भगवत्यष्टकम् Bhagavatyashtakam

नमोऽस्तु ते सरस्वति त्रिशूलचक्रधारिणि सिताम्बरावृते शुभे मृगेन्द्रपीठसंस्थिते ।सुवर्णबन्धुराधरे सुझल्लरीशिरोरुहे सुवर्णपद्मभूषिते नमोऽस्तु ते महेश्वरि ॥ १॥

namo'stu te sarasvati triśūlacakradhāriṇi sitāmbarāvṛte śubhe mṛgendrapīṭhasaṃsthite |suvarṇabandhurādhare sujhallarīśiroruhe suvarṇapadmabhūṣite namo'stu te maheśvari || 1||

पितामहादिभिर्नुते स्वकान्तिलुप्तचन्द्रभे सरत्नमालयावृते भवाब्धिकष्टहारिणि ।तमालहस्तमण्डिते तमालभालशोभिते गिरामगोचरे इले नमोऽस्तु ते महेश्वरि ॥ २॥

pitāmahādibhirnute svakāntiluptacandrabhe saratnamālayāvṛte bhavābdhikaṣṭahāriṇi |tamālahastamaṇḍite tamālabhālaśobhite girāmagocare ile namo'stu te maheśvari || 2||

स्वभक्तवत्सलेऽनघे सदापवर्गभोगदे दरिद्रदुखहारिणि त्रिलोकशङ्करीश्वरि ।भवानि भीम अम्बिके प्रचण्डतेज उज्ज्वले भुजाकलापमण्डिते नमोऽस्तु ते महेश्वरि ॥ ३॥

svabhaktavatsale'naghe sadāpavargabhogade daridradukhahāriṇi trilokaśaṅkarīśvari |bhavāni bhīma ambike pracaṇḍateja ujjvale bhujākalāpamaṇḍite namo'stu te maheśvari || 3||

प्रपन्नभीतिनाशिके प्रसूनमाल्यकन्धरे धियस्तमोनिवारिके विशुद्धबुद्धिकारिके ।सुरार्चिताऽङ्घ्रिपङ्कजे प्रचण्डविक्रमेऽक्षरे विशालपद्मलोचने नमोऽस्तु ते महेश्वरि ॥ ४॥

prapannabhītināśike prasūnamālyakandhare dhiyastamonivārike viśuddhabuddhikārike |surārcitā'ṅghripaṅkaje pracaṇḍavikrame'kṣare viśālapadmalocane namo'stu te maheśvari || 4||

हतस्त्वया स दैत्यधूम्रलोचनो यदा रणे तदा प्रसूनवृष्टयस्त्रिविष्टपे सुरैः कृताः ।निरीक्ष्य तत्र ते प्रभामलज्जत प्रभाकरस्त्वयि दयाकरे ध्रुवे नमोऽस्तु ते महेश्वरि ॥ ५॥

hatastvayā sa daityadhūmralocano yadā raṇe tadā prasūnavṛṣṭayastriviṣṭape suraiḥ kṛtāḥ |nirīkṣya tatra te prabhāmalajjata prabhākarastvayi dayākare dhruve namo'stu te maheśvari || 5||

ननाद केसरी यदा चचाल मेदिनी तदा जगाम दैत्यनायकः स्वसेनया द्रुतं भिया ।सकोपकम्पदच्छदे सचण्डमुण्डघातिके मृगेन्द्रनादनादिते नमोऽस्तु ते महेश्वरि ॥ ६॥

nanāda kesarī yadā cacāla medinī tadā jagāma daityanāyakaḥ svasenayā drutaṃ bhiyā |sakopakampadacchade sacaṇḍamuṇḍaghātike mṛgendranādanādite namo'stu te maheśvari || 6||

कुचन्दनार्चितालके सितोष्णवारणाधरे सवर्करानने वरे निशुम्भशुम्भमर्दिके ।प्रसीद चण्डिके अजे समस्तदोषघातिके शुभामतिप्रदेऽचले नमोऽस्तु ते महेश्वरि ॥ ७॥

kucandanārcitālake sitoṣṇavāraṇādhare savarkarānane vare niśumbhaśumbhamardike |prasīda caṇḍike aje samastadoṣaghātike śubhāmatiprade'cale namo'stu te maheśvari || 7||

त्वमेव विश्वधारिणी त्वमेव विश्वकारिणी त्वमेव सर्वहारिणी न गम्यसेऽजितात्मभिः ।दिवौकसां हिते रता करोषि दैत्यनाशन शताक्षि रक्तदन्तिके नमोऽस्तु ते महेश्वरि ॥ ८॥

tvameva viśvadhāriṇī tvameva viśvakāriṇī tvameva sarvahāriṇī na gamyase'jitātmabhiḥ |divaukasāṃ hite ratā karoṣi daityanāśana śatākṣi raktadantike namo'stu te maheśvari || 8||

पठन्ति ये समाहिता इमं स्तवं सदा नराः अनन्यभक्तिसंयुताः अहर्मुखेऽनुवासरम् ।भवन्ति ते तु पण्डिताः सुपुत्रधान्यसंयुताः कलत्रभूतिसंयुता व्रजन्ति चाऽमृतं सुखम् ॥ ९॥

paṭhanti ye samāhitā imaṃ stavaṃ sadā narāḥ ananyabhaktisaṃyutāḥ aharmukhe'nuvāsaram |bhavanti te tu paṇḍitāḥ suputradhānyasaṃyutāḥ kalatrabhūtisaṃyutā vrajanti cā'mṛtaṃ sukham || 9||

॥ इति श्रीमदमरदासविरचितं भगवत्यष्टकं समाप्तम् ॥

|| iti śrīmadamaradāsaviracitaṃ bhagavatyaṣṭakaṃ samāptam ||