राघवशरणागतिः Shri Raghavachetanacharyakrita Shriraghavasharanagatih

पुण्यसद्यजमानन्दभाष्यकारं च राघवम् ।करोमि सद्गुरुं नत्त्वा राघवशरणागतिम् ॥ १॥

puṇyasadyajamānandabhāṣyakāraṃ ca rāghavam |karomi sadguruṃ nattvā rāghavaśaraṇāgatim || 1||

परेशं दिव्यधामस्थं दिव्यदेहगुणाम्बुधिम् ।जगद्धेतुं शरण्यं च राघवं शरणं श्रये ॥ २॥

pareśaṃ divyadhāmasthaṃ divyadehaguṇāmbudhim |jagaddhetuṃ śaraṇyaṃ ca rāghavaṃ śaraṇaṃ śraye || 2||

तस्मिंस्तस्मिंश्च देशादौ रक्षायै साधुधर्मयोः ।श्रितं मत्स्यादिरूपं च राघवं शरणं श्रये ॥ ३॥

tasmiṃstasmiṃśca deśādau rakṣāyai sādhudharmayoḥ |śritaṃ matsyādirūpaṃ ca rāghavaṃ śaraṇaṃ śraye || 3||

सृष्ट्याद्यर्थं च लोकानां स्वभक्तानामुपास्तये ।चतुर्व्यूहस्वरूपं च राघवं शरणं श्रये ॥ ४॥

sṛṣṭyādyarthaṃ ca lokānāṃ svabhaktānāmupāstaye |caturvyūhasvarūpaṃ ca rāghavaṃ śaraṇaṃ śraye || 4||

जगत् सृष्ट्वा च तस्यान्तस्तद्रक्षायै प्रविश्य हि ।अन्तर्यामिस्वरूपं च राघवं शरणं श्रये ॥ ५॥

jagat sṛṣṭvā ca tasyāntastadrakṣāyai praviśya hi |antaryāmisvarūpaṃ ca rāghavaṃ śaraṇaṃ śraye || 5||

स्वर्णादिविग्रहं भक्ताभीष्टं स्वीकृत्य तत्र हि ।षाड्गुण्येन स्थितं चाथ राघवं शरणं श्रये ॥ ६॥

svarṇādivigrahaṃ bhaktābhīṣṭaṃ svīkṛtya tatra hi |ṣāḍguṇyena sthitaṃ cātha rāghavaṃ śaraṇaṃ śraye || 6||

राघवचेतनाचार्यद्वाराचार्येण धीमता ।कृता मोक्षप्रदा भूयाद् राघवशरणागतिः ॥ ७॥

rāghavacetanācāryadvārācāryeṇa dhīmatā |kṛtā mokṣapradā bhūyād rāghavaśaraṇāgatiḥ || 7||

इति श्रीराघवचेतनाचार्यकृता श्रीराघवशरणागतिः सम्पूर्णा ।

iti śrīrāghavacetanācāryakṛtā śrīrāghavaśaraṇāgatiḥ sampūrṇā |