॥

bhūrjapatre likhitvedaṃ māhātmyaṃ pratyahaṃ śive |yaḥ pūjayiṣyati prājñaḥ sa duḥkhāni na paśyati || 424||

एतन्माहात्म्यमन्त्रैस्तु प्रत्यहं भैरवार्चकैः ।प्रीणनीयो भीमरूपो भैरवो भीमविक्रमः ॥ ४२५॥

etanmāhātmyamantraistu pratyahaṃ bhairavārcakaiḥ |prīṇanīyo bhīmarūpo bhairavo bhīmavikramaḥ || 425||

कालाष्टम्यां विशेषेण कालभैरवसन्निधौ ।तत्प्रादुर्भावमाहात्म्यं पठनीयं प्रयत्नतः ॥ ४२६॥

kālāṣṭamyāṃ viśeṣeṇa kālabhairavasannidhau |tatprādurbhāvamāhātmyaṃ paṭhanīyaṃ prayatnataḥ || 426||

शृण्वन् श्रीभैरवस्येमां प्रादुर्भावकथान्नरः ।भैरवाचरितः शैवो यातनां नैव पश्यति ॥ ४२७॥

śṛṇvan śrībhairavasyemāṃ prādurbhāvakathānnaraḥ |bhairavācaritaḥ śaivo yātanāṃ naiva paśyati || 427||

नित्यं भैरवमाहात्म्यं मन्त्रावर्तनपूर्वकम् ।प्रदक्षिणादिकं कार्यं श्रद्धया यातनापहम् ॥ ४२८॥

nityaṃ bhairavamāhātmyaṃ mantrāvartanapūrvakam |pradakṣiṇādikaṃ kāryaṃ śraddhayā yātanāpaham || 428||

श्री कालभैरवे भक्तिः सदा कार्या प्रयत्नतः ।पूजनीयोऽन्वहं पूज्यो देवानामपि शासकः ॥ ४२९॥

śrī kālabhairave bhaktiḥ sadā kāryā prayatnataḥ |pūjanīyo'nvahaṃ pūjyo devānāmapi śāsakaḥ || 429||

देवाश्च सर्वदा भीताः शासकं कालभैरवम् ।पूजयन्त्यतियत्नेन प्रत्यहं भीमविक्रमम् ॥ ४३०॥

devāśca sarvadā bhītāḥ śāsakaṃ kālabhairavam |pūjayantyatiyatnena pratyahaṃ bhīmavikramam || 430||

भैरवादुग्ररूपाद्धि नान्यः काश्यां प्रकाशकः (प्रशासकः) ।अशैवादपरः काश्यां शास्योऽपि न वरानने ॥ ४३१॥

bhairavādugrarūpāddhi nānyaḥ kāśyāṃ prakāśakaḥ (praśāsakaḥ) |aśaivādaparaḥ kāśyāṃ śāsyo'pi na varānane || 431||

अशैवं मृतमालोक्य काश्यां भैरवकिङ्कराः ।दीर्घतप्तायसैः शस्त्रैस्ताडयन्त्युरुविक्रमाः ॥ ४३२॥

aśaivaṃ mṛtamālokya kāśyāṃ bhairavakiṅkarāḥ |dīrghataptāyasaiḥ śastraistāḍayantyuruvikramāḥ || 432||

प्रलयानलसङ्काशो ज्वालामालासमावृतः ।कालभैरवकोपाग्निरशैवेन्धनदाहकः ॥ ४३३॥

pralayānalasaṅkāśo jvālāmālāsamāvṛtaḥ |kālabhairavakopāgniraśaivendhanadāhakaḥ || 433||

ततः काश्यां विशेषेण शिवैकपरदैवतैः ।शैवैः स्थातव्यमनिशमशैवैर्न कदाचन ॥ ४३४॥

tataḥ kāśyāṃ viśeṣeṇa śivaikaparadaivataiḥ |śaivaiḥ sthātavyamaniśamaśaivairna kadācana || 434||

कपाली कुण्डली भीमो भैरवो भीमविक्रमः ।व्यालोपवीती कवची शूली शूरः शिवप्रियः ॥ ४३५॥

kapālī kuṇḍalī bhīmo bhairavo bhīmavikramaḥ |vyālopavītī kavacī śūlī śūraḥ śivapriyaḥ || 435||

एतानि दशनामानि पठन् यः प्रणमेत्सदा ।शैवः शिवार्चकस्तस्य नास्ति भैरवयातना ॥ ४३६॥

etāni daśanāmāni paṭhan yaḥ praṇametsadā |śaivaḥ śivārcakastasya nāsti bhairavayātanā || 436||

॥ इति शिवरहस्यान्तर्गते काश्याः भैरवमाहात्म्यं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः ११ । ४०३\।२४३६॥– ॥ श्रीशिवरहस्यम् । उग्राख्यः सप्तमांशः । अध्यायः ११ । ४०३।२-४३६॥

|| iti śivarahasyāntargate kāśyāḥ bhairavamāhātmyaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 11 | 403\|2436||– || śrīśivarahasyam | ugrākhyaḥ saptamāṃśaḥ | adhyāyaḥ 11 | 403|2-436||