प्रातःसङ्कल्पगद्यम् Pratah Shankalpa Gadyam

ॐ लौकिकवैदिकभेदभिन्नवर्णात्मकध्वन्यात्मकाशेषशब्दार्थऋगादिसर्ववेदार्थविष्णुमन्त्रार्थपुरुषसूक्तार्थगायत्र्यर्थश्रीमन्नारायणाष्टाक्षरमन्त्रार्थवासुदेवद्वादशाक्षरमन्त्रान्तर्गतान्त्यचतुरक्षरार्थव्याहृत्यर्थमातृकामन्त्रार्थ प्रणवोपासकानां, पापाविद्धदैत्यपूगाविद्ध श्रीविष्णुभक्त्याद्यनन्तगुणपरिपूर्ण रमाव्यतिरिक्तपूर्वप्रसिद्ध व्यतिरिक्तानन्तवेदप्रतिपाद्यमुख्यतमाअनन्तजीवनियामका अनन्तरूपभगवत्कार्यसाधकपरमदयालुक्षमासमुद्रभक्तवत्सलभक्तापराधसहिष्णुश्रीमुख्यप्राणावतारभूतानां,अज्ञज्ञानार्थिज्ञानयोग्य भगवत्कृपापात्रभूतसल्लोककृपालु ब्रह्मरुद्राद्यर्थितभगवदाज्ञां शिरसि परमादरेण अनर्घ्यशिरोरत्नवन्निधाय तथाऽशेष देवताप्रार्थनानां हारवद्धृधि निधाय, सर्वस्वकीयसज्जनानुग्रहेच्छया कर्मभुव्यवतीर्णानां, तथाऽवतीर्य सकलसच्छास्त्रकर्तॄणां, सकलदुर्मतभञ्जकानां, अनादितः सत्सम्प्रदायपरम्पराप्राप्तश्रीमद्वैष्णवसिद्धान्तप्रतिष्ठापकानां,अत एव भगवत्परमानुग्रहपात्रभूतानां, सर्वदा भगवदाज्ञया भगवत्सन्निधौ पूज्यानां, तथा भगवता दत्तवराणां, द्वात्रिंशल्लक्षणोपेतानां, तथा समग्रगुरुलक्षणोपेतानां, असंशयानां, प्रसादमात्रेण स्वभक्ताशेषसंशयच्छेतॄणां,प्रणवाद्यशेष वैष्णवमन्त्रोद्धारकाणां, सर्वदा सर्ववैष्णवमन्त्रजापकानां, संसिद्धसप्तकोटिमहामन्त्राणां, भगवति भक्त्यतिशयेन भगवदुपासनार्थं स्वेच्छयागृहीतरूपाणां, तत्र तत्र पृथक् पृथक् भगवतोऽनन्तरूपेषु पृथक् पृथग्वेदोक्ततदनुक्तभारतोक्त तदनुक्तसम्प्रदायागत स्वेतरस्वाभिन्नतयाऽप्यशेषशक्तिविशेषाभ्यां, पृथग्व्यवहार विषयसर्वसामर्थ्योपेतनिरवधिकानन्तानवद्यकल्याणगुणपरिपूर्णानन्तगुणोपसंहर्तॄणांतथा वेदोक्तसर्वक्रियोपसंहर्तॄणां, एवं अनन्तरूपाअवयवगुण क्रियाजात्यवस्थाविशिष्टभगवदुपासकानां, परमदयालूनां, क्षमासमुद्राणां, भक्तवत्सलानां, भक्तापराधसहिष्णूनां, स्वभक्तान् दुर्मार्गातुद्धृत्य सन्मार्गस्थापकानां, स्वभक्तं मामुद्दिश्य भगवतः पुरः परमदयालो क्षमासमुद्र भक्तवत्सल भक्तापराधसहिष्णो त्वदधीनं दीनं दूनं अनाथं शरणागतमनेनमुद्धरेति विज्ञापनकर्तॄणां,सर्वज्ञशिरोमणीनां, अशेषगुर्वन्तर्यामिणां, सदाभगवत्पराणां, भगवतोऽन्यत्रसर्ववस्तुषु मनःसङ्गरहितानां, सर्वत्र सर्वदा सर्वाकारसर्वाधारसर्वाश्रयसर्वोत्पादकसर्वपालकसर्वसंहारकसर्वनियामकसर्वप्रेरकसर्वप्रवर्तकसर्वनिवर्तकयथायोग्यं सर्वज्ञानाज्ञानबन्धमोक्षप्रदसर्वसत्ताप्रद सर्वशब्दवाच्यसर्वशब्दप्रवृत्तिनिमित्तसर्वगुणातिपरिपूर्णमुख्यतमसर्वदोषातिदूरसर्वाचिन्त्यसर्वोत्तमसर्वेश्वरसर्वात्यन्तविलक्षणस्वगतभेदविवर्जितत्वादिनाभगवद्द्रष्टॄणां,अभिमानादि सर्वदोषदूराणां, असूयेर्ष्यादिअशेषमनोदोषनिवर्तकानां, नित्यापरोक्षीकृतरमायुक्ताशेषभगवद्रूपाणां, अत एव विलीनाशेषप्रकृतिबन्धानां अत एव दूरोत्सारिताशेषानिष्टानां, अथ एव अशेषभक्ताशेषानिष्टनिवर्तकानां, प्रणवोपासकानां, अस्मदादिगुरूणां, श्रीमदानन्दतीर्थश्रीमच्चरणानां अन्तर्यामिन्अनिरुद्धप्रद्युम्नसङ्कर्षणवासुदेवात्मक श्रीमध्ववल्लभ श्रीलक्ष्मीवेदव्यासात्मकाण्डस्थितानन्तरूपावयवगुणक्रियाजात्यवस्थाविशिष्टरमायुक्तक्षीराब्धिशेषशायि श्रीपद्मनाभात्मक अण्डाद्बहिरभिव्यक्तशुद्धसृष्टित्वेनाभिमतश्रीचतुर्मुखमुख्यप्राणोपास्यत्वादिअनेकप्रयोजनकानन्तानन्तरूपमूलभूततथाऽशेषजगत्पालनप्रयोजनकशान्तिपतिअनिरुद्धमूलभूत तथाऽशेषजगत्सृष्टिप्रयोजनककृतिपतिप्रद्युम्नमूलभूत तथाऽशेषजगत्संहारप्रयोजनकजयापतिसङ्कर्षणमूलभूत तथा स्वस्वसमग्रयोग्यताभिज्ञ परमानुग्रहशीलभगवत्प्रेरितचतुर्मुखादिसद्गुरूपदिष्टस्वस्वयोग्यभगवद्रूपगुणोपासनया सञ्जातस्वस्वयोग्यभगवद्रूपविशेषदर्शनभोगाभ्यां विनष्टानिष्टसञ्चितप्रारब्धलक्षणाशेषकर्माणां, स्वस्वयोग्यतानुसारेण सम्पूर्णसाधनानां, पूर्वकल्पे ब्रह्मणा सह विरजानदीस्नानेन त्यक्तलिङ्गानां, तथा विनष्टावशिष्टेष्टाशेषप्रारब्धकर्माणां प्रलयकाले भगवदुदरे वसतांआनन्दमात्रवपुषां, तदनुभवरहितानां स्वस्वयोग्यभगवद्रूपविशेषध्यानरतानां, सृष्टिकाले भगवदाज्ञया भगवदुदराद्बहिर्निर्गतानां श्रीश्वेतद्वीपदर्शनं निमित्तीकृत्य प्रधानावरणभूतस्वेच्छापसरेण स्वस्वयोग्यआनन्दाविर्भावलक्षणमुक्तिप्रदानप्रयोजनकमायापति श्रीवासुदेवात्मकलक्ष्म्यात्मकप्रलयाब्धिस्थश्रीवटपत्रशायिअशेषजगदुदराशेषमुक्तनाभिदेशोर्ध्वभागकुक्ष्याख्यदेशत्रिविधाशेषसंसारिनाभिदेशाखिलतमः पतितनाभ्यधोभागदेशश्रीभूम्यालिङ्गितकालादिचेष्टकपरमाण्वादिअशेषकालावयवसृष्ट्यादिकर्तृशेषनामकपरमपुरुषनामक श्रीचतुर्मुखमुख्यप्राणोपासितचरणानिरुद्धादिचतूरूपात्मकगायत्रीनामकसवितृनामकरूपविशेषात्मकव्याप्तरूपबृहच्छरीरशून्याभिदकालाभिदकेवलाभिदब्रह्माभिदानन्ताभिधरूपविशेषात्मकनिरुपचरितमूलरूपनिरुपचरितव्याप्तप्रतिपाद्यानन्ततेजः पुञ्ज तादृशरमायुक्तरूपविशेषात्मकगायत्रीभूतवाक्पृथिवीशरीरहृदयभेदेन षड्विधगायत्रीनामक लोकवेदसमीररमान्तर्गतप्रणवाख्य तुरीयपादोपेतगायत्रीपादचतुष्टयप्रतिपाद्यवैकुण्ठस्थितानन्तासनस्थितश्वेतद्वीपस्थितसर्वजीवस्थितरूपभेदेन चतूरूपात्मक देहव्याप्तदेहान्तर्यामिजीवव्याप्तजीवन्तर्यामिरूपभेदेन चतूरूपात्मकनिरुपचरितसर्ववागर्थप्रतिपादक श्रीदेव्यादिरमारूपाष्टकाभिमन्यमानचक्रशङ्खवराभययुक्तहस्तचतुष्टयोपेतप्रदीपवर्णसर्वाभरणभूषितविश्वादिभगवद्रूपाष्टकप्रतिपादकाकाराद्यष्टाक्षरात्मकश्रीमद्प्रणवाद्यष्टमहामन्त्रप्रतिपाद्यष्टरूपात्मकमन्त्राध्यायोक्तभूवराहाद्यशेषवैष्णवमन्त्रप्रतिपाद्यभूवराहाद्यशेषरूपविशेषात्मकरमादिमन्त्रप्रतिपाद्यरमादिनिष्ठरमादिनामकरूपविशेषात्मक श्रीलक्ष्मीनृसिंहात्मकपरमदयालो, क्षमासमुद्र, भक्तवत्सल, भक्तापराधसहिष्णो, देशकालाधिपते देहेन्द्रियादिपते सूर्यवंशध्वज रघुकुलतिलकलक्ष्मणभरतशत्रुघ्नाग्रज श्रीहनुमदुपासितचरण सीतापते श्रीरामचन्द्र !त्वदाज्ञया त्वत्प्रसादात् त्वत्प्रेरणया त्वत्प्रीत्यर्थं त्वामुद्दिश्य त्वामनुस्मरन्नेव त्वदाज्ञया नियतेन मन्नियामकेन सत्ताप्रदवायुनामक चेष्टाप्रदप्राणनामकधारणाप्रदधर्मनामकमुक्तिप्रदभक्तिनामकरूपविशेषैः मद्धृदिस्थितेन परमदयालुना क्षमासमुद्रेण भक्तवत्सलेन भक्तापराधसहिष्णुना सर्वस्वामिना सर्वप्रेरकेण सर्वतात्त्विकदेवताप्रेरकेण, सर्वतात्त्विकासुरभञ्जकेन तथा तत्प्रेरणाप्रयुक्ताशेषदुर्मतभञ्जकेन, अत एव प्रभञ्जनशब्दवाच्येन,प्रतिदिनं प्रतिक्षणं बुद्धिशोधकेन, सर्वकर्मकर्त्रा सर्वकर्मकारयित्रा सर्वकर्मस्वामिना सर्वकर्मसमर्पकेण सर्वकर्मफलभोक्त्रा सर्वकर्मफलभोजयित्रा सर्वकर्मप्रेरकेण सर्वकर्मोद्बोधकेन सर्वकर्मशुद्धिप्रदेन सर्वकर्मसिद्धिप्रदेन सर्वकर्मनिष्ठेन सर्वकर्मसाक्षिणा सर्वकर्मनिष्ठभगवद्रूपोपासकेनअत एव अशेषजीवनिःसङ्ख्यानादिकालीनधर्माधर्मद्रष्टुस्वेच्छयोद्बोधकेन तद्वाचककपिलोपासकेन, रमाव्यतिरिक्तपूर्वप्रसिद्धव्यतिरिक्तानन्तवेदप्रतिपाद्यमुख्यतमेन, अनन्तगुणपरिपूर्णेन सर्वदोषदूरेण त्वच्चित्ताभिज्ञेन त्वच्चित्तानुसारिचित्तेन त्वत्परमानुग्रहपात्रभूतेन मद्योग्यताभिज्ञेन श्रीभारतीरमणेन रुद्राद्यशेषदेवतोपासितचरणेन मम सर्वास्ववस्थासु चित्रधा विचित्रधा त्वदुपासकेन, श्रीमुख्यप्राणेन प्रेरितः सन्त्वत्संस्मृतिपूर्वकं शयनात् समुत्थायाद्यतनं स्ववर्णाश्रमोचितं देशकालावस्थोचितं नित्यनैमित्तिककाम्यभेदेन त्रिविधं त्वत्पूजात्मकं कर्म यथाशक्ति यथाज्ञप्ति यथावैभवं करिष्ये । मदाज्ञाकारिभिः विद्यासम्बन्धिभिः देहसम्बन्धिभिश्च त्वदीयैः अशेषजनैः त्वत्सर्वकर्मकर्तृत्वकारयितृत्वादिअनुसन्धानपूर्वकं कारयिष्ये च ॥इति श्रीराघवेन्द्राख्ययतिना कृतमञ्जसा ।प्रातः सङ्कल्पगद्यं स्यात् प्रीत्यै माधव मध्वयोः ॥

oṃ laukikavaidikabhedabhinnavarṇātmakadhvanyātmakāśeṣaśabdārthaṛgādisarvavedārthaviṣṇumantrārthapuruṣasūktārthagāyatryarthaśrīmannārāyaṇāṣṭākṣaramantrārthavāsudevadvādaśākṣaramantrāntargatāntyacaturakṣarārthavyāhṛtyarthamātṛkāmantrārtha praṇavopāsakānāṃ, pāpāviddhadaityapūgāviddha śrīviṣṇubhaktyādyanantaguṇaparipūrṇa ramāvyatiriktapūrvaprasiddha vyatiriktānantavedapratipādyamukhyatamāanantajīvaniyāmakā anantarūpabhagavatkāryasādhakaparamadayālukṣamāsamudrabhaktavatsalabhaktāparādhasahiṣṇuśrīmukhyaprāṇāvatārabhūtānāṃ,ajñajñānārthijñānayogya bhagavatkṛpāpātrabhūtasallokakṛpālu brahmarudrādyarthitabhagavadājñāṃ śirasi paramādareṇa anarghyaśiroratnavannidhāya tathā'śeṣa devatāprārthanānāṃ hāravaddhṛdhi nidhāya, sarvasvakīyasajjanānugrahecchayā karmabhuvyavatīrṇānāṃ, tathā'vatīrya sakalasacchāstrakartṝṇāṃ, sakaladurmatabhañjakānāṃ, anāditaḥ satsampradāyaparamparāprāptaśrīmadvaiṣṇavasiddhāntapratiṣṭhāpakānāṃ,ata eva bhagavatparamānugrahapātrabhūtānāṃ, sarvadā bhagavadājñayā bhagavatsannidhau pūjyānāṃ, tathā bhagavatā dattavarāṇāṃ, dvātriṃśallakṣaṇopetānāṃ, tathā samagragurulakṣaṇopetānāṃ, asaṃśayānāṃ, prasādamātreṇa svabhaktāśeṣasaṃśayacchetṝṇāṃ,praṇavādyaśeṣa vaiṣṇavamantroddhārakāṇāṃ, sarvadā sarvavaiṣṇavamantrajāpakānāṃ, saṃsiddhasaptakoṭimahāmantrāṇāṃ, bhagavati bhaktyatiśayena bhagavadupāsanārthaṃ svecchayāgṛhītarūpāṇāṃ, tatra tatra pṛthak pṛthak bhagavato'nantarūpeṣu pṛthak pṛthagvedoktatadanuktabhāratokta tadanuktasampradāyāgata svetarasvābhinnatayā'pyaśeṣaśaktiviśeṣābhyāṃ, pṛthagvyavahāra viṣayasarvasāmarthyopetaniravadhikānantānavadyakalyāṇaguṇaparipūrṇānantaguṇopasaṃhartṝṇāṃtathā vedoktasarvakriyopasaṃhartṝṇāṃ, evaṃ anantarūpāavayavaguṇa kriyājātyavasthāviśiṣṭabhagavadupāsakānāṃ, paramadayālūnāṃ, kṣamāsamudrāṇāṃ, bhaktavatsalānāṃ, bhaktāparādhasahiṣṇūnāṃ, svabhaktān durmārgātuddhṛtya sanmārgasthāpakānāṃ, svabhaktaṃ māmuddiśya bhagavataḥ puraḥ paramadayālo kṣamāsamudra bhaktavatsala bhaktāparādhasahiṣṇo tvadadhīnaṃ dīnaṃ dūnaṃ anāthaṃ śaraṇāgatamanenamuddhareti vijñāpanakartṝṇāṃ,sarvajñaśiromaṇīnāṃ, aśeṣagurvantaryāmiṇāṃ, sadābhagavatparāṇāṃ, bhagavato'nyatrasarvavastuṣu manaḥsaṅgarahitānāṃ, sarvatra sarvadā sarvākārasarvādhārasarvāśrayasarvotpādakasarvapālakasarvasaṃhārakasarvaniyāmakasarvaprerakasarvapravartakasarvanivartakayathāyogyaṃ sarvajñānājñānabandhamokṣapradasarvasattāprada sarvaśabdavācyasarvaśabdapravṛttinimittasarvaguṇātiparipūrṇamukhyatamasarvadoṣātidūrasarvācintyasarvottamasarveśvarasarvātyantavilakṣaṇasvagatabhedavivarjitatvādinābhagavaddraṣṭṝṇāṃ,abhimānādi sarvadoṣadūrāṇāṃ, asūyerṣyādiaśeṣamanodoṣanivartakānāṃ, nityāparokṣīkṛtaramāyuktāśeṣabhagavadrūpāṇāṃ, ata eva vilīnāśeṣaprakṛtibandhānāṃ ata eva dūrotsāritāśeṣāniṣṭānāṃ, atha eva aśeṣabhaktāśeṣāniṣṭanivartakānāṃ, praṇavopāsakānāṃ, asmadādigurūṇāṃ, śrīmadānandatīrthaśrīmaccaraṇānāṃ antaryāminaniruddhapradyumnasaṅkarṣaṇavāsudevātmaka śrīmadhvavallabha śrīlakṣmīvedavyāsātmakāṇḍasthitānantarūpāvayavaguṇakriyājātyavasthāviśiṣṭaramāyuktakṣīrābdhiśeṣaśāyi śrīpadmanābhātmaka aṇḍādbahirabhivyaktaśuddhasṛṣṭitvenābhimataśrīcaturmukhamukhyaprāṇopāsyatvādianekaprayojanakānantānantarūpamūlabhūtatathā'śeṣajagatpālanaprayojanakaśāntipatianiruddhamūlabhūta tathā'śeṣajagatsṛṣṭiprayojanakakṛtipatipradyumnamūlabhūta tathā'śeṣajagatsaṃhāraprayojanakajayāpatisaṅkarṣaṇamūlabhūta tathā svasvasamagrayogyatābhijña paramānugrahaśīlabhagavatpreritacaturmukhādisadgurūpadiṣṭasvasvayogyabhagavadrūpaguṇopāsanayā sañjātasvasvayogyabhagavadrūpaviśeṣadarśanabhogābhyāṃ vinaṣṭāniṣṭasañcitaprārabdhalakṣaṇāśeṣakarmāṇāṃ, svasvayogyatānusāreṇa sampūrṇasādhanānāṃ, pūrvakalpe brahmaṇā saha virajānadīsnānena tyaktaliṅgānāṃ, tathā vinaṣṭāvaśiṣṭeṣṭāśeṣaprārabdhakarmāṇāṃ pralayakāle bhagavadudare vasatāṃānandamātravapuṣāṃ, tadanubhavarahitānāṃ svasvayogyabhagavadrūpaviśeṣadhyānaratānāṃ, sṛṣṭikāle bhagavadājñayā bhagavadudarādbahirnirgatānāṃ śrīśvetadvīpadarśanaṃ nimittīkṛtya pradhānāvaraṇabhūtasvecchāpasareṇa svasvayogyaānandāvirbhāvalakṣaṇamuktipradānaprayojanakamāyāpati śrīvāsudevātmakalakṣmyātmakapralayābdhisthaśrīvaṭapatraśāyiaśeṣajagadudarāśeṣamuktanābhideśordhvabhāgakukṣyākhyadeśatrividhāśeṣasaṃsārinābhideśākhilatamaḥ patitanābhyadhobhāgadeśaśrībhūmyāliṅgitakālādiceṣṭakaparamāṇvādiaśeṣakālāvayavasṛṣṭyādikartṛśeṣanāmakaparamapuruṣanāmaka śrīcaturmukhamukhyaprāṇopāsitacaraṇāniruddhādicatūrūpātmakagāyatrīnāmakasavitṛnāmakarūpaviśeṣātmakavyāptarūpabṛhaccharīraśūnyābhidakālābhidakevalābhidabrahmābhidānantābhidharūpaviśeṣātmakanirupacaritamūlarūpanirupacaritavyāptapratipādyānantatejaḥ puñja tādṛśaramāyuktarūpaviśeṣātmakagāyatrībhūtavākpṛthivīśarīrahṛdayabhedena ṣaḍvidhagāyatrīnāmaka lokavedasamīraramāntargatapraṇavākhya turīyapādopetagāyatrīpādacatuṣṭayapratipādyavaikuṇṭhasthitānantāsanasthitaśvetadvīpasthitasarvajīvasthitarūpabhedena catūrūpātmaka dehavyāptadehāntaryāmijīvavyāptajīvantaryāmirūpabhedena catūrūpātmakanirupacaritasarvavāgarthapratipādaka śrīdevyādiramārūpāṣṭakābhimanyamānacakraśaṅkhavarābhayayuktahastacatuṣṭayopetapradīpavarṇasarvābharaṇabhūṣitaviśvādibhagavadrūpāṣṭakapratipādakākārādyaṣṭākṣarātmakaśrīmadpraṇavādyaṣṭamahāmantrapratipādyaṣṭarūpātmakamantrādhyāyoktabhūvarāhādyaśeṣavaiṣṇavamantrapratipādyabhūvarāhādyaśeṣarūpaviśeṣātmakaramādimantrapratipādyaramādiniṣṭharamādināmakarūpaviśeṣātmaka śrīlakṣmīnṛsiṃhātmakaparamadayālo, kṣamāsamudra, bhaktavatsala, bhaktāparādhasahiṣṇo, deśakālādhipate dehendriyādipate sūryavaṃśadhvaja raghukulatilakalakṣmaṇabharataśatrughnāgraja śrīhanumadupāsitacaraṇa sītāpate śrīrāmacandra !tvadājñayā tvatprasādāt tvatpreraṇayā tvatprītyarthaṃ tvāmuddiśya tvāmanusmaranneva tvadājñayā niyatena manniyāmakena sattāpradavāyunāmaka ceṣṭāpradaprāṇanāmakadhāraṇāpradadharmanāmakamuktipradabhaktināmakarūpaviśeṣaiḥ maddhṛdisthitena paramadayālunā kṣamāsamudreṇa bhaktavatsalena bhaktāparādhasahiṣṇunā sarvasvāminā sarvaprerakeṇa sarvatāttvikadevatāprerakeṇa, sarvatāttvikāsurabhañjakena tathā tatpreraṇāprayuktāśeṣadurmatabhañjakena, ata eva prabhañjanaśabdavācyena,pratidinaṃ pratikṣaṇaṃ buddhiśodhakena, sarvakarmakartrā sarvakarmakārayitrā sarvakarmasvāminā sarvakarmasamarpakeṇa sarvakarmaphalabhoktrā sarvakarmaphalabhojayitrā sarvakarmaprerakeṇa sarvakarmodbodhakena sarvakarmaśuddhipradena sarvakarmasiddhipradena sarvakarmaniṣṭhena sarvakarmasākṣiṇā sarvakarmaniṣṭhabhagavadrūpopāsakenaata eva aśeṣajīvaniḥsaṅkhyānādikālīnadharmādharmadraṣṭusvecchayodbodhakena tadvācakakapilopāsakena, ramāvyatiriktapūrvaprasiddhavyatiriktānantavedapratipādyamukhyatamena, anantaguṇaparipūrṇena sarvadoṣadūreṇa tvaccittābhijñena tvaccittānusāricittena tvatparamānugrahapātrabhūtena madyogyatābhijñena śrībhāratīramaṇena rudrādyaśeṣadevatopāsitacaraṇena mama sarvāsvavasthāsu citradhā vicitradhā tvadupāsakena, śrīmukhyaprāṇena preritaḥ santvatsaṃsmṛtipūrvakaṃ śayanāt samutthāyādyatanaṃ svavarṇāśramocitaṃ deśakālāvasthocitaṃ nityanaimittikakāmyabhedena trividhaṃ tvatpūjātmakaṃ karma yathāśakti yathājñapti yathāvaibhavaṃ kariṣye | madājñākāribhiḥ vidyāsambandhibhiḥ dehasambandhibhiśca tvadīyaiḥ aśeṣajanaiḥ tvatsarvakarmakartṛtvakārayitṛtvādianusandhānapūrvakaṃ kārayiṣye ca ||iti śrīrāghavendrākhyayatinā kṛtamañjasā |prātaḥ saṅkalpagadyaṃ syāt prītyai mādhava madhvayoḥ ||

॥ इति श्रीराघवेन्द्रतीर्थप्रणीत प्रातः सङ्कल्पगद्यम् ॥

|| iti śrīrāghavendratīrthapraṇīta prātaḥ saṅkalpagadyam ||