गिरिधार्यष्टकम् Shri Giridhari Ashtakam

त्र्यैलोक्यलक्ष्मीमदभृत्सुरेश्वरो यदा घनैरन्तकरैर्ववर्ष ।तदाकरोद्यः स्वबलेन रक्षणं तं गोपबालं गिरिधारिणं व्रजे ॥ १॥

tryailokyalakṣmīmadabhṛtsureśvaro yadā ghanairantakarairvavarṣa |tadākarodyaḥ svabalena rakṣaṇaṃ taṃ gopabālaṃ giridhāriṇaṃ vraje || 1||

यः पाययन्तीमधिरुह्य पूतनां स्तन्यं पपौ प्राणपरायणः शिशुः ।जघान वातायितदैत्यपुङ्गवं तं गोपबालं गिरिधारिणं व्रजे ॥ २॥

yaḥ pāyayantīmadhiruhya pūtanāṃ stanyaṃ papau prāṇaparāyaṇaḥ śiśuḥ |jaghāna vātāyitadaityapuṅgavaṃ taṃ gopabālaṃ giridhāriṇaṃ vraje || 2||

नन्दव्रजं यः स्वरुचेन्दिरालयं चक्रे दिवीशां दिवि मोहवृद्धये ।गोगोपगोपीजनसर्वसौख्यकृत्तं गोपबालं गिरिधारिणं व्रजे ॥ ३॥

nandavrajaṃ yaḥ svarucendirālayaṃ cakre divīśāṃ divi mohavṛddhaye |gogopagopījanasarvasaukhyakṛttaṃ gopabālaṃ giridhāriṇaṃ vraje || 3||

यं कामदोग्घ्री गगनाहृतैर्जलैः स्वज्ञातिराज्ये मुदिताभ्यषिञ्चत् ।गोविन्दनामोत्सवकृद्व्रजौकसां तं गोपबालं गिरिधारिणं भजे ॥ ४॥

yaṃ kāmadogghrī gaganāhṛtairjalaiḥ svajñātirājye muditābhyaṣiñcat |govindanāmotsavakṛdvrajaukasāṃ taṃ gopabālaṃ giridhāriṇaṃ bhaje || 4||

यस्याननाब्जं व्रजसुन्दरीजना दिनक्षये लोचनषट्पदैर्मुदा ।पिबन्त्यधीरा विरहातुरा भृशं तं गोपबालं गिरिधारिणं भजे ॥ ५॥

yasyānanābjaṃ vrajasundarījanā dinakṣaye locanaṣaṭpadairmudā |pibantyadhīrā virahāturā bhṛśaṃ taṃ gopabālaṃ giridhāriṇaṃ bhaje || 5||

वृन्दावने निर्जरवृन्दवन्दिते गाश्चारयन्यः कलवेणुनिःस्वनः ।गोपाङ्गनाचित्तविमोहमन्मथस्तं गोपबालं गिरिधारिणं भजे ॥ ६॥

vṛndāvane nirjaravṛndavandite gāścārayanyaḥ kalaveṇuniḥsvanaḥ |gopāṅganācittavimohamanmathastaṃ gopabālaṃ giridhāriṇaṃ bhaje || 6||

यः स्वात्मलीलारसदित्सया सतामाविश्चकाराऽग्निकुमारविग्रहम् ।श्रीवल्लभाध्वानुसृतैकपालकस्तं गोपबालं गिरिधारिणं भजे ॥ ७॥

yaḥ svātmalīlārasaditsayā satāmāviścakārā'gnikumāravigraham |śrīvallabhādhvānusṛtaikapālakastaṃ gopabālaṃ giridhāriṇaṃ bhaje || 7||

गोपेन्द्रसूनोर्गिरिधारिणोऽष्टकं पठेदिदंयस्तदनन्यमानसः ।समुच्यते दुःखमहार्णवाद्भृशं प्राप्नोति दास्यं गिरिधारिणे ध्रुवम् ॥ ८॥

gopendrasūnorgiridhāriṇo'ṣṭakaṃ paṭhedidaṃyastadananyamānasaḥ |samucyate duḥkhamahārṇavādbhṛśaṃ prāpnoti dāsyaṃ giridhāriṇe dhruvam || 8||

प्रणम्य सम्प्रार्थयते तवाग्रतस्त्वदङ्घ्रिरेणुं रघुनाथनामकः ।श्रीविठ्ठ्लानुग्रहलब्धसन्मतिस्तत्पूरयैतस्य मनोरथार्णवम् ॥ ९॥

praṇamya samprārthayate tavāgratastvadaṅghrireṇuṃ raghunāthanāmakaḥ |śrīviṭhṭhlānugrahalabdhasanmatistatpūrayaitasya manorathārṇavam || 9||

॥ इति श्रीरघुनाथप्रभुकृतं समाप्तमिदं श्रीगिरिराजधार्यष्टकम् ॥

|| iti śrīraghunāthaprabhukṛtaṃ samāptamidaṃ śrīgirirājadhāryaṣṭakam ||