कालमृत्युजयस्तोत्रम् Kalamrityujaya Stotram

श्रीनारायणीश्रीरुवाच ।नारायण जगत्कान्त सर्वरक्षक सर्वग ।कथं त्रिकालजं मृत्युं जयति मानवो भुवि ॥ १॥

śrīnārāyaṇīśrīruvāca |nārāyaṇa jagatkānta sarvarakṣaka sarvaga |kathaṃ trikālajaṃ mṛtyuṃ jayati mānavo bhuvi || 1||

मृत्युरनिपरावृत्तो बलवान् केन वार्यते ।केन रूपेण वा मृत्युर्मानवान् परिधावति ॥ २॥

mṛtyuraniparāvṛtto balavān kena vāryate |kena rūpeṇa vā mṛtyurmānavān paridhāvati || 2||

श्रीपुरुषोत्तम उवाच ।शृणु श्रीशिवराज्ञीश्रि नारायणि रमेऽपि च ।लक्ष्मि समुद्रजे चापि शृणु चाक्षरमाणिकि ॥ ३॥

śrīpuruṣottama uvāca |śṛṇu śrīśivarājñīśri nārāyaṇi rame'pi ca |lakṣmi samudraje cāpi śṛṇu cākṣaramāṇiki || 3||

गरुडो मम भक्तो वै समासीनोऽभवद्गृहे ।जपन् मालां मम ध्यायन् मन्मूर्तिं दिव्यरूपिणीम् ॥ ४॥

garuḍo mama bhakto vai samāsīno'bhavadgṛhe |japan mālāṃ mama dhyāyan manmūrtiṃ divyarūpiṇīm || 4||

पृष्टस्तदा जनकेन कश्यपेन सुतो निजः ।कथं पुत्र महाभक्त योगिन् मृत्युर्निवर्तते ॥ ५॥

pṛṣṭastadā janakena kaśyapena suto nijaḥ |kathaṃ putra mahābhakta yogin mṛtyurnivartate || 5||

केन रूपेण मृत्युर्वै समायाति हरत्यपि ।कथं निःस्पर्शनं तस्य देहिनस्त्विह चर्यते ॥ ६॥

kena rūpeṇa mṛtyurvai samāyāti haratyapi |kathaṃ niḥsparśanaṃ tasya dehinastviha caryate || 6||

श्रुत्वा पक्षी च पितरं समुवाच वदामि तत् ।भक्त्या निवर्तते मृत्युराश्रयात्परमात्मनः ॥ ७॥

śrutvā pakṣī ca pitaraṃ samuvāca vadāmi tat |bhaktyā nivartate mṛtyurāśrayātparamātmanaḥ || 7||

दण्डी शस्त्रधरो भिक्षुर्नग्नादिः कालदूतकः ।समायाति वर्ष्म धृत्वा तद्दंशेन न जीवति ॥ ८॥

daṇḍī śastradharo bhikṣurnagnādiḥ kāladūtakaḥ |samāyāti varṣma dhṛtvā taddaṃśena na jīvati || 8||

चितावल्मीकशैलादौ कूपे च विवरे तरोः ।दंशे दंष्ट्रात्रयं लग्नं दष्टो देही न जीवति ॥ ९॥

citāvalmīkaśailādau kūpe ca vivare taroḥ |daṃśe daṃṣṭrātrayaṃ lagnaṃ daṣṭo dehī na jīvati || 9||

षष्ठ्यां च कर्कटे मेषे मूलाऽऽश्लेषामघादिषु ।कक्षाश्रोणिगले सन्धौ शङ्खकर्णोदरादिषु ॥ १०॥

ṣaṣṭhyāṃ ca karkaṭe meṣe mūlā''śleṣāmaghādiṣu |kakṣāśroṇigale sandhau śaṅkhakarṇodarādiṣu || 10||

वक्त्रे बाहौ च ग्रीवायां पृष्ठे दष्टो न श्रीपति ।शेषोऽर्कः फणिपश्चन्द्रस्तक्षको भौम ईरितः ॥ ११॥

vaktre bāhau ca grīvāyāṃ pṛṣṭhe daṣṭo na śrīpati |śeṣo'rkaḥ phaṇipaścandrastakṣako bhauma īritaḥ || 11||

कर्कोटो ज्ञो गुरुः पद्मो महापद्मस्तु भार्गवः ।शङ्खः शनैश्चरो राहुः कुलिकश्चेति ते ग्रहाः ॥ १२॥

karkoṭo jño guruḥ padmo mahāpadmastu bhārgavaḥ |śaṅkhaḥ śanaiścaro rāhuḥ kulikaśceti te grahāḥ || 12||

तत्तद्ग्रहेषु तज्जातिसर्पदष्टो न जीवति ।पादांऽगुष्ठः प्रतिपदः स्यात् पादपृष्ठौ द्वितीयका ॥ १३॥

tattadgraheṣu tajjātisarpadaṣṭo na jīvati |pādāṃ'guṣṭhaḥ pratipadaḥ syāt pādapṛṣṭhau dvitīyakā || 13||

गुल्फौ नु वै तृतीया स्याज्जानुनी च चतुर्थिका ।लिङ्गं भगं पञ्चमीति नाभिः षष्ठीस्तिथिर्मता ॥ १४॥

gulphau nu vai tṛtīyā syājjānunī ca caturthikā |liṅgaṃ bhagaṃ pañcamīti nābhiḥ ṣaṣṭhīstithirmatā || 14||

हृदयं सप्तमी प्रोक्ता स्तनौ चाष्टमिकादिनम् ।कण्ठस्तु नवमी प्रोक्ता दशमी नासिकापुटौ ॥ १५॥

hṛdayaṃ saptamī proktā stanau cāṣṭamikādinam |kaṇṭhastu navamī proktā daśamī nāsikāpuṭau || 15||

नेत्रे चैकादशी बोध्या कर्णौ द्वादशिका मता ।भ्रुवौ त्रयोदशीरूपे शङ्खश्चतुर्दशी मता ॥ १६॥

netre caikādaśī bodhyā karṇau dvādaśikā matā |bhruvau trayodaśīrūpe śaṅkhaścaturdaśī matā || 16||

मस्तकं पञ्चदशिका तत्तिथौ तत्स्थले दशेत् ।तदा कालकवलेन दष्टो देही न जीवति ॥ १७॥

mastakaṃ pañcadaśikā tattithau tatsthale daśet |tadā kālakavalena daṣṭo dehī na jīvati || 17||

पुंसो दक्षिणभागे तु नार्या वामे त्विदं मतम् ।एतादृशक्षणे दष्टा न जीवन्ति कदाचन ॥ १८॥

puṃso dakṣiṇabhāge tu nāryā vāme tvidaṃ matam |etādṛśakṣaṇe daṣṭā na jīvanti kadācana || 18||

किन्तु ॐ गरुड स्वाहा जपेल्लक्षप्रवर्तनम् ।जपन् स्पृशेत्पदाङ्गुष्ठे तले पृष्ठे च गुल्फके ॥ १९॥

kintu oṃ garuḍa svāhā japellakṣapravartanam |japan spṛśetpadāṅguṣṭhe tale pṛṣṭhe ca gulphake || 19||

जङ्घायां जानुभागे च सक्थ्नोलिङ्गे भगे कटौ ।जघने नाभिदेशे च नितम्बे चोदरे हृदि ॥ २०॥

jaṅghāyāṃ jānubhāge ca sakthnoliṅge bhage kaṭau |jaghane nābhideśe ca nitambe codare hṛdi || 20||

स्तनयोः पार्श्वदेशे च बाह्वोश्च करयोस्तले ।अङ्गुलिषु कफोणे च कण्ठे गले कृकाटके ॥ २१॥

stanayoḥ pārśvadeśe ca bāhvośca karayostale |aṅguliṣu kaphoṇe ca kaṇṭhe gale kṛkāṭake || 21||

हनौ मुखे गण्डके च नासायां च कपोलके ।कर्णयोः कर्णपृष्ठे च ललाटे नेत्रयोर्भ्रुवोः ॥ २२॥

hanau mukhe gaṇḍake ca nāsāyāṃ ca kapolake |karṇayoḥ karṇapṛṣṭhe ca lalāṭe netrayorbhruvoḥ || 22||

कपाले मस्तके चापि शिखायां विन्यसेन्मुहुः ।स एव गरुडो देही जायते मन्त्रमन्त्रणात् ॥ २३॥

kapāle mastake cāpi śikhāyāṃ vinyasenmuhuḥ |sa eva garuḍo dehī jāyate mantramantraṇāt || 23||

नाक्रमन्ति च तच्छायां स्वप्नेऽपि विषपन्नगाः ।कालरूपाश्चापि सर्पास्तद्भयाद्विद्रवन्ति वै ॥ २४॥

nākramanti ca tacchāyāṃ svapne'pi viṣapannagāḥ |kālarūpāścāpi sarpāstadbhayādvidravanti vai || 24||

विषं मन्त्रस्य विन्यासात् सर्वं नश्यति लीयते ।ॐ शेषेश्वर नागिनीपते गरुडपृष्ठग ॥ २५॥

viṣaṃ mantrasya vinyāsāt sarvaṃ naśyati līyate |oṃ śeṣeśvara nāginīpate garuḍapṛṣṭhaga || 25||

आस्तीकवाक्फलद श्रीहरे विषिविषं हर ।इतिमन्त्रं लक्षवारं जपेत् सिद्धो भवेत्ततः ॥ २६॥

āstīkavākphalada śrīhare viṣiviṣaṃ hara |itimantraṃ lakṣavāraṃ japet siddho bhavettataḥ || 26||

प्रयुञ्जीत महाकालोऽप्यपि दूरायते भयात् ।ममाऽनादिकृष्णनारायणनामजपात्तदा ॥ २७॥

prayuñjīta mahākālo'pyapi dūrāyate bhayāt |mamā'nādikṛṣṇanārāyaṇanāmajapāttadā || 27||

महाकालोऽपि संयाति विप्रकृष्टो भयान्मम ।जीवाऽयोग्योऽपि देह्यत्र जीवत्येव न संशयः ॥ २८॥

mahākālo'pi saṃyāti viprakṛṣṭo bhayānmama |jīvā'yogyo'pi dehyatra jīvatyeva na saṃśayaḥ || 28||

श्रीधरस्याऽर्चनं कुर्यात् परिवारान्वितस्य मे ।ध्यात्वाऽऽत्मानं श्रीधराख्यं शङ्खचक्रगदाधरम् ॥ २९॥

śrīdharasyā'rcanaṃ kuryāt parivārānvitasya me |dhyātvā''tmānaṃ śrīdharākhyaṃ śaṅkhacakragadādharam || 29||

ॐ श्रीमते पुरुषोत्तमाय नमः परात्मने ।अक्षराय नमश्चेति माणिक्यायै नमो नमः ॥ ३०॥

oṃ śrīmate puruṣottamāya namaḥ parātmane |akṣarāya namaśceti māṇikyāyai namo namaḥ || 30||

पद्मावत्यै जयायै च ललितायै नमो नमः ।सुखदायै च प्रज्ञायै लक्ष्म्यै चापि नमो नमः ॥ ३१॥

padmāvatyai jayāyai ca lalitāyai namo namaḥ |sukhadāyai ca prajñāyai lakṣmyai cāpi namo namaḥ || 31||

राधिकायै क्रियायै च ज्ञानायै च नमो नमः ।इच्छायै कमलायै च महालक्ष्म्यै नमो नमः ॥ ३२॥

rādhikāyai kriyāyai ca jñānāyai ca namo namaḥ |icchāyai kamalāyai ca mahālakṣmyai namo namaḥ || 32||

ॐ ह्रीं श्रीधरायापि विष्णवे मे नमो नमः ।अभिषेकं तथा वस्त्रं ततो यज्ञोपवीतकम् ॥ ३३॥

oṃ hrīṃ śrīdharāyāpi viṣṇave me namo namaḥ |abhiṣekaṃ tathā vastraṃ tato yajñopavītakam || 33||

गन्धं पुष्पं तथा धूपं दीपमन्नं प्रदक्षिणम् ।दद्याज्जपेन्मनुं मे च ध्यायेन्मां च हृदि स्थितम् ॥ ३४॥

gandhaṃ puṣpaṃ tathā dhūpaṃ dīpamannaṃ pradakṣiṇam |dadyājjapenmanuṃ me ca dhyāyenmāṃ ca hṛdi sthitam || 34||

शुद्धस्फटिकसङ्काशं कोटिसूर्यसमप्रभम् ।प्रसन्नवदनं सौम्यं स्फुरन्मुकुटकुण्डलम् ॥ ३५॥

śuddhasphaṭikasaṅkāśaṃ koṭisūryasamaprabham |prasannavadanaṃ saumyaṃ sphuranmukuṭakuṇḍalam || 35||

किरीटिनमुदाराङ्गं वनमालाविभूषितम् ।परब्रह्मस्वरूपं मे चिन्तयेच्छोभनं परम् ॥ ३६॥

kirīṭinamudārāṅgaṃ vanamālāvibhūṣitam |parabrahmasvarūpaṃ me cintayecchobhanaṃ param || 36||

श्रीनिवासाय कृष्णाय नमः श्रीपतये नमः ।श्रीधराय सशार्ङ्गाय श्रीप्रदाय नमो नमः ॥ ३७॥

śrīnivāsāya kṛṣṇāya namaḥ śrīpataye namaḥ |śrīdharāya saśārṅgāya śrīpradāya namo namaḥ || 37||

श्रीवल्लभाय शान्ताय श्रीमते ते नमो नमः ।श्रीपर्वतनिवासाय नमः श्रेयस्कराय च ॥ ३८॥

śrīvallabhāya śāntāya śrīmate te namo namaḥ |śrīparvatanivāsāya namaḥ śreyaskarāya ca || 38||

श्रेयसाम्पतये चापि श्रीविश्रामाय ते नमः ।नमः श्रेयःस्वरूपाय श्रीकराय नमो नमः ॥ ३९॥

śreyasāmpataye cāpi śrīviśrāmāya te namaḥ |namaḥ śreyaḥsvarūpāya śrīkarāya namo namaḥ || 39||

श्रिया साकं शयानाय शरण्याय नमो नमः ।पुष्पाञ्जलिं ततो दत्वा श्रीश्वरं वै विसर्जयेत् ॥ ४०॥

śriyā sākaṃ śayānāya śaraṇyāya namo namaḥ |puṣpāñjaliṃ tato datvā śrīśvaraṃ vai visarjayet || 40||

एवं पूजाप्रकर्ता च निर्विषो जायते ध्रुवम् ।स विधूयेत पापानि मे प्रयाति परं पदम् ॥ ४१॥

evaṃ pūjāprakartā ca nirviṣo jāyate dhruvam |sa vidhūyeta pāpāni me prayāti paraṃ padam || 41||

ॐ श्रीं ह्रीं श्रीधराय श्रीविष्णवे जिष्णवे नमः ।सर्वव्याधिहरश्चायं सर्वपीडाहरो मनुः ॥ ४२॥

oṃ śrīṃ hrīṃ śrīdharāya śrīviṣṇave jiṣṇave namaḥ |sarvavyādhiharaścāyaṃ sarvapīḍāharo manuḥ || 42||

सर्वपापहरश्चापि भुक्तिमुक्तिप्रदायकः ।सर्वगरलसंहर्ता ह्यभिचारविनाशकः ॥ ४३॥

sarvapāpaharaścāpi bhuktimuktipradāyakaḥ |sarvagaralasaṃhartā hyabhicāravināśakaḥ || 43||

सर्वेष्टपूरकश्चापि मम धामप्रदोऽपि च ।मत्स्वरूपः स्वयं भूत्वा जपेज्जीवेन्न संशयः ॥ ४४॥

sarveṣṭapūrakaścāpi mama dhāmaprado'pi ca |matsvarūpaḥ svayaṃ bhūtvā japejjīvenna saṃśayaḥ || 44||

यन्मासे यदृतौ यश्च सूर्येण सह भोगवान् ।सर्पोऽपि वर्तते तस्य नाम्ना शपथमादिशेत् ॥ ४५॥

yanmāse yadṛtau yaśca sūryeṇa saha bhogavān |sarpo'pi vartate tasya nāmnā śapathamādiśet || 45||

तेन सर्पविषं तूर्णं शाम्यत्येव न संशयः ।इति श्रीलक्ष्मीनारायणीयसंहितायाः द्वापरयुगसन्तानात्मकस्यतृतीयखण्डे१४३अध्यायान्तर्गतं कालमृत्युजयस्तोत्रं सम्पूर्णम् ।लक्ष्मीनारायणीयसंहिता । खण्ड ३। अध्याय १४२/१४५॥लक्ष्मीनारायणीयसंहिता । खण्ड ३। अध्याय १४२/१-४५॥

tena sarpaviṣaṃ tūrṇaṃ śāmyatyeva na saṃśayaḥ |iti śrīlakṣmīnārāyaṇīyasaṃhitāyāḥ dvāparayugasantānātmakasyatṛtīyakhaṇḍe143adhyāyāntargataṃ kālamṛtyujayastotraṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 142/145||lakṣmīnārāyaṇīyasaṃhitā | khaṇḍa 3| adhyāya 142/1-45||