सीतारामस्तोत्रम् हनूमत्कृतम् Sitarama Stotram

अयोध्यापुरनेतारं मिथिलापुरनायिकाम् ।राघवाणामलङ्कारं वैदेहानामलङ्क्रियाम् ॥ १॥

ayodhyāpuranetāraṃ mithilāpuranāyikām |rāghavāṇāmalaṅkāraṃ vaidehānāmalaṅkriyām || 1||

रघूणां कुलदीपं च निमीनां कुलदीपिकाम् ।सूर्यवंशसमुद्भूतं सोमवंशसमुद्भवाम् ॥ २॥

raghūṇāṃ kuladīpaṃ ca nimīnāṃ kuladīpikām |sūryavaṃśasamudbhūtaṃ somavaṃśasamudbhavām || 2||

पुत्रं दशरथस्याद्यं पुत्रीं जनकभूपतेः ।वशिष्ठानुमताचारं शतानन्दमतानुगाम् ॥ ३॥

putraṃ daśarathasyādyaṃ putrīṃ janakabhūpateḥ |vaśiṣṭhānumatācāraṃ śatānandamatānugām || 3||

कौसल्यागर्भसम्भूतं वेदिगर्भोदितां स्वयम् ।पुण्डरीकविशालाक्षं स्फुरदिन्दीवरेक्षणाम् ॥ ४॥

kausalyāgarbhasambhūtaṃ vedigarbhoditāṃ svayam |puṇḍarīkaviśālākṣaṃ sphuradindīvarekṣaṇām || 4||

चन्द्रकान्ताननाम्भोजं चन्द्रबिम्बोपमाननाम् ।मत्तमातङ्गगमनं मत्तहंसवधूगताम् ॥ ५॥

candrakāntānanāmbhojaṃ candrabimbopamānanām |mattamātaṅgagamanaṃ mattahaṃsavadhūgatām || 5||

चन्दनार्द्रभुजामध्यं कुङ्कुमार्द्रकुचस्थलीम् ।चापालङ्कृतहस्ताब्जं पद्मालङ्कृतपाणिकाम् ॥ ६॥

candanārdrabhujāmadhyaṃ kuṅkumārdrakucasthalīm |cāpālaṅkṛtahastābjaṃ padmālaṅkṛtapāṇikām || 6||

शरणागतगोप्तारं प्रणिपादप्रसादिकाम् ।कालमेघनिभं रामं कार्तस्वरसमप्रभाम् ॥ ७॥

śaraṇāgatagoptāraṃ praṇipādaprasādikām |kālameghanibhaṃ rāmaṃ kārtasvarasamaprabhām || 7||

दिव्यसिंहासनासीनं दिव्यस्रग्वस्त्रभूषणाम् ।अनुक्षणं कटाक्षाभ्यां अन्योन्येक्षणकाङ्क्षिणौ ॥ ८॥

divyasiṃhāsanāsīnaṃ divyasragvastrabhūṣaṇām |anukṣaṇaṃ kaṭākṣābhyāṃ anyonyekṣaṇakāṅkṣiṇau || 8||

अन्योन्यसदृशाकारौ त्रैलोक्यगृहदम्पती।इमौ युवां प्रणम्याहं भजाम्यद्य कृतार्थताम् ॥ ९॥

anyonyasadṛśākārau trailokyagṛhadampatī|imau yuvāṃ praṇamyāhaṃ bhajāmyadya kṛtārthatām || 9||

अनेन स्तौति यः स्तुत्यं रामं सीतां च भक्तितः ।तस्य तौ तनुतां पुण्यास्सम्पदः सकलार्थदाः ॥ १०॥

anena stauti yaḥ stutyaṃ rāmaṃ sītāṃ ca bhaktitaḥ |tasya tau tanutāṃ puṇyāssampadaḥ sakalārthadāḥ || 10||

एवं श्रीरामचन्द्रस्य जानक्याश्च विशेषतः ।कृतं हनूमता पुण्यं स्तोत्रं सद्यो विमुक्तिदम् ।यः पठेत्प्रातरुत्थाय सर्वान् कामानवाप्नुयात् ॥ ११॥

evaṃ śrīrāmacandrasya jānakyāśca viśeṣataḥ |kṛtaṃ hanūmatā puṇyaṃ stotraṃ sadyo vimuktidam |yaḥ paṭhetprātarutthāya sarvān kāmānavāpnuyāt || 11||

(य इदं पठति स्तोत्रं मैथिलीरामचन्द्रयोः ।श्रीवैकुण्ठमवाप्नोति स नरो हतकिल्बिषः ॥ १२॥

(ya idaṃ paṭhati stotraṃ maithilīrāmacandrayoḥ |śrīvaikuṇṭhamavāpnoti sa naro hatakilbiṣaḥ || 12||

चन्द्रकान्ताननाम्भोजं चन्द्रबिम्बोपमाननाम् ।शरणागतगोप्तारं प्रणिपातप्रसादिकाम् ।कालमेघनिभं रामं कार्तस्वरसमप्रभाम्॥ १३॥)

candrakāntānanāmbhojaṃ candrabimbopamānanām |śaraṇāgatagoptāraṃ praṇipātaprasādikām |kālameghanibhaṃ rāmaṃ kārtasvarasamaprabhām|| 13||)

॥ इति हनूमत्कृतसीताराम स्तोत्रं सम्पूर्णम् ॥

|| iti hanūmatkṛtasītārāma stotraṃ sampūrṇam ||