देहस्थदेवताचक्रस्तोत्रम् Dehastha Devata Chakra Stotram

देहो देवालयः प्रोक्तः स्वात्मा देवः सनातनः ।त्यजेदज्ञाननिर्माल्यं सोऽहं भावेन पूजयेत् ॥ १॥

deho devālayaḥ proktaḥ svātmā devaḥ sanātanaḥ |tyajedajñānanirmālyaṃ so'haṃ bhāvena pūjayet || 1||

असुरसुरवृन्दवन्दितमभिमतवरवितरणे निरतम् ।दर्शनशताग्र्यपूज्यं प्राणतनुं गणपतिं वन्दे ॥ २॥

asurasuravṛndavanditamabhimatavaravitaraṇe niratam |darśanaśatāgryapūjyaṃ prāṇatanuṃ gaṇapatiṃ vande || 2||

वरवीरयोगिनीगणसिद्धावलिपूजिताङ्घ्रियुगलम् ।अपहृतविनयिजनार्तिं वटुकमपानाभिधं वन्दे ॥ ३॥

varavīrayoginīgaṇasiddhāvalipūjitāṅghriyugalam |apahṛtavinayijanārtiṃ vaṭukamapānābhidhaṃ vande || 3||

यद्धीबलेन विश्वं भक्तानां शिवपथं भाति ।तमहमवधानरूपं सद्गुरुममलं सदा वन्दे ॥ ४॥

yaddhībalena viśvaṃ bhaktānāṃ śivapathaṃ bhāti |tamahamavadhānarūpaṃ sadgurumamalaṃ sadā vande || 4||

आत्मीयविषयभोगैरिन्द्रियदेव्यः सदा हृदम्भोजे ।अभिपूजयन्ति यं तं चिन्मयमानन्दभैरवं वन्दे ॥ ५॥

ātmīyaviṣayabhogairindriyadevyaḥ sadā hṛdambhoje |abhipūjayanti yaṃ taṃ cinmayamānandabhairavaṃ vande || 5||

उदयावभासचर्वणलीलां विश्वस्य या करोत्यनिशम् ।आनन्दभैरवीं तां विमर्शरूपामहं वन्दे ॥ ६॥

udayāvabhāsacarvaṇalīlāṃ viśvasya yā karotyaniśam |ānandabhairavīṃ tāṃ vimarśarūpāmahaṃ vande || 6||

अर्चयति भैरवं या निश्चयकुसुमैः सुरेशपत्रस्था ।प्रणमामि बुद्धिरूपां ब्रह्माणीं तामहं सततम् ॥ ७॥

arcayati bhairavaṃ yā niścayakusumaiḥ sureśapatrasthā |praṇamāmi buddhirūpāṃ brahmāṇīṃ tāmahaṃ satatam || 7||

कुरुते भैरवपूजामनलदलस्थाऽभिमानकुसुमैर्या ।नित्यमहङ्कृतिरूपां वन्दे तां शाम्भवीमम्बाम् ॥ ८॥

kurute bhairavapūjāmanaladalasthā'bhimānakusumairyā |nityamahaṅkṛtirūpāṃ vande tāṃ śāmbhavīmambām || 8||

विदधाति भैरवार्चां दक्षिणदलगा विषेशकुसुमैर्या । (विकल्पकुसुमैर्या)नित्यं मनःस्वरूपां कौमारीं तामहं वन्दे ॥ ९॥

vidadhāti bhairavārcāṃ dakṣiṇadalagā viṣeśakusumairyā | (vikalpakusumairyā)nityaṃ manaḥsvarūpāṃ kaumārīṃ tāmahaṃ vande || 9||

नैरृतदलगा भैरवमर्चयते शब्दकुसुमैर्या ।प्रणमामि श्रुतिरूपां नित्यं तां वैष्णवीं शक्तिम् ॥ १०॥ (शब्दरूपाम्)

nairṛtadalagā bhairavamarcayate śabdakusumairyā |praṇamāmi śrutirūpāṃ nityaṃ tāṃ vaiṣṇavīṃ śaktim || 10|| (śabdarūpām)

पश्चिमदिग्दलसंस्था हृदयहरैः स्पर्शकुसुमैर्या ।तोषयति भैरवं तां त्वग्रूपधरां नमामि वाराहीम् ॥ ११॥

paścimadigdalasaṃsthā hṛdayaharaiḥ sparśakusumairyā |toṣayati bhairavaṃ tāṃ tvagrūpadharāṃ namāmi vārāhīm || 11||

वरतररूपविशेषैर्मारुतदिग्दलनिषण्णदेहा या ।पूजयति भैरवं तामिन्द्राणीं दृक्तनुं वन्दे ॥ १२॥

varatararūpaviśeṣairmārutadigdalaniṣaṇṇadehā yā |pūjayati bhairavaṃ tāmindrāṇīṃ dṛktanuṃ vande || 12||

धनपतिकिसलयनिलया या नित्यं विविधषड्रसाहारैः ।पूजयति भैरवं तां जिह्वाभिख्यां नमामि चामुण्डाम् ॥ १३॥

dhanapatikisalayanilayā yā nityaṃ vividhaṣaḍrasāhāraiḥ |pūjayati bhairavaṃ tāṃ jihvābhikhyāṃ namāmi cāmuṇḍām || 13||

ईशदलस्था भैरवमर्चयते परिमलैर्विचित्रैर्याप्रणमामि सर्वदा तां घ्राणाभिख्यां महालक्ष्मीम् ॥ १४॥

īśadalasthā bhairavamarcayate parimalairvicitrairyāpraṇamāmi sarvadā tāṃ ghrāṇābhikhyāṃ mahālakṣmīm || 14||

षड्दर्शनेषु पूज्यं षड्त्रिंशत्तत्त्वसंवलितम् ।आत्माभिख्यं सततं क्षेत्रपतिं सिद्धिदं वन्दे ॥ १५॥

ṣaḍdarśaneṣu pūjyaṃ ṣaḍtriṃśattattvasaṃvalitam |ātmābhikhyaṃ satataṃ kṣetrapatiṃ siddhidaṃ vande || 15||

संस्फुरदनुभवसारं सर्वान्तः सततसन्निहितम् ।नौमि सदोदितमित्थं निजदेहगदेवताचक्रम् ॥ १६॥

saṃsphuradanubhavasāraṃ sarvāntaḥ satatasannihitam |naumi sadoditamitthaṃ nijadehagadevatācakram || 16||

इति श्रीअभिनवगुप्तपादाचार्यकृतं देहस्थदेवताचक्रस्तोत्रं सम्पूर्णम् ॥

iti śrīabhinavaguptapādācāryakṛtaṃ dehasthadevatācakrastotraṃ sampūrṇam ||