स्वामिनीस्तोत्रम् Shri Svamini Stotram

यदैव श्रीराधे! रहसि मिलति त्वां मधुपतिःतदैवाकार्याऽहं निजचरणदास्ये निगदिता ।मुदा चन्द्रावल्या शशिमुखि ! कृतार्थास्मि भवतितथा सम्पन्ने मां स्मरसि यदि सम्प्रेषणविधौ ॥ १॥

yadaiva śrīrādhe! rahasi milati tvāṃ madhupatiḥtadaivākāryā'haṃ nijacaraṇadāsye nigaditā |mudā candrāvalyā śaśimukhi ! kṛtārthāsmi bhavatitathā sampanne māṃ smarasi yadi sampreṣaṇavidhau || 1||

कदाचित् कालिन्द्यामहनि तरलापाड्गरुचिरासमाप्लुत्याकण्ठं किमपि परिधायाशुवसनम् ।स्मरेन् मां चेदुत्तारितवसनसङ्क्षालनविधौकृतार्थाऽहं भूयान्निजचरणदासीति भवति ॥ २॥

kadācit kālindyāmahani taralāpāḍgarucirāsamāplutyākaṇṭhaṃ kimapi paridhāyāśuvasanam |smaren māṃ ceduttāritavasanasaṅkṣālanavidhaukṛtārthā'haṃ bhūyānnijacaraṇadāsīti bhavati || 2||

तमिस्रायामश्रावितचरणमञ्जीरनिनदाकथञ्चित् सम्प्राप्ता प्रियतमनिकुञ्जं चरणयोः ।मुदा तल्पारोहे कमलमुखि ! सम्मार्जनविधौकृतार्थैवाहं चेत् स्मरति भवती मां सकृदपि ॥ ३॥

tamisrāyāmaśrāvitacaraṇamañjīraninadākathañcit samprāptā priyatamanikuñjaṃ caraṇayoḥ |mudā talpārohe kamalamukhi ! sammārjanavidhaukṛtārthaivāhaṃ cet smarati bhavatī māṃ sakṛdapi || 3||

विविधबन्धरतिश्रमसीकराकुलकपोलमुदीक्ष्य हरिं यदि ।स्मरसि मां व्यजनार्थमपि क्षणंसुमुखि धन्यतमास्मि तदा ह्यहम् ॥ ४॥

vividhabandharatiśramasīkarākulakapolamudīkṣya hariṃ yadi |smarasi māṃ vyajanārthamapi kṣaṇaṃsumukhi dhanyatamāsmi tadā hyaham || 4||

यदि स्नानव्याजात् तरणितनयातीरमहनिप्रयातुं प्राणेशोचितविविधवस्तूनि सुमुखि ।गृहीत्वा गुप्तानि स्मरसि परिधेयं स्ववसनंग्रहीतुं मां स्वामिन्यहमिह कृतार्थैव हि तदा ॥ ५॥

yadi snānavyājāt taraṇitanayātīramahaniprayātuṃ prāṇeśocitavividhavastūni sumukhi |gṛhītvā guptāni smarasi paridheyaṃ svavasanaṃgrahītuṃ māṃ svāminyahamiha kṛtārthaiva hi tadā || 5||

कुतूहलाभिनिवेशतः प्रियेण पाणिकर्षणाद् (कुतूहलैकशीलतः)इतस्ततो विपाटितां स्वकञ्चुकीमतिप्रियाम् ।प्रदातुमुन्नताङ्गि मां सकृद्यदि स्मरस्यहोतदा मुदास्मि राधिके! कृतार्थतापदङ्गता ॥ ६॥

kutūhalābhiniveśataḥ priyeṇa pāṇikarṣaṇād (kutūhalaikaśīlataḥ)itastato vipāṭitāṃ svakañcukīmatipriyām |pradātumunnatāṅgi māṃ sakṛdyadi smarasyahotadā mudāsmi rādhike! kṛtārthatāpadaṅgatā || 6||

चारुप्रसूनमयतल्पगता स्वनाथेताम्बूलचर्वितमुदारमुखाम्बुजस्थम् ।दातुं स्थिते निजमुखाब्जगतं प्रदातुंमां चेत् स्मरस्यनुचरीं क्व तदा नु मामि ॥ ७॥

cāruprasūnamayatalpagatā svanāthetāmbūlacarvitamudāramukhāmbujastham |dātuṃ sthite nijamukhābjagataṃ pradātuṃmāṃ cet smarasyanucarīṃ kva tadā nu māmi || 7||

निकुञ्जे पुष्पालीरचितशयनात् केलिजनितश्रमाम्भः सङ्क्रान्ताननकमलशोभाहृतमनाः ।समुत्थायायान्ती सहजकृपया केलिदलितांस्रजं दातुं राधे ! स्मरसि यदि मां त्वं किमपरैः ॥ ८॥

nikuñje puṣpālīracitaśayanāt kelijanitaśramāmbhaḥ saṅkrāntānanakamalaśobhāhṛtamanāḥ |samutthāyāyāntī sahajakṛpayā kelidalitāṃsrajaṃ dātuṃ rādhe ! smarasi yadi māṃ tvaṃ kimaparaiḥ || 8||

यदा चलसि मार्गता शयनतापि शेषे मुदापदाम्बुजमलङ्करोष्यमलकुङ्कुमं त्वं तदा ।मुहुः सुमुखि राधिके ! किमधिकं नु सम्प्रार्थयेसदा भवतु मे भवच्चरणपङ्कजारक्तता ॥ ९॥

yadā calasi mārgatā śayanatāpi śeṣe mudāpadāmbujamalaṅkaroṣyamalakuṅkumaṃ tvaṃ tadā |muhuḥ sumukhi rādhike ! kimadhikaṃ nu samprārthayesadā bhavatu me bhavaccaraṇapaṅkajāraktatā || 9||

प्रियतमकरपद्मस्पर्शभावेक्षणोद्यद्रसभरजवरासामन्दमोदाकुलानाम् ।प्रतिपदतलरुग्भिर्गोपसीमन्तिनीनामरुणतरहृदम्भोजन्मने मे नमोऽस्तु ॥ १०॥

priyatamakarapadmasparśabhāvekṣaṇodyadrasabharajavarāsāmandamodākulānām |pratipadatalarugbhirgopasīmantinīnāmaruṇatarahṛdambhojanmane me namo'stu || 10||

यावन्ति पदपद्मानि भवतीनां हरिप्रियाः ।तावद्रूपः सदा दास्यं करवाणि तदा तदा ॥ ११॥

yāvanti padapadmāni bhavatīnāṃ haripriyāḥ |tāvadrūpaḥ sadā dāsyaṃ karavāṇi tadā tadā || 11||

गेहात् निकुञ्जं निशि सङ्गतायाःप्रियेण तल्पे विनिवेशितायाः ।स्वकेशवृन्दैस्तवपादपङ्कजेसम्मार्जयिष्यामि मुदा कदा नु ॥ १२॥

gehāt nikuñjaṃ niśi saṅgatāyāḥpriyeṇa talpe viniveśitāyāḥ |svakeśavṛndaistavapādapaṅkajesammārjayiṣyāmi mudā kadā nu || 12||

इति श्रीविट्ठलेश्वरविरचितं श्रीस्वामिनीस्तोत्रं समाप्तम् ।

iti śrīviṭṭhaleśvaraviracitaṃ śrīsvāminīstotraṃ samāptam |