ललिताकवचम् Shri Lalita Kavacha

। नारदपुराणान्तर्गते ।सनत्कुमार उवाचअथ ते कवचं देव्या वक्ष्ये नवरतात्मकम् ।येन देवासुरनरजयी स्यात्साधकः सदा ॥ १॥

| nāradapurāṇāntargate |sanatkumāra uvācaatha te kavacaṃ devyā vakṣye navaratātmakam |yena devāsuranarajayī syātsādhakaḥ sadā || 1||

सर्वतः सर्वदाऽऽत्मानं ललिता पातु सर्वगा ।कामेशी पुरतः पातु भगमाली त्वनन्तरम् ॥ २॥

sarvataḥ sarvadā''tmānaṃ lalitā pātu sarvagā |kāmeśī purataḥ pātu bhagamālī tvanantaram || 2||

दिशं पातु तथा दक्षपार्श्वं मे पातु सर्वदा ।नित्यक्लिन्नाथ भेरुण्डा दिशं मे पातु कौणपीम् ॥ ३॥

diśaṃ pātu tathā dakṣapārśvaṃ me pātu sarvadā |nityaklinnātha bheruṇḍā diśaṃ me pātu kauṇapīm || 3||

तथैव पश्चिमं भागं रक्षताद्वह्निवासिनी ।महावज्रेश्वरी नित्या वायव्ये मां सदावतु ॥ ४॥

tathaiva paścimaṃ bhāgaṃ rakṣatādvahnivāsinī |mahāvajreśvarī nityā vāyavye māṃ sadāvatu || 4||

वामपार्श्वं सदा पातु इतीमेलरिता ततः ।माहेश्वरी दिशं पातु त्वरितं सिद्धदायिनी ॥ ५॥

vāmapārśvaṃ sadā pātu itīmelaritā tataḥ |māheśvarī diśaṃ pātu tvaritaṃ siddhadāyinī || 5||

पातु मामूर्ध्वतः शश्वद्देवता कुलसुन्दरी ।अधो नीलपताकाख्या विजया सर्वतश्च माम् ॥ ६॥

pātu māmūrdhvataḥ śaśvaddevatā kulasundarī |adho nīlapatākākhyā vijayā sarvataśca mām || 6||

करोतु मे मङ्गलानि सर्वदा सर्वमङ्गला ।देहेन्द्रियमनःप्राणाञ्ज्वालामालिनिविग्रहा ॥ ७॥

karotu me maṅgalāni sarvadā sarvamaṅgalā |dehendriyamanaḥprāṇāñjvālāmālinivigrahā || 7||

पालयत्वनिशं चित्ता चित्तं मे सर्वदावतु ।कामात्क्रोधात्तथा लोभान्मोहान्मानान्मदादपि ॥ ८॥

pālayatvaniśaṃ cittā cittaṃ me sarvadāvatu |kāmātkrodhāttathā lobhānmohānmānānmadādapi || 8||

पापान्मां सर्वतः शोकात्सङ्क्षयात्सर्वतः सदा ।असत्यात्क्रूरचिन्तातो हिंसातश्चौरतस्तथा ।स्तैमित्याच्च सदा पातु प्रेरयन्त्यः शुभं प्रति ॥ ९॥

pāpānmāṃ sarvataḥ śokātsaṅkṣayātsarvataḥ sadā |asatyātkrūracintāto hiṃsātaścauratastathā |staimityācca sadā pātu prerayantyaḥ śubhaṃ prati || 9||

नित्याः षोडश मां पातु गजारूढाः स्वशक्तिभिः ।तथा हयसमारूढाः पातु मां सर्वतः सदा ॥ १०॥

nityāḥ ṣoḍaśa māṃ pātu gajārūḍhāḥ svaśaktibhiḥ |tathā hayasamārūḍhāḥ pātu māṃ sarvataḥ sadā || 10||

सिंहारूढास्तथा पातु पातु ऋक्षगता अपि ।रथारूढाश्च मां पातु सर्वतः सर्वदा रणे ॥ ११॥

siṃhārūḍhāstathā pātu pātu ṛkṣagatā api |rathārūḍhāśca māṃ pātu sarvataḥ sarvadā raṇe || 11||

तार्क्ष्यारूढाश्च मां पातु तथा व्योमगताश्च ताः ।भूतगाः सर्वगाः पातु पातु देव्यश्च सर्वदा ॥ १२॥

tārkṣyārūḍhāśca māṃ pātu tathā vyomagatāśca tāḥ |bhūtagāḥ sarvagāḥ pātu pātu devyaśca sarvadā || 12||

भूतप्रेतपिशाचाश्च परकृत्यादिकान् गदान् ।द्रावयन्तु स्वशक्तीनां भूषणैरायुधैर्मम ॥ १३॥

bhūtapretapiśācāśca parakṛtyādikān gadān |drāvayantu svaśaktīnāṃ bhūṣaṇairāyudhairmama || 13||

गजाश्वद्वीपिपञ्चास्यतार्क्ष्यारूढाखिलायुधाः ।असङ्ख्याः शक्तयो देव्यः पातु मां सर्वतः सदा ॥ १४॥

gajāśvadvīpipañcāsyatārkṣyārūḍhākhilāyudhāḥ |asaṅkhyāḥ śaktayo devyaḥ pātu māṃ sarvataḥ sadā || 14||

सायं प्रातर्जपन्नित्याकवचं सर्वरक्षकम् ।कदाचिन्नाशुभं पश्येत्सर्वदानन्दमास्थितः ॥ १५॥

sāyaṃ prātarjapannityākavacaṃ sarvarakṣakam |kadācinnāśubhaṃ paśyetsarvadānandamāsthitaḥ || 15||

इत्येतत्कवचं प्रोक्तं ललितायाः शुभावहम् ।यस्य सन्धारणान्मर्त्यो निर्भयो विजयी सुखी ॥ १६॥

ityetatkavacaṃ proktaṃ lalitāyāḥ śubhāvaham |yasya sandhāraṇānmartyo nirbhayo vijayī sukhī || 16||

॥ इति श्रीबृहन्नारदीयपुराणे पूर्वभागे तृतीयपादेबृहदुपाख्याने श्रीललिताकवचं सम्पूर्णम् ॥ अध्यायः ८९॥

|| iti śrībṛhannāradīyapurāṇe pūrvabhāge tṛtīyapādebṛhadupākhyāne śrīlalitākavacaṃ sampūrṇam || adhyāyaḥ 89||