अग्निस्तुतिः १ Agni Stuti Devaih Krita

(सौरपुराणे ६१अध्यायान्तर्गता)देवा ऊचुःजलभीरो जलोत्पन्न जलाजलजलेचर ।जलजामलपत्राक्ष यज्ञदेव हुताशन ॥ १॥

(saurapurāṇe 61adhyāyāntargatā)devā ūcuḥjalabhīro jalotpanna jalājalajalecara |jalajāmalapatrākṣa yajñadeva hutāśana || 1||

कृष्णकेतो कृष्णवर्त्मन्स्वर्गमार्गप्रदर्शक ।यज्ञाहुतिहुताहार यज्ञाहार हराकृते ॥ २॥

kṛṣṇaketo kṛṣṇavartmansvargamārgapradarśaka |yajñāhutihutāhāra yajñāhāra harākṛte || 2||

पूर्णगर्भ गवां गर्भ जय देव महाशन ।तमोहर महाहार स्वाहाभर्तर्नमोऽस्तु ते ॥ ३॥

pūrṇagarbha gavāṃ garbha jaya deva mahāśana |tamohara mahāhāra svāhābhartarnamo'stu te || 3||

हव्यवाहन सप्तार्चे चित्रभानो महायुते ।अनलाग्ने यज्ञमुख जय पावक सर्वग ॥ ४॥

havyavāhana saptārce citrabhāno mahāyute |analāgne yajñamukha jaya pāvaka sarvaga || 4||

विभावसो महाभाग वेदभाषार्थभाषण ।कृशानो ऋतुसम्भारप्रिय विश्वप्रभावन ॥ ५॥

vibhāvaso mahābhāga vedabhāṣārthabhāṣaṇa |kṛśāno ṛtusambhārapriya viśvaprabhāvana || 5||

सागराम्बुघृतं देव त्वमश्वमुखसंश्रितः ।पिबंश्चैवोद्गिरंश्चैव न तृप्तिमधिगच्छसि ॥ ६॥

sāgarāmbughṛtaṃ deva tvamaśvamukhasaṃśritaḥ |pibaṃścaivodgiraṃścaiva na tṛptimadhigacchasi || 6||

त्वं वाक्येष्वनुवाक्येषु निषत्सूपनिषत्सु च ।ब्राह्मणा ब्रह्मयोनिं त्वां स्तुवन्ति त्वत्परायणाः ॥ ७॥

tvaṃ vākyeṣvanuvākyeṣu niṣatsūpaniṣatsu ca |brāhmaṇā brahmayoniṃ tvāṃ stuvanti tvatparāyaṇāḥ || 7||

तुभ्यं कृत्वा नमो विप्राः स्वकर्मविहितां गतिम् ।ब्रह्मेन्द्रविष्णुरुद्राणां लोकान्सम्प्राप्नुवन्ति च ॥ ८॥

tubhyaṃ kṛtvā namo viprāḥ svakarmavihitāṃ gatim |brahmendraviṣṇurudrāṇāṃ lokānsamprāpnuvanti ca || 8||

त्वमन्तः सर्वभूतानां भुक्तं भोक्ता जगत्पते ।पचसे पचतां श्रेष्ठ त्रीँल्लोकान्सङ्क्षयिष्यसि ॥ ९॥

tvamantaḥ sarvabhūtānāṃ bhuktaṃ bhoktā jagatpate |pacase pacatāṃ śreṣṭha trīm̐llokānsaṅkṣayiṣyasi || 9||

साक्षी लोकत्रयस्यास्य त्वया तुल्यो न विद्यते ।शरणं भव देवानां विश्वत्रयमहेश्वर ॥ १०॥

sākṣī lokatrayasyāsya tvayā tulyo na vidyate |śaraṇaṃ bhava devānāṃ viśvatrayamaheśvara || 10||

इत्येवं स्तूयमानोऽसावुत्थाय ज्वलनस्तदा ।देवान्प्रदक्षिणीकृत्य ययौ शम्भुगृहं द्विजाः ॥ ११॥

ityevaṃ stūyamāno'sāvutthāya jvalanastadā |devānpradakṣiṇīkṛtya yayau śambhugṛhaṃ dvijāḥ || 11||

तत्रापश्यत्प्रतीहारं महादेवसमं बले ।पूजितं सेन्द्रकैर्देवैर्महादेवदिदृक्षुभिः ॥ १२॥

tatrāpaśyatpratīhāraṃ mahādevasamaṃ bale |pūjitaṃ sendrakairdevairmahādevadidṛkṣubhiḥ || 12||

इति सौरपुराणे एकषष्ठितमोऽध्यायान्तर्गता देवैः कृताअग्निस्तुतिः समाप्ता ।

iti saurapurāṇe ekaṣaṣṭhitamo'dhyāyāntargatā devaiḥ kṛtāagnistutiḥ samāptā |