प्रणामप्रणयस्तवम् Pranamapranayastavam

कन्दर्पकोटिरम्याय स्फुरदिन्दीवरत्विषे ।जगन्मोहनलीलाय नमो गोपेन्द्रसूनवे॥ १॥

kandarpakoṭiramyāya sphuradindīvaratviṣe |jaganmohanalīlāya namo gopendrasūnave|| 1||

कृष्णलाकृतहाराय कृष्णलावण्यशालिने ।कृष्णाकूलकरीन्द्राय कृष्णाय करवै नमः ॥ २॥

kṛṣṇalākṛtahārāya kṛṣṇalāvaṇyaśāline |kṛṣṇākūlakarīndrāya kṛṣṇāya karavai namaḥ || 2||

सर्वानन्दकदम्बाय कदम्बकुसुमस्रजे ।नमः प्रेमावलम्बाय प्रलम्बारिकनीयसे ॥ ३॥

sarvānandakadambāya kadambakusumasraje |namaḥ premāvalambāya pralambārikanīyase || 3||

कुण्डलस्फुरदंसाय वंशायत्तमुखश्रिये ।राधामानसहंसाय व्रजोत्तंसाय ते नमः ॥ ४॥

kuṇḍalasphuradaṃsāya vaṃśāyattamukhaśriye |rādhāmānasahaṃsāya vrajottaṃsāya te namaḥ || 4||

नमः शिखण्डचूडाय दण्डमण्डितपाणये ।कुण्डलीकृतपुष्पाय पुण्डरीकेक्षणाय ते ॥ ५॥

namaḥ śikhaṇḍacūḍāya daṇḍamaṇḍitapāṇaye |kuṇḍalīkṛtapuṣpāya puṇḍarīkekṣaṇāya te || 5||

राधिकाप्रेममाध्वीकमाधुरीमुदितान्तरम्।कन्दर्पवृन्दसौन्दर्यं गोविन्दमभिवादये ॥ ६॥

rādhikāpremamādhvīkamādhurīmuditāntaram|kandarpavṛndasaundaryaṃ govindamabhivādaye || 6||

शृङ्गाररसशृङ्गारं कर्णिकारात्तकर्णिम् ।वन्दे श्रिया नवाभ्राणां बिभ्राणां विभ्रमं हरिम् ॥ ७॥

śṛṅgārarasaśṛṅgāraṃ karṇikārāttakarṇim |vande śriyā navābhrāṇāṃ bibhrāṇāṃ vibhramaṃ harim || 7||

साध्वीव्रतमणिव्रातपश्यतोहरवेणवे ।कल्हारकृतचूडाय शङ्खचूडभिदे नमः ॥ ८॥

sādhvīvratamaṇivrātapaśyatoharaveṇave |kalhārakṛtacūḍāya śaṅkhacūḍabhide namaḥ || 8||

राधिकाधरबन्धूकमकरन्दमधुव्रजम् ।दैत्यसिन्धुरपारीन्द्रं वन्दे गोपेन्द्रनन्दनम् ॥ ९॥

rādhikādharabandhūkamakarandamadhuvrajam |daityasindhurapārīndraṃ vande gopendranandanam || 9||

बर्हेन्द्रायुधरम्याय जगज्जीवनदायिने ।राधाविद्युद्वृताङ्गाय कृष्णाम्भोदाय तै नमः ॥ १०॥

barhendrāyudharamyāya jagajjīvanadāyine |rādhāvidyudvṛtāṅgāya kṛṣṇāmbhodāya tai namaḥ || 10||

प्रेमान्धवल्लवीवृन्दलोचनेन्दीवरेन्दवे ।काश्मीरतिलकाढ्याय नमः पीताम्बराय ते ॥ ११॥

premāndhavallavīvṛndalocanendīvarendave |kāśmīratilakāḍhyāya namaḥ pītāmbarāya te || 11||

गीर्वाणेशमदोद्दामदावनिर्वाणनीरदम् ।कुन्दुकीकृतशैलेन्द्रं वन्दे गोकुलबान्धवम् ॥ १२॥

gīrvāṇeśamadoddāmadāvanirvāṇanīradam |kundukīkṛtaśailendraṃ vande gokulabāndhavam || 12||

दैन्यार्णवे निमग्नोऽस्मि मन्तुग्रावमदार्दितः ।दुष्टे कारुण्यपारीण मयि कृष्ण कृपां कुरु ॥ १३॥

dainyārṇave nimagno'smi mantugrāvamadārditaḥ |duṣṭe kāruṇyapārīṇa mayi kṛṣṇa kṛpāṃ kuru || 13||

आधारोऽप्यपराधानामविवेकहतोऽप्यहम् ।त्वत्कारुण्यप्रतीक्षोऽस्मि प्रसीद मयि माधव ॥ १४॥

ādhāro'pyaparādhānāmavivekahato'pyaham |tvatkāruṇyapratīkṣo'smi prasīda mayi mādhava || 14||

इति प्रमाणप्रणयस्तवं समाप्तम् ॥

iti pramāṇapraṇayastavaṃ samāptam ||