कमलाम्बिकास्तोत्रम् अथवा कमलाम्बिकाष्टकम् Shri Kamalambika Stotram

बन्धूकद्युतिमिन्दुबिम्बवदनां वृन्दारकैर्वन्दितांमन्दारादि समर्चितां मधुमतीं मन्दस्मितां सुन्दरीम् ।बन्धच्छेदनकारिणीं त्रिनयनां भोगापवर्गप्रदांवन्देऽहं कमलाम्बिकामनुदिनं वाञ्छानुकूलां शिवाम् ॥ १॥

bandhūkadyutimindubimbavadanāṃ vṛndārakairvanditāṃmandārādi samarcitāṃ madhumatīṃ mandasmitāṃ sundarīm |bandhacchedanakāriṇīṃ trinayanāṃ bhogāpavargapradāṃvande'haṃ kamalāmbikāmanudinaṃ vāñchānukūlāṃ śivām || 1||

श्रीकामेश्वरपीठमध्यनिलयां श्रीराजराजेश्वरींश्रीवाणीपरिसेविताङ्घ्रियुगलां श्रीमत्कृपासागराम् ।शोकापद्भयमोचिनीं सुकवितानन्दैकसन्दायिनींवन्देऽहं कमलाम्बिकामनुदिनं वाञ्छानुकूलां शिवाम् ॥ २॥

śrīkāmeśvarapīṭhamadhyanilayāṃ śrīrājarājeśvarīṃśrīvāṇīparisevitāṅghriyugalāṃ śrīmatkṛpāsāgarām |śokāpadbhayamocinīṃ sukavitānandaikasandāyinīṃvande'haṃ kamalāmbikāmanudinaṃ vāñchānukūlāṃ śivām || 2||

माया मोहविनाशिनीं मुनिगणैराराधितां तन्मयींश्रेयःसञ्चयदायिनीं गुणमयीं वाय्वादि भूतां सताम् ।प्रातःकालसमानशोभमकुटां सामादि वेदैस्तुतांवन्देऽहं कमलाम्बिकामनुदिनं वाञ्छानुकूलां शिवाम् ॥ ३॥

māyā mohavināśinīṃ munigaṇairārādhitāṃ tanmayīṃśreyaḥsañcayadāyinīṃ guṇamayīṃ vāyvādi bhūtāṃ satām |prātaḥkālasamānaśobhamakuṭāṃ sāmādi vedaistutāṃvande'haṃ kamalāmbikāmanudinaṃ vāñchānukūlāṃ śivām || 3||

बालां भक्तजनौघचित्तनिलयां बालेन्दुचूडाम्बरांसालोक्यादि चतुर्विधार्थफलदां नीलोत्पलाक्षीमजाम् ।कालारिप्रियनायिकां कलिमलप्रध्वंसिनीं कौलिनींवन्देऽहं कमलाम्बिकामनुदिनं वाञ्छानुकूलां शिवाम् ॥ ४॥

bālāṃ bhaktajanaughacittanilayāṃ bālenducūḍāmbarāṃsālokyādi caturvidhārthaphaladāṃ nīlotpalākṣīmajām |kālāripriyanāyikāṃ kalimalapradhvaṃsinīṃ kaulinīṃvande'haṃ kamalāmbikāmanudinaṃ vāñchānukūlāṃ śivām || 4||

आनन्दामृतसिन्धुमध्यनिलयामज्ञानमूलापहांज्ञानानन्दविवर्धिनीं विजयदां मीनेक्षणां मोहिनीम् ।ज्ञानानन्दपरां गणेशजननीं गन्धर्वसम्पूजितांवन्देऽहं कमलाम्बिकामनुदिनं वाञ्छानुकूलां शिवाम् ॥ ५॥

ānandāmṛtasindhumadhyanilayāmajñānamūlāpahāṃjñānānandavivardhinīṃ vijayadāṃ mīnekṣaṇāṃ mohinīm |jñānānandaparāṃ gaṇeśajananīṃ gandharvasampūjitāṃvande'haṃ kamalāmbikāmanudinaṃ vāñchānukūlāṃ śivām || 5||

षट्चक्रोपरि नादबिन्दुनिलयां सर्वेश्वरीं सर्वगांषट्शास्त्रागमवेदवेदितगुणां षट्कोणसंवासिनीम् ।षट्कालेन समर्च्चितात्मविभवां षड्वर्गसञ्छेदिनींवन्देऽहं कमलाम्बिकामनुदिनं वाञ्छानुकूलां शिवाम् ॥ ६॥

ṣaṭcakropari nādabindunilayāṃ sarveśvarīṃ sarvagāṃṣaṭśāstrāgamavedaveditaguṇāṃ ṣaṭkoṇasaṃvāsinīm |ṣaṭkālena samarccitātmavibhavāṃ ṣaḍvargasañchedinīṃvande'haṃ kamalāmbikāmanudinaṃ vāñchānukūlāṃ śivām || 6||

योगानन्दकरीं जगत्सुखकरीं योगीन्द्रचित्तालयांएकामीशसुखप्रदां द्विजनुतामेकान्तसञ्चारिणीम् ।वागीशां विधिविष्णुशम्भुवरदां विश्वेश्वरीं वैणिकींवन्देऽहं कमलाम्बिकामनुदिनं वाञ्छानुकूलां शिवाम् ॥ ७॥

yogānandakarīṃ jagatsukhakarīṃ yogīndracittālayāṃekāmīśasukhapradāṃ dvijanutāmekāntasañcāriṇīm |vāgīśāṃ vidhiviṣṇuśambhuvaradāṃ viśveśvarīṃ vaiṇikīṃvande'haṃ kamalāmbikāmanudinaṃ vāñchānukūlāṃ śivām || 7||

बोधानन्दमयीं बुधैरभिनुतां मोदप्रदामम्बिकांश्रीमद्वेदपुरीशदासविनुतां ह्रीङ्कारसन्धालयाम् ।भेदाभेदविवर्जितां बहुविधां वेदान्तचूडामणिंवन्देऽहं कमलाम्बिकामनुदिनं वाञ्छानुकूलां शिवाम् ॥ ८॥

bodhānandamayīṃ budhairabhinutāṃ modapradāmambikāṃśrīmadvedapurīśadāsavinutāṃ hrīṅkārasandhālayām |bhedābhedavivarjitāṃ bahuvidhāṃ vedāntacūḍāmaṇiṃvande'haṃ kamalāmbikāmanudinaṃ vāñchānukūlāṃ śivām || 8||

इत्थं श्रीकमलाम्बिकाप्रियकरं स्तोत्रं पठेद्यस्सदापुत्रश्रीप्रदमष्टसिद्धिफलदं चिन्ताविनाशास्पदम् ।एति ब्रह्मपदं निजं निरुपमं निष्कल्मषं निष्कलंयोगीन्द्रैरपि दुर्लभं पुनरयं चिन्ताविनाशं परम् ॥ ९॥

itthaṃ śrīkamalāmbikāpriyakaraṃ stotraṃ paṭhedyassadāputraśrīpradamaṣṭasiddhiphaladaṃ cintāvināśāspadam |eti brahmapadaṃ nijaṃ nirupamaṃ niṣkalmaṣaṃ niṣkalaṃyogīndrairapi durlabhaṃ punarayaṃ cintāvināśaṃ param || 9||

इति श्रीकमलाम्बिकास्तोत्रं अथवा श्रीकमलाम्बिकाष्टकं सम्पूर्णम् ।

iti śrīkamalāmbikāstotraṃ athavā śrīkamalāmbikāṣṭakaṃ sampūrṇam |