शारदागीतिका Shrisharadagitika

अयि शारदे ! मदीये हृदि मन्दिरे स्वकीये ।कमनीयपादपद्मे कृपया त्वया निधेये ॥ १॥

ayi śārade ! madīye hṛdi mandire svakīye |kamanīyapādapadme kṛpayā tvayā nidheye || 1||

श्रुतसाधनेन हीनाः शिशवस्तवाऽतिदीनाः ।इह सन्ति तापलीना विविधाऽऽपदामधीनाः ॥ २॥

śrutasādhanena hīnāḥ śiśavastavā'tidīnāḥ |iha santi tāpalīnā vividhā''padāmadhīnāḥ || 2||

महदे ! शुभागमन्ते विदधामहे निशान्ते ।कथनं त्विदं तवान्ते दययेहि दिव्यकान्ते ! ॥ ३॥

mahade ! śubhāgamante vidadhāmahe niśānte |kathanaṃ tvidaṃ tavānte dayayehi divyakānte ! || 3||

करुणाकटाक्षदानैर्दुरितोदधौ निमग्नान् ।कथमीक्षसे न बालान् जगदम्ब ! पादलग्नान् ॥ ४॥

karuṇākaṭākṣadānairduritodadhau nimagnān |kathamīkṣase na bālān jagadamba ! pādalagnān || 4||

वसनं न चाऽशनन्ते सकलाः सुता लभन्ते ।अत एव चास्थिशेषा विकलाः क्षुधा म्रियन्ते ॥ ५॥

vasanaṃ na cā'śanante sakalāḥ sutā labhante |ata eva cāsthiśeṣā vikalāḥ kṣudhā mriyante || 5||

पददर्शने कृताऽऽशा इह पुत्रकास्त्वदीयाः ।त्वरया दयस्व मातः ! विलपन्ति भारतीयाः ॥ ६॥

padadarśane kṛtā''śā iha putrakāstvadīyāḥ |tvarayā dayasva mātaḥ ! vilapanti bhāratīyāḥ || 6||

भवजालमालयाऽलं तव लङ्घिताऽङ्घ्रिकार्ये ।शिवशङ्करेऽतिदीने कलुषं न धार्यमार्ये ! ॥ ७॥

bhavajālamālayā'laṃ tava laṅghitā'ṅghrikārye |śivaśaṅkare'tidīne kaluṣaṃ na dhāryamārye ! || 7||

इति श्रीशारदागीतिका समाप्ता ।१९९६ विक्रमाब्दीयवसन्तपञ्चम्यांश्री शारदापूजोपलक्ष्ये मटिहानी विद्यालये छात्रवृन्दैर्गीता

iti śrīśāradāgītikā samāptā | 1996 vikramābdīyavasantapañcamyāṃśrī śāradāpūjopalakṣye maṭihānī vidyālaye chātravṛndairgītā