रामस्तुतिः ०८ Shri Hanumatkrita Shrirama Stutih

नमो रामाय हरये विष्णवे प्रभविष्णवे ।आदिदेवाय देवाय पुराणाय गदाभृते ॥ १॥

namo rāmāya haraye viṣṇave prabhaviṣṇave |ādidevāya devāya purāṇāya gadābhṛte || 1||

विष्टरे पुष्पके नित्यं निविष्टाय महात्मने ।प्रहृष्ट वानरानीक जुष्ट पादाम्बुजायते ॥ २॥

viṣṭare puṣpake nityaṃ niviṣṭāya mahātmane |prahṛṣṭa vānarānīka juṣṭa pādāmbujāyate || 2||

निष्पिष्ट राक्षसेन्द्राय जगदिष्ट विधायिने ।नमः सहस्र शिरसे सहस्र चरणाय च ॥ ३॥

niṣpiṣṭa rākṣasendrāya jagadiṣṭa vidhāyine |namaḥ sahasra śirase sahasra caraṇāya ca || 3||

सहस्राक्षाय शुद्धाय राघवाय च विष्णवे ।भक्तार्ति हारिणे तुभ्यं सीतायाः पतये नमः ॥ ४॥

sahasrākṣāya śuddhāya rāghavāya ca viṣṇave |bhaktārti hāriṇe tubhyaṃ sītāyāḥ pataye namaḥ || 4||

हरये नारसिंहाय दैत्यराज विदारिणे ।नमस्तुभ्यं वराहाय दंष्ट्रोद्धृत वसुन्धरे ॥ ५॥

haraye nārasiṃhāya daityarāja vidāriṇe |namastubhyaṃ varāhāya daṃṣṭroddhṛta vasundhare || 5||

त्रिविक्रमाय भवते बलि यज्ञ विभेदिने ।नमो वामन रूपाय नमो मन्दर धारिणे ॥ ६॥

trivikramāya bhavate bali yajña vibhedine |namo vāmana rūpāya namo mandara dhāriṇe || 6||

नमस्ते मत्स्य रूपाय त्रयी पालन कारिणे ।नमः परशुरामाय क्षत्रियान्त कराय ते ॥ ७॥

namaste matsya rūpāya trayī pālana kāriṇe |namaḥ paraśurāmāya kṣatriyānta karāya te || 7||

नमस्ते राक्षसघ्नाय नमो राघव रूपिणे ।महादेव महाभीम महाकोदण्ड भेदिने ॥ ८॥

namaste rākṣasaghnāya namo rāghava rūpiṇe |mahādeva mahābhīma mahākodaṇḍa bhedine || 8||

क्षत्रियान्तकरक्रूर भार्गव त्रास कारिणे ।नमोऽस्त्व हिल्यासन्ताप हारिणे चाप हारिणे ॥ ९॥

kṣatriyāntakarakrūra bhārgava trāsa kāriṇe |namo'stva hilyāsantāpa hāriṇe cāpa hāriṇe || 9||

नागायुत वलोपेत ताटका देह हारिणे ।शिला कठिन विस्तार वालिवक्षो विभेदिने ॥ १०॥

nāgāyuta valopeta tāṭakā deha hāriṇe |śilā kaṭhina vistāra vālivakṣo vibhedine || 10||

नमो माया मृगध्वंस कारिणेऽज्ञान हारिणे ।दशस्यन्दन दुःखाब्धि शोषणागस्त्य रूपिणे ॥ ११॥

namo māyā mṛgadhvaṃsa kāriṇe'jñāna hāriṇe |daśasyandana duḥkhābdhi śoṣaṇāgastya rūpiṇe || 11||

अनेकोर्मि समाधूत समुद्रमद हारिणे ।मैथिली मानसाम्भोज भानवे लोक साक्षिणे ॥ १२॥

anekormi samādhūta samudramada hāriṇe |maithilī mānasāmbhoja bhānave loka sākṣiṇe || 12||

राजेन्द्राय नमस्तुभ्यं जानकी पतये हरे ।तारक ब्रह्मणे तुभ्यं नमो राजीव लोचन ॥ १३॥

rājendrāya namastubhyaṃ jānakī pataye hare |tāraka brahmaṇe tubhyaṃ namo rājīva locana || 13||

रामाय राम चन्द्राय वरेण्याय सुखात्मने ।विश्वामित्र प्रियायेदं नमः खर विदारिणे ॥ १४॥

rāmāya rāma candrāya vareṇyāya sukhātmane |viśvāmitra priyāyedaṃ namaḥ khara vidāriṇe || 14||

प्रसीद देव देवेश भक्तानामभयप्रद ।रक्ष मां करुणा सिन्धो रामचन्द्र नमोस्तुते ॥ १५॥

prasīda deva deveśa bhaktānāmabhayaprada |rakṣa māṃ karuṇā sindho rāmacandra namostute || 15||

रक्ष मां वेद वचसामप्यगोचर राघव ।पाहिमां कृपया राम शरणं त्वामुपैम्यहम् ॥ १६॥

rakṣa māṃ veda vacasāmapyagocara rāghava |pāhimāṃ kṛpayā rāma śaraṇaṃ tvāmupaimyaham || 16||

रघुवीर महामोहमपाकुरु ममाधुना ।स्नाने चाचमने भुक्तौ जाग्रत्स्वप्न सुषुप्तिषु ॥ १७॥

raghuvīra mahāmohamapākuru mamādhunā |snāne cācamane bhuktau jāgratsvapna suṣuptiṣu || 17||

सर्वावस्थासु सर्वत्र पाहिमां रघुनन्दन ।महिमानं तवस्तोतुं कः समर्थो जगत्त्रये ॥ १८॥

sarvāvasthāsu sarvatra pāhimāṃ raghunandana |mahimānaṃ tavastotuṃ kaḥ samartho jagattraye || 18||

त्वमेव त्वन्महत्त्वं वै जानासि रघुनन्दन ।अतस्ते शरणं यामि सर्वभावेन सर्वदा ॥ १९॥

tvameva tvanmahattvaṃ vai jānāsi raghunandana |ataste śaraṇaṃ yāmi sarvabhāvena sarvadā || 19||

इति स्कन्दपुराणान्तर्गता श्रीहनुमत्कृता श्रीरामस्तुतिः समाप्ता ।

iti skandapurāṇāntargatā śrīhanumatkṛtā śrīrāmastutiḥ samāptā |