शिवस्तोत्रम् (कल्किकृतम्) Kalkikritam Shivastotram

श्रीगणेशाय नमः ।गौरीनाथं विश्वनाथं शरण्यं भूतावासं वासुकीकण्ठभूषम् ।त्र्यक्षं पञ्चास्यादिदेवं पुराणं वन्दे सान्द्रानन्दसन्दोहदक्षम् ॥ १॥योगाधीशं कामनाशं करालं गङ्गासङ्गक्लिन्नमूर्धानमीशम् ।जटाजूटाटोपरिक्षिप्तभावं महाकालं चन्द्रभालं नमामि ॥ २॥श्मशानस्थं भूतवेतालसङ्गं नानाशस्त्रैः सङ्गशूलादिभिश्च ।व्यग्रात्युग्रा बाहवो लोकनाशे यस्य क्रोधोद्भूतलोकोऽस्तमेति ॥ ३॥यो भूतादिः पञ्चभूतैः सिसृक्षुस्तन्मात्रात्मा कालकर्मस्वभावैः ।प्रहृत्येदं प्राप्य जीवत्वमीशो ब्रह्मानन्दे क्रीडते तं नमामि ॥ ४॥स्थितौ विष्णुः सर्वजिष्णुः सुरात्मा लोकान्साधून् धर्मसेतून्बिभर्ति ।ब्रह्माद्यंशे योऽभिमानी गुणात्मा शब्दाद्यङ्गैस्तं परेशं नमामि ॥ ५॥यस्याज्ञया वायवो वान्ति लोके ज्वलत्यग्निः सविता याति तप्यन् ।शीतांशुः खे तारकासंग्रहश्च प्रवर्तन्ते तं परेशं प्रपद्ये ॥ ६॥यस्य श्वासात्सर्वधात्री धरित्री देवो वर्षत्यम्बुकालः प्रमाता ।मेरुर्मध्ये भूवनानां च भर्ता तमीशानं विश्वरूपं नमामि ॥ ७॥इति श्रीकल्किपुराणे कल्किकृतं शिवस्तोत्रं सम्पूर्णम् ।

śrīgaṇeśāya namaḥ |gaurīnāthaṃ viśvanāthaṃ śaraṇyaṃ bhūtāvāsaṃ vāsukīkaṇṭhabhūṣam |tryakṣaṃ pañcāsyādidevaṃ purāṇaṃ vande sāndrānandasandohadakṣam || 1||yogādhīśaṃ kāmanāśaṃ karālaṃ gaṅgāsaṅgaklinnamūrdhānamīśam |jaṭājūṭāṭoparikṣiptabhāvaṃ mahākālaṃ candrabhālaṃ namāmi || 2||śmaśānasthaṃ bhūtavetālasaṅgaṃ nānāśastraiḥ saṅgaśūlādibhiśca |vyagrātyugrā bāhavo lokanāśe yasya krodhodbhūtaloko'stameti || 3||yo bhūtādiḥ pañcabhūtaiḥ sisṛkṣustanmātrātmā kālakarmasvabhāvaiḥ |prahṛtyedaṃ prāpya jīvatvamīśo brahmānande krīḍate taṃ namāmi || 4||sthitau viṣṇuḥ sarvajiṣṇuḥ surātmā lokānsādhūn dharmasetūnbibharti |brahmādyaṃśe yo'bhimānī guṇātmā śabdādyaṅgaistaṃ pareśaṃ namāmi || 5||yasyājñayā vāyavo vānti loke jvalatyagniḥ savitā yāti tapyan |śītāṃśuḥ khe tārakāsaṃgrahaśca pravartante taṃ pareśaṃ prapadye || 6||yasya śvāsātsarvadhātrī dharitrī devo varṣatyambukālaḥ pramātā |merurmadhye bhūvanānāṃ ca bhartā tamīśānaṃ viśvarūpaṃ namāmi || 7||iti śrīkalkipurāṇe kalkikṛtaṃ śivastotraṃ sampūrṇam |