आर्द्रानन्दलक्ष्मीव्रतनिरूपणम् Ardranandalakshmivratanirupanam

शृणु लक्ष्मि व्रतं चान्यत्तवैव दशमीदिने ।आषाढे शुक्लपक्षे वै चातुर्मास्याऽग्रगे दिने ॥ २२॥

śṛṇu lakṣmi vrataṃ cānyattavaiva daśamīdine |āṣāḍhe śuklapakṣe vai cāturmāsyā'grage dine || 22||

प्रातरेव समुत्थाय स्नात्वा ध्यायेद्धरिं प्रभुम् ।ततश्चार्द्रानन्दलक्ष्मीं सौवर्णीं पूजयेद्व्रती ॥ २३॥

prātareva samutthāya snātvā dhyāyeddhariṃ prabhum |tataścārdrānandalakṣmīṃ sauvarṇīṃ pūjayedvratī || 23||

अङ्गुष्ठमात्रां सद्वस्त्रां भूषाशृङ्गारशोभिताम् ।नारायणीश्रियं दर्भगन्धोदकैः सुचन्दनैः ॥ २४॥

aṅguṣṭhamātrāṃ sadvastrāṃ bhūṣāśṛṅgāraśobhitām |nārāyaṇīśriyaṃ darbhagandhodakaiḥ sucandanaiḥ || 24||

स्नापयेच्छुक्लपुष्पैश्च कुङ्कुमाक्षतभोजनैः ।नैवेद्यैर्भोजयेच्चापि नीराजयेत् क्षमापयेत् ॥ २५॥

snāpayecchuklapuṣpaiśca kuṅkumākṣatabhojanaiḥ |naivedyairbhojayeccāpi nīrājayet kṣamāpayet || 25||

अनादिश्रीकृष्णनारायणेन सहितां श्रियम् ।प्रार्थयेद्भावहृदयैः स्वेष्टदं स्वेष्टदां तदा ॥ २६॥

anādiśrīkṛṣṇanārāyaṇena sahitāṃ śriyam |prārthayedbhāvahṛdayaiḥ sveṣṭadaṃ sveṣṭadāṃ tadā || 26||

महालक्ष्म्यै नमः पादौ महाविष्णो नमोऽस्तु ते ।शोकहन्त्र्यै नमो जङ्घे सुखदाय नमोऽस्तु ते ॥ २७॥

mahālakṣmyai namaḥ pādau mahāviṣṇo namo'stu te |śokahantryai namo jaṅghe sukhadāya namo'stu te || 27||

कमलायै नमश्चोरू आनन्दाय नमो हरे ।ईश्वरिण्यै नमः कटिं सम्पत्प्रदाय ते नमः ॥ २८॥

kamalāyai namaścorū ānandāya namo hare |īśvariṇyai namaḥ kaṭiṃ sampatpradāya te namaḥ || 28||

माधव्यै च नमो नाभौ स्वर्णवर्णाय ते नमः ।स्तनौ पोषणकारिण्यै नमो विश्वम्भराय ते ॥ २९॥

mādhavyai ca namo nābhau svarṇavarṇāya te namaḥ |stanau poṣaṇakāriṇyai namo viśvambharāya te || 29||

कण्ठे नमः सरस्वत्यै नीलकण्ठाय ते नमः ।करौ कमलधारिण्यै नारायणाय ते नमः ॥ ३०॥

kaṇṭhe namaḥ sarasvatyai nīlakaṇṭhāya te namaḥ |karau kamaladhāriṇyai nārāyaṇāya te namaḥ || 30||

बाहू नमो रक्षयित्र्यै सुदर्शनधराय च ।चान्द्र्यै चन्द्रानने नौमि हरिं वह्निमुखाय च ॥ ३१॥

bāhū namo rakṣayitryai sudarśanadharāya ca |cāndryai candrānane naumi hariṃ vahnimukhāya ca || 31||

नेत्रे कृपाप्रवर्षिण्यै करुणानिलयाय च ।भ्रुवौ नमः क्षेमदायै कुशलकारिणे नमः ॥ ३२॥

netre kṛpāpravarṣiṇyai karuṇānilayāya ca |bhruvau namaḥ kṣemadāyai kuśalakāriṇe namaḥ || 32||

ललाटे धनरूपायै स्वर्णवर्णाय ते नमः ।मुकुटे सर्वरत्नायै सकौस्तुभाय ते नमः ॥ ३३॥

lalāṭe dhanarūpāyai svarṇavarṇāya te namaḥ |mukuṭe sarvaratnāyai sakaustubhāya te namaḥ || 33||

सर्वकायौ सर्ववासौ सर्वैश्वर्यसमन्वितौ ।सर्वकामप्रदौ वन्दे आर्द्राश्र्यानन्दमाधवौ ॥ ३४॥

sarvakāyau sarvavāsau sarvaiśvaryasamanvitau |sarvakāmapradau vande ārdrāśryānandamādhavau || 34||

सम्पदा चोपकरणैर्धनैर्धान्यै रसादिभिः ।भूषाम्बरादिभिश्चापि गृहमार्द्रं प्रपूरितम् ॥ ३५॥

sampadā copakaraṇairdhanairdhānyai rasādibhiḥ |bhūṣāmbarādibhiścāpi gṛhamārdraṃ prapūritam || 35||

कुरुतं स्त्रीदासदासीभृत्यापत्यसुशोभितम् ।दिव्यसाधनशोभं च धेनुवाजिगजान्वितम् ॥ ३६॥

kurutaṃ strīdāsadāsībhṛtyāpatyasuśobhitam |divyasādhanaśobhaṃ ca dhenuvājigajānvitam || 36||

उद्यानवाटीक्षेत्राढ्यं यशोमानप्रवर्धितम् ।यानविमानवाहाढ्यं शिष्यप्रशिष्यसत्प्रजम् ॥ ३७॥

udyānavāṭīkṣetrāḍhyaṃ yaśomānapravardhitam |yānavimānavāhāḍhyaṃ śiṣyapraśiṣyasatprajam || 37||

मोदप्रमोदसौख्याढ्यं समुत्साहोत्सवान्वितम् ।वाद्यगीतिमहासत्रदानपानसमन्वितम् ॥ ३८॥

modapramodasaukhyāḍhyaṃ samutsāhotsavānvitam |vādyagītimahāsatradānapānasamanvitam || 38||

धर्मकर्माऽध्वरयुक्तं नित्यं च बहुदक्षिणम् ।विघ्नशून्यं पञ्चयज्ञपरं कुरुतं मद्गृहम् ॥ ३९॥

dharmakarmā'dhvarayuktaṃ nityaṃ ca bahudakṣiṇam |vighnaśūnyaṃ pañcayajñaparaṃ kurutaṃ madgṛham || 39||

स्नुषाभिः परितो रम्यां साधुसाध्वीविराजितम् ।परमेशमहाभक्तिप्रवाहितं निरन्तरम् ॥ ४०॥

snuṣābhiḥ parito ramyāṃ sādhusādhvīvirājitam |parameśamahābhaktipravāhitaṃ nirantaram || 40||

अन्ते दिव्यरसाढ्ये वामक्षरे वसतिं च मे ।एवमभ्यर्थ्य च पुष्पाञ्जलिं दत्वा विसर्जयेत् ॥ ४१॥

ante divyarasāḍhye vāmakṣare vasatiṃ ca me |evamabhyarthya ca puṣpāñjaliṃ datvā visarjayet || 41||

लक्ष्मीं नारायणं चार्द्रानन्दौ श्रीगुरवे दिशेत् ।रत्नहीरकधान्यानि द्विजातिभ्यो दिशेत्तथा ॥ ४२॥

lakṣmīṃ nārāyaṇaṃ cārdrānandau śrīgurave diśet |ratnahīrakadhānyāni dvijātibhyo diśettathā || 42||

भोजयेद्बालबालाद्या दिशेच्च दक्षिणाः शुभाः ।शङ्खचक्रे सकटके स्वस्तिकाङ्कुशचामरान् ॥ ४३॥

bhojayedbālabālādyā diśecca dakṣiṇāḥ śubhāḥ |śaṅkhacakre sakaṭake svastikāṅkuśacāmarān || 43||

दद्यात् सत्पुरुषायाऽपि मिष्टान्नाम्बरकाणि च ।घृतपात्राणि पात्राणि सहिरण्यकानि सन्दिशेत् ॥ ४४॥

dadyāt satpuruṣāyā'pi miṣṭānnāmbarakāṇi ca |ghṛtapātrāṇi pātrāṇi sahiraṇyakāni sandiśet || 44||

शर्करासक्तुपात्राणि चतुर्मासं दिशेत्तथा ।तिलपात्राणि पूर्णानि रसपात्राणि यानि च ॥ ४५॥

śarkarāsaktupātrāṇi caturmāsaṃ diśettathā |tilapātrāṇi pūrṇāni rasapātrāṇi yāni ca || 45||

गन्धोदकं पुष्पवारि चन्दनं कुङ्कुमोदकम् ।अपक्वं दधि दुग्धं च गोशृङ्गोदकमित्यपि ॥ ४६॥

gandhodakaṃ puṣpavāri candanaṃ kuṅkumodakam |apakvaṃ dadhi dugdhaṃ ca gośṛṅgodakamityapi || 46||

तुलसीं कमलं दद्याच्चातुर्मास्ये सदार्चने ।दाने सर्वं प्रदद्याच्च वदेच्चापि श्रियाः पुरः ॥ ४७॥

tulasīṃ kamalaṃ dadyāccāturmāsye sadārcane |dāne sarvaṃ pradadyācca vadeccāpi śriyāḥ puraḥ || 47||

लक्ष्मी मे प्रीयतां नित्यं पापनाशाय माधवी ।सौभाग्याय प्रसन्नाऽस्तु ललिता मे सुखाय च ॥ ४८॥

lakṣmī me prīyatāṃ nityaṃ pāpanāśāya mādhavī |saubhāgyāya prasannā'stu lalitā me sukhāya ca || 48||

एवमुक्त्वा दिशेत्सर्वं कार्तिके दशमीदिने ।हिरण्यकमलं दत्वा चैकादश्यां प्रगे पुनः ॥ ४९॥

evamuktvā diśetsarvaṃ kārtike daśamīdine |hiraṇyakamalaṃ datvā caikādaśyāṃ prage punaḥ || 49||

पूजयित्वा व्रतं पूर्णं कुर्याद्दिशेद्द्विजातये ।सतूलावरणां शय्यां लक्ष्मीर्मे प्रीयतामिति ॥ ५०॥

pūjayitvā vrataṃ pūrṇaṃ kuryāddiśeddvijātaye |satūlāvaraṇāṃ śayyāṃ lakṣmīrme prīyatāmiti || 50||

आर्द्राननरमानारायणव्रतं त्विदं महत् ।तेनेहाऽमुत्र च सदानन्दमाप्नोति सम्पदः ॥ ५१॥

ārdrānanaramānārāyaṇavrataṃ tvidaṃ mahat |tenehā'mutra ca sadānandamāpnoti sampadaḥ || 51||

भुक्त्वा स्वर्गान् चिरस्थाँश्च परं पदमवाप्नुयात् ।श्रोतुर्वक्तुश्च संस्मर्तुश्चाप्यानन्दो भवेद्ध्रुवः ॥ ५२॥

bhuktvā svargān cirasthām̐śca paraṃ padamavāpnuyāt |śroturvaktuśca saṃsmartuścāpyānando bhaveddhruvaḥ || 52||

गृहे स्वे महदानन्दशतानि चानुभूय च ।भूयो लक्ष्मीपदं याति श्रीपुरं धाम चैश्वरम् ॥ ५३॥

gṛhe sve mahadānandaśatāni cānubhūya ca |bhūyo lakṣmīpadaṃ yāti śrīpuraṃ dhāma caiśvaram || 53||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे१३८अध्यायान्तर्गतं आर्द्रानन्दलक्ष्मीव्रतनिरूपणं सम्पूर्णम् ।लक्ष्मीनारायणीयसंहिता । खण्ड ३। अध्याय १३८/२२५३॥लक्ष्मीनारायणीयसंहिता । खण्ड ३। अध्याय १३८/२२-५३॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe138adhyāyāntargataṃ ārdrānandalakṣmīvratanirūpaṇaṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 138/2253||lakṣmīnārāyaṇīyasaṃhitā | khaṇḍa 3| adhyāya 138/22-53||