कृष्णनारायणस्तुतिः Shri Krishnaprokta Krishnanarayana Stuti

भजध्वं भावतो भक्त्या शाश्वतालयदो यतः ।प्रपद्ये परमेशानं तं ह्यजं वैष्णवप्रियम् ॥ ५३॥

bhajadhvaṃ bhāvato bhaktyā śāśvatālayado yataḥ |prapadye parameśānaṃ taṃ hyajaṃ vaiṣṇavapriyam || 53||

परब्रह्म महात्मानं विश्वस्य जगतः पतिम् ।नमस्तस्मै देवदैत्येश्वरमुक्तादिसेविने ॥ ५४॥

parabrahma mahātmānaṃ viśvasya jagataḥ patim |namastasmai devadaityeśvaramuktādisevine || 54||

सर्वाक्षाय सर्वव्याप्तात्मनेऽन्तर्यामिणे नमः ।गायन्ति यं गायत्रिणोऽर्चयन्त्येनं समर्पिताः ॥ ५५॥

sarvākṣāya sarvavyāptātmane'ntaryāmiṇe namaḥ |gāyanti yaṃ gāyatriṇo'rcayantyenaṃ samarpitāḥ || 55||

यत्र सर्वं कारणं च कार्यं क्रिया च साधनम् ।दैवतं सदसश्चापि नमस्तस्मै विलासिने ॥ ५६॥

yatra sarvaṃ kāraṇaṃ ca kāryaṃ kriyā ca sādhanam |daivataṃ sadasaścāpi namastasmai vilāsine || 56||

नमः शान्ताय वरिणे शङ्खचक्रध्वजाब्जिने ।शूलिने शार्ङ्गिणे चापि वज्रिणे शरिणे नमः ॥ ५७॥

namaḥ śāntāya variṇe śaṅkhacakradhvajābjine |śūline śārṅgiṇe cāpi vajriṇe śariṇe namaḥ || 57||

स्वस्तिमते मीनवते नमस्ते प्रभविष्णवे ।नमोऽस्त्वप्रतिरूपाय स्वरूपध्वजधारिणे ॥ ५८॥

svastimate mīnavate namaste prabhaviṣṇave |namo'stvapratirūpāya svarūpadhvajadhāriṇe || 58||

नमो नानाभिरामाय नमः पटुतराय च ।नमः साङ्ख्यप्रवक्त्रे ते योगवक्त्रे च ते नमः ॥ ५९॥

namo nānābhirāmāya namaḥ paṭutarāya ca |namaḥ sāṅkhyapravaktre te yogavaktre ca te namaḥ || 59||

नमः श्रुतिप्रवक्त्रे ते न्यायवक्त्रे नमो नमः ।नमो मुक्तिप्रवक्त्रे ते नमः शिक्षाप्रदाय च ॥ ६०॥

namaḥ śrutipravaktre te nyāyavaktre namo namaḥ |namo muktipravaktre te namaḥ śikṣāpradāya ca || 60||

नमो मीमांसनवक्त्रे नमोऽमृतप्रदाय च ।नमो हिरण्यवपुषे नमश्चम्पकवर्चसे ॥ ६१॥

namo mīmāṃsanavaktre namo'mṛtapradāya ca |namo hiraṇyavapuṣe namaścampakavarcase || 61||

नमः स्तुत्याय मन्त्राय सर्वभूतशरीरिणे ।नमो होत्रे नमः शीलव्रतस्थायाऽतिरूपिणे ॥ ६२॥

namaḥ stutyāya mantrāya sarvabhūtaśarīriṇe |namo hotre namaḥ śīlavratasthāyā'tirūpiṇe || 62||

नमो दीर्घाक्षिणे तुभ्यं सर्वकामप्रदायिने ।नभश्चान्तरनेत्राय सर्वनेत्राय ते नमः ॥ ६३॥

namo dīrghākṣiṇe tubhyaṃ sarvakāmapradāyine |nabhaścāntaranetrāya sarvanetrāya te namaḥ || 63||

भेदाऽभेदप्रभिन्नाय नमस्ते व्यतिरेकिणे ।छायातपनरूपाय शान्तसत्त्वाय ते नमः ॥ ६४॥

bhedā'bhedaprabhinnāya namaste vyatirekiṇe |chāyātapanarūpāya śāntasattvāya te namaḥ || 64||

यज्ञभागप्रियायैकमूर्तये ब्रह्मणे नमः ।पञ्चालपुत्रीरक्षाय भगुपुत्रीप्रवाहिने ॥ ६५॥

yajñabhāgapriyāyaikamūrtaye brahmaṇe namaḥ |pañcālaputrīrakṣāya bhaguputrīpravāhine || 65||

अनरण्यसुतेशाय नमो नारायणीशिने ।अन्नदायाऽन्नपतये कोशात्मकाय ते नमः ॥ ६६॥

anaraṇyasuteśāya namo nārāyaṇīśine |annadāyā'nnapataye kośātmakāya te namaḥ || 66||

बालानुरूपगोत्रे च बाललीलाविलासिने ।नमो बालाय वृद्धाय मञ्जुकेशाय ते नमः ॥ ६७॥

bālānurūpagotre ca bālalīlāvilāsine |namo bālāya vṛddhāya mañjukeśāya te namaḥ || 67||

नमः षट्कर्मतुष्टाय सहस्राभरणाय च ।धर्मार्थकाममोक्षाणामाश्रयाय च ते नमः ॥ ६८॥

namaḥ ṣaṭkarmatuṣṭāya sahasrābharaṇāya ca |dharmārthakāmamokṣāṇāmāśrayāya ca te namaḥ || 68||

नमोऽनन्तगुणैश्वर्यविभूत्याश्रयिणे नमः ।मेघशोभाय चन्द्रार्कताराप्रभाय ते नमः ॥ ६९॥

namo'nantaguṇaiśvaryavibhūtyāśrayiṇe namaḥ |meghaśobhāya candrārkatārāprabhāya te namaḥ || 69||

त्वमन्नमन्नभोक्ता च पक्वभुक् पावनोऽनलः ।वारि त्वं त्वं तथातृप्तिः सुखमानन्द ते नमः ॥ ७०॥

tvamannamannabhoktā ca pakvabhuk pāvano'nalaḥ |vāri tvaṃ tvaṃ tathātṛptiḥ sukhamānanda te namaḥ || 70||

जरायुजाऽण्डजाश्चापि स्वेदोद्भिज्जास्त्वया कृताः ।त्वमेव चावतारेश भूतग्रामश्चतुर्विधः ॥ ७१॥

jarāyujā'ṇḍajāścāpi svedodbhijjāstvayā kṛtāḥ |tvameva cāvatāreśa bhūtagrāmaścaturvidhaḥ || 71||

स्रष्टा चराचरस्याऽस्य पाता हन्ता त्वमेव ह ।त्वामाहुर्ब्रह्म विद्वांसः परं ब्रह्मविदां गतिः ॥ ७२॥

sraṣṭā carācarasyā'sya pātā hantā tvameva ha |tvāmāhurbrahma vidvāṃsaḥ paraṃ brahmavidāṃ gatiḥ || 72||

मनसः परमं ज्योतिर्ज्यातिस्त्वं ज्योतिषामपि ।हंसो वृक्षो मधुकरः प्राहुस्त्वां ब्रह्मवादिनः ॥ ७३॥

manasaḥ paramaṃ jyotirjyātistvaṃ jyotiṣāmapi |haṃso vṛkṣo madhukaraḥ prāhustvāṃ brahmavādinaḥ || 73||

यज्ञेष्टकृत् फलनरत्वं त्वामाहुर्मुनयस्तथा ।पठ्यसे स्तुतिभिर्नित्यं वेदोपनिषदां गणैः ॥ ७४॥

yajñeṣṭakṛt phalanaratvaṃ tvāmāhurmunayastathā |paṭhyase stutibhirnityaṃ vedopaniṣadāṃ gaṇaiḥ || 74||

नरा नार्यः स्थावरा जङ्गमास्तिर्यञ्च इत्यपि ।त्वमेव विद्यसे कृष्णनारायण जगत्प्रभो ॥ ७५॥

narā nāryaḥ sthāvarā jaṅgamāstiryañca ityapi |tvameva vidyase kṛṣṇanārāyaṇa jagatprabho || 75||

त्वमेव मेघसङ्घाश्च विद्युतोऽशनिगर्जितम् ।संवत्सरस्त्वमृतवो मासो मासार्धमेव च ॥ ७६॥

tvameva meghasaṅghāśca vidyuto'śanigarjitam |saṃvatsarastvamṛtavo māso māsārdhameva ca || 76||

युगानिमेषाः काष्ठाश्च नक्षत्राणि ग्रहास्तथा ।त्वं शरी त्वं गदी चक्री खड्गी वज्री शरासनी ॥ ७७॥

yugānimeṣāḥ kāṣṭhāśca nakṣatrāṇi grahāstathā |tvaṃ śarī tvaṃ gadī cakrī khaḍgī vajrī śarāsanī || 77||

छेत्ता भेत्ता प्रहर्ताऽसि मन्ता नेता सनातनः ।समुद्राः सरितः शैला वृक्षाः सरांसि भूस्तराः ॥ ७८॥

chettā bhettā prahartā'si mantā netā sanātanaḥ |samudrāḥ saritaḥ śailā vṛkṣāḥ sarāṃsi bhūstarāḥ || 78||

लतातृणौषधिवल्लीपशवो मृगपक्षिणः ।पृथुकर्मगुणारम्भः कालः पुष्पफलोदयः ॥ ७९॥

latātṛṇauṣadhivallīpaśavo mṛgapakṣiṇaḥ |pṛthukarmaguṇārambhaḥ kālaḥ puṣpaphalodayaḥ || 79||

मध्यं बीजं चांऽकुरं च पत्रं काण्डं च ग्रन्थिका ।नालं पुष्पं फलं चापि रसो गन्धस्त्वमेव च ॥ ८०॥

madhyaṃ bījaṃ cāṃ'kuraṃ ca patraṃ kāṇḍaṃ ca granthikā |nālaṃ puṣpaṃ phalaṃ cāpi raso gandhastvameva ca || 80||

पिष्टं मिष्टं सदेष्टं च त्वमेव परमेश्वर ।पवित्रं च पवित्राणां मङ्गलानां च मङ्गलम् ॥ ८१॥

piṣṭaṃ miṣṭaṃ sadeṣṭaṃ ca tvameva parameśvara |pavitraṃ ca pavitrāṇāṃ maṅgalānāṃ ca maṅgalam || 81||

उदयानामुदयाग्र्यं त्वमेव परमा गतिः ।प्राणा निमेषा जृम्भश्च क्षुतं चाऽभ्याहतिस्तथा ॥ ८२॥

udayānāmudayāgryaṃ tvameva paramā gatiḥ |prāṇā nimeṣā jṛmbhaśca kṣutaṃ cā'bhyāhatistathā || 82||

ब्रह्मकालयमाग्नीनां शास्ता बोधयिता भवान् ।चनुर्युगश्चतुर्वेदश्चातुर्होत्रप्रवर्तकः ॥ ८३॥

brahmakālayamāgnīnāṃ śāstā bodhayitā bhavān |canuryugaścaturvedaścāturhotrapravartakaḥ || 83||

चातुराश्रम्यनेता च चातुर्वर्ण्यकरस्तथा ।प्रशिल्पी गणको माता सर्वशिल्पप्रवर्तकः ॥ ८४॥

cāturāśramyanetā ca cāturvarṇyakarastathā |praśilpī gaṇako mātā sarvaśilpapravartakaḥ || 84||

स्वाहा स्वधा वषट्कारो नमस्कारः स्तुतिस्तथा ।प्रार्थना प्रार्थनीयं च त्वमेव ते नमो नमः ॥ ८५॥

svāhā svadhā vaṣaṭkāro namaskāraḥ stutistathā |prārthanā prārthanīyaṃ ca tvameva te namo namaḥ || 85||

गूढव्रतो गुह्यतपास्तारको भूमिसन्धरः ।धाता विधाता सन्धाता त्वमेव ते नमो नमः ॥ ८६॥

gūḍhavrato guhyatapāstārako bhūmisandharaḥ |dhātā vidhātā sandhātā tvameva te namo namaḥ || 86||

ब्रह्मा शम्भुस्तथा विष्णुर्विराड्भूमा त्वमेव च ।तपः सत्यं ब्रह्मचर्यमार्जवं त्वं प्रतोषणम् ॥ ८७॥

brahmā śambhustathā viṣṇurvirāḍbhūmā tvameva ca |tapaḥ satyaṃ brahmacaryamārjavaṃ tvaṃ pratoṣaṇam || 87||

भूर्भुवः स्वं जीवसृष्टिरीशसृष्टिस्त्वमेव च ।ब्रह्मसृष्टिः ऋतं दीक्षा दमनं त्वं जनार्दनः ॥ ८८॥

bhūrbhuvaḥ svaṃ jīvasṛṣṭirīśasṛṣṭistvameva ca |brahmasṛṣṭiḥ ṛtaṃ dīkṣā damanaṃ tvaṃ janārdanaḥ || 88||

कान्तः प्रियः पतिः स्वामी नारायणस्त्वमेव च ।बिन्दुर्नादो ध्वनिर्ब्रह्म विमर्शः स्फोट इत्यपि ॥ ८९॥

kāntaḥ priyaḥ patiḥ svāmī nārāyaṇastvameva ca |bindurnādo dhvanirbrahma vimarśaḥ sphoṭa ityapi || 89||

पश्यन्ती च परा मध्या विशिष्टा वाक् त्वमेव च ।गौर्भूमिर्ब्राह्मभक्तश्च साधुः सती च किङ्करी ॥ ९०॥

paśyantī ca parā madhyā viśiṣṭā vāk tvameva ca |gaurbhūmirbrāhmabhaktaśca sādhuḥ satī ca kiṅkarī || 90||

वश्यः सर्वं त्वमेवाऽऽस्से त्वां विना नास्ति नास्त्यपि ।शशाङ्कानलशीतोष्णक्षुत्तृषाश्च जरामयाः ॥ ९१॥

vaśyaḥ sarvaṃ tvamevā''sse tvāṃ vinā nāsti nāstyapi |śaśāṅkānalaśītoṣṇakṣuttṛṣāśca jarāmayāḥ || 91||

आधयो व्याधयः शान्तिर्भेषजं त्वं जनार्दन ।सोमपास्त्वं च माधुर्यं मरुत्पतिर्जगत्पतिः ॥ ९२॥

ādhayo vyādhayaḥ śāntirbheṣajaṃ tvaṃ janārdana |somapāstvaṃ ca mādhuryaṃ marutpatirjagatpatiḥ || 92||

अमृताशी जगन्नाथाः कुङ्कुमेशस्त्वमेव च ।अक्षतेशो गणेशश्च मुक्तेशस्त्वं परेश्वरः ॥ ९३॥

amṛtāśī jagannāthāḥ kuṅkumeśastvameva ca |akṣateśo gaṇeśaśca mukteśastvaṃ pareśvaraḥ || 93||

विषाग्निपाः सोमपाश्च क्षीरपा नवनीतपाः ।आज्यपा मधुपाः सर्वभोक्ता त्वं च पितामहः ॥ ९४॥

viṣāgnipāḥ somapāśca kṣīrapā navanītapāḥ |ājyapā madhupāḥ sarvabhoktā tvaṃ ca pitāmahaḥ || 94||

हिरण्यरेताः पुरुषश्रेष्ठस्त्वमेव चैकलः ।त्वं स्त्रीपुमान् त्वं तृतीयो भावद्वयविवर्जितः ॥ ९५॥

hiraṇyaretāḥ puruṣaśreṣṭhastvameva caikalaḥ |tvaṃ strīpumān tvaṃ tṛtīyo bhāvadvayavivarjitaḥ || 95||

भावत्रयातिगश्चापि भावत्रये प्रवर्तसे ।बालो युवा स्थविरश्च जीर्णदंष्ट्रोऽसि विश्वकृत् ॥ ९६॥

bhāvatrayātigaścāpi bhāvatraye pravartase |bālo yuvā sthaviraśca jīrṇadaṃṣṭro'si viśvakṛt || 96||

चन्द्रादित्यौ चक्षुषी ते जिह्वा ते च सरस्वती ।अहोरात्रे निमिषोभे आत्मानस्ते गृहालयाः ॥ ९७॥

candrādityau cakṣuṣī te jihvā te ca sarasvatī |ahorātre nimiṣobhe ātmānaste gṛhālayāḥ || 97||

न ब्रह्मा न शिवो विष्णुः पौराणा ऋषयो न ते ।माहात्म्यं वेदितुं शक्ता याथातथ्येन बालक ॥ ९८॥

na brahmā na śivo viṣṇuḥ paurāṇā ṛṣayo na te |māhātmyaṃ vedituṃ śaktā yāthātathyena bālaka || 98||

पुंसामीशेश्वराणां मुक्तानां कोट्यर्बुदानि च ।तिष्ठसे त्वं समावृत्य चान्तर्बहिस्त्वमेव सः ॥ ९९॥

puṃsāmīśeśvarāṇāṃ muktānāṃ koṭyarbudāni ca |tiṣṭhase tvaṃ samāvṛtya cāntarbahistvameva saḥ || 99||

महतस्तमसः पारेऽक्षरस्याऽपि परे सदा ।परे धाम्नि परेशस्त्वं राजसे सोऽत्र मूर्तिमान् ॥ १००॥

mahatastamasaḥ pāre'kṣarasyā'pi pare sadā |pare dhāmni pareśastvaṃ rājase so'tra mūrtimān || 100||

यं विनिद्रा जितप्राणाः सत्त्वस्था ब्रह्मवर्तिनः ।परं पश्यन्ति युञ्जानास्तस्मै योगात्मने नमः ॥ १०१॥

yaṃ vinidrā jitaprāṇāḥ sattvasthā brahmavartinaḥ |paraṃ paśyanti yuñjānāstasmai yogātmane namaḥ || 101||

या या मूर्तयः सूक्ष्मास्ते शक्या दर्शयितुं न ताः ।ताभ्यः सर्वाभ्य एवाऽत्र त्वद्रूपाभ्यो नमो नमः ॥ १०२॥

yā yā mūrtayaḥ sūkṣmāste śakyā darśayituṃ na tāḥ |tābhyaḥ sarvābhya evā'tra tvadrūpābhyo namo namaḥ || 102||

भक्तानुकम्पी भगवान् भक्तेषु वर्तसे सदा ।केशा मेघा यस्य नाड्यो नद्यः कुक्षौ महाब्धयः ॥ १०३॥

bhaktānukampī bhagavān bhakteṣu vartase sadā |keśā meghā yasya nāḍyo nadyaḥ kukṣau mahābdhayaḥ || 103||

शयानाय जले हैमे तपस्यते च ते नमः ।येऽङ्गुष्ठमात्राः पुरुषाश्चिदः स्थावरजङ्गमाः ॥ १०४॥

śayānāya jale haime tapasyate ca te namaḥ |ye'ṅguṣṭhamātrāḥ puruṣāścidaḥ sthāvarajaṅgamāḥ || 104||

ये नदीषु समुद्रेषु पर्वतेषु गुहासु च ।वृक्षमूलेषु गोष्ठेषु कान्तारगहनेषु च ॥ १०५॥

ye nadīṣu samudreṣu parvateṣu guhāsu ca |vṛkṣamūleṣu goṣṭheṣu kāntāragahaneṣu ca || 105||

चतुष्पथेषु रथ्यासु चत्वरेषु सभासु च ।हस्त्यश्वरथशालासु जीर्णोद्यानालयेषु च ॥ १०६॥

catuṣpatheṣu rathyāsu catvareṣu sabhāsu ca |hastyaśvarathaśālāsu jīrṇodyānālayeṣu ca || 106||

येऽपि पञ्चसु भूतेषु दिशासु विदिशासु च ।चन्द्रे सूर्ये सत्यलोके वैकुण्ठाख्यचतुष्टये ॥ १०७॥

ye'pi pañcasu bhūteṣu diśāsu vidiśāsu ca |candre sūrye satyaloke vaikuṇṭhākhyacatuṣṭaye || 107||

रसातलगता ये च ये च तस्मात् परङ्गताः ।तव भक्तास्तव दासाः किङ्करास्तव केशव ॥ १०८॥

rasātalagatā ye ca ye ca tasmāt paraṅgatāḥ |tava bhaktāstava dāsāḥ kiṅkarāstava keśava || 108||

दास्यः सत्यस्तव भक्ताः किङ्कर्यस्तव माधव ।नमस्तेभ्यो नमस्ताभ्य उभाभ्यां च नमोऽच्युत ॥ १०९॥

dāsyaḥ satyastava bhaktāḥ kiṅkaryastava mādhava |namastebhyo namastābhya ubhābhyāṃ ca namo'cyuta || 109||

येषां न विद्यते सङ्ख्याः प्रमाणं रूपमेव च ।असङ्ख्यास्ते मुक्तगणा नमस्तेभ्योऽस्तु नित्यशः ॥ ११०॥

yeṣāṃ na vidyate saṅkhyāḥ pramāṇaṃ rūpameva ca |asaṅkhyāste muktagaṇā namastebhyo'stu nityaśaḥ || 110||

प्रसीद बालरूप त्वं स्वकं भावं प्रदर्शय ।त्वयि नो हृदयान्यत्र भवन्तु सत्कथाफलम् ॥ १११॥

prasīda bālarūpa tvaṃ svakaṃ bhāvaṃ pradarśaya |tvayi no hṛdayānyatra bhavantu satkathāphalam || 111||

इत्येवं राधिके! तेन स्तुतः कृष्णनरायणः ।कथारम्भे प्रसन्नः सन्नात्मनो दर्शनं ददौ ॥ ११२॥

ityevaṃ rādhike! tena stutaḥ kṛṣṇanarāyaṇaḥ |kathārambhe prasannaḥ sannātmano darśanaṃ dadau || 112||

इति श्रीलक्ष्मीनारायणीयसंहिता । खण्ड २। अध्याय ४०अध्यायान्तर्गतंश्रीकृष्णप्रोक्ता कृष्णनारायणस्तुतिः समाप्ता ।लक्ष्मीनारायणीयसंहिता । खण्ड २। अध्याय ४०/३८११२॥लक्ष्मीनारायणीयसंहिता । खण्ड २। अध्याय ४०/३८-११२॥

iti śrīlakṣmīnārāyaṇīyasaṃhitā | khaṇḍa 2| adhyāya 40adhyāyāntargataṃśrīkṛṣṇaproktā kṛṣṇanārāyaṇastutiḥ samāptā |lakṣmīnārāyaṇīyasaṃhitā | khaṇḍa 2| adhyāya 40/38112||lakṣmīnārāyaṇīyasaṃhitā | khaṇḍa 2| adhyāya 40/38-112||