ललितात्रिपुरसुन्दरीहृदयस्तोत्रम् Shri Lalitatripurasundari Hridayastotram

॥ श्रीललितात्रिपुरसुन्दर्यै नमः ॥॥ अथ श्रीमत् ललितात्रिपुरसुन्दरीहृदयस्तोत्रसाधना ॥ॐ शुद्धस्फटिकसङ्काशं द्विनेत्रं करुणानिधिम् ।वराभयकरं वन्दे श्रीगुरुं शिवरूपिणम् ॥ १॥

|| śrīlalitātripurasundaryai namaḥ |||| atha śrīmat lalitātripurasundarīhṛdayastotrasādhanā ||oṃ śuddhasphaṭikasaṅkāśaṃ dvinetraṃ karuṇānidhim |varābhayakaraṃ vande śrīguruṃ śivarūpiṇam || 1||

भक्ताज्ञानतमोभानुं मूर्ध्नि पङ्कजसंस्थितम् ।सदाशिवमयं नित्यं श्रीगुरुं प्रणमाम्यहम् ॥ २॥

bhaktājñānatamobhānuṃ mūrdhni paṅkajasaṃsthitam |sadāśivamayaṃ nityaṃ śrīguruṃ praṇamāmyaham || 2||

श्रीविद्यां जगतां धात्रीं सर्गस्थितिलयेश्वरीम् ।नमामि ललितां नित्यं महात्रिपुरसुन्दरीम् ॥ ३॥

śrīvidyāṃ jagatāṃ dhātrīṃ sargasthitilayeśvarīm |namāmi lalitāṃ nityaṃ mahātripurasundarīm || 3||

बिन्दुत्रिकोणसंयुक्तं वसुकोणसमन्वितम् ।दशकोणद्वयोपेतं भुवनारसमन्वितम् ॥ ४॥

bindutrikoṇasaṃyuktaṃ vasukoṇasamanvitam |daśakoṇadvayopetaṃ bhuvanārasamanvitam || 4||

दलाष्टकसमोपेतं दलषोडशकान्वितम् ।वृत्तत्रयान्वितं भूमिसदनत्रयभूषितम् ॥ ५॥

dalāṣṭakasamopetaṃ dalaṣoḍaśakānvitam |vṛttatrayānvitaṃ bhūmisadanatrayabhūṣitam || 5||

नमामि ललिताचक्रं भक्तानामेतदिष्टदम् ।अमृताम्भोनिधौ तत्र रत्नद्वीपं नमाम्यहम् ॥ ६॥

namāmi lalitācakraṃ bhaktānāmetadiṣṭadam |amṛtāmbhonidhau tatra ratnadvīpaṃ namāmyaham || 6||

नानावृक्षमहोद्यानं वन्देऽहं कल्पवाटिकाम् ।सन्तानवाटिकां वन्दे हरिचन्दनवाटिकाम् ॥ ७॥

nānāvṛkṣamahodyānaṃ vande'haṃ kalpavāṭikām |santānavāṭikāṃ vande haricandanavāṭikām || 7||

मन्दारवाटिकां वन्दे पारिजाताख्यवाटिकाम् ।नमामि तव देवेशि कदम्बवनवाटिकाम् ॥ ८॥

mandāravāṭikāṃ vande pārijātākhyavāṭikām |namāmi tava deveśi kadambavanavāṭikām || 8||

पुष्परागमहारत्नप्राकारं प्रणमाम्यहम् ।पद्मरागाख्यमणिभिः प्राकारं सर्वदा भजे ॥ ९॥

puṣparāgamahāratnaprākāraṃ praṇamāmyaham |padmarāgākhyamaṇibhiḥ prākāraṃ sarvadā bhaje || 9||

गोमेदरत्नप्राकारं वज्रप्राकारमाश्रये ।वैडूर्यरत्नप्राकारं प्रणमामि तवेश्वरि ॥ १०॥

gomedaratnaprākāraṃ vajraprākāramāśraye |vaiḍūryaratnaprākāraṃ praṇamāmi taveśvari || 10||

इन्द्रनीलाख्यरत्नानां प्राकारं प्रणमाम्यहम् ।मुक्तारत्नमयं चैव प्राकारं सर्वदा भजे ॥ ११॥

indranīlākhyaratnānāṃ prākāraṃ praṇamāmyaham |muktāratnamayaṃ caiva prākāraṃ sarvadā bhaje || 11||

मरकताख्यमहारत्नप्राकाराय नमस्तव ।विद्रुमाख्यमहारत्नप्राकारं तु तवाश्रये ॥ १२॥

marakatākhyamahāratnaprākārāya namastava |vidrumākhyamahāratnaprākāraṃ tu tavāśraye || 12||

माणिक्यमण्डपं वन्दे सहस्रस्तम्भमण्डपम् ।ललिते तव देवेशि भजाम्यमृतवापिकाम् ॥ १३॥

māṇikyamaṇḍapaṃ vande sahasrastambhamaṇḍapam |lalite tava deveśi bhajāmyamṛtavāpikām || 13||

आनन्दवापिकां वन्दे भजे चैव विमर्शिकाम् ।भजे बालातपोद्गारं चन्द्रिकोद्गारमाश्रये ॥ १४॥

ānandavāpikāṃ vande bhaje caiva vimarśikām |bhaje bālātapodgāraṃ candrikodgāramāśraye || 14||

महाशृङ्गारपरिखां महापद्माटवीं भजे ।चिन्तामणिमहारत्नगृहराजं नमाम्यहम् ॥ १५॥

mahāśṛṅgāraparikhāṃ mahāpadmāṭavīṃ bhaje |cintāmaṇimahāratnagṛharājaṃ namāmyaham || 15||

पूर्वाम्नायमयं पूर्वद्वारं देवि भजामि ते ।दक्षिणाम्नाय रूपं ते दक्षिणद्वारमाश्रये ॥ १६॥

pūrvāmnāyamayaṃ pūrvadvāraṃ devi bhajāmi te |dakṣiṇāmnāya rūpaṃ te dakṣiṇadvāramāśraye || 16||

नमामि ते परं द्वारं पश्चिमाम्नायरूपकम् ।वन्देऽहमुत्तरं द्वारमुत्तराम्नायरूपकम् ॥ १७॥

namāmi te paraṃ dvāraṃ paścimāmnāyarūpakam |vande'hamuttaraṃ dvāramuttarāmnāyarūpakam || 17||

ऊर्ध्वाम्नायमऽहं वन्दे ऊर्ध्वद्वारं कुलेश्वरि ।ललिते तव देवेशि महासिंहासनं भजे ॥ १८॥

ūrdhvāmnāyama'haṃ vande ūrdhvadvāraṃ kuleśvari |lalite tava deveśi mahāsiṃhāsanaṃ bhaje || 18||

ब्रह्मात्मकमञ्चपादमेकं तव नमाम्यहम् ।एकं विष्णुमयं मञ्चपादं तव नमाम्यहम् ॥ १९॥

brahmātmakamañcapādamekaṃ tava namāmyaham |ekaṃ viṣṇumayaṃ mañcapādaṃ tava namāmyaham || 19||

एकं रुद्रमयं मञ्चपादं तव नमाम्यहम् ।मञ्चपादं नमाम्येकं तव देवीश्वरात्मकम् ॥ २०॥

ekaṃ rudramayaṃ mañcapādaṃ tava namāmyaham |mañcapādaṃ namāmyekaṃ tava devīśvarātmakam || 20||

मञ्चैकफलकं वन्दे सदाशिवमयं शुभम् ।नमामि ते हंसतूलतलिमां परमेश्वरि ॥ २१॥

mañcaikaphalakaṃ vande sadāśivamayaṃ śubham |namāmi te haṃsatūlatalimāṃ parameśvari || 21||

भजामि ते हंसतूल महोपाधानमुत्तमम् ।कौसुम्भास्तरणं देवि तव नित्यं नमाम्यहम् ॥ २२॥

bhajāmi te haṃsatūla mahopādhānamuttamam |kausumbhāstaraṇaṃ devi tava nityaṃ namāmyaham || 22||

मानसपूजा ।महावितानकं वन्दे महाजवनिकां भजे ।एवं पूजागृहं ध्यात्वा श्रीचक्रस्य शिवप्रिये ॥ २३॥

mānasapūjā |mahāvitānakaṃ vande mahājavanikāṃ bhaje |evaṃ pūjāgṛhaṃ dhyātvā śrīcakrasya śivapriye || 23||

मद्दक्षिणे स्थापयामि भागे पुष्पाक्षतादिकम् ।अभितस्ते महादेवि दीपाँस्तान् दर्शयाम्यहम् ॥ २४॥

maddakṣiṇe sthāpayāmi bhāge puṣpākṣatādikam |abhitaste mahādevi dīpām̐stān darśayāmyaham || 24||

मूलेन त्रिपुराचक्रं तव सम्पूजयाम्यहम् ।त्रिभिःखण्डैस्तव त्र्यस्त्रं पूजयामि शिवप्रिये ॥ २५॥

mūlena tripurācakraṃ tava sampūjayāmyaham |tribhiḥkhaṇḍaistava tryastraṃ pūjayāmi śivapriye || 25||

वाय्वग्निजलसंयुक्तप्राणायामैरहं शिवे ।शोषणं दाहनं देवि करोम्याप्लावनं तथा ॥ २६॥

vāyvagnijalasaṃyuktaprāṇāyāmairahaṃ śive |śoṣaṇaṃ dāhanaṃ devi karomyāplāvanaṃ tathā || 26||

त्रिवारं मूलमन्त्रेण प्राणायामं करोम्यहम् ।अपसर्पन्तु ते भूता ये भूता भूमिसंस्थिताः ॥ २७॥

trivāraṃ mūlamantreṇa prāṇāyāmaṃ karomyaham |apasarpantu te bhūtā ye bhūtā bhūmisaṃsthitāḥ || 27||

ये भूता विघ्नकर्तारस्ते नश्यन्तु शिवाज्ञया ।करोम्यनेन मन्त्रेण तालत्रयमहं शिवे ॥ २८॥

ye bhūtā vighnakartāraste naśyantu śivājñayā |karomyanena mantreṇa tālatrayamahaṃ śive || 28||

नारायणोऽहं ब्रह्माऽहं भैरवोऽहं शिवोऽस्म्यहम् ।देवोऽहं परमात्माऽहं महात्रिपुरसुन्दरि ॥ २९॥

nārāyaṇo'haṃ brahmā'haṃ bhairavo'haṃ śivo'smyaham |devo'haṃ paramātmā'haṃ mahātripurasundari || 29||

ध्यात्वैवं वज्रकवचं न्यासं तव करोम्यहम् ।कुमारीबीजसंयुक्तं महात्रिपुरसुन्दरि ॥ ३०॥

dhyātvaivaṃ vajrakavacaṃ nyāsaṃ tava karomyaham |kumārībījasaṃyuktaṃ mahātripurasundari || 30||

मां रक्ष रक्षेति हृदि करोम्यञ्जलिमीश्वरि ।नमो देव्यासनायेति ते करोम्यासनं शिवे ॥ ३१॥

māṃ rakṣa rakṣeti hṛdi karomyañjalimīśvari |namo devyāsanāyeti te karomyāsanaṃ śive || 31||

चक्रासनं नमस्यामि सर्वमन्त्रासनं भजे ।साध्यसिद्धासनं वन्दे मन्त्रैरेभिर्महेश्वरि ॥ ३२॥

cakrāsanaṃ namasyāmi sarvamantrāsanaṃ bhaje |sādhyasiddhāsanaṃ vande mantrairebhirmaheśvari || 32||

करोम्यस्मिंश्चक्रमन्त्रदेवतासनमुत्तमम् ।करोम्यथ षडङ्गाख्यं मातृकाश्च करोम्यहम् ॥ ३३॥

karomyasmiṃścakramantradevatāsanamuttamam |karomyatha ṣaḍaṅgākhyaṃ mātṛkāśca karomyaham || 33||

वशिन्याद्यष्टकं न्यासं षोढान्यासं करोम्यहम् ।महाषोढां ततः कुर्वे नवयोन्याख्यमुत्तमम् ॥ ३४॥

vaśinyādyaṣṭakaṃ nyāsaṃ ṣoḍhānyāsaṃ karomyaham |mahāṣoḍhāṃ tataḥ kurve navayonyākhyamuttamam || 34||

चक्रन्यासं ततः कुर्वे श्रीकण्ठन्यासमुत्तमम् ।केशवादि महान्यासं कामन्यासं करोम्यहम् ॥ ३५॥

cakranyāsaṃ tataḥ kurve śrīkaṇṭhanyāsamuttamam |keśavādi mahānyāsaṃ kāmanyāsaṃ karomyaham || 35||

कलान्यासं ततः कुर्वे कुर्वे कामकलाह्वयम् ।पीठन्यासं ततः कुर्वे तत्त्वन्यासं करोम्यहम् ॥ ३६॥

kalānyāsaṃ tataḥ kurve kurve kāmakalāhvayam |pīṭhanyāsaṃ tataḥ kurve tattvanyāsaṃ karomyaham || 36||

ततः करोमि स्थित्यादिन्यासं तत् त्रिपुरेश्वरि ।ततः शुद्धोदकेनाहं वामभागे महेश्वरि ॥ ३७॥

tataḥ karomi sthityādinyāsaṃ tat tripureśvari |tataḥ śuddhodakenāhaṃ vāmabhāge maheśvari || 37||

करोमि मण्डलं वृत्तं चतुरस्रं शिवप्रिये ।पुष्पैरभ्यर्च्य साधारं शङ्खं संस्थापयाम्यहम् ॥ ३८॥

karomi maṇḍalaṃ vṛttaṃ caturasraṃ śivapriye |puṣpairabhyarcya sādhāraṃ śaṅkhaṃ saṃsthāpayāmyaham || 38||

अर्चयामि षडङ्गेन जलमापूरयाम्यहम् ।ददामि चादिमं बिन्दुं कुर्वे मूलाभिमन्त्रितम् ॥ ३९॥

arcayāmi ṣaḍaṅgena jalamāpūrayāmyaham |dadāmi cādimaṃ binduṃ kurve mūlābhimantritam || 39||

तज्जलेन जगन्मातस्त्रिकोणं वृत्तसंयुतम् ।षट्कोणं चतुरस्त्रं च मण्डलं प्रकरोम्यहम् ॥ ४०॥

tajjalena jaganmātastrikoṇaṃ vṛttasaṃyutam |ṣaṭkoṇaṃ caturastraṃ ca maṇḍalaṃ prakaromyaham || 40||

विद्यया पूजनं मध्ये खण्डैस्त्र्यस्त्राभिपूजनम् ।बीजावृत्या कोणषट्कं पूजयामि शिवप्रिये ॥ ४१॥

vidyayā pūjanaṃ madhye khaṇḍaistryastrābhipūjanam |bījāvṛtyā koṇaṣaṭkaṃ pūjayāmi śivapriye || 41||

तस्मिन् दशकलायुक्तमग्निमण्डलमाश्रये ।धूमार्चिषं नमस्यामि ऊष्मां च ज्वलिनीं भजे ॥ ४२॥

tasmin daśakalāyuktamagnimaṇḍalamāśraye |dhūmārciṣaṃ namasyāmi ūṣmāṃ ca jvalinīṃ bhaje || 42||

ज्वलिनीं च नमस्यामि वन्देऽहं विस्फुल्लिङ्गिनीम् ।सुश्रियं च सुरूपां च कपिलां प्रणमाम्यहम् ॥ ४३॥

jvalinīṃ ca namasyāmi vande'haṃ visphulliṅginīm |suśriyaṃ ca surūpāṃ ca kapilāṃ praṇamāmyaham || 43||

नौमि हव्यवहां नित्यं भजे कव्यवहां कलाम् ।यादिभिः सहिता वह्नेः कला दश तथा भजे ॥ ४४॥

naumi havyavahāṃ nityaṃ bhaje kavyavahāṃ kalām |yādibhiḥ sahitā vahneḥ kalā daśa tathā bhaje || 44||

सूर्यस्य मण्डलं तत्र कलाद्वादशकात्मकम् ।अर्घ्यपात्रे त्वऽहं वन्दे तपिनीं तापिनीं भजे ॥ ४५॥

sūryasya maṇḍalaṃ tatra kalādvādaśakātmakam |arghyapātre tva'haṃ vande tapinīṃ tāpinīṃ bhaje || 45||

धूम्रां मरीचिं वन्देऽहं ज्वालिनीं च रुचिं भजे ।सुषुम्णां भोगदां वन्दे भजे विश्वां च बोधिनीम् ॥ ४६॥

dhūmrāṃ marīciṃ vande'haṃ jvālinīṃ ca ruciṃ bhaje |suṣumṇāṃ bhogadāṃ vande bhaje viśvāṃ ca bodhinīm || 46||

धारिणीं च क्षमां वन्दे सौरा एताः कला भजे ।सोमस्य मण्डलं तत्र कलाः षोडशकात्मकाः ॥ ४७॥

dhāriṇīṃ ca kṣamāṃ vande saurā etāḥ kalā bhaje |somasya maṇḍalaṃ tatra kalāḥ ṣoḍaśakātmakāḥ || 47||

अर्घ्यामृतात्मकं वन्देऽमृतां मानदां स्तुवे ।पूषां तुष्टिं भजे पुष्टिं रतिं धृतिमहं भजे ॥ ४८॥

arghyāmṛtātmakaṃ vande'mṛtāṃ mānadāṃ stuve |pūṣāṃ tuṣṭiṃ bhaje puṣṭiṃ ratiṃ dhṛtimahaṃ bhaje || 48||

शशिनीं चन्द्रिकां वन्दे कान्तिं ज्योत्स्नां श्रियं भजे ।नौमि प्रीतिं चाङ्गदां च पूर्णां पूर्णामृतां भजे ॥ ४९॥

śaśinīṃ candrikāṃ vande kāntiṃ jyotsnāṃ śriyaṃ bhaje |naumi prītiṃ cāṅgadāṃ ca pūrṇāṃ pūrṇāmṛtāṃ bhaje || 49||

स्वरैः षोडशभिर्युक्ता भजे सोमस्य वै कलाः ।त्रिकोणलेखनं कुर्वे अकथादिसुरेखकम् ॥ ५०॥

svaraiḥ ṣoḍaśabhiryuktā bhaje somasya vai kalāḥ |trikoṇalekhanaṃ kurve akathādisurekhakam || 50||