पाशुपतक्षेत्रमाहात्म्यम् Kashisthitam Pashupatakshetramahatmyam

शिवपार्वतीसंवादेश्रीसदाशिव उवाचकाश्यां पशुपतीशस्य स्थानमत्युत्तमं शुभे ।नित्यं सन्निहितस्तत्र निवसाम्यहमादरात् ॥ २॥

śivapārvatīsaṃvādeśrīsadāśiva uvācakāśyāṃ paśupatīśasya sthānamatyuttamaṃ śubhe |nityaṃ sannihitastatra nivasāmyahamādarāt || 2||

महापाशुपतैस्तत्र वसतिः क्रियते सदा ।शैवशास्त्रप्रणेतारः सन्ति तत्रैव कोटिशः ॥ ३॥

mahāpāśupataistatra vasatiḥ kriyate sadā |śaivaśāstrapraṇetāraḥ santi tatraiva koṭiśaḥ || 3||

भस्मदिग्धकराद्यङ्गाः त्रिपुण्ड्राङ्कितमस्तकाः ।रुद्राक्षमालाभरणाः दीर्घपिङ्गजटाधराः ॥ ४॥

bhasmadigdhakarādyaṅgāḥ tripuṇḍrāṅkitamastakāḥ |rudrākṣamālābharaṇāḥ dīrghapiṅgajaṭādharāḥ || 4||

अघोरमूर्तिमनिशं ध्यायन्ते मामजं शिवम् ।अघोरमन्त्रविन्यासजपनिष्ठा निराकुलाः ॥ ५॥

aghoramūrtimaniśaṃ dhyāyante māmajaṃ śivam |aghoramantravinyāsajapaniṣṭhā nirākulāḥ || 5||

निष्कलं निर्गुणं शान्तं शिवमक्षरमव्ययम् ।तुरीयमनघं मत्वा भजन्ति शिवमेव माम् ॥ ६॥

niṣkalaṃ nirguṇaṃ śāntaṃ śivamakṣaramavyayam |turīyamanaghaṃ matvā bhajanti śivameva mām || 6||

त्यक्त्वा पशुपतीशस्य स्थानमन्यत्र सर्वदा ।न गच्छन्त्येव नियताः शैवदीक्षापरायणाः ॥ ७॥

tyaktvā paśupatīśasya sthānamanyatra sarvadā |na gacchantyeva niyatāḥ śaivadīkṣāparāyaṇāḥ || 7||

नित्यं शिवकथास्वेव सक्तान्तःकरणा मुदा ।शिवनाम विहायान्यन्न वदन्त्येव सर्वदा ॥ ८॥

nityaṃ śivakathāsveva saktāntaḥkaraṇā mudā |śivanāma vihāyānyanna vadantyeva sarvadā || 8||

तत्र पाशुपतं नाम कुण्डमस्ति वरानने ।तत्काश्मीरमणिश्रेष्ठै रचितं निर्मलोदकम् ॥ ९॥

tatra pāśupataṃ nāma kuṇḍamasti varānane |tatkāśmīramaṇiśreṣṭhai racitaṃ nirmalodakam || 9||

तत्र कुर्वन्ति ये स्नानं भूयस्ते सर्वदा शुभे ।नारकीं यातनां प्राप्य न शोचन्ति कदाचन ॥ १०॥

tatra kurvanti ye snānaṃ bhūyaste sarvadā śubhe |nārakīṃ yātanāṃ prāpya na śocanti kadācana || 10||

तत्र स्नात्वा च पीत्वा च तज्जलं पापनाशकम् ।सुधार्मिका मणिच्छायासमाक्रान्तमहर्निशम् ॥ ११॥

tatra snātvā ca pītvā ca tajjalaṃ pāpanāśakam |sudhārmikā maṇicchāyāsamākrāntamaharniśam || 11||

स्पृष्ट्वाऽपि यान्ति मल्लोकं निर्धूताघा न संशयः ।पुनरावृत्तिरहितं सर्वाशास्यमनामयम् ॥ १२॥

spṛṣṭvā'pi yānti mallokaṃ nirdhūtāghā na saṃśayaḥ |punarāvṛttirahitaṃ sarvāśāsyamanāmayam || 12||

तस्मिन्नेवाभवत्कुण्डे मण्डूकः कश्चिदुत्तमः ।स शिवान्नान्यदस्तीति वदंस्तिष्ठति सर्वदा ॥ १३॥

tasminnevābhavatkuṇḍe maṇḍūkaḥ kaściduttamaḥ |sa śivānnānyadastīti vadaṃstiṣṭhati sarvadā || 13||

शिवभक्तशरीरं तु चरलिङ्गमतो मया ।शिवतुष्ट्यर्थमत्रैव पूजा कार्या विशेषतः ॥ २९॥

śivabhaktaśarīraṃ tu caraliṅgamato mayā |śivatuṣṭyarthamatraiva pūjā kāryā viśeṣataḥ || 29||

शिवभक्तशरीराख्ये चरलिङ्गे सदाशिवः ।नित्यं सन्निहितः साम्बो मोदते भक्तवत्सलः ॥ ३०॥

śivabhaktaśarīrākhye caraliṅge sadāśivaḥ |nityaṃ sannihitaḥ sāmbo modate bhaktavatsalaḥ || 30||

ततः शैवशरीराख्ये लिङ्गे दत्तं धनं प्रियम् ।गृह्णाति सादरं शम्भुर्भक्तदेहाश्रयः सदा ॥ ३१॥

tataḥ śaivaśarīrākhye liṅge dattaṃ dhanaṃ priyam |gṛhṇāti sādaraṃ śambhurbhaktadehāśrayaḥ sadā || 31||

धन्याः शैवजनाः सर्वे शिवनामैकजीवनाः ।यत्पूजया महादेवस्तुष्टो भवति सानुगः ॥ ३२॥

dhanyāḥ śaivajanāḥ sarve śivanāmaikajīvanāḥ |yatpūjayā mahādevastuṣṭo bhavati sānugaḥ || 32||

इतोऽप्यन्ये शिवरताः कीटास्तत्कुण्डवासिनः ।कालेन काश्यामनिशं वसन्तः शिवसम्मताः ॥ ७१॥

ito'pyanye śivaratāḥ kīṭāstatkuṇḍavāsinaḥ |kālena kāśyāmaniśaṃ vasantaḥ śivasammatāḥ || 71||

शैवं पदमवाप्यान्ते स्थास्यन्ति सुखिनः सदा ।धर्मसम्पादितेनैव काशीवसेन सर्वदा ॥ ७२॥

śaivaṃ padamavāpyānte sthāsyanti sukhinaḥ sadā |dharmasampāditenaiva kāśīvasena sarvadā || 72||

काशी पाशुपतं क्षेत्रं महापाशुपताश्रयम् ।सा पाशुपतवर्याणां मोक्षदा नावसंशयः ॥ ७३॥

kāśī pāśupataṃ kṣetraṃ mahāpāśupatāśrayam |sā pāśupatavaryāṇāṃ mokṣadā nāvasaṃśayaḥ || 73||

शैवाः पाशुपताः शुद्धा यत्र तिष्ठन्ति सर्वदा ।लिङ्गार्चनावृ(नव्र)ताधीशास्तत्रैव निवसाम्यहम् ॥ ७४॥

śaivāḥ pāśupatāḥ śuddhā yatra tiṣṭhanti sarvadā |liṅgārcanāvṛ(navra)tādhīśāstatraiva nivasāmyaham || 74||

मन्नाम जपसंसक्ता मल्लिङ्गार्चनतत्पराः ।यत्रक्वचन तिष्ठन्ति तत्रसन्निहितोऽस्म्यहम् ॥ ७५॥

mannāma japasaṃsaktā malliṅgārcanatatparāḥ |yatrakvacana tiṣṭhanti tatrasannihito'smyaham || 75||

शम्भो शङ्कर विश्वेशेत्यनिशं यत्र नृत्यति ।शैवःशिवरतस्तत्र निवसामि वरानने ॥ ७६॥

śambho śaṅkara viśveśetyaniśaṃ yatra nṛtyati |śaivaḥśivaratastatra nivasāmi varānane || 76||

यत्र पाशुपता धर्माः शिवधर्माश्च सन्ततम् ।वसन्ति तत्र सततं निवसाम्यहमादरात् ॥ ७७॥

yatra pāśupatā dharmāḥ śivadharmāśca santatam |vasanti tatra satataṃ nivasāmyahamādarāt || 77||

महापाशुपतं शैवं महाशैवं शिवप्रियम् ।दृष्ट्वा पूजां यथाशक्ति कर्तव्या सर्वथा जनैः ॥ ७८॥

mahāpāśupataṃ śaivaṃ mahāśaivaṃ śivapriyam |dṛṣṭvā pūjāṃ yathāśakti kartavyā sarvathā janaiḥ || 78||

शैवानपूजयित्वैव यो गच्छत्यभिमानतः ।स याति नरकं घोरं सत्यमेवोच्यते मया ॥ ७९॥

śaivānapūjayitvaiva yo gacchatyabhimānataḥ |sa yāti narakaṃ ghoraṃ satyamevocyate mayā || 79||

शिवदीक्षापरैः(रः)शैवः अशैवेभ्यः कदाचन ।नमस्कारो न कर्तव्यो यतः शैवा जनोत्तमाः ॥ ८०॥

śivadīkṣāparaiḥ(raḥ)śaivaḥ aśaivebhyaḥ kadācana |namaskāro na kartavyo yataḥ śaivā janottamāḥ || 80||

शैवैरन्योन्यपूजा तु कर्तव्या विधिवत्सदा ।अन्योन्यं पूजकाः पूज्यास्ते भवन्त्यनघाः शुभे ॥ ८१॥

śaivairanyonyapūjā tu kartavyā vidhivatsadā |anyonyaṃ pūjakāḥ pūjyāste bhavantyanaghāḥ śubhe || 81||

न काशीसदृशं क्षेत्रं न शङ्करसमः सुरः ।न शैवसदृशो विप्रो न मत्तोऽन्योऽपि मोक्षदः ॥ ८२॥

na kāśīsadṛśaṃ kṣetraṃ na śaṅkarasamaḥ suraḥ |na śaivasadṛśo vipro na matto'nyo'pi mokṣadaḥ || 82||

श्रीमत्पशुपतीशस्य सन्निधौ पत्रिणोऽपि माम् ।ज्ञात्वा शिव शिवेत्येवं वदन्त्यनिशमादरात् ॥ ८३॥

śrīmatpaśupatīśasya sannidhau patriṇo'pi mām |jñātvā śiva śivetyevaṃ vadantyaniśamādarāt || 83||

धन्यं पाशुपतं स्थानं धन्याः पाशुपता जनाः ।धन्याः पशुपतीशस्य पूजकाः सर्वदा मुदा ॥ ८४॥

dhanyaṃ pāśupataṃ sthānaṃ dhanyāḥ pāśupatā janāḥ |dhanyāḥ paśupatīśasya pūjakāḥ sarvadā mudā || 84||

यस्मिन्पाशुपतस्थाने वसतां पत्रिणामपि ।शिवतत्त्वमतिः शुद्धा वर्तते बुद्धिदुर्लभा ॥ ८५॥

yasminpāśupatasthāne vasatāṃ patriṇāmapi |śivatattvamatiḥ śuddhā vartate buddhidurlabhā || 85||

काश्यां पशुपतीशस्य सन्निधाने स्थितिः सदा ।पूर्वोक्तधर्मनिरतैः कर्तव्या यत्नतः शुभे ॥ ८६॥

kāśyāṃ paśupatīśasya sannidhāne sthitiḥ sadā |pūrvoktadharmanirataiḥ kartavyā yatnataḥ śubhe || 86||

निराहारव्रतैः शुद्वैर्महाशैवैः शिवार्चकैः ।स्थेयं पशुपतीशस्य क्षेत्रे यत्नेन सर्वदा ॥ ८७॥

nirāhāravrataiḥ śudvairmahāśaivaiḥ śivārcakaiḥ |stheyaṃ paśupatīśasya kṣetre yatnena sarvadā || 87||

तत्र जप्तो महामन्त्रः शैव शीघ्रफलप्रदः ।भवत्येव न सन्देहो जपनीयः प्रयत्नतः ॥ ८८॥

tatra japto mahāmantraḥ śaiva śīghraphalapradaḥ |bhavatyeva na sandeho japanīyaḥ prayatnataḥ || 88||

शैवदीक्षां(क्षा) शुभां(भा)तत्र शैवेभ्यो दीयते मया ।ततः पञ्चाक्षरो मन्त्रस्तत्र जप्यो निरन्तरम् ॥ ८९॥

śaivadīkṣāṃ(kṣā) śubhāṃ(bhā)tatra śaivebhyo dīyate mayā |tataḥ pañcākṣaro mantrastatra japyo nirantaram || 89||

॥ इति शिवरहस्यान्तर्गते काशीस्थितं पाशुपतक्षेत्रमाहात्म्यं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः १० । वावृत्तश्लोकाः ॥– ॥ श्रीशिवरहस्यम् । उग्राख्यः सप्तमांशः । अध्यायः १० । वावृत्तश्लोकाः ॥

|| iti śivarahasyāntargate kāśīsthitaṃ pāśupatakṣetramāhātmyaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 10 | vāvṛttaślokāḥ ||– || śrīśivarahasyam | ugrākhyaḥ saptamāṃśaḥ | adhyāyaḥ 10 | vāvṛttaślokāḥ ||