रामाष्टोत्तरशतनामस्तोत्रम् २ Ramashtottarashatanama Stotram

॥ अथ श्रीमदानन्दरामायणान्तर्गत श्रीरामाष्टोत्तरशतनाम स्तोत्रम् ॥विष्णुदास उवाच ।गुरो ते प्रष्टुमिच्छामि तत्त्वं वद सविस्तरम् ।कुम्भोदरेण मुनिना यत्स्तोत्रं समुदीरितम् ॥ १॥

|| atha śrīmadānandarāmāyaṇāntargata śrīrāmāṣṭottaraśatanāma stotram ||viṣṇudāsa uvāca |guro te praṣṭumicchāmi tattvaṃ vada savistaram |kumbhodareṇa muninā yatstotraṃ samudīritam || 1||

अष्टोत्तरशतं नाम्नां राघवस्य शुभप्रदम् ।श्रवणे तस्य मे प्रीतिर्जाताऽस्ति कथयस्व तत् ॥ २॥

aṣṭottaraśataṃ nāmnāṃ rāghavasya śubhapradam |śravaṇe tasya me prītirjātā'sti kathayasva tat || 2||

श्रीरामदास उवाच ।शृणु शिष्य महाबुद्धे सम्यक् पृष्टं त्वया मम ।अष्टोत्तरशतं नाम्नां राघवस्य वदाम्यहम् ॥ ३॥

śrīrāmadāsa uvāca |śṛṇu śiṣya mahābuddhe samyak pṛṣṭaṃ tvayā mama |aṣṭottaraśataṃ nāmnāṃ rāghavasya vadāmyaham || 3||

सर्वेश्वरः सर्वमयः सर्वभूतोपकारकः ।सर्वेषामुकारार्थं यः साकारो निराकृतिः ॥ ४॥

sarveśvaraḥ sarvamayaḥ sarvabhūtopakārakaḥ |sarveṣāmukārārthaṃ yaḥ sākāro nirākṛtiḥ || 4||

स भवत्येव लोकेऽस्मिन् संसारभयनाशनः ।यदा यदा हि लोकानां भयमुत्पद्यते तदा ॥ ५॥

sa bhavatyeva loke'smin saṃsārabhayanāśanaḥ |yadā yadā hi lokānāṃ bhayamutpadyate tadā || 5||

अवतीर्याकरोच्छ्रीमान् दुष्टदैत्यविमर्द्दनम् ।मत्स्यकूर्मवराहादिरूपेण परमार्थदृक् ॥ ६॥

avatīryākarocchrīmān duṣṭadaityavimarddanam |matsyakūrmavarāhādirūpeṇa paramārthadṛk || 6||

तत्कालेषु च सर्वेषु सर्वेषामुपकारकृत् ।साधूनां समचित्तानां भक्तानां भक्तवत्सलः ॥ ७॥

tatkāleṣu ca sarveṣu sarveṣāmupakārakṛt |sādhūnāṃ samacittānāṃ bhaktānāṃ bhaktavatsalaḥ || 7||

उपकर्तुं निराकारः सदाकारेण जायते ।अजोऽयं जायतेऽनन्तो विश्रुतो भूतभावनः ॥ ८॥

upakartuṃ nirākāraḥ sadākāreṇa jāyate |ajo'yaṃ jāyate'nanto viśruto bhūtabhāvanaḥ || 8||

तदा तदाऽवतरति भक्तानामनुकम्पया ।क्षीराब्धौ देवदेवेशो लक्ष्मीनारायणो विभुः ॥ ९॥

tadā tadā'vatarati bhaktānāmanukampayā |kṣīrābdhau devadeveśo lakṣmīnārāyaṇo vibhuḥ || 9||

आशेषैः शङ्खचक्राभ्यां देवैर्ब्रह्मादिभिः सह ।शेषोऽभूल्लक्ष्मणो लक्ष्मीर्जानकी शङ्खचक्रके ॥ १०॥

āśeṣaiḥ śaṅkhacakrābhyāṃ devairbrahmādibhiḥ saha |śeṣo'bhūllakṣmaṇo lakṣmīrjānakī śaṅkhacakrake || 10||

जातौ भरतशत्रुघ्नौ देवाः सर्वेऽपि वानराः ।आसन् पुरैव सर्वेऽपि देवानां भयशान्तये ॥ ११॥

jātau bharataśatrughnau devāḥ sarve'pi vānarāḥ |āsan puraiva sarve'pi devānāṃ bhayaśāntaye || 11||

तत्र नारायणो देवः श्रीराम इति विश्रुतः ।सर्वलोकोपकाराय भूमौ स्वयमवातरत् ॥ १२॥

tatra nārāyaṇo devaḥ śrīrāma iti viśrutaḥ |sarvalokopakārāya bhūmau svayamavātarat || 12||

ध्यानमात्रेण देवेशो महापातकनाशकृत् ।कीर्तनश्रवणाभ्यां च हत्याकोटिनिवारणः ॥ १३॥

dhyānamātreṇa deveśo mahāpātakanāśakṛt |kīrtanaśravaṇābhyāṃ ca hatyākoṭinivāraṇaḥ || 13||

कलौ स कीर्तनेनैव सर्वपापं व्यपोहति ।रामरामेति रामेति ये वदन्त्यतिपापिनः ॥ १४॥

kalau sa kīrtanenaiva sarvapāpaṃ vyapohati |rāmarāmeti rāmeti ye vadantyatipāpinaḥ || 14||

पापकोटिसहस्रेभ्यस्तानुद्धरति नान्यथा ।अष्टोत्तरशतं नाम्नां तस्य स्तोत्रं वदाम्यहम् ॥ १५॥

pāpakoṭisahasrebhyastānuddharati nānyathā |aṣṭottaraśataṃ nāmnāṃ tasya stotraṃ vadāmyaham || 15||

ॐ अस्य श्रीरामचन्द्रनामाष्टोत्तरशतमन्त्रस्य ब्रह्मा ऋषिः ।अनुष्टुप् छन्दः । जानकीवल्लभः श्रीरामचन्द्रो देवता ॥ॐ बीजम् । नमः शक्तिः । श्रीरामचन्द्रः कीलकम् ।श्रीरामचन्द्रप्रीत्यर्थे जपे विनियोगः ॥षडङ्गन्यासः ।ॐ नमो भगवते राजाधिराजाय परमात्मने हृदयाय नमः ।ॐ नमो भगवते विद्याधिराजाय हयग्रीवाय शिरसे स्वाहा ।ॐ नमो भगवते जानकीवल्लभाय शिखायै वषट् ।ॐ नमो भगवते रघुनन्दनायामिततेजसे कवचाय हुम् ।ॐ नमो भगवते क्षीराब्धिमध्यस्थाय नारायणाय नेत्रत्रयाय वौषट् ।ॐ नमो भगवते सत्प्रकाशाय रामाय अस्त्राय फट् । इति दिग्बन्धः ॥अङ्गुलीन्यासः ।ॐ नमो भगवते राजाधिराजाय परमात्मने अङ्गुष्ठाभ्यां नमः ।ॐ नमो भगवते विद्याधिराजाय हयग्रीवाय तर्जनीभ्यां नमः ।ॐ नमो भगवते जानकीवल्लभाय मध्यमाभ्यां नमः ।ॐ नमो भगवते रघुनन्दनायामिततेजसे अनामिकाभ्यां नमः ।ॐ नमो भगवते क्षीराब्धिमध्यस्थाय नारायणाय कनिष्ठिकाभ्यां नमः ।ॐ नमो भगवते सत्प्रकाशाय रामाय करतलकरपृष्ठाभ्यां नमः ।अथ ध्यानम् ।मन्दाराकृतिपुण्यधामविलसद्वक्षस्थलं कोमलंशान्तं कान्तमहेन्द्रनीलरुचिराभासं सहस्राननम् ।वन्देऽहं रघुनन्दनं सुरपतिं कोदण्डदीक्षागुरुंरामं सर्वजगत्सुसेवितपदं सीतामनोवल्लभम् ॥ १६॥

oṃ asya śrīrāmacandranāmāṣṭottaraśatamantrasya brahmā ṛṣiḥ |anuṣṭup chandaḥ | jānakīvallabhaḥ śrīrāmacandro devatā ||oṃ bījam | namaḥ śaktiḥ | śrīrāmacandraḥ kīlakam |śrīrāmacandraprītyarthe jape viniyogaḥ ||ṣaḍaṅganyāsaḥ |oṃ namo bhagavate rājādhirājāya paramātmane hṛdayāya namaḥ |oṃ namo bhagavate vidyādhirājāya hayagrīvāya śirase svāhā |oṃ namo bhagavate jānakīvallabhāya śikhāyai vaṣaṭ |oṃ namo bhagavate raghunandanāyāmitatejase kavacāya hum |oṃ namo bhagavate kṣīrābdhimadhyasthāya nārāyaṇāya netratrayāya vauṣaṭ |oṃ namo bhagavate satprakāśāya rāmāya astrāya phaṭ | iti digbandhaḥ ||aṅgulīnyāsaḥ |oṃ namo bhagavate rājādhirājāya paramātmane aṅguṣṭhābhyāṃ namaḥ |oṃ namo bhagavate vidyādhirājāya hayagrīvāya tarjanībhyāṃ namaḥ |oṃ namo bhagavate jānakīvallabhāya madhyamābhyāṃ namaḥ |oṃ namo bhagavate raghunandanāyāmitatejase anāmikābhyāṃ namaḥ |oṃ namo bhagavate kṣīrābdhimadhyasthāya nārāyaṇāya kaniṣṭhikābhyāṃ namaḥ |oṃ namo bhagavate satprakāśāya rāmāya karatalakarapṛṣṭhābhyāṃ namaḥ |atha dhyānam |mandārākṛtipuṇyadhāmavilasadvakṣasthalaṃ komalaṃśāntaṃ kāntamahendranīlarucirābhāsaṃ sahasrānanam |vande'haṃ raghunandanaṃ surapatiṃ kodaṇḍadīkṣāguruṃrāmaṃ sarvajagatsusevitapadaṃ sītāmanovallabham || 16||

अथ स्तोत्रम् ।ॐ सहस्रशीर्ष्णे वै तुभ्यं सहस्राक्षाय ते नमः ।नमः सहस्रहस्ताय सहस्रचरणाय च ॥ १७॥

atha stotram |oṃ sahasraśīrṣṇe vai tubhyaṃ sahasrākṣāya te namaḥ |namaḥ sahasrahastāya sahasracaraṇāya ca || 17||

नमो जीमूतवर्णाय नमस्ते विश्वतोमुख ।अच्युताय नमस्तुभ्यं नमस्ते शेषशायिने ॥ १८॥

namo jīmūtavarṇāya namaste viśvatomukha |acyutāya namastubhyaṃ namaste śeṣaśāyine || 18||

नमो हिरण्यगर्भाय पञ्चभूतात्मने नमः ।नमो मूलप्रकृतये देवानां हितकारिणे ॥ १९॥

namo hiraṇyagarbhāya pañcabhūtātmane namaḥ |namo mūlaprakṛtaye devānāṃ hitakāriṇe || 19||

नमस्ते सर्वलोकेश सर्वदुःखनिषूदन ।शङ्खचक्रगदापद्मजटामुकुटधारिणे ॥ २०॥

namaste sarvalokeśa sarvaduḥkhaniṣūdana |śaṅkhacakragadāpadmajaṭāmukuṭadhāriṇe || 20||

नमो गर्भाय तत्त्वाय ज्योतिषां ज्योतिषे नमः ।ॐ नमो वासुदेवाय नमो दशरथात्मज ॥ २१॥

namo garbhāya tattvāya jyotiṣāṃ jyotiṣe namaḥ |oṃ namo vāsudevāya namo daśarathātmaja || 21||

नमो नमस्ते राजेन्द्र सर्वसम्पत्प्रदाय च ।नमः कारुण्यरूपाय कैकेयीप्रियकारिणे ॥ २२॥

namo namaste rājendra sarvasampatpradāya ca |namaḥ kāruṇyarūpāya kaikeyīpriyakāriṇe || 22||

नमो दन्ताय शान्ताय विश्वामित्रप्रियाय ते ।यज्ञेशाय नमस्तुभ्यं नमस्ते क्रतुपालक ॥ २३॥

namo dantāya śāntāya viśvāmitrapriyāya te |yajñeśāya namastubhyaṃ namaste kratupālaka || 23||

नमो नमः केशवाय नमो नाथाय शर्ङ्गिणे ।नमस्ते रामचन्द्राय नमो नारायणाय च ॥ २४॥

namo namaḥ keśavāya namo nāthāya śarṅgiṇe |namaste rāmacandrāya namo nārāyaṇāya ca || 24||

नमस्ते रामचन्द्राय माधवाय नमो नमः ।गोविन्द्राय नमस्तुभ्यं नमस्ते परमात्मने ॥ २५॥

namaste rāmacandrāya mādhavāya namo namaḥ |govindrāya namastubhyaṃ namaste paramātmane || 25||

नमस्ते विष्णुरूपाय रघुनाथाय ते नमः ।नमस्तेऽनाथनाथाय नमस्ते मधुसूदन ॥ २६॥

namaste viṣṇurūpāya raghunāthāya te namaḥ |namaste'nāthanāthāya namaste madhusūdana || 26||

त्रिविक्रम नमस्तेऽस्तु सीतायाः पतये नमः ।वामनाय नमस्तुभ्यं नमस्ते राघवाय च ॥ २७॥

trivikrama namaste'stu sītāyāḥ pataye namaḥ |vāmanāya namastubhyaṃ namaste rāghavāya ca || 27||

नमो नमः श्रीधराय जानकीवल्लभाय च ।नमस्तेऽस्तु हृषीकेश कन्दर्पाय नमो नमः ॥ २८॥

namo namaḥ śrīdharāya jānakīvallabhāya ca |namaste'stu hṛṣīkeśa kandarpāya namo namaḥ || 28||

नमस्ते पद्मनाभाय कौसल्याहर्षकारिणे ।नमो राजीवनेत्राय नमस्ते लक्ष्मणाग्रज ॥ २९॥

namaste padmanābhāya kausalyāharṣakāriṇe |namo rājīvanetrāya namaste lakṣmaṇāgraja || 29||

नमो नमस्ते काकुत्स्थ नमो दामोदराय च ।विभीषणपरित्रातर्नमः सङ्कर्षणाय च ॥ ३०॥

namo namaste kākutstha namo dāmodarāya ca |vibhīṣaṇaparitrātarnamaḥ saṅkarṣaṇāya ca || 30||

वासुदेव नमस्तेऽस्तु नमस्ते शङ्करप्रिय ।प्रद्युम्नाय नमस्तुभ्यमनिरुद्धाय ते नमः ॥ ३१॥

vāsudeva namaste'stu namaste śaṅkarapriya |pradyumnāya namastubhyamaniruddhāya te namaḥ || 31||

सदसद्भक्तिरूपाय नमस्ते पुरुषोत्तम ।अधोक्षज नमस्तेऽस्तु सप्ततालहराय च ॥ ३२॥

sadasadbhaktirūpāya namaste puruṣottama |adhokṣaja namaste'stu saptatālaharāya ca || 32||

खरदूषणसंहर्त्रे श्रीनृसिम्हाय ते नमः ।अच्युताय नमस्तुभ्यं नमस्ते सेतुबन्धक ॥ ३३॥

kharadūṣaṇasaṃhartre śrīnṛsimhāya te namaḥ |acyutāya namastubhyaṃ namaste setubandhaka || 33||

जनार्दन नमस्तेऽस्तु नमो हनुमदाश्रय ।उपेन्द्रचन्द्रवन्द्याय मारीचमथनाय च ॥ ३४॥

janārdana namaste'stu namo hanumadāśraya |upendracandravandyāya mārīcamathanāya ca || 34||

नमो बालिप्रहरण नमः सुग्रीवराज्यद ।जामदग्न्यमहादर्पहराय हरये नमः ॥ ३५॥

namo bālipraharaṇa namaḥ sugrīvarājyada |jāmadagnyamahādarpaharāya haraye namaḥ || 35||

नमो नमस्ते कृष्णाय नमस्ते भरताग्रज ।नमस्ते पितृभक्ताय नमः शत्रुघ्नपूर्वज ॥ ३६॥

namo namaste kṛṣṇāya namaste bharatāgraja |namaste pitṛbhaktāya namaḥ śatrughnapūrvaja || 36||

अयोध्याधिपते तुभ्यं नमः शत्रुघ्नसेवित ।नमो नित्याय सत्याय बुद्ध्यादिज्ञानरूपिणे ॥ ३७॥

ayodhyādhipate tubhyaṃ namaḥ śatrughnasevita |namo nityāya satyāya buddhyādijñānarūpiṇe || 37||

अद्वैतब्रह्मरूपाय ज्ञानगम्याय ते नमः ।नमः पूर्णाय रम्याय माधवाय चिदात्मने ॥ ३८॥

advaitabrahmarūpāya jñānagamyāya te namaḥ |namaḥ pūrṇāya ramyāya mādhavāya cidātmane || 38||

अयोध्येशाय श्रेष्ठाय चिन्मात्राय परात्मने ।नमोऽहल्योद्धारणाय नमस्ते चापभञ्जिने ॥ ३९॥

ayodhyeśāya śreṣṭhāya cinmātrāya parātmane |namo'halyoddhāraṇāya namaste cāpabhañjine || 39||

सीतारामाय सेव्याय स्तुत्याय परमेष्ठिने ।नमस्ते बाणहस्ताय नमः कोदण्डधारिणे ॥ ४०॥

sītārāmāya sevyāya stutyāya parameṣṭhine |namaste bāṇahastāya namaḥ kodaṇḍadhāriṇe || 40||

नमः कबन्धहन्त्रे च वालिहन्त्रे नमोऽस्तु ते ।नमस्तेऽस्तु दशग्रीवप्राणसंहारकारिणे ॥ ४१॥ १०८

namaḥ kabandhahantre ca vālihantre namo'stu te |namaste'stu daśagrīvaprāṇasaṃhārakāriṇe || 41|| 108

अष्टोत्तरशतं नाम्नां रमचन्द्रस्य पावनम्एतत्प्रोक्तं मया श्रेष्ठ सर्वपातकनाशनम् ॥ ४२॥

aṣṭottaraśataṃ nāmnāṃ ramacandrasya pāvanametatproktaṃ mayā śreṣṭha sarvapātakanāśanam || 42||

प्रचरिष्यति तल्लोके प्राण्यदृष्टवशाद्द्विज ।तस्य कीर्तनमात्रेण जना यास्यन्ति सद्गतिम् ॥ ४३॥

pracariṣyati talloke prāṇyadṛṣṭavaśāddvija |tasya kīrtanamātreṇa janā yāsyanti sadgatim || 43||

तावद्विजृम्भते पापं ब्रह्महत्यापुरःसरम्।ह्।यावन्नामाष्टकशतं पुरुषो न हि कीर्तयेत् ॥ ४४॥

tāvadvijṛmbhate pāpaṃ brahmahatyāpuraḥsaram|h|yāvannāmāṣṭakaśataṃ puruṣo na hi kīrtayet || 44||

तावत्कलेर्महोत्साहो निःशङ्कं सम्प्रवर्तते ।यावच्छ्रीरामचन्द्रस्य शतनाम्नां न कीर्तनम् ॥ ४६॥

tāvatkalermahotsāho niḥśaṅkaṃ sampravartate |yāvacchrīrāmacandrasya śatanāmnāṃ na kīrtanam || 46||

तावत्स्वरूपं रामस्य दुर्बोधं प्राणिनां स्फुटम् ।यावन्न निष्ठया रामनाममाहात्म्यमुत्तमम् ॥ ४७॥

tāvatsvarūpaṃ rāmasya durbodhaṃ prāṇināṃ sphuṭam |yāvanna niṣṭhayā rāmanāmamāhātmyamuttamam || 47||

कीर्तितं पठितं चित्ते धृतं संस्मारितं मुदा ।अन्यतः शृणुयान्मर्त्यः सोऽपि मुच्येत पातकात् ॥ ४८॥

kīrtitaṃ paṭhitaṃ citte dhṛtaṃ saṃsmāritaṃ mudā |anyataḥ śṛṇuyānmartyaḥ so'pi mucyeta pātakāt || 48||

ब्रह्महत्यादिपापानां निष्कृतिं यदि वाञ्छति ।रामस्तोत्रं मासमेकं पठित्वा मुच्यते नरः ॥ ४९॥

brahmahatyādipāpānāṃ niṣkṛtiṃ yadi vāñchati |rāmastotraṃ māsamekaṃ paṭhitvā mucyate naraḥ || 49||

दुष्प्रतिग्रहदुर्भोज्यदुरालापादिसम्भवम् ।पापं सकृत्कीर्तनेन रामस्तोत्रं विनाशयेत् ॥ ५०॥

duṣpratigrahadurbhojyadurālāpādisambhavam |pāpaṃ sakṛtkīrtanena rāmastotraṃ vināśayet || 50||

श्रुतिस्मृतिपुराणेतिहासागमशतानि च ।अर्हन्ति नाल्पां श्रीरामनामकीर्तिकलामपि ॥ ५१॥

śrutismṛtipurāṇetihāsāgamaśatāni ca |arhanti nālpāṃ śrīrāmanāmakīrtikalāmapi || 51||

अष्टोत्तरशतं नाम्नां सीतारामस्य पावनम् ।अस्य सङ्कीर्तनादेव सर्वान् कामान् लभेन्नरः ॥ ५२॥

aṣṭottaraśataṃ nāmnāṃ sītārāmasya pāvanam |asya saṅkīrtanādeva sarvān kāmān labhennaraḥ || 52||

पुत्रार्थी लभते पुत्रान् धनार्थी धनमाप्नुयात् ।स्त्रियं प्राप्नोति पत्न्यर्थी स्तोत्रपाठश्रवादिना ॥ ५३॥

putrārthī labhate putrān dhanārthī dhanamāpnuyāt |striyaṃ prāpnoti patnyarthī stotrapāṭhaśravādinā || 53||

कुम्भोदरेण मुनिना येन स्तोत्रेण राघवः ।स्तुतः पूर्वं यज्ञवाटे तदेतत्त्वां मयोदितम् ॥ ५४॥

kumbhodareṇa muninā yena stotreṇa rāghavaḥ |stutaḥ pūrvaṃ yajñavāṭe tadetattvāṃ mayoditam || 54||

इति श्रीशतकोटिरामचरितान्तर्गते श्रीमदानन्दरामायणे वाल्मीकीयेयागकाण्डे श्रीरामनामाष्टोत्तरशतनामस्तोत्रं नाम पञ्चमः सर्गः ॥

iti śrīśatakoṭirāmacaritāntargate śrīmadānandarāmāyaṇe vālmīkīyeyāgakāṇḍe śrīrāmanāmāṣṭottaraśatanāmastotraṃ nāma pañcamaḥ sargaḥ ||