मङ्गलाष्टकम् २ Mangalashtakam (2)

श्रीमत्पङ्कजविष्टरौ हरिहरौ वायुर्महेन्द्रोऽनलःचन्द्रो भास्करवित्तपालवरुणाः धर्माधिराजो ग्रहाः ।प्रद्युम्नो नलकूबरः सुरगजः चिन्तामणिः कौस्तुभःस्वामी शक्तिधरस्तु लाङ्गलधरः कुर्वन्तु नो मङ्गलम् ॥ १॥

śrīmatpaṅkajaviṣṭarau hariharau vāyurmahendro'nalaḥcandro bhāskaravittapālavaruṇāḥ dharmādhirājo grahāḥ |pradyumno nalakūbaraḥ suragajaḥ cintāmaṇiḥ kaustubhaḥsvāmī śaktidharastu lāṅgaladharaḥ kurvantu no maṅgalam || 1||

गौरी श्रीरदितिश्च कद्रु सुभगा भूतिः सुपर्णी शुभासावित्री तु सरस्वती वसुमती द्रौपद्यहल्या सती ।स्वाहा जाम्बवती सुरुक्ममभगिनी दुःस्वप्नविध्वंसिनीवेला चाम्बुनिधेः सुमीनमकरा कुर्वन्तु नो मङ्गलम् ॥ २॥

gaurī śrīraditiśca kadru subhagā bhūtiḥ suparṇī śubhāsāvitrī tu sarasvatī vasumatī draupadyahalyā satī |svāhā jāmbavatī surukmamabhaginī duḥsvapnavidhvaṃsinīvelā cāmbunidheḥ sumīnamakarā kurvantu no maṅgalam || 2||

नेत्राणां त्रितयं शिवं पशुपतेरग्नित्रयं पावनंयत्तद्विष्णुपदत्रयं त्रिभुवनं ख्यातं च रामत्रयम् ।गङ्गावाहपथत्रयं सुविमलं वेदत्रयं ब्राह्मणंसन्ध्यानां त्रितयं द्विजैः सुविहितं कुर्वन्तु नो मङ्गलम् ॥ ३॥

netrāṇāṃ tritayaṃ śivaṃ paśupateragnitrayaṃ pāvanaṃyattadviṣṇupadatrayaṃ tribhuvanaṃ khyātaṃ ca rāmatrayam |gaṅgāvāhapathatrayaṃ suvimalaṃ vedatrayaṃ brāhmaṇaṃsandhyānāṃ tritayaṃ dvijaiḥ suvihitaṃ kurvantu no maṅgalam || 3||

अश्वत्थो वटवृक्षः चन्दनतरुः मन्दारकल्पद्रुमौजम्बूनिम्बकदम्बचूतलरलाः वृक्षाश्च ये क्षीरिणः ।सर्वे ते फलसंयुताः प्रतिदिनं विभ्राजनं राजतेरम्यं चैत्ररथं च नन्दनवनं कुर्वन्तु नो मङ्गलम् ॥ ४॥

aśvattho vaṭavṛkṣaḥ candanataruḥ mandārakalpadrumaujambūnimbakadambacūtalaralāḥ vṛkṣāśca ye kṣīriṇaḥ |sarve te phalasaṃyutāḥ pratidinaṃ vibhrājanaṃ rājateramyaṃ caitrarathaṃ ca nandanavanaṃ kurvantu no maṅgalam || 4||

वाल्मीकिः सनकः सनन्दनतरू व्यासो वसिष्ठो भृगुःजाबालिर्जमदग्निकच्छजनकाः गर्गोऽङ्गिरा गौतमः ।मान्धाता ऋतुपर्णवैनसगरा धन्यो दिलीपो नलःपुण्यो धर्मसुतो ययातिनहुषौ कुर्वन्तु नो मङ्गलम् ॥ ५॥

vālmīkiḥ sanakaḥ sanandanatarū vyāso vasiṣṭho bhṛguḥjābālirjamadagnikacchajanakāḥ gargo'ṅgirā gautamaḥ |māndhātā ṛtuparṇavainasagarā dhanyo dilīpo nalaḥpuṇyo dharmasuto yayātinahuṣau kurvantu no maṅgalam || 5||

ब्रह्मा वेदपतिः शिवः पशुपतिः सूर्यश्च चक्षुष्पतिःशक्रो देवपतिर्यमः पितृपतिः स्कन्दश्च सेनापतिः ।यक्षो वित्तपतिः हरिश्च जगतां वायुः पतिः प्राणिनांइत्येते पतयः समेत्य सततं कुर्वन्तु नो मङ्गलम् ॥ ६॥

brahmā vedapatiḥ śivaḥ paśupatiḥ sūryaśca cakṣuṣpatiḥśakro devapatiryamaḥ pitṛpatiḥ skandaśca senāpatiḥ |yakṣo vittapatiḥ hariśca jagatāṃ vāyuḥ patiḥ prāṇināṃityete patayaḥ sametya satataṃ kurvantu no maṅgalam || 6||

गङ्गा सिन्धु सरस्वती च यमुना गोदावरी नर्मदाकावेरी सरयूर्महेन्द्रतनया चर्मण्वती वेदिका ।क्षिप्रा वेत्रवती महासुरनदी ख्याता च या गण्डकीपूर्णा पूर्णजलैः समुद्रसहिताः कुर्वन्तु नो मङ्गलम् ॥ ७॥

gaṅgā sindhu sarasvatī ca yamunā godāvarī narmadākāverī sarayūrmahendratanayā carmaṇvatī vedikā |kṣiprā vetravatī mahāsuranadī khyātā ca yā gaṇḍakīpūrṇā pūrṇajalaiḥ samudrasahitāḥ kurvantu no maṅgalam || 7||

लक्ष्मी कौस्तुभपारिजातकुसुमाः धन्वन्तरिश्चन्द्रमाःगावः कामदुघाः सुरेश्वरगजो रम्भादिदेवाङ्गनाः ।अश्वः सप्तमुखः सुधा हरिधनुः शङ्खो विषं चाम्बुधेःरत्नानीति चतुर्दश प्रतिदिनं कुर्वन्तु नो मङ्गलम् ॥ ८॥

lakṣmī kaustubhapārijātakusumāḥ dhanvantariścandramāḥgāvaḥ kāmadughāḥ sureśvaragajo rambhādidevāṅganāḥ |aśvaḥ saptamukhaḥ sudhā haridhanuḥ śaṅkho viṣaṃ cāmbudheḥratnānīti caturdaśa pratidinaṃ kurvantu no maṅgalam || 8||

इत्येतद्वरमङ्गलाष्टकमिदं पापौघविध्वंसनंपुण्यं सम्प्रति कालिदासकविना विप्रप्रबन्धीकृतम् ।यः प्रातः शृणुयात् समाहितमनाः नित्यं पठेत् भक्तिमान्गङ्गासागरसङ्गमे प्रतिदिनं प्राप्नोत्यसौ मङ्गलम् ॥ ९॥

ityetadvaramaṅgalāṣṭakamidaṃ pāpaughavidhvaṃsanaṃpuṇyaṃ samprati kālidāsakavinā vipraprabandhīkṛtam |yaḥ prātaḥ śṛṇuyāt samāhitamanāḥ nityaṃ paṭhet bhaktimāngaṅgāsāgarasaṅgame pratidinaṃ prāpnotyasau maṅgalam || 9||

इति कालिदासविरचितं मङ्गलाष्टकं सम्पूर्णम् ।

iti kālidāsaviracitaṃ maṅgalāṣṭakaṃ sampūrṇam |