शिवकृपार्थप्रार्थना Gangakrita Shivakripartha Prarthana

नमो नमस्ते गिरिजासहाय नमो नमस्ते पुनरिन्दुमौले ।नमो नमस्तेऽस्तु पुनर्नमस्ते नमो नमस्ते करुणासमुद्र ॥ ६४॥

namo namaste girijāsahāya namo namaste punarindumaule |namo namaste'stu punarnamaste namo namaste karuṇāsamudra || 64||

श्रीमन्महारुद्र नमो नमस्ते श्रीवीररुद्राय नमो नमस्ते ।नमो नमस्ते गिरिश त्रिनेत्र नमो नमस्तेऽस्तु विभूतिगात्र ॥ ६५॥

śrīmanmahārudra namo namaste śrīvīrarudrāya namo namaste |namo namaste giriśa trinetra namo namaste'stu vibhūtigātra || 65||

श्रीनीलकण्ठाय नमो नमस्ते भालप्रदेशानललोचनाय ।नमो नमस्तेऽस्तु कपर्दिने नमो नमो नमस्तेऽस्तु सदाशिवप्रभो ॥ ६६॥

śrīnīlakaṇṭhāya namo namaste bhālapradeśānalalocanāya |namo namaste'stu kapardine namo namo namaste'stu sadāśivaprabho || 66||

मार्ताण्डमण्डलनिवास नमो नमस्ते मार्ताण्डकुण्डलविराजितभूषणाय ।मार्ताण्डचण्डकरसङ्कुलमण्टपाय तस्मै मृडाय भगवन् भव ते नमोऽस्तु ॥ ६७॥

mārtāṇḍamaṇḍalanivāsa namo namaste mārtāṇḍakuṇḍalavirājitabhūṣaṇāya |mārtāṇḍacaṇḍakarasaṅkulamaṇṭapāya tasmai mṛḍāya bhagavan bhava te namo'stu || 67||

यद्वीक्षणप्रसरमात्रविधूतपापाः सम्प्राप्नुवन्ति परमं पदमिन्दुमौलेः ।तैरेव मां मुहुरपि प्रणतां प्रपश्य पश्याद्य वह्निनिकराश्रिततप्तदेहाम् ॥ ६८॥

yadvīkṣaṇaprasaramātravidhūtapāpāḥ samprāpnuvanti paramaṃ padamindumauleḥ |taireva māṃ muhurapi praṇatāṃ prapaśya paśyādya vahninikarāśritataptadehām || 68||

माता त्वमेव भगवन् जनकस्त्वमेव मित्रं त्वमेव मम चन्द्रकलावतंस ।भ्राता त्वमेव भगवन् गिरिजासहाय त्राता त्वमेव भगवन् हर नीलकण्ठ ॥ ६९॥

mātā tvameva bhagavan janakastvameva mitraṃ tvameva mama candrakalāvataṃsa |bhrātā tvameva bhagavan girijāsahāya trātā tvameva bhagavan hara nīlakaṇṭha || 69||

त्वं कालकूटविषधारणधीरचित्तः त्वं मारसंहरणकारणभूत एव ।ब्रह्माण्डमण्डलसुखण्डनहेतुभूतः त्वामेव तावदधुना शरणं प्रपन्नाः ॥ ७०॥

tvaṃ kālakūṭaviṣadhāraṇadhīracittaḥ tvaṃ mārasaṃharaṇakāraṇabhūta eva |brahmāṇḍamaṇḍalasukhaṇḍanahetubhūtaḥ tvāmeva tāvadadhunā śaraṇaṃ prapannāḥ || 70||

त्वन्नामकीर्तनसुधारसपानपीनो दीनोऽपि दैन्यमपहाय दिवं प्रयाति ।पश्चादुपैति परमं पदमीश तेन तद्भाग्ययोग्यकरुणां कुरु मामपीश ॥ ७१॥

tvannāmakīrtanasudhārasapānapīno dīno'pi dainyamapahāya divaṃ prayāti |paścādupaiti paramaṃ padamīśa tena tadbhāgyayogyakaruṇāṃ kuru māmapīśa || 71||

॥ इति शिवरहस्यान्तर्गते गङ्गाकृता शिवकृपार्थप्रार्थना सम्पूर्णा ॥॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः १०। ६४७१ ॥

|| iti śivarahasyāntargate gaṅgākṛtā śivakṛpārthaprārthanā sampūrṇā |||| śrīśivarahasyam | harākhyaḥ tṛtīyāṃśaḥ | uttarārdham | adhyāyaḥ 10| 6471 ||

– ॥ श्रीशिवरहस्यम् ।हराख्यः तृतीयांशः ।उत्तरार्धम् ।अध्यायः १०। ६४-७१ ॥

– || śrīśivarahasyam |harākhyaḥ tṛtīyāṃśaḥ |uttarārdham |adhyāyaḥ 10| 64-71 ||