शुक्रकवचम् Shukrakavacham

श्रीगणेशाय नमः ।ॐ अस्य श्रीशुक्रकवचस्तोत्रमन्त्रस्य भारद्वाज ऋषिः ।अनुष्टुप्छन्दः । श्रीशुक्रो देवता ।शुक्रप्रीत्यर्थे जपे विनियोगः ॥मृणालकुन्देन्दुपयोजसुप्रभं पीताम्बरं प्रसृतमक्षमालिनम् ।समस्तशास्त्रार्थविधिं महान्तं ध्यायेत्कविं वाञ्छितमर्थसिद्धये ॥ १॥

śrīgaṇeśāya namaḥ |oṃ asya śrīśukrakavacastotramantrasya bhāradvāja ṛṣiḥ |anuṣṭupchandaḥ | śrīśukro devatā |śukraprītyarthe jape viniyogaḥ ||mṛṇālakundendupayojasuprabhaṃ pītāmbaraṃ prasṛtamakṣamālinam |samastaśāstrārthavidhiṃ mahāntaṃ dhyāyetkaviṃ vāñchitamarthasiddhaye || 1||

ॐ शिरो मे भार्गवः पातु भालं पातु ग्रहाधिपः ।नेत्रे दैत्यगुरुः पातु श्रोत्रे मे चन्दनद्युतिः ॥ २॥

oṃ śiro me bhārgavaḥ pātu bhālaṃ pātu grahādhipaḥ |netre daityaguruḥ pātu śrotre me candanadyutiḥ || 2||

पातु मे नासिकां काव्यो वदनं दैत्यवन्दितः ।वचनं चोशनाः पातु कण्ठं श्रीकण्ठभक्तिमान् ॥ ३॥

pātu me nāsikāṃ kāvyo vadanaṃ daityavanditaḥ |vacanaṃ cośanāḥ pātu kaṇṭhaṃ śrīkaṇṭhabhaktimān || 3||

भुजौ तेजोनिधिः पातु कुक्षिं पातु मनोव्रजः ।नाभिं भृगुसुतः पातु मध्यं पातु महीप्रियः ॥ ४॥

bhujau tejonidhiḥ pātu kukṣiṃ pātu manovrajaḥ |nābhiṃ bhṛgusutaḥ pātu madhyaṃ pātu mahīpriyaḥ || 4||

कटिं मे पातु विश्वात्मा ऊरू मे सुरपूजितः ।जानुं जाड्यहरः पातु जङ्घे ज्ञानवतां वरः ॥ ५॥

kaṭiṃ me pātu viśvātmā ūrū me surapūjitaḥ |jānuṃ jāḍyaharaḥ pātu jaṅghe jñānavatāṃ varaḥ || 5||

गुल्फौ गुणनिधिः पातु पातु पादौ वराम्बरः ।सर्वाण्यङ्गानि मे पातु स्वर्णमालापरिष्कृतः ॥ ६॥

gulphau guṇanidhiḥ pātu pātu pādau varāmbaraḥ |sarvāṇyaṅgāni me pātu svarṇamālāpariṣkṛtaḥ || 6||

य इदं कवचं दिव्यं पठति श्रद्धयान्वितः ।न तस्य जायते पीडा भार्गवस्य प्रसादतः ॥ ७॥

ya idaṃ kavacaṃ divyaṃ paṭhati śraddhayānvitaḥ |na tasya jāyate pīḍā bhārgavasya prasādataḥ || 7||

॥ इति श्रीब्रह्माण्डपुराणे शुक्रकवचं सम्पूर्णम् ॥

|| iti śrībrahmāṇḍapurāṇe śukrakavacaṃ sampūrṇam ||