ललितास्तवरत्नम् अथवा आर्या द्विशति Lalitastavaratnam By Durvasa

आर्या द्विशती च॥ श्री ललितास्तवरत्नम् पारायण क्रमः ॥वन्दे गजेन्द्रवदनं वामाङ्कारूढवल्लभाश्लिष्टम् ।कुङ्कुमपरागशोणं कुवल्यिनीजारकोरकापीडम् ॥अस्य श्री ललितास्तवरत्नमालामहामन्त्रस्य ।भगवान् श्रीदुर्वासा ऋषिः । पंक्तिः छन्दः ।सपरिवारश्रीललितामहात्रिपुरसुन्दरी देवता ॥ऐं तापिञ्चमेचकाभां तालीदलरचित कर्णताटङ्काम् ।ताम्बूलपूरितमुखीं ताम्राधरबिम्बदरहासाम् ॥ इति बीजम् ॥सौः धूर्तानामतिदूरा वार्ता शेषावलग्न कमनीया ।आर्तालीशुभदात्री वार्ताली भवतु वाञ्चितार्थाय ॥ इति शक्तिः ॥क्लीं आदिमरसावलम्बां अनिदम्प्रथमाक्तिवल्लरीकलिकाम् ।आब्रह्मकीटजननींमन्तः कलयामि सुन्दरीमनिशम् ॥ इति कीलकम् ॥मम सपरिवारश्रीललितामहात्रिपुरसुन्दरीप्रसादसिद्धिद्वारासर्वाभीष्टसिद्ध्यर्थे पारायणे विनियोगः ।कुङ्कुमललामभास्वन्निटिलां कुटिलतरछिल्लिका युगलाम् ।नालीकतुल्यनयनां नासाञ्चलनटितमौक्तिकाभरणाम् ॥अङ्गुष्ठाभ्यां नमः । हृदयाय नमः ॥ १॥

āryā dviśatī ca|| śrī lalitāstavaratnam pārāyaṇa kramaḥ ||vande gajendravadanaṃ vāmāṅkārūḍhavallabhāśliṣṭam |kuṅkumaparāgaśoṇaṃ kuvalyinījārakorakāpīḍam ||asya śrī lalitāstavaratnamālāmahāmantrasya |bhagavān śrīdurvāsā ṛṣiḥ | paṃktiḥ chandaḥ |saparivāraśrīlalitāmahātripurasundarī devatā ||aiṃ tāpiñcamecakābhāṃ tālīdalaracita karṇatāṭaṅkām |tāmbūlapūritamukhīṃ tāmrādharabimbadarahāsām || iti bījam ||sauḥ dhūrtānāmatidūrā vārtā śeṣāvalagna kamanīyā |ārtālīśubhadātrī vārtālī bhavatu vāñcitārthāya || iti śaktiḥ ||klīṃ ādimarasāvalambāṃ anidamprathamāktivallarīkalikām |ābrahmakīṭajananīṃmantaḥ kalayāmi sundarīmaniśam || iti kīlakam ||mama saparivāraśrīlalitāmahātripurasundarīprasādasiddhidvārāsarvābhīṣṭasiddhyarthe pārāyaṇe viniyogaḥ |kuṅkumalalāmabhāsvanniṭilāṃ kuṭilatarachillikā yugalām |nālīkatulyanayanāṃ nāsāñcalanaṭitamauktikābharaṇām ||aṅguṣṭhābhyāṃ namaḥ | hṛdayāya namaḥ || 1||

अङ्कुरित मन्दहासां अरुणाधरकान्तिविजितबिम्बाभाम् ।कस्तूरीमकरीयुतकपोलसंक्रान्तकनकताटङ्काम् ॥तर्जनीभ्यां नमः । शिरसे स्वाहा ॥ २॥

aṅkurita mandahāsāṃ aruṇādharakāntivijitabimbābhām |kastūrīmakarīyutakapolasaṃkrāntakanakatāṭaṅkām ||tarjanībhyāṃ namaḥ | śirase svāhā || 2||

कर्पूरसान्द्रवीटीकबलितवदनारविन्दकमनीयाम् ।कम्बुसहोदरकण्ठप्रलम्बमानाच्छमौक्तिककलापाम् ॥मध्यमाभ्यां नमः । शिखायै वषट् ॥ ३॥

karpūrasāndravīṭīkabalitavadanāravindakamanīyām |kambusahodarakaṇṭhapralambamānācchamauktikakalāpām ||madhyamābhyāṃ namaḥ | śikhāyai vaṣaṭ || 3||

कल्हारदामकोमल भुजयुगल स्फुरित रत्नकेयूराम् ।करपद्ममूलविलसत् काञ्चनमयकटकवलयसन्दोहाम् ॥अनामिकाभ्यां नमः । कवचाय हुं ॥ ४॥

kalhāradāmakomala bhujayugala sphurita ratnakeyūrām |karapadmamūlavilasat kāñcanamayakaṭakavalayasandohām ||anāmikābhyāṃ namaḥ | kavacāya huṃ || 4||

पाणिचतुष्टयविलसत्पाशाङ्कुशपुण्ड्रचापपुष्पास्राम् ।कूलङ्कषकुचशिखरां कुङ्कुमकर्दमितरत्नकूर्पासाम् ॥कनिष्ठिकाभ्यां नमः । नेत्रत्रयाय वौषट् ॥ ५॥

pāṇicatuṣṭayavilasatpāśāṅkuśapuṇḍracāpapuṣpāsrām |kūlaṅkaṣakucaśikharāṃ kuṅkumakardamitaratnakūrpāsām ||kaniṣṭhikābhyāṃ namaḥ | netratrayāya vauṣaṭ || 5||

कमलभवकञ्जलोचनकिरीटरत्नांशुरञ्जितपदाब्जाम् ।उन्मस्तकानुकम्पामुत्तरलापाङ्कपोषितानङ्गाम् ॥करतलकरपृष्ठाभ्यां नमः । अस्त्राय फट् ।भूर्भुवस्सुवरोमिति दिग्बन्धः ॥ ६॥

kamalabhavakañjalocanakirīṭaratnāṃśurañjitapadābjām |unmastakānukampāmuttaralāpāṅkapoṣitānaṅgām ||karatalakarapṛṣṭhābhyāṃ namaḥ | astrāya phaṭ |bhūrbhuvassuvaromiti digbandhaḥ || 6||

॥ ध्यानम् ॥आदिमरसावलम्बाम् अनिदम्प्रथमोक्तिवल्लरीकलिकाम् ।आब्रह्मकीटजननीं अन्तः कलयामि सुन्दरीमनिशम् ॥ १॥

|| dhyānam ||ādimarasāvalambām anidamprathamoktivallarīkalikām |ābrahmakīṭajananīṃ antaḥ kalayāmi sundarīmaniśam || 1||

नतजनसुलभाय नमो नालीकसनाभिलोचनाय नमः ।नन्दितगिरिशाय नमो महसे नवनीपपाटलाय नमः ॥ २॥

natajanasulabhāya namo nālīkasanābhilocanāya namaḥ |nanditagiriśāya namo mahase navanīpapāṭalāya namaḥ || 2||

पवनमयि पावकमयि क्षोणीमयि गगनमयि कृपीटमयि ।रविमयि शशिमयि दिङ्मयि समयमयि प्राणमयि शिवे पाहि ॥ ३॥

pavanamayi pāvakamayi kṣoṇīmayi gaganamayi kṛpīṭamayi |ravimayi śaśimayi diṅmayi samayamayi prāṇamayi śive pāhi || 3||

कालि कपालिनि शूलिनि भैरवि मातङ्गि पञ्चमि त्रिपुरे ।वाग्देवि विन्ध्यवासिनि बाले भुवनेशि पालय चिरं माम् ॥ ४॥

kāli kapālini śūlini bhairavi mātaṅgi pañcami tripure |vāgdevi vindhyavāsini bāle bhuvaneśi pālaya ciraṃ mām || 4||

लमित्यादि पञ्चपूजा ॥ततः पारायणान्तरमं हृदयादिन्यासं विधाय ध्यात्वापञ्चोपचारेः सम्पूजयेत् ॥॥ महर्षिदुर्वासः प्रणीतं श्री ललितास्तवरत्नम् ॥॥ आर्या द्विशती ॥वन्दे गजेन्द्रवदनं वामाङ्कारूढवल्लभाश्लिष्टम् ।कुङ्कुमपरागशोणं कुवलयिनीजारकोरकापीडम् ॥ १॥

lamityādi pañcapūjā ||tataḥ pārāyaṇāntaramaṃ hṛdayādinyāsaṃ vidhāya dhyātvāpañcopacāreḥ sampūjayet |||| maharṣidurvāsaḥ praṇītaṃ śrī lalitāstavaratnam |||| āryā dviśatī ||vande gajendravadanaṃ vāmāṅkārūḍhavallabhāśliṣṭam |kuṅkumaparāgaśoṇaṃ kuvalayinījārakorakāpīḍam || 1||

स जयति सुवर्णशैलः सकलजगच्चक्रसङ्घटितमूर्तिः ।काञ्चन निकुञ्जवाटी कन्दलदमरीप्रपञ्च सङ्गीतः ॥ २॥

sa jayati suvarṇaśailaḥ sakalajagaccakrasaṅghaṭitamūrtiḥ |kāñcana nikuñjavāṭī kandaladamarīprapañca saṅgītaḥ || 2||

हरिहयनैरृतमारुतहरितामन्तेष्ववस्थितं तस्य ।विनुमः सानुत्रितयं विधिहरिगौरीशविष्टपाधारम् ॥ ३॥

harihayanairṛtamārutaharitāmanteṣvavasthitaṃ tasya |vinumaḥ sānutritayaṃ vidhiharigaurīśaviṣṭapādhāram || 3||

मध्ये पुनर्मनोहररत्नरुचिस्तबक रञ्जितदिगन्तम् ।उपरि चतुः शतयोजनमुत्तङ्ग शृङ्गम्पुङ्गवमुपासे ॥ ४॥

madhye punarmanohararatnarucistabaka rañjitadigantam |upari catuḥ śatayojanamuttaṅga śṛṅgampuṅgavamupāse || 4||

तत्र चतुः शतयोजनपरिणाहं देव शिल्पिना रचितम् ।नानासालमनोज्ञं नमाम्यहं नगरं आदिविद्यायाः ॥ ५॥

tatra catuḥ śatayojanapariṇāhaṃ deva śilpinā racitam |nānāsālamanojñaṃ namāmyahaṃ nagaraṃ ādividyāyāḥ || 5||

प्रथमं सहस्रपूर्वक षट्शतसंख्याक योजनं परितः ।वलयीकृतस्वगात्रं वरणं शरणं व्रजाम्ययो रूपम् ॥ ६॥

prathamaṃ sahasrapūrvaka ṣaṭśatasaṃkhyāka yojanaṃ paritaḥ |valayīkṛtasvagātraṃ varaṇaṃ śaraṇaṃ vrajāmyayo rūpam || 6||

तस्योत्तरे समीरणयोजनदूरे तरङ्गितच्छायः ।घटयतु मुदं द्वितीयो घण्टास्तनसार निर्मितः सालः ॥ ७॥

tasyottare samīraṇayojanadūre taraṅgitacchāyaḥ |ghaṭayatu mudaṃ dvitīyo ghaṇṭāstanasāra nirmitaḥ sālaḥ || 7||

उभयोरन्तरसीमन्युद्दाम भ्रमररञ्जितोदारम् ।उपवमनमुपास्महे वयमूरीकृत मन्दमारुत स्यन्दम् ॥ ८॥

ubhayorantarasīmanyuddāma bhramararañjitodāram |upavamanamupāsmahe vayamūrīkṛta mandamāruta syandam || 8||

आलिङ्ग्य भद्रकालीमासीनस्तत्र हरिशिलाश्यामाम् ।मनसि महाकालो मे विहरतु मधुपानविभ्रमन्नेत्रः ॥ ९॥

āliṅgya bhadrakālīmāsīnastatra hariśilāśyāmām |manasi mahākālo me viharatu madhupānavibhramannetraḥ || 9||

तार्त्तीयीको वरणस्तस्योत्तरसीम्नि वातयोजनतः ।ताम्रेण रचितमूर्तिस्तनुतादा चन्द्रतारकं भद्रम् ॥ १०॥

tārttīyīko varaṇastasyottarasīmni vātayojanataḥ |tāmreṇa racitamūrtistanutādā candratārakaṃ bhadram || 10||

मध्ये तयोश्च मणिमयपल्लवशाखा प्रसूनपक्ष्मलिताम् ।कल्पानोकहवाटीं कलये मकरन्दपङ्किलावालाम् ॥ ११॥

madhye tayośca maṇimayapallavaśākhā prasūnapakṣmalitām |kalpānokahavāṭīṃ kalaye makarandapaṅkilāvālām || 11||

तत्र मधुमाधवश्रीतरुणीभ्यां तरलदृक्चकोराभ्याम् ।आलिङ्गितोऽवतान्मामनिशं प्रथमर्तुरात्तपुष्पास्रः ॥ १२॥

tatra madhumādhavaśrītaruṇībhyāṃ taraladṛkcakorābhyām |āliṅgito'vatānmāmaniśaṃ prathamarturāttapuṣpāsraḥ || 12||

नमत तदुत्तरभागे नाकिपथोल्लङ्घि शृङ्गसङ्घातम् ।सीसाकृतिं तुरीयं सितकिरणालोकनिर्मलं सालम् ॥ १३॥

namata taduttarabhāge nākipathollaṅghi śṛṅgasaṅghātam |sīsākṛtiṃ turīyaṃ sitakiraṇālokanirmalaṃ sālam || 13||

सालद्वयान्तराले सरलालिकपोतचाटुसुभगायाम् ।सन्तानवाटिकायां सक्तं चेतोऽस्तु सततमस्माकम् ॥ १४॥

sāladvayāntarāle saralālikapotacāṭusubhagāyām |santānavāṭikāyāṃ saktaṃ ceto'stu satatamasmākam || 14||

तत्र तपनादिरूक्षः साम्राज्ञीचरण सान्द्रितस्वान्तः ।शुक्र शुचिश्रीसहितो ग्रीष्मर्तुर्दिशतु कीर्तिमाकल्पम् ॥ १५॥

tatra tapanādirūkṣaḥ sāmrājñīcaraṇa sāndritasvāntaḥ |śukra śuciśrīsahito grīṣmarturdiśatu kīrtimākalpam || 15||

उत्तरसीमनि तस्योन्नतशिखरोत्कम्पि हाटकपताकः ।प्रकटयतु पञ्चमो नः प्राकारः कुशलमारकूटमयः ॥ १६॥

uttarasīmani tasyonnataśikharotkampi hāṭakapatākaḥ |prakaṭayatu pañcamo naḥ prākāraḥ kuśalamārakūṭamayaḥ || 16||

प्राकारयोश्च मध्ये पल्लवितान्यभृतपञ्चमोन्मेषा ।हरिचन्दनद्रुवाटीहरतादामूलमस्मदनुतापम् ॥ १७॥

prākārayośca madhye pallavitānyabhṛtapañcamonmeṣā |haricandanadruvāṭīharatādāmūlamasmadanutāpam || 17||

तत्र नभश्री मुख्यैस्तरुणी वर्गैः समन्वितः परितः ।वज्राट्टऋहासमुखरो वाञ्छापूर्तिं तनोतु वर्षर्तुः ॥ १८॥

tatra nabhaśrī mukhyaistaruṇī vargaiḥ samanvitaḥ paritaḥ |vajrāṭṭaṛhāsamukharo vāñchāpūrtiṃ tanotu varṣartuḥ || 18||

मारुतयोजनदूरे महनीयस्तस्य चोत्तरे भागे ।भद्रं कृषीष्ट षष्ठः प्राकारः पञ्चलोहधातुमयः ॥ १९॥

mārutayojanadūre mahanīyastasya cottare bhāge |bhadraṃ kṛṣīṣṭa ṣaṣṭhaḥ prākāraḥ pañcalohadhātumayaḥ || 19||

अनयोर्मध्ये सन्ततमङ्कूरद्दिव्यकुसुमगन्धायाम् ।मन्दारवाटिकायां मानसमङ्गीकरोतु मे विहृतिम् ॥ २०॥

anayormadhye santatamaṅkūraddivyakusumagandhāyām |mandāravāṭikāyāṃ mānasamaṅgīkarotu me vihṛtim || 20||

तस्यामिषोर्जलक्ष्मीतरुणीभ्यां शरदृतुः सदा सहितः ।अभ्यर्चयन् स जीयादम्बामामोदमेदुरैः कुसुमैः ॥ २१॥

tasyāmiṣorjalakṣmītaruṇībhyāṃ śaradṛtuḥ sadā sahitaḥ |abhyarcayan sa jīyādambāmāmodameduraiḥ kusumaiḥ || 21||

तस्यर्षिसंख्ययोजनदूरे देदीप्यमानशृङ्गौघः ।कलधौतकलितमूर्तिः कल्याणं दिशतु सप्तमः सालः ॥ २२॥

tasyarṣisaṃkhyayojanadūre dedīpyamānaśṛṅgaughaḥ |kaladhautakalitamūrtiḥ kalyāṇaṃ diśatu saptamaḥ sālaḥ || 22||

मध्ये तयोर्मरुत्पथ लङ्घिथविट-पाग्रविरुतकलकण्ठा ।श्रीपारिजातवाटी श्रियमनिशं दिशतु शीतलोद्देशा ॥ २३॥

madhye tayormarutpatha laṅghithaviṭa-pāgravirutakalakaṇṭhā |śrīpārijātavāṭī śriyamaniśaṃ diśatu śītaloddeśā || 23||

तस्यामतिप्रियाभ्यां सहखेलन् सहसहस्य लक्ष्मीभ्याम् ।सामन्तो झषकेतोर्हेमन्तो भवतु हेमवृद्ध्यै नः ॥ २४॥

tasyāmatipriyābhyāṃ sahakhelan sahasahasya lakṣmībhyām |sāmanto jhaṣaketorhemanto bhavatu hemavṛddhyai naḥ || 24||

उत्तरतस्तस्य महानुद्भट हुत्भुक्षि स्वारुणः मयूखः ।तपनीयखण्डरचितस्तनुतादायुष्यमष्टमो वरणः ॥ २५॥

uttaratastasya mahānudbhaṭa hutbhukṣi svāruṇaḥ mayūkhaḥ |tapanīyakhaṇḍaracitastanutādāyuṣyamaṣṭamo varaṇaḥ || 25||

कादम्बविपिनवाटीमनयोर्मध्यभुवि कल्पितावासाम् ।कलयामि सूनकोरककन्दलितामोदतुन्दिलसमीराम् ॥ २६॥

kādambavipinavāṭīmanayormadhyabhuvi kalpitāvāsām |kalayāmi sūnakorakakandalitāmodatundilasamīrām || 26||

तस्यामतिशिशिराकृतिरासीनस्तपतपस्यलक्ष्मीभ्याम् ।शिवमनिशं कुरुतान्मे शिशिरर्तुः सततशीतलदिगन्तः ॥ २७॥

tasyāmatiśiśirākṛtirāsīnastapatapasyalakṣmībhyām |śivamaniśaṃ kurutānme śiśirartuḥ satataśītaladigantaḥ || 27||

तस्यां कदम्बवाट्यां तत्प्रसवामोदमिलितमधुगन्धम् ।सप्तावरणमनोज्ञं शरणं समुपैमि मन्त्रिणीशरणम् ॥ २८॥

tasyāṃ kadambavāṭyāṃ tatprasavāmodamilitamadhugandham |saptāvaraṇamanojñaṃ śaraṇaṃ samupaimi mantriṇīśaraṇam || 28||

तत्रालये विशाले तपनीयारचिततरलसोपाने ।माणिक्य मण्डपान्तर्महिते सिंहासने मणीखचिते ॥ २९॥

tatrālaye viśāle tapanīyāracitataralasopāne |māṇikya maṇḍapāntarmahite siṃhāsane maṇīkhacite || 29||

बिन्दुत्रिपञ्चकोणद्विपनृपवसुवेददलकुरेखाढ्ये ।चक्रे सदा निविष्टां षष्ठ्यष्टत्रिंशदक्षरेशानीम् ॥ ३०॥

bindutripañcakoṇadvipanṛpavasuvedadalakurekhāḍhye |cakre sadā niviṣṭāṃ ṣaṣṭhyaṣṭatriṃśadakṣareśānīm || 30||

तापिञ्छमेचकाभां तालीदलघटितकर्णताटङ्काम् ।ताम्बूलपूरितमुखीं ताम्राधरबिम्बदृष्टदरहासाम् ॥ ३१॥

tāpiñchamecakābhāṃ tālīdalaghaṭitakarṇatāṭaṅkām |tāmbūlapūritamukhīṃ tāmrādharabimbadṛṣṭadarahāsām || 31||

कुङ्कुमपङ्किलदेहां कुवलयजीवातुशावकावतंसाम् ।कोकनदशोणचरणां कोकिलनिक्वाणकोमलालापाम् ॥ ३२॥

kuṅkumapaṅkiladehāṃ kuvalayajīvātuśāvakāvataṃsām |kokanadaśoṇacaraṇāṃ kokilanikvāṇakomalālāpām || 32||

वामाङ्गगलितचूलीं वनमाल्यकदम्बमालिकाभरणाम् ।मुक्ताललन्तिकाञ्चित मुग्धालिकमिलितचित्रकोदाराम् ॥ ३३॥

vāmāṅgagalitacūlīṃ vanamālyakadambamālikābharaṇām |muktālalantikāñcita mugdhālikamilitacitrakodārām || 33||

करविधृतकीरशावककलनिनदव्यक्तनिखिलनिगमार्थाम् ।वामकुचसङ्गिवीणावादनसौख्यार्धमीलिताक्षियुगाम् ॥ ३४॥

karavidhṛtakīraśāvakakalaninadavyaktanikhilanigamārthām |vāmakucasaṅgivīṇāvādanasaukhyārdhamīlitākṣiyugām || 34||

आपाटलांशुकधरां आदिरसोन्मेषवासित कटाक्षाम् ।आम्नायसारगुलिकां आद्यां सङ्गीतमातृकां वन्दे ॥ ३५॥

āpāṭalāṃśukadharāṃ ādirasonmeṣavāsita kaṭākṣām |āmnāyasāragulikāṃ ādyāṃ saṅgītamātṛkāṃ vande || 35||

तस्य च सुवर्णसालस्योत्तरतस्तरुणकुङ्कुमच्छायः ।शमयतु मम सन्तापं सालो नवमः स पुष्परागमयः ॥ ३६॥

tasya ca suvarṇasālasyottaratastaruṇakuṅkumacchāyaḥ |śamayatu mama santāpaṃ sālo navamaḥ sa puṣparāgamayaḥ || 36||

अनयोरन्तरवसुधाः प्रणुमः प्रत्यग्रपुष्परागमयीः ।सिंहासनेश्वरीमनुचिन्तननिस्तन्द्रसिद्धनीरन्ध्राः ॥ ३७॥

anayorantaravasudhāḥ praṇumaḥ pratyagrapuṣparāgamayīḥ |siṃhāsaneśvarīmanucintananistandrasiddhanīrandhrāḥ || 37||

तत्सालोत्तरदेशे तरुणजपाकिरणधोरणीशोणः ।प्रशमयतु पद्मरागप्राकारो मम पराभवं दशमः ॥ ३८॥

tatsālottaradeśe taruṇajapākiraṇadhoraṇīśoṇaḥ |praśamayatu padmarāgaprākāro mama parābhavaṃ daśamaḥ || 38||

अन्तरभूकृतवासाननयोरपनीत चित्तवैमत्यान् ।चक्रेशीपदभक्तांश्चारणवर्गानहर्निशं कलये ॥ ३९॥

antarabhūkṛtavāsānanayorapanīta cittavaimatyān |cakreśīpadabhaktāṃścāraṇavargānaharniśaṃ kalaye || 39||

सारङ्गवाहयोजनदूरेऽऽसङ्घटित केतनस्तस्य ।गोमेदकेन रचितो गोपायतु मां समुन्नतः सालः ॥ ४०॥

sāraṅgavāhayojanadūre''saṅghaṭita ketanastasya |gomedakena racito gopāyatu māṃ samunnataḥ sālaḥ || 40||