स्वयंभगवत्त्वाष्टकम् Shri Svayambhagavattvashtakam

स्वजन्मन्यैश्वर्यं बलमिह वधे दैत्यविततेर्यशः पार्थत्राणे यदुपुरि महासम्पदमधात् ।परं ज्ञानं जिष्णौ मुषलमनु वैराग्यमनु योभगैः षड्भिः पूर्णः स भवतु मुदे नन्दतनयः ॥ १॥

svajanmanyaiśvaryaṃ balamiha vadhe daityavitateryaśaḥ pārthatrāṇe yadupuri mahāsampadamadhāt |paraṃ jñānaṃ jiṣṇau muṣalamanu vairāgyamanu yobhagaiḥ ṣaḍbhiḥ pūrṇaḥ sa bhavatu mude nandatanayaḥ || 1||

चतुर्बाहुत्वं यः स्वजनि समये यो मृदशनेजगत्कोटीं कुक्ष्यन्तरपरिमितत्वं स्ववपुषः ।दधिस्फोटे ब्रह्मण्यतनुत परानन्ततनुतांमहैश्वर्यः पूर्णः स भवतु मुदे नन्दतनयः ॥ २॥

caturbāhutvaṃ yaḥ svajani samaye yo mṛdaśanejagatkoṭīṃ kukṣyantaraparimitatvaṃ svavapuṣaḥ |dadhisphoṭe brahmaṇyatanuta parānantatanutāṃmahaiśvaryaḥ pūrṇaḥ sa bhavatu mude nandatanayaḥ || 2||

बलं बक्यां दन्तच्छदनवरयोः केशिनि नृगेनिऋपे बाह्वोरङ्घ्रेः फणिनि वपुषः कंसमरुतोः ।गिरित्रे दैत्येष्वप्यतनुत निजास्त्रस्य यदतोमहौजोभिः पूर्णः स भवतु मुदे नन्दतनयः ॥ ३॥

balaṃ bakyāṃ dantacchadanavarayoḥ keśini nṛgeniṛpe bāhvoraṅghreḥ phaṇini vapuṣaḥ kaṃsamarutoḥ |giritre daityeṣvapyatanuta nijāstrasya yadatomahaujobhiḥ pūrṇaḥ sa bhavatu mude nandatanayaḥ || 3||

असङ्ख्यातो गोप्यो व्रजभुवि महिष्यो यदुपुरेसुताः प्रद्युम्नाद्याः सुरतरुसुधर्मादि च धनम् ।बहिर्द्वारि ब्रह्माद्यापि बलिवहं स्तौति यदतःश्रियां पूरैः पूर्णः स भवतु मुदे नन्दतनयः ॥ ४॥

asaṅkhyāto gopyo vrajabhuvi mahiṣyo yadupuresutāḥ pradyumnādyāḥ suratarusudharmādi ca dhanam |bahirdvāri brahmādyāpi balivahaṃ stauti yadataḥśriyāṃ pūraiḥ pūrṇaḥ sa bhavatu mude nandatanayaḥ || 4||

यतो दत्ते मुक्तिं रिपुविततये यन् नरजनिर्विजेता रुद्रादेरपि नतजनाधीन इति यत् ।सभायां द्रौपद्या वरकृदतिपूज्यो नृपमखेयशोभिस्तत्पूर्णः स भवतु मुदे नन्दतनयः ॥ ५॥

yato datte muktiṃ ripuvitataye yan narajanirvijetā rudrāderapi natajanādhīna iti yat |sabhāyāṃ draupadyā varakṛdatipūjyo nṛpamakheyaśobhistatpūrṇaḥ sa bhavatu mude nandatanayaḥ || 5||

न्यधाद्गीतारत्नं त्रिजगदतुलं यत्प्रियसखेपरं तत्त्वं प्रेम्णोद्धवपरमभक्ते च निगमम् ।निजप्राणप्रेस्ठास्वपि रसभृतं गोपकुलजास्वतो ज्ञानैः पूर्णः स भवतु मुदे नन्दतनयः ॥ ६॥

nyadhādgītāratnaṃ trijagadatulaṃ yatpriyasakheparaṃ tattvaṃ premṇoddhavaparamabhakte ca nigamam |nijaprāṇapresṭhāsvapi rasabhṛtaṃ gopakulajāsvato jñānaiḥ pūrṇaḥ sa bhavatu mude nandatanayaḥ || 6||

कृतागस्कं व्याधं सतनुमपि वैकुण्ठमनयन्ममत्वस्यैकाग्रानपि परिजनान् हन्त विजहौ ।यद्यप्येते श्रुत्या धुवतनुतयोक्तास्तदपि हास्ववैराग्यैः पूर्णः स भवतु मुदे नन्दतनयः ॥ ७॥

kṛtāgaskaṃ vyādhaṃ satanumapi vaikuṇṭhamanayanmamatvasyaikāgrānapi parijanān hanta vijahau |yadyapyete śrutyā dhuvatanutayoktāstadapi hāsvavairāgyaiḥ pūrṇaḥ sa bhavatu mude nandatanayaḥ || 7||

अजत्वं जन्मित्वं रतिररतितेहारहिततासलीलत्वं व्याप्तिः परिमितिरहंताममतयोः ।पदे त्यागात्यागावुभयमपि नित्यं सदुररीकरोतीशः पूर्णः स भवतु मुदे नन्दतनयः ॥ ८॥

ajatvaṃ janmitvaṃ ratiraratitehārahitatāsalīlatvaṃ vyāptiḥ parimitirahaṃtāmamatayoḥ |pade tyāgātyāgāvubhayamapi nityaṃ sadurarīkarotīśaḥ pūrṇaḥ sa bhavatu mude nandatanayaḥ || 8||

समुद्यत्सन्देहज्वरशतहरं भेषजवरंजनो यः सेवेत प्रथितभगवत्त्वाष्टकमिदम् ।तदैश्वर्यस्वादैः स्वधियमतिवेलं सरसयन्लभेतासौ तस्य प्रियपरिजनानुग्यपदवीम् ॥ ९॥

samudyatsandehajvaraśataharaṃ bheṣajavaraṃjano yaḥ seveta prathitabhagavattvāṣṭakamidam |tadaiśvaryasvādaiḥ svadhiyamativelaṃ sarasayanlabhetāsau tasya priyaparijanānugyapadavīm || 9||

इति श्रीविश्वनाथचक्रवर्तिठक्कुरविरचितस्तवामृतलहर्यांश्रीश्रीस्वयंभगवत्त्वाष्टकं सम्पूर्णम् ।

iti śrīviśvanāthacakravartiṭhakkuraviracitastavāmṛtalaharyāṃśrīśrīsvayaṃbhagavattvāṣṭakaṃ sampūrṇam |