लक्ष्मीस्तोत्रम् Agastimunirachita Shrilakshmi Stotra

जय पद्मपलाशाक्षि जय त्वं श्रीपतिप्रिये ।जय मातर्महालक्ष्मि संसारार्णवतारिणि ॥ १॥

jaya padmapalāśākṣi jaya tvaṃ śrīpatipriye |jaya mātarmahālakṣmi saṃsārārṇavatāriṇi || 1||

महालक्ष्मि नमस्तुभ्यं नमस्तुभ्यं सुरेश्वरि ।हरिप्रिये नमस्तुभ्यं नमस्तुभ्यं दयानिधे ॥ २॥

mahālakṣmi namastubhyaṃ namastubhyaṃ sureśvari |haripriye namastubhyaṃ namastubhyaṃ dayānidhe || 2||

पद्मालये नमस्तुभ्यं नमस्तुभ्यं च सर्वदे ।सर्वभूतहितार्थाय वसुवृष्टिं सदा कुरु ॥ ३॥

padmālaye namastubhyaṃ namastubhyaṃ ca sarvade |sarvabhūtahitārthāya vasuvṛṣṭiṃ sadā kuru || 3||

जगन्मातर्नमस्तुभ्यं नमस्तुभ्यं दयानिधे ।दयावति नमस्तुभ्यं विश्वेश्वरि नमोऽस्तु ते ॥ ४॥

jaganmātarnamastubhyaṃ namastubhyaṃ dayānidhe |dayāvati namastubhyaṃ viśveśvari namo'stu te || 4||

नमः क्षीरार्णवसुते नमस्त्रैलोक्यधारिणि ।वसुवृष्टे नमस्तुभ्यं रक्ष मां शरणागतं ॥ ५॥

namaḥ kṣīrārṇavasute namastrailokyadhāriṇi |vasuvṛṣṭe namastubhyaṃ rakṣa māṃ śaraṇāgataṃ || 5||

रक्ष त्वं देवदेवेशि देवदेवस्य वल्लभे ।दरिद्रात्त्राहि मां लक्ष्मि कृपां कुरु ममोपरि ॥ ६॥

rakṣa tvaṃ devadeveśi devadevasya vallabhe |daridrāttrāhi māṃ lakṣmi kṛpāṃ kuru mamopari || 6||

नमस्त्रैलोक्यजननि नमस्त्रैलोक्यपावनि ।ब्रह्मादयो नमस्ते त्वां जगदानन्ददायिनि ॥ ७॥

namastrailokyajanani namastrailokyapāvani |brahmādayo namaste tvāṃ jagadānandadāyini || 7||

विष्णुप्रिये नमस्तुभ्यं नमस्तुभ्यं जगद्धिते ।आर्तहन्त्रि नमस्तुभ्यं समृद्धिं कुरु मे सदा ॥ ८॥

viṣṇupriye namastubhyaṃ namastubhyaṃ jagaddhite |ārtahantri namastubhyaṃ samṛddhiṃ kuru me sadā || 8||

अब्जवासे नमस्तुभ्यं चपलायै नमो नमः ।चञ्चलायै नमस्तुभ्यं ललितायै नमो नमः ॥ ९॥

abjavāse namastubhyaṃ capalāyai namo namaḥ |cañcalāyai namastubhyaṃ lalitāyai namo namaḥ || 9||

नमः प्रद्युम्नजननि मातुस्तुभ्यं नमो नमः ।परिपालय भो मातर्मां तुभ्यं शरणागतं ॥ १०॥

namaḥ pradyumnajanani mātustubhyaṃ namo namaḥ |paripālaya bho mātarmāṃ tubhyaṃ śaraṇāgataṃ || 10||

शरण्ये त्वां प्रपन्नोऽस्मि कमले कमलालये ।त्राहि त्राहि महालक्ष्मि परित्राणपरायणे ॥ ११॥

śaraṇye tvāṃ prapanno'smi kamale kamalālaye |trāhi trāhi mahālakṣmi paritrāṇaparāyaṇe || 11||

पाण्डित्यं शोभते नैव न शोभन्ति गुणा नरे ।शीलत्वं नैव शोभेत महालक्ष्मि त्वया विना ॥ १२॥

pāṇḍityaṃ śobhate naiva na śobhanti guṇā nare |śīlatvaṃ naiva śobheta mahālakṣmi tvayā vinā || 12||

तावद्विराजते रूपं तावच्छीलं विराजते ।तावद्गुणा नराणां च यावल्लक्ष्मीः प्रसीदति ॥ १३॥

tāvadvirājate rūpaṃ tāvacchīlaṃ virājate |tāvadguṇā narāṇāṃ ca yāvallakṣmīḥ prasīdati || 13||

लक्ष्मित्वयालङ्कृतमानवा ये पापैर्विमुक्ता नृपलोकमान्याः ।गुणैर्विहीना गुणिनो भवन्ति दुशीलिनः शीलवतां वरिष्ठाः ॥ १४॥

lakṣmitvayālaṅkṛtamānavā ye pāpairvimuktā nṛpalokamānyāḥ |guṇairvihīnā guṇino bhavanti duśīlinaḥ śīlavatāṃ variṣṭhāḥ || 14||

लक्ष्मीर्भूषयते रूपं लक्ष्मीर्भूषयते कुलं ।लक्ष्मीर्भूषयते विद्यां सर्वाल्लक्ष्मीर्विशिष्यते ॥ १५॥

lakṣmīrbhūṣayate rūpaṃ lakṣmīrbhūṣayate kulaṃ |lakṣmīrbhūṣayate vidyāṃ sarvāllakṣmīrviśiṣyate || 15||

लक्ष्मि त्वद्गुणकीर्तनेन कमलाभूर्यात्यलं जिह्वतांरुद्राद्या रविचन्द्रदेवपतयो वक्तुं च नैव क्षमाः ।अस्माभिस्तव रूपलक्षणगुणान्वक्तुं कथं शक्यतेमातर्मां परिपाहि विश्वजननि कृत्वा ममेष्टं ध्रुवं ॥ १६॥

lakṣmi tvadguṇakīrtanena kamalābhūryātyalaṃ jihvatāṃrudrādyā ravicandradevapatayo vaktuṃ ca naiva kṣamāḥ |asmābhistava rūpalakṣaṇaguṇānvaktuṃ kathaṃ śakyatemātarmāṃ paripāhi viśvajanani kṛtvā mameṣṭaṃ dhruvaṃ || 16||

दीनार्तिभीतं भवतापपीडितं धनैर्विहीनं तव पार्श्वमागतं ।कृपानिधित्वान्मम लक्ष्मि सत्वरं धनप्रदानाद्धन्नायकं कुरु ॥ १७॥

dīnārtibhītaṃ bhavatāpapīḍitaṃ dhanairvihīnaṃ tava pārśvamāgataṃ |kṛpānidhitvānmama lakṣmi satvaraṃ dhanapradānāddhannāyakaṃ kuru || 17||

मां विलोक्य जननि हरिप्रिये । निर्धनं त्वत्समीपमागतं ॥देहि मे झटिति लक्ष्मि । कराग्रं वस्त्रकाञ्चनवरान्नमद्भुतं ॥ १८॥

māṃ vilokya janani haripriye | nirdhanaṃ tvatsamīpamāgataṃ ||dehi me jhaṭiti lakṣmi | karāgraṃ vastrakāñcanavarānnamadbhutaṃ || 18||

त्वमेव जननी लक्ष्मि पिता लक्ष्मि त्वमेव च ।भ्राता त्वं च सखा लक्ष्मि विद्या लक्ष्मि त्वमेव च ॥ १९॥

tvameva jananī lakṣmi pitā lakṣmi tvameva ca |bhrātā tvaṃ ca sakhā lakṣmi vidyā lakṣmi tvameva ca || 19||

त्राहि त्राहि महालक्ष्मि त्राहि त्राहि सुरेश्वरि ।त्राहि त्राहि जगन्मातर्दरिद्रात्त्राहि वेगतः ॥ २०॥

trāhi trāhi mahālakṣmi trāhi trāhi sureśvari |trāhi trāhi jaganmātardaridrāttrāhi vegataḥ || 20||

नमस्तुभ्यं जगद्धात्रि नमस्तुभ्यं नमो नमः ।धर्माधारे नमस्तुभ्यं नमः सम्पत्तिदायिनी ॥ २१॥

namastubhyaṃ jagaddhātri namastubhyaṃ namo namaḥ |dharmādhāre namastubhyaṃ namaḥ sampattidāyinī || 21||

दरिद्रार्णवमग्नोऽहं निमग्नोऽहं रसातले ।मज्जन्तं मां करे धृत्वा सूद्धर त्वं रमे द्रुतं ॥ २२॥

daridrārṇavamagno'haṃ nimagno'haṃ rasātale |majjantaṃ māṃ kare dhṛtvā sūddhara tvaṃ rame drutaṃ || 22||

किं लक्ष्मि बहुनोक्तेन जल्पितेन पुनः पुनः ।अन्यन्मे शरणं नास्ति सत्यं सत्यं हरिप्रिये ॥ २३॥

kiṃ lakṣmi bahunoktena jalpitena punaḥ punaḥ |anyanme śaraṇaṃ nāsti satyaṃ satyaṃ haripriye || 23||

एतच्श्रुत्वाऽगस्तिवाक्यं हृष्यमाण हरिप्रिया ।उवाच मधुरां वाणीं तुष्टाहं तव सर्वदा ॥ २४॥

etacśrutvā'gastivākyaṃ hṛṣyamāṇa haripriyā |uvāca madhurāṃ vāṇīṃ tuṣṭāhaṃ tava sarvadā || 24||

लक्ष्मीरुवाच ।यत्त्वयोक्तमिदं स्तोत्रं यः पठिष्यति मानवः ।शृणोति च महाभागस्तस्याहं वशवर्तिनी ॥ २५॥

lakṣmīruvāca |yattvayoktamidaṃ stotraṃ yaḥ paṭhiṣyati mānavaḥ |śṛṇoti ca mahābhāgastasyāhaṃ vaśavartinī || 25||

नित्यं पठति यो भक्त्या त्वलक्ष्मीस्तस्य नश्यति ।रणश्च नश्यते तीव्रं वियोगं नैव पश्यति ॥ २६॥

nityaṃ paṭhati yo bhaktyā tvalakṣmīstasya naśyati |raṇaśca naśyate tīvraṃ viyogaṃ naiva paśyati || 26||

यः पठेत्प्रातरुत्थाय श्रद्धाभक्तिसमन्वितः ।गृहे तस्य सदा स्थास्ये नित्यं श्रीपतिना सह ॥ २७॥

yaḥ paṭhetprātarutthāya śraddhābhaktisamanvitaḥ |gṛhe tasya sadā sthāsye nityaṃ śrīpatinā saha || 27||

सुखसौभाग्यसम्पन्नो मनस्वी बुद्धिमान् भवेत् ।पुत्रवान् गुणवान् श्रेष्ठो भोगभोक्ता च मानवः ॥ २॥

sukhasaubhāgyasampanno manasvī buddhimān bhavet |putravān guṇavān śreṣṭho bhogabhoktā ca mānavaḥ || 2||

इदं स्तोत्रं महापुण्यं लक्ष्म्यगस्तिप्रकीर्तितं ।विष्णुप्रसादजननं चतुर्वर्गफलप्रदं ॥ २९॥

idaṃ stotraṃ mahāpuṇyaṃ lakṣmyagastiprakīrtitaṃ |viṣṇuprasādajananaṃ caturvargaphalapradaṃ || 29||

राजद्वारे जयश्चैव शत्रोश्चैव पराजयः ।भूतप्रेतपिशाचानां व्याघ्राणां न भयं तथा ॥ ३०॥

rājadvāre jayaścaiva śatroścaiva parājayaḥ |bhūtapretapiśācānāṃ vyāghrāṇāṃ na bhayaṃ tathā || 30||

न शस्त्रानलतोयौघाद्भयं तस्य प्रजायते ।दुर्वृत्तानां च पापानां बहुहानिकरं परं ॥ ३१॥

na śastrānalatoyaughādbhayaṃ tasya prajāyate |durvṛttānāṃ ca pāpānāṃ bahuhānikaraṃ paraṃ || 31||

मन्दुराकरिशालासु गवां गोष्ठे समाहितः ।पठेत्तद्दोषशान्त्यर्थं महापातकनाशनं ॥ ३२॥

mandurākariśālāsu gavāṃ goṣṭhe samāhitaḥ |paṭhettaddoṣaśāntyarthaṃ mahāpātakanāśanaṃ || 32||

सर्वसौख्यकरं नृणामायुरारोग्यदं तथा ।अगस्रिआमुनिना प्रोक्तं प्रजानां हितकाम्यया ॥ ३३॥

sarvasaukhyakaraṃ nṛṇāmāyurārogyadaṃ tathā |agasriāmuninā proktaṃ prajānāṃ hitakāmyayā || 33||

॥ इत्यगस्तिमुनिविरचितं श्रीमहालक्ष्मीस्तोत्रं सम्पूर्णं ॥

|| ityagastimuniviracitaṃ śrīmahālakṣmīstotraṃ sampūrṇaṃ ||