गौरङ्गप्रत्यङ्गवर्णनाक्यस्तवराजः Shri Gauranga pratyanga Varnanakhya Stavarajah

अथ स्तोत्रं प्रवक्ष्यामि प्रत्यङ्गवर्णनं प्रभोः ।त्रिकालं पठनादेव प्रेमभक्तिं लभेन्नरः ॥ १॥

atha stotraṃ pravakṣyāmi pratyaṅgavarṇanaṃ prabhoḥ |trikālaṃ paṭhanādeva premabhaktiṃ labhennaraḥ || 1||

कश्चिच्छ्रीकृष्णचैतन्यस्मरणाकुलमानसः ।पुलकावचिताङ्गोऽपि सकम्पाश्रुविलोचनः ॥ २॥

kaścicchrīkṛṣṇacaitanyasmaraṇākulamānasaḥ |pulakāvacitāṅgo'pi sakampāśruvilocanaḥ || 2||

कथञ्चित् स्थैर्यमालम्ब्य प्रणम्य गुरुमादरात् ।स्तोतुमारब्धवान्भक्त्या द्विजचन्द्रं महाप्रभुम् ॥ ३॥

kathañcit sthairyamālambya praṇamya gurumādarāt |stotumārabdhavānbhaktyā dvijacandraṃ mahāprabhum || 3||

तप्तहेमद्युतिं वन्दे कलिकृष्णं जगद्गुरुम् ।चारुदीर्घतनुं श्रीमच्छचीहृदयनन्दनम् ॥ ४॥

taptahemadyutiṃ vande kalikṛṣṇaṃ jagadgurum |cārudīrghatanuṃ śrīmacchacīhṛdayanandanam || 4||

लसन्मुक्तालतानद्धचारुकुञ्चितकुन्तलम् ।शिखण्डाक्षतगन्धाढ्य पुष्पगुच्छावतंसकम् ॥ ५॥

lasanmuktālatānaddhacārukuñcitakuntalam |śikhaṇḍākṣatagandhāḍhya puṣpagucchāvataṃsakam || 5||

अर्धचन्द्रोल्लसद्भालकस्तूरीतिलकाङ्कितम् ।भङ्गुरभ्रूलताकेलिजितकामशरासनम् ॥ ६॥

ardhacandrollasadbhālakastūrītilakāṅkitam |bhaṅgurabhrūlatākelijitakāmaśarāsanam || 6||

प्रेमप्रवाहमधुररक्तोत्पलविलोचनम् ।तिलप्रसूनसुस्निग्धनूतनायतनासिकम् ॥ ७॥

premapravāhamadhuraraktotpalavilocanam |tilaprasūnasusnigdhanūtanāyatanāsikam || 7||

श्रीगण्डमण्डलोल्लासिरत्नकुण्डलमण्डितम् ।सव्यकर्णसुविन्यस्तस्फुरच्चारुशिखण्डकम् ॥ ८॥

śrīgaṇḍamaṇḍalollāsiratnakuṇḍalamaṇḍitam |savyakarṇasuvinyastasphuraccāruśikhaṇḍakam || 8||

मधुरस्मितसुस्निग्धप्रारक्ताधरपल्लवम् ।ईषद्दन्तुरितस्निग्धस्फुरन्मुक्तारदोज्ज्वलम् ॥ ९॥

madhurasmitasusnigdhaprāraktādharapallavam |īṣaddanturitasnigdhasphuranmuktāradojjvalam || 9||

सप्रेममधुरालापवशीकृतजगज्जनम् ।त्रिकोणचिबुकं कोटिशरदिन्दुप्रभाननम् ॥ १०॥

sapremamadhurālāpavaśīkṛtajagajjanam |trikoṇacibukaṃ koṭiśaradinduprabhānanam || 10||

सिंहग्रीवं महामत्तद्विरदोल्लासिकन्धरम् ।आरक्तरेखात्रययुक्कम्बुकण्ठमनोहरम् ॥ ११॥

siṃhagrīvaṃ mahāmattadviradollāsikandharam |āraktarekhātrayayukkambukaṇṭhamanoharam || 11||

मुक्ता प्रबालकलितहारोज्ज्वलितवक्षसम् ।कङ्कणाङ्गदविद्योतिजानुलम्बितभुजद्वयम् ॥ १२॥

muktā prabālakalitahārojjvalitavakṣasam |kaṅkaṇāṅgadavidyotijānulambitabhujadvayam || 12||

यवचक्राङ्कितारक्तश्रीमत्पाणितलोज्ज्वलम् ।स्वर्णमुद्रालसच्छ्रीमद्विमलाङ्गुलिपल्लवम् ॥ १३॥

yavacakrāṅkitāraktaśrīmatpāṇitalojjvalam |svarṇamudrālasacchrīmadvimalāṅgulipallavam || 13||

चन्दनागुरुसुस्निग्धं पुलकावलिचर्चितम् ।चारुनाभिलसन्मध्यं सिंहमध्यकृशोदरम् ॥ १४॥

candanāgurususnigdhaṃ pulakāvalicarcitam |cārunābhilasanmadhyaṃ siṃhamadhyakṛśodaram || 14||

विचित्रचित्रवसनमध्यबन्धोल्लसद्वलिम् ।सुचारुनूपुरोल्लासिकूजच्चरणपल्लवम् ॥ १५॥

vicitracitravasanamadhyabandhollasadvalim |sucārunūpurollāsikūjaccaraṇapallavam || 15||

शरच्चन्द्रप्रतीकाशनखराजत्पदाङ्गुलिम् ।अङ्कुशध्वजवज्रादिलसत्तलपदाम्बुजम् ॥ १६॥

śaraccandrapratīkāśanakharājatpadāṅgulim |aṅkuśadhvajavajrādilasattalapadāmbujam || 16||

कोटिसूर्यप्रतीकाशं कोटीन्दुललितद्युतिम् ।कोटिकन्दर्पलावण्यं कोटिलीलामनोरमम् ॥ १७॥

koṭisūryapratīkāśaṃ koṭīndulalitadyutim |koṭikandarpalāvaṇyaṃ koṭilīlāmanoramam || 17||

साक्षाल्लीलातनुं केलितनुं शृङ्गारविग्रहम् ।क्वचिद्भावकलामूर्तिं प्रस्फुरत्प्रेमविग्रहम् ॥ १८॥

sākṣāllīlātanuṃ kelitanuṃ śṛṅgāravigraham |kvacidbhāvakalāmūrtiṃ prasphuratpremavigraham || 18||

नामात्मकं नामतनुं परमानन्दविग्रहम् ।भक्त्यात्मकं भक्तितनुं भक्त्याचारविहारिणम् ॥ १९॥

nāmātmakaṃ nāmatanuṃ paramānandavigraham |bhaktyātmakaṃ bhaktitanuṃ bhaktyācāravihāriṇam || 19||

अशेषकेलिलावण्यं लीलाताण्डवपण्डितम् ।शचीजठररत्नाब्धिसमुद्भूतसुधानिधिम् ॥ २०॥

aśeṣakelilāvaṇyaṃ līlātāṇḍavapaṇḍitam |śacījaṭhararatnābdhisamudbhūtasudhānidhim || 20||

अशेषजगदानन्दकन्दमद्भुतमङ्गलम् ।स्फुरद्रासरसावेशमदालसविलोचनम् ॥ २१॥

aśeṣajagadānandakandamadbhutamaṅgalam |sphuradrāsarasāveśamadālasavilocanam || 21||

क्वचिद्भक्तजनैर्दिव्यमाल्यगन्धानुलेपनैः ।वेष्टितं रससङ्गीतं गायद्भी रसलालसम् ॥ २२॥

kvacidbhaktajanairdivyamālyagandhānulepanaiḥ |veṣṭitaṃ rasasaṅgītaṃ gāyadbhī rasalālasam || 22||

क्वचिद् बाल्यरसावेशगङ्गातीरे विहारिणम् ।क्वचिद् गायति गायन्तं नृत्यन्तं करशब्दितैः ॥ २३॥

kvacid bālyarasāveśagaṅgātīre vihāriṇam |kvacid gāyati gāyantaṃ nṛtyantaṃ karaśabditaiḥ || 23||

वदन्तं शब्दमत्युच्चैः कुर्वन्तं सिंहविक्रमम् ।क्वचिद् आस्फोटहुङ्कारकम्पिताशेषभूतलम् ॥ २४॥

vadantaṃ śabdamatyuccaiḥ kurvantaṃ siṃhavikramam |kvacid āsphoṭahuṅkārakampitāśeṣabhūtalam || 24||

सुगुप्तगोपिकाभावप्रकाशितजगत्त्रयम् ।प्रापिताशेषपुरुषस्त्रीस्वभावमनाकुलम् ॥ २५॥

suguptagopikābhāvaprakāśitajagattrayam |prāpitāśeṣapuruṣastrīsvabhāvamanākulam || 25||

निजभावरसास्वादविवशैकादशेन्द्रियम् ।विदग्धनागरीभावकलाकेलिमनोरमम् ॥ २६॥

nijabhāvarasāsvādavivaśaikādaśendriyam |vidagdhanāgarībhāvakalākelimanoramam || 26||

गदाधरप्रेमभावकलाक्रान्तमनोरथम् ।नरहरिप्रेमरसास्वादविह्वलमानसम् ॥ २७॥

gadādharapremabhāvakalākrāntamanoratham |naraharipremarasāsvādavihvalamānasam || 27||

सर्वभागवताहूतकान्ताभावप्रकाशकम् ।प्रेमप्रदानललितद्विभुजं भक्तवत्सलम् ॥ २८॥

sarvabhāgavatāhūtakāntābhāvaprakāśakam |premapradānalalitadvibhujaṃ bhaktavatsalam || 28||

प्रेमाख्यपदद्वन्द्वं श्रीप्रेमभक्तिमन्दिरम् ।निजभावरसोल्लासमुग्धीकृतजगत्त्रयम् ॥ २९॥

premākhyapadadvandvaṃ śrīpremabhaktimandiram |nijabhāvarasollāsamugdhīkṛtajagattrayam || 29||

स्वनामजपसङ्ख्याभिर्वैष्णवीकृतभूतलम् ।नवद्वीपजनानन्दं भूदेवजनमङ्गलम् ॥ ३०॥

svanāmajapasaṅkhyābhirvaiṣṇavīkṛtabhūtalam |navadvīpajanānandaṃ bhūdevajanamaṅgalam || 30||

अशेषजीवसद्भाग्यक्रमसम्भूतसत्फलम् ।भयानुरागसुस्नेहभक्तिगम्यपदाम्बुजम् ॥ ३१॥

aśeṣajīvasadbhāgyakramasambhūtasatphalam |bhayānurāgasusnehabhaktigamyapadāmbujam || 31||

नटराजशिरोरत्नं श्रीनागरशिरोमणिम् ।अशेषरसिकस्फूर्यन्मौलिभूषणभूषणम् ॥ ३२॥

naṭarājaśiroratnaṃ śrīnāgaraśiromaṇim |aśeṣarasikasphūryanmaulibhūṣaṇabhūṣaṇam || 32||

रसिकानुगतस्निग्धवदनाब्जमधुव्रतम् ।श्रीमद्द्विजकुलोत्तंसं नवद्वीपविभूषणम् ॥ ३३॥

rasikānugatasnigdhavadanābjamadhuvratam |śrīmaddvijakulottaṃsaṃ navadvīpavibhūṣaṇam || 33||

प्रेमभक्तिरसोन्मत्ताद्वैतसेव्यपदाम्बुजम् ।नित्यानन्दप्रियतमं सर्वभक्तमनोरथम् ॥ ३४॥

premabhaktirasonmattādvaitasevyapadāmbujam |nityānandapriyatamaṃ sarvabhaktamanoratham || 34||

भक्ताराध्यं भक्तिसाध्यं भक्तरूपिणमीश्वरम् ।श्रीनिवासादिभक्ताग्रैः स्तूयमानं मुहुर्मुहुः ।सार्वभौमादिभिर्वेदशास्त्रागमविशारदैः ॥ ३५॥

bhaktārādhyaṃ bhaktisādhyaṃ bhaktarūpiṇamīśvaram |śrīnivāsādibhaktāgraiḥ stūyamānaṃ muhurmuhuḥ |sārvabhaumādibhirvedaśāstrāgamaviśāradaiḥ || 35||

य एवं चिन्तयेद् देवदेवेशं प्रयतोऽनिशम् ।संस्तौति भक्तिभावेन त्रिसन्ध्यं नित्यमेव च ॥ ३६॥

ya evaṃ cintayed devadeveśaṃ prayato'niśam |saṃstauti bhaktibhāvena trisandhyaṃ nityameva ca || 36||

धर्मार्थी लभते धर्मं श्रीभागवतमुत्तमम् ।अर्थार्थी लभते चार्थं कृष्णसेवाविधौ रतिम् ॥ ३७॥

dharmārthī labhate dharmaṃ śrībhāgavatamuttamam |arthārthī labhate cārthaṃ kṛṣṇasevāvidhau ratim || 37||

कामार्थी लभते कामं प्रेमभक्तिविधानतः ।संसारवासनामुक्तिं मोक्षार्थी विगतस्पृहः ॥ ३८॥

kāmārthī labhate kāmaṃ premabhaktividhānataḥ |saṃsāravāsanāmuktiṃ mokṣārthī vigataspṛhaḥ || 38||

विद्यार्थी लभते विद्यां कामसंसारकृन्तनीम् ।काव्यार्थी कविताशक्तिं कृष्णवर्णनशालिनीम् ॥ ३९॥

vidyārthī labhate vidyāṃ kāmasaṃsārakṛntanīm |kāvyārthī kavitāśaktiṃ kṛṣṇavarṇanaśālinīm || 39||

अपुत्रो वैष्णवं पुत्रं लभते लोकवन्दितम् ।आश्रयार्थी लभेच्छान्तं श्रीमद्भागवतं गुरुम् ॥ ४०॥

aputro vaiṣṇavaṃ putraṃ labhate lokavanditam |āśrayārthī labhecchāntaṃ śrīmadbhāgavataṃ gurum || 40||

श्रीमच्छ्रीकृष्णचैतन्यपादाम्बुजे भृशम् ।प्रेमानुरागललितां सद्भक्तिं लभते नरः ॥ ४१॥

śrīmacchrīkṛṣṇacaitanyapādāmbuje bhṛśam |premānurāgalalitāṃ sadbhaktiṃ labhate naraḥ || 41||

इति श्रीलावधूताभिन्नश्रीमद्-अद्वैताचार्यप्रभुविरचितंश्रीगौराङ्गप्रत्यङ्गवर्णनाख्यस्तवराजः समाप्तः ।अफ़्तेर् आद्वैत अस् देअथ्।

iti śrīlāvadhūtābhinnaśrīmad-advaitācāryaprabhuviracitaṃśrīgaurāṅgapratyaṅgavarṇanākhyastavarājaḥ samāptaḥ |aफ़ter ādvaita as death|