चिदम्बरशिवध्वनिस्तवः Chidambarashivadhvani Stava

श्रीगणेशाय नमः ।श्रीचित्सभेशाय नमः ।ॐ शिव शिव शरणं शिवानन्द शिवशिव शिवाय शिवाय नमः ।ओङ्कारमोषधीशानचूडमोजस्विदूरगम् ।ओड्याणपीठनिलयं वन्दे श्रीचित्सभापतिम् ॥ १॥

śrīgaṇeśāya namaḥ |śrīcitsabheśāya namaḥ |oṃ śiva śiva śaraṇaṃ śivānanda śivaśiva śivāya śivāya namaḥ |oṅkāramoṣadhīśānacūḍamojasvidūragam |oḍyāṇapīṭhanilayaṃ vande śrīcitsabhāpatim || 1||

शिखिवाहसुतं देवं शिष्टार्चितपदाम्बुजम् ।शिखावन्तं महादेवं वन्दे श्रीचित्सभापतिम् ॥ २॥

śikhivāhasutaṃ devaṃ śiṣṭārcitapadāmbujam |śikhāvantaṃ mahādevaṃ vande śrīcitsabhāpatim || 2||

वरुणाघ प्रहन्तारं वरदं वररूपिणम् ।वन्दारुजनमन्दारं वन्दे श्रीचित्सभापतिम् ॥ ३॥

varuṇāgha prahantāraṃ varadaṃ vararūpiṇam |vandārujanamandāraṃ vande śrīcitsabhāpatim || 3||

शिलादसुतवन्द्याङ्घ्रिं शिरोधृतसुरापगम् ।शिखिराजत्भालदेशं वन्दे श्रीचित्सभापतिम् ॥ ४॥

śilādasutavandyāṅghriṃ śirodhṛtasurāpagam |śikhirājatbhāladeśaṃ vande śrīcitsabhāpatim || 4||

वनमाल्यर्चितपदं वंशवृद्धिकरं नृणाम् ।वसुधारथवामोमं वन्दे श्रीचित्सभापतिम् ॥ ५॥

vanamālyarcitapadaṃ vaṃśavṛddhikaraṃ nṛṇām |vasudhārathavāmomaṃ vande śrīcitsabhāpatim || 5||

शरच्चन्द्रसमानाभं शरणं जगतां सदा ।शङ्खचक्रकरान्विष्टं वन्दे श्रीचित्सभापतिम् ॥ ६॥

śaraccandrasamānābhaṃ śaraṇaṃ jagatāṃ sadā |śaṅkhacakrakarānviṣṭaṃ vande śrīcitsabhāpatim || 6||

रणन्मञ्जीरपादाब्जं रजताचलवासिनम् ।रम्भादिफलभोक्तारं वन्दे श्रीचित्सभापतिम् ॥ ७॥

raṇanmañjīrapādābjaṃ rajatācalavāsinam |rambhādiphalabhoktāraṃ vande śrīcitsabhāpatim || 7||

णशक्तिपदमृग्याङ्घ्रिं गणनाथसुतं विभुम् ।फणाभृन्नाथवरदं वन्दे श्रीचित्सभापतिम् ॥ ८॥

ṇaśaktipadamṛgyāṅghriṃ gaṇanāthasutaṃ vibhum |phaṇābhṛnnāthavaradaṃ vande śrīcitsabhāpatim || 8||

शिवालिङ्गितवर्ष्माणं शिवरुद्रादिसंज्ञकम् ।शिवं शिवकरं नॄणां वन्दे श्रीचित्सभापतिम् ॥ ९॥

śivāliṅgitavarṣmāṇaṃ śivarudrādisaṃjñakam |śivaṃ śivakaraṃ nṝṇāṃ vande śrīcitsabhāpatim || 9||

वाराशितनयानाथनेत्रार्चितपदाम्बुजम् ।वारिजातासने संस्थं वन्दे श्रीचित्सभापतिम् ॥ १०॥

vārāśitanayānāthanetrārcitapadāmbujam |vārijātāsane saṃsthaṃ vande śrīcitsabhāpatim || 10||

नन्दनस्थितमन्दारवृक्षस्यौदार्यदायिनम् ।नन्द्यादिभिस्सदा सेव्यं वन्दे श्रीचित्सभापतिम् ॥ ११॥

nandanasthitamandāravṛkṣasyaudāryadāyinam |nandyādibhissadā sevyaṃ vande śrīcitsabhāpatim || 11||

दण्डपाणिहरं देवं दण्डपाणिं दयानिधिम् ।दण्डोद्दण्डनटं चण्डं वन्दे श्रीचित्सभापतिम् ॥ १२॥

daṇḍapāṇiharaṃ devaṃ daṇḍapāṇiṃ dayānidhim |daṇḍoddaṇḍanaṭaṃ caṇḍaṃ vande śrīcitsabhāpatim || 12||

शिष्यलोकं शिरोरत्नभूषणं शिखिधारिणम् ।शिवदातारमीशानं वन्दे श्रीचित्सभापतिम् ॥ १३॥

śiṣyalokaṃ śiroratnabhūṣaṇaṃ śikhidhāriṇam |śivadātāramīśānaṃ vande śrīcitsabhāpatim || 13||

वपुषा भासयन्तं तत् जगत्सर्वं चराचरम् ।वज्रपाण्यादिसंसेव्यं वन्दे श्रीचित्सभापतिम् ॥ १४॥

vapuṣā bhāsayantaṃ tat jagatsarvaṃ carācaram |vajrapāṇyādisaṃsevyaṃ vande śrīcitsabhāpatim || 14||

शिशुं मुनिवरस्यादौ रक्षन्तं यमशासनात् ।शिपिविष्टं शिलादार्च्यं वन्दे श्रीचित्सभापतिम् ॥ १५॥

śiśuṃ munivarasyādau rakṣantaṃ yamaśāsanāt |śipiviṣṭaṃ śilādārcyaṃ vande śrīcitsabhāpatim || 15||

वलारितपसा प्रीतं वटमूलनिवासिनम् ।वटुकैरावृतप्रान्तं वन्दे श्रीचित्सभापतिम् ॥ १६॥

valāritapasā prītaṃ vaṭamūlanivāsinam |vaṭukairāvṛtaprāntaṃ vande śrīcitsabhāpatim || 16||

शिखरे शिखरीन्द्रस्य वसन्तं श्रितपालकम् ।शिखाग्रे योगिनां संस्थं वन्दे श्रीचित्सभापतिम् ॥ १७॥

śikhare śikharīndrasya vasantaṃ śritapālakam |śikhāgre yogināṃ saṃsthaṃ vande śrīcitsabhāpatim || 17||

वाराणस्यादिमे क्षेत्रे वसन्तं वायुरूपिणम् ।वाल्कलिक्षयहेतुं तं वन्दे श्रीचित्सभापतिम् ॥ १८॥

vārāṇasyādime kṣetre vasantaṃ vāyurūpiṇam |vālkalikṣayahetuṃ taṃ vande śrīcitsabhāpatim || 18||

यमाद्यष्टाङ्गविलसद्योगवत्स्वान्तगोचरम् ।यक्षराक्षसवृन्देड्यं वन्दे श्रीचित्सभापतिम् ॥ १९॥

yamādyaṣṭāṅgavilasadyogavatsvāntagocaram |yakṣarākṣasavṛndeḍyaṃ vande śrīcitsabhāpatim || 19||

शिञ्जन्नूपुरपादाब्जं शिलादसुतसन्नुतम् ।शिवादिसंज्ञं शिवदं वन्दे श्रीचित्सभापतिम् ॥ २०॥

śiñjannūpurapādābjaṃ śilādasutasannutam |śivādisaṃjñaṃ śivadaṃ vande śrīcitsabhāpatim || 20||

वारणास्यषडास्याद्यैरावृतं शङ्करं विभुम् ।वासवाद्यखिलैरर्च्यं वन्दे श्रीचित्सभापतिम् ॥ २१॥

vāraṇāsyaṣaḍāsyādyairāvṛtaṃ śaṅkaraṃ vibhum |vāsavādyakhilairarcyaṃ vande śrīcitsabhāpatim || 21||

यमुनासखिभर्तारं यमहन्तारमव्ययम् ।यजनप्रियमम्बेशं वन्दे श्रीचित्सभापतिम् ॥ २२॥

yamunāsakhibhartāraṃ yamahantāramavyayam |yajanapriyamambeśaṃ vande śrīcitsabhāpatim || 22||

नराणामिष्टदातारं नक्रकुण्डलभूषितम् ।नमदानन्ददं नित्यं वन्दे श्रीचित्सभापतिम् ॥ २३॥

narāṇāmiṣṭadātāraṃ nakrakuṇḍalabhūṣitam |namadānandadaṃ nityaṃ vande śrīcitsabhāpatim || 23||

महान्तं मणिभूषाढ्यं मतिमद्भिरुपासितम् ।महाकविप्रदं वेद्यं वन्दे श्रीचित्सभापतिम् ॥ २४॥

mahāntaṃ maṇibhūṣāḍhyaṃ matimadbhirupāsitam |mahākavipradaṃ vedyaṃ vande śrīcitsabhāpatim || 24||

इमं ध्वनिस्तवं नित्यं पठतां नटसन्निधौ ।इह भुक्तिं प्रदत्वाऽन्ते मुक्तिं यच्छति शङ्करः ॥ २५॥

imaṃ dhvanistavaṃ nityaṃ paṭhatāṃ naṭasannidhau |iha bhuktiṃ pradatvā'nte muktiṃ yacchati śaṅkaraḥ || 25||

इति श्रीचिदम्बरशिवध्वनिस्तवः सम्पूर्णः ।

iti śrīcidambaraśivadhvanistavaḥ sampūrṇaḥ |