लक्ष्मीस्तोत्रम् (देवविरचितं) Shri Lakshmistotram

देवकृतम् ।क्षमस्व भगवत्यम्ब क्षमाशीले परात्परे ।शुद्धसत्त्वस्वरूपे च कोपादिपरिवर्जिते ॥ १॥

devakṛtam |kṣamasva bhagavatyamba kṣamāśīle parātpare |śuddhasattvasvarūpe ca kopādiparivarjite || 1||

उपमे सर्वसाध्वीनां देवीनां देवपूजिते ।त्वया विना जगत्सर्वं मृततुल्यं च निष्फलम् ॥ २॥

upame sarvasādhvīnāṃ devīnāṃ devapūjite |tvayā vinā jagatsarvaṃ mṛtatulyaṃ ca niṣphalam || 2||

सर्वसम्पत्स्वरूपा त्वं सर्वेषां सर्वरूपिणि ।रासेश्वर्यधिदेवी त्वं त्वत्कलाः सर्वयोषितः ॥ ३॥

sarvasampatsvarūpā tvaṃ sarveṣāṃ sarvarūpiṇi |rāseśvaryadhidevī tvaṃ tvatkalāḥ sarvayoṣitaḥ || 3||

कैलासे पार्वती त्वं च क्षीरोदे सिन्धुकन्यका ।स्वर्गे च स्वर्गलक्ष्मीस्त्वं मर्त्यलक्ष्मीश्च भूतले ॥ ४॥

kailāse pārvatī tvaṃ ca kṣīrode sindhukanyakā |svarge ca svargalakṣmīstvaṃ martyalakṣmīśca bhūtale || 4||

वैकुण्ठे च महालक्ष्मीर्देवदेवी सरस्वती ।गङ्गा च तुलसी त्वं च सावित्री ब्रह्मलोकतः ॥ ५॥

vaikuṇṭhe ca mahālakṣmīrdevadevī sarasvatī |gaṅgā ca tulasī tvaṃ ca sāvitrī brahmalokataḥ || 5||

कृष्णप्राणाधिदेवी त्वं गोलोके राधिका स्वयम् ।रासे रासेश्वरी त्वं च वृन्दावनवने वने ॥ ६॥

kṛṣṇaprāṇādhidevī tvaṃ goloke rādhikā svayam |rāse rāseśvarī tvaṃ ca vṛndāvanavane vane || 6||

कृष्णप्रिया त्वं भाण्डीरे चन्द्रा चन्दनकानने ।विरजा चम्पकवने शतशृङ्गे च सुन्दरी ॥ ७॥

kṛṣṇapriyā tvaṃ bhāṇḍīre candrā candanakānane |virajā campakavane śataśṛṅge ca sundarī || 7||

पद्मावती पद्मवने मालती मालतीवने ।कुन्ददन्ती कुन्दवने सुशीला केतकीवने ॥ ८॥

padmāvatī padmavane mālatī mālatīvane |kundadantī kundavane suśīlā ketakīvane || 8||

कदम्बमाला त्वं देवि कदम्बकाननेऽपि च ।राजलक्ष्मी राजगृहे गृहलक्ष्मीर्गृहे गृहे ॥ ९॥

kadambamālā tvaṃ devi kadambakānane'pi ca |rājalakṣmī rājagṛhe gṛhalakṣmīrgṛhe gṛhe || 9||

इत्युक्त्वा देवताः सर्वा मुनयो मनवस्तथा ।रुरुदुर्नम्रवदनाः शुष्ककण्ठोष्ठतालुकाः ॥ १०॥

ityuktvā devatāḥ sarvā munayo manavastathā |rurudurnamravadanāḥ śuṣkakaṇṭhoṣṭhatālukāḥ || 10||

इति लक्ष्मीस्तवं पुण्यं सर्वदेवैः कृतं शुभम् ।यः पठेत्प्रातरुत्थाय स वै सर्वं लभेद्ध्रुवम् ॥ ११॥

iti lakṣmīstavaṃ puṇyaṃ sarvadevaiḥ kṛtaṃ śubham |yaḥ paṭhetprātarutthāya sa vai sarvaṃ labheddhruvam || 11||

अभार्यो लभते भार्यां विनीतां सुसुतां सतीम् ।सुशीलां सुन्दरीं रम्यामतिसुप्रियवादिनीम् ॥ १२॥

abhāryo labhate bhāryāṃ vinītāṃ susutāṃ satīm |suśīlāṃ sundarīṃ ramyāmatisupriyavādinīm || 12||

पुत्रपौत्रवतीं शुद्धां कुलजां कोमलां वराम् ।अपुत्रो लभते पुत्रं वैष्णवं चिरजीविनम् ॥ १३॥

putrapautravatīṃ śuddhāṃ kulajāṃ komalāṃ varām |aputro labhate putraṃ vaiṣṇavaṃ cirajīvinam || 13||

परमैश्वर्ययुक्तं च विद्यावन्तं यशस्विनम् ।भ्रष्टराज्यो लभेद्राज्यं भ्रष्टश्रीर्लभते श्रियम् ॥ १४॥

paramaiśvaryayuktaṃ ca vidyāvantaṃ yaśasvinam |bhraṣṭarājyo labhedrājyaṃ bhraṣṭaśrīrlabhate śriyam || 14||

हतबन्धुर्लभेद्वन्धुं धनभ्रष्टो धनं लभेत् ।कीर्तिहीनो लभेत्कीर्तिं प्रतिष्ठां च लभेद्ध्रुवम् ॥ १५॥

hatabandhurlabhedvandhuṃ dhanabhraṣṭo dhanaṃ labhet |kīrtihīno labhetkīrtiṃ pratiṣṭhāṃ ca labheddhruvam || 15||

सर्वमङ्गलदं स्तोत्रं शोकसन्तापनाशनम् ।हर्षानन्दकरं शश्वद्धर्ममोक्षसुहृत्प्रदम् ॥ १६॥

sarvamaṅgaladaṃ stotraṃ śokasantāpanāśanam |harṣānandakaraṃ śaśvaddharmamokṣasuhṛtpradam || 16||

इति देवकृतं श्रीलक्ष्मीस्तोत्रं सम्पूर्णम् ।

iti devakṛtaṃ śrīlakṣmīstotraṃ sampūrṇam |