गोकर्णमहालिङ्गेव प्रदोषपूजाकैङ्कर्यवर्णनम् Gokarnamahalinge Vasumanonripanushthita Pradoshapujakainkarya Varnanam

(शिवगौरीसंवादे)ईश्वरःपुरा वसुमना नाम राजासीदतिधार्मिकः ॥ ५८॥

(śivagaurīsaṃvāde)īśvaraḥpurā vasumanā nāma rājāsīdatidhārmikaḥ || 58||

विदर्भविषये देवि स कैङ्कर्यपरो मम ।नानाप्रकारशोभाढ्यैर्भूधराकारगोपुरैः ॥ ५९॥

vidarbhaviṣaye devi sa kaiṅkaryaparo mama |nānāprakāraśobhāḍhyairbhūdharākāragopuraiḥ || 59||

प्राकारराजद्वृषभैर्धूयमानपताककैः ।नवरत्नचितानेकमण्डपैः शोभितं नृपः ॥ ६०॥

prākārarājadvṛṣabhairdhūyamānapatākakaiḥ |navaratnacitānekamaṇḍapaiḥ śobhitaṃ nṛpaḥ || 60||

वाहनैश्चैव देवेशि रथैश्च शतचक्रकैः ।मदागारपरो राजा मुक्त्यगाराधिनायकः ॥ ६१॥

vāhanaiścaiva deveśi rathaiśca śatacakrakaiḥ |madāgāraparo rājā muktyagārādhināyakaḥ || 61||

छत्रचामरजालैश्च स्वर्णशय्यादिभाजनैः ।क्षौमाम्बरैः स्वर्णक्लृप्तैः भूषणैर्मणिकल्पितैः ॥ ६२॥

chatracāmarajālaiśca svarṇaśayyādibhājanaiḥ |kṣaumāmbaraiḥ svarṇaklṛptaiḥ bhūṣaṇairmaṇikalpitaiḥ || 62||

कारयामास नृपतिर्गोलकं रत्ननिर्मितम् ।धूपैर्दीपैश्च नैवेद्यैः स्नापनीयैरहर्निशम् ॥ ६३॥

kārayāmāsa nṛpatirgolakaṃ ratnanirmitam |dhūpairdīpaiśca naivedyaiḥ snāpanīyairaharniśam || 63||

सलक्षगोघृतापारदीपैर्दीपयदम्बिके ।ताम्बूलपर्वतांश्चापि दत्तवान्मत्कृपाप्तये ॥ ६४॥

salakṣagoghṛtāpāradīpairdīpayadambike |tāmbūlaparvatāṃścāpi dattavānmatkṛpāptaye || 64||

कर्पूरखण्डैः शतशो दीपयामास मां शिवे ।छत्रचामरकोटीभिर्व्यजनादर्शकैरपि ॥ ६५॥

karpūrakhaṇḍaiḥ śataśo dīpayāmāsa māṃ śive |chatracāmarakoṭībhirvyajanādarśakairapi || 65||

नानावाद्यरवैर्देवि पूरयामास मद्गृहम् ।नाट्याङ्गनास्तदा तेन कल्पिताः सुमनोहराः ॥ ६६॥

nānāvādyaravairdevi pūrayāmāsa madgṛham |nāṭyāṅganāstadā tena kalpitāḥ sumanoharāḥ || 66||

सहस्रं कम्बुकण्ठ्यस्ताः पीनश्रोणिपयोधराः ।शैवान्सम्भोजयामास शिवनैवेद्यराशिभिः ॥ ६७॥

sahasraṃ kambukaṇṭhyastāḥ pīnaśroṇipayodharāḥ |śaivānsambhojayāmāsa śivanaivedyarāśibhiḥ || 67||

प्रफुल्लपुष्पारामं च मत्पूजार्थं प्रकल्पयत् ।सोमवारप्रदोषेषु चतुर्दश्यष्टमीषु च ॥ ६८॥

praphullapuṣpārāmaṃ ca matpūjārthaṃ prakalpayat |somavārapradoṣeṣu caturdaśyaṣṭamīṣu ca || 68||

शिवरात्रिषु देवेशि पर्वस्वपि विशेषतः ।पूजयत्येव भूपालो नित्याद्दशगुणं शिवे ॥ ६९॥

śivarātriṣu deveśi parvasvapi viśeṣataḥ |pūjayatyeva bhūpālo nityāddaśaguṇaṃ śive || 69||

तत्प्रदोषे कृतां पूजां शृणु त्वमगजे शुभाम् ।श्रुत्वाऽपि लभते गौरि मम लोकं न संशयः ॥ ७०॥

tatpradoṣe kṛtāṃ pūjāṃ śṛṇu tvamagaje śubhām |śrutvā'pi labhate gauri mama lokaṃ na saṃśayaḥ || 70||

प्रदोषे पूजनं कुर्वन्नित्यमास्ते प्रहृष्टधीः ।गोकर्णेशं महालिङ्गं पश्यन्नष्टोरुकिल्बिषः ॥ ७१॥

pradoṣe pūjanaṃ kurvannityamāste prahṛṣṭadhīḥ |gokarṇeśaṃ mahāliṅgaṃ paśyannaṣṭorukilbiṣaḥ || 71||

प्रदोषपूजारतचित्तवृत्तिः नृपस्तदा मत्पदपूजनोत्सवैः ।समभ्यषिञ्चद्गिरिजे महेशं गोकर्णलिङ्गस्यमपारभाग्यैः ॥ ७२॥

pradoṣapūjāratacittavṛttiḥ nṛpastadā matpadapūjanotsavaiḥ |samabhyaṣiñcadgirije maheśaṃ gokarṇaliṅgasyamapārabhāgyaiḥ || 72||

क्षीराज्यादिघटैः सुतैलजघटैः सक्षौद्रसच्छर्कराभारैःखण्डदधिप्रसर्पितसुसर्प्युत्थाज्यमण्डादिभिः ।रम्भाम्रादिफलैस्तथेक्षुजरसैर्जम्बीरनी रैः शिवैःसन्नारिकेलोद्भवद्रवत्सुक्षौद्रमहोरुकोशैः ॥ ७३॥

kṣīrājyādighaṭaiḥ sutailajaghaṭaiḥ sakṣaudrasaccharkarābhāraiḥkhaṇḍadadhiprasarpitasusarpyutthājyamaṇḍādibhiḥ |rambhāmrādiphalaistathekṣujarasairjambīranī raiḥ śivaiḥsannārikelodbhavadravatsukṣaudramahorukośaiḥ || 73||

आसिच्य गन्धोदकरत्रपुष्पसौवर्णनीरैश्च सुगन्धपूरैः ।पाटीरसारैर्मृगनाभिपूरैः कर्पूरसारैश्च सुशोधितैर्जलैः ॥ ७४॥

āsicya gandhodakaratrapuṣpasauvarṇanīraiśca sugandhapūraiḥ |pāṭīrasārairmṛganābhipūraiḥ karpūrasāraiśca suśodhitairjalaiḥ || 74||

आलिम्प्य गन्धैश्च तदोरुलिङ्गं संवेष्ट्य शुभ्रोत्तमधौतवस्त्रैः ।दत्वोपवीतान्युपवीतिने मे अखण्डशाल्युद्भवतण्डुलाक्षतैः ॥ ७५॥

ālimpya gandhaiśca tadoruliṅgaṃ saṃveṣṭya śubhrottamadhautavastraiḥ |datvopavītānyupavītine me akhaṇḍaśālyudbhavataṇḍulākṣataiḥ || 75||

अनर्घ्यरत्नोत्तम भूषणैर्मामभूषयद्देवि तदा नृपाग्रणीः ।बिल्वैश्च पद्मैः करवीरमल्लिकाजातीफलैः गन्धफलीसरैश्च ॥ ७६॥

anarghyaratnottama bhūṣaṇairmāmabhūṣayaddevi tadā nṛpāgraṇīḥ |bilvaiśca padmaiḥ karavīramallikājātīphalaiḥ gandhaphalīsaraiśca || 76||

उत्फुल्लनीलोत्पलपुण्डरीकैः कल्हारजालैररविन्दपुष्पैः ।समर्चयन्नामसहस्रतो नृपस्तदा मुदा मां शशिशेखरं शिवम् ॥ ७७॥

utphullanīlotpalapuṇḍarīkaiḥ kalhārajālairaravindapuṣpaiḥ |samarcayannāmasahasrato nṛpastadā mudā māṃ śaśiśekharaṃ śivam || 77||

बिल्वत्वक्परिकल्पितागरुरसैर्धूपस्तदा दीयतेदीपैर्गोघृतपूरितैरतिसितैर्वर्तीभिरत्युज्ज्वलैः ।नैवेद्यैर्द्दधिखण्डसारसुभगैः सत्सोपदंशान्वितैःसूपापूपादिराशिप्रभवपरिमलामोदिस्वाद्वन्नजालैः ॥ ७८॥

bilvatvakparikalpitāgarurasairdhūpastadā dīyatedīpairgoghṛtapūritairatisitairvartībhiratyujjvalaiḥ |naivedyairddadhikhaṇḍasārasubhagaiḥ satsopadaṃśānvitaiḥsūpāpūpādirāśiprabhavaparimalāmodisvādvannajālaiḥ || 78||

शुभ्रद्रोणसुमप्रभान्नजमहाराशीभिरीशं शिवेसूपापूपमरन्दसुनदरमहाहैयङ्गवीनोत्थितैः ।आज्यैः प्राज्यैः सुतप्तप्रभवपरिमलैः कालकाले निवेद्यहृष्टोऽभूत् प्रार्थिवेन्द्रो जनिशतविततानन्दपुण्यैकमूर्तिः ॥ ७९॥

śubhradroṇasumaprabhānnajamahārāśībhirīśaṃ śivesūpāpūpamarandasunadaramahāhaiyaṅgavīnotthitaiḥ |ājyaiḥ prājyaiḥ sutaptaprabhavaparimalaiḥ kālakāle nivedyahṛṣṭo'bhūt prārthivendro janiśatavitatānandapuṇyaikamūrtiḥ || 79||

सन्नागवल्लीदलभारकल्पितैः निष्टप्तहेमादिविशालपात्रैः ।ताम्बूलैः कतकैर्लवङ्गमुखरैः पूगीफलैश्चूर्णकैः ॥ ८०॥

sannāgavallīdalabhārakalpitaiḥ niṣṭaptahemādiviśālapātraiḥ |tāmbūlaiḥ katakairlavaṅgamukharaiḥ pūgīphalaiścūrṇakaiḥ || 80||

उडुगणपतिमौलिं धेनुकर्णेशलिङ्गं तुरगणगणकृष्टैः वाद्यजालोत्थशब्दैः ।गणपतिकरशुण्डालग्नकञ्जोत्थनादैः दशशतवरदीपैर्दीपयामास भूपः ॥ ८१॥

uḍugaṇapatimauliṃ dhenukarṇeśaliṅgaṃ turagaṇagaṇakṛṣṭaiḥ vādyajālotthaśabdaiḥ |gaṇapatikaraśuṇḍālagnakañjotthanādaiḥ daśaśatavaradīpairdīpayāmāsa bhūpaḥ || 81||

सुधारसारगण्होत्थितापारदीपैरस्रण्डैश्च बिल्वैस्तदाऽऽखण्डलाद्याः ।सुधाधामखण्डोज्वलन्मौलिलिङ्गमखण्डेकबोधाय नीराजयन्ति ॥ ८२॥

sudhārasāragaṇhotthitāpāradīpairasraṇḍaiśca bilvaistadā''khaṇḍalādyāḥ |sudhādhāmakhaṇḍojvalanmauliliṅgamakhaṇḍekabodhāya nīrājayanti || 82||

हर हर शिव शङ्कर प्रसीद दुरितोत्थिततापहरास्तदोषे ।इति सुरवरकिन्नरोक्तिशब्दैः करबद्धाञ्जलिभिस्तदा प्रदोषे ॥ ८३॥

hara hara śiva śaṅkara prasīda duritotthitatāpaharāstadoṣe |iti suravarakinnaroktiśabdaiḥ karabaddhāñjalibhistadā pradoṣe || 83||

छत्रैश्चामरकोटिभिश्च गिरिजे मां वीजयन्त्यादरान्मायूरैर्व्यजनैस्तथैव विमलादर्शैश्च नाट्यैरपि ।देवि प्रस्तवनप्रदक्षिणनमस्कारैः शिवं तोषयद्भेरीशङ्खमृदङ्गकाहलरवैर्नाट्याङ्गनाकल्पितैः ॥ ८४॥

chatraiścāmarakoṭibhiśca girije māṃ vījayantyādarānmāyūrairvyajanaistathaiva vimalādarśaiśca nāṭyairapi |devi prastavanapradakṣiṇanamaskāraiḥ śivaṃ toṣayadbherīśaṅkhamṛdaṅgakāhalaravairnāṭyāṅganākalpitaiḥ || 84||

नाट्यैस्तालमृदङ्गनूपुरझणत्कारारवैः शङ्करं सन्तोष्यप्रमथेश्वरं स मुमुदे धन्यः स भूपाग्रणीः ॥ ८५॥

nāṭyaistālamṛdaṅganūpurajhaṇatkārāravaiḥ śaṅkaraṃ santoṣyapramatheśvaraṃ sa mumude dhanyaḥ sa bhūpāgraṇīḥ || 85||

राजाश्रीमद्गोकर्ण शम्भो भवशतजनितापारतापैकभङ्गंत्वल्लिङ्गं दृष्टिसङ्गं यदि भवति महाभाग्यपूर्णे जनेऽस्मिन् ।काले वीतभये प्रदोषसमये सर्वैः सुरैः सेवितेत्वत्पादाम्बुरुहं प्रकृष्टभवजापारव्यथां संहरेत् ॥ ८६॥

rājāśrīmadgokarṇa śambho bhavaśatajanitāpāratāpaikabhaṅgaṃtvalliṅgaṃ dṛṣṭisaṅgaṃ yadi bhavati mahābhāgyapūrṇe jane'smin |kāle vītabhaye pradoṣasamaye sarvaiḥ suraiḥ sevitetvatpādāmburuhaṃ prakṛṣṭabhavajāpāravyathāṃ saṃharet || 86||

शिवःइत्थं मामम्बिकेशं सुरवरनिकरैः शाङ्करैर्देवि पुण्यैःकाले तस्मिन्प्रदोषे गिरिवरतनये सर्वसौख्येऽस्तदोषे ।भूपस्तापैर्विहीनो मुदितवसुमनाः सन्मानास्तत्पदाब्जंसम्पूज्यालोक्य पूतो मम गणवरभाग्भाग्यवर्यः कृतो मे ॥ ८७॥

śivaḥitthaṃ māmambikeśaṃ suravaranikaraiḥ śāṅkarairdevi puṇyaiḥkāle tasminpradoṣe girivaratanaye sarvasaukhye'stadoṣe |bhūpastāpairvihīno muditavasumanāḥ sanmānāstatpadābjaṃsampūjyālokya pūto mama gaṇavarabhāgbhāgyavaryaḥ kṛto me || 87||

॥ इति शिवरहस्यान्तर्गते शिवगौरीसंवादे गोकर्णमहालिङ्गे वसुमनोनृपानुष्ठित प्रदोषपूजाकैङ्कर्यवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः २३। ५८ब८७॥– ॥ श्रीशिवरहस्यम् । भर्गाख्यः पन्चमांशः । अध्यायः २३। ५८ब-८७॥

|| iti śivarahasyāntargate śivagaurīsaṃvāde gokarṇamahāliṅge vasumanonṛpānuṣṭhita pradoṣapūjākaiṅkaryavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 23| 58ba87||– || śrīśivarahasyam | bhargākhyaḥ pancamāṃśaḥ | adhyāyaḥ 23| 58ba-87||