विरोधिषट्कम् Shri Jangidevacharyapranitam Virodhishatkam

नतत्त्वा गुरुं च रामं च भाष्यकृतपुण्यसद्मजम् ।त्याज्यं विरोधिषट्कं हि त्यागाय बोधयाम्यहम् ॥ १॥

natattvā guruṃ ca rāmaṃ ca bhāṣyakṛtapuṇyasadmajam |tyājyaṃ virodhiṣaṭkaṃ hi tyāgāya bodhayāmyaham || 1||

फलेहा पुरुषकारोपेक्षणं चातिसंशयः ।अहन्ता ममता चैतद् रामाश्रयविरोधकम् ॥ २॥

phalehā puruṣakāropekṣaṇaṃ cātisaṃśayaḥ |ahantā mamatā caitad rāmāśrayavirodhakam || 2||

तदधीनतया रामभिन्नेषु चामरेषु हि ।श्रोत्रस्य दानं श्रवणविरोधित्वेन सम्मतम् ॥ ३॥

tadadhīnatayā rāmabhinneṣu cāmareṣu hi |śrotrasya dānaṃ śravaṇavirodhitvena sammatam || 3||

श्रीरामाधीनतां त्यक्त्वा स्वातन्त्र्येण प्रवर्त्तनम् ।स्वरूपस्य विरोधीति सम्मतं हि विचक्षणैः ॥ ४॥

śrīrāmādhīnatāṃ tyaktvā svātantryeṇa pravarttanam |svarūpasya virodhīti sammataṃ hi vicakṣaṇaiḥ || 4||

विषयानुभवेच्छेशानुभवस्य विरोधिनी ।रामप्राप्तेर्विरोधी हि केवलैः सह सङ्गमः ॥ ५॥

viṣayānubhaveccheśānubhavasya virodhinī |rāmaprāptervirodhī hi kevalaiḥ saha saṅgamaḥ || 5||

ब्रह्मरुद्रादिदेवेषु परेशत्वभ्रमस्तथा ।परत्वस्य विरोधी हि सम्मतस्तत्त्ववेदिभिः ॥ ६॥

brahmarudrādideveṣu pareśatvabhramastathā |paratvasya virodhī hi sammatastattvavedibhiḥ || 6||

विरोधिषट्कमेतद्धि जन्निदेवेन बोधितम् ।परित्याज्यं प्रयत्नेन रामभक्तैर्मुमुक्षुभिः ॥ ७॥

virodhiṣaṭkametaddhi jannidevena bodhitam |parityājyaṃ prayatnena rāmabhaktairmumukṣubhiḥ || 7||

इति श्रीजङ्गिदेवाचार्यप्रणीतं विरोधिषट्कं सम्पूर्णम् ।

iti śrījaṅgidevācāryapraṇītaṃ virodhiṣaṭkaṃ sampūrṇam |