शुक्रस्तोत्रम् ३ Shukrastotram 3

ॐ कवीश्वर नमस्तुभ्यं हव्यकव्यविदां वर ।उपासक सरस्वत्या मृतसञ्जीवनप्रिय ॥ १॥

oṃ kavīśvara namastubhyaṃ havyakavyavidāṃ vara |upāsaka sarasvatyā mṛtasañjīvanapriya || 1||

दैत्यपूज्य नमस्तुभ्यं दैत्येन्द्रशासनाकर ।नीतिशास्त्रकलाभिज्ञ बलिजीवप्रभावन ॥ २॥

daityapūjya namastubhyaṃ daityendraśāsanākara |nītiśāstrakalābhijña balijīvaprabhāvana || 2||

प्रह्लादपरमाह्लाद विरोचनगुरो सित ।आस्फूर्जज्जितशिष्यारे नमस्ते भृगुनन्दन ॥ ३॥

prahlādaparamāhlāda virocanaguro sita |āsphūrjajjitaśiṣyāre namaste bhṛgunandana || 3||

सुराशन सुरारातिचित्तसंस्थितिभावन ।उशना सकलप्राणिप्राणाश्रय नमोऽस्तु ते ॥ ४॥

surāśana surārāticittasaṃsthitibhāvana |uśanā sakalaprāṇiprāṇāśraya namo'stu te || 4||

नमस्ते खेचराधीश शुक्र शुक्लयशस्कर ।वारुण वारुणीनाथ मुक्तामणिसमप्रभ ॥ ५॥

namaste khecarādhīśa śukra śuklayaśaskara |vāruṇa vāruṇīnātha muktāmaṇisamaprabha || 5||

क्षीबचित्त कचोद्भूतिहेतो जीवरिपो नमः ।देवयानीययातीष्ट दुहितृस्थेयवत्सल ॥ ६॥

kṣībacitta kacodbhūtiheto jīvaripo namaḥ |devayānīyayātīṣṭa duhitṛstheyavatsala || 6||

वह्निकोणपते तुभ्यं नमस्ते खगनायक ।त्रिलोचन तृतीयाक्षिसंस्थित शुकवाहन ॥ ७॥

vahnikoṇapate tubhyaṃ namaste khaganāyaka |trilocana tṛtīyākṣisaṃsthita śukavāhana || 7||

इत्थं दैत्यगुरोः स्तोत्रं यः स्मरेन्मानवः सदा ।दशादौ गोचरे तस्य भवेद्विघ्नहरः सितः ॥ ८॥

itthaṃ daityaguroḥ stotraṃ yaḥ smarenmānavaḥ sadā |daśādau gocare tasya bhavedvighnaharaḥ sitaḥ || 8||

सोमतुल्या प्रभा यस्य चासुराणां गुरुस्तथा ।जेता यः सर्वशत्रूणां स काव्यः प्रीयतां मम ॥ ९॥

somatulyā prabhā yasya cāsurāṇāṃ gurustathā |jetā yaḥ sarvaśatrūṇāṃ sa kāvyaḥ prīyatāṃ mama || 9||

इति शुक्रस्तोत्रं सम्पूर्णम् ।

iti śukrastotraṃ sampūrṇam |