श्रीकृष्णस्तोत्रम् (सान्दीपनिकृतं ब्रह्मवैवर्तपुराणान्तर्गतम् परं ब्रह्म परं धाम परमीश परात्पर) Sandipanikritam Shri Krishna Stotram

सान्दीपनिरुवाच ।परं ब्रह्म परं धाम परमीश परात्पर ।स्वेच्छामयं स्वयञ्ज्योतिर्निलिप्तैको निरङ्कुशः ॥ ६॥

sāndīpaniruvāca |paraṃ brahma paraṃ dhāma paramīśa parātpara |svecchāmayaṃ svayañjyotirniliptaiko niraṅkuśaḥ || 6||

भक्तैकनाथ भक्तेष्ट भक्तानुग्रहविग्रह ।भक्तवाञ्छाकल्पतरो भक्तानां प्राणवल्लभ ॥ ७॥

bhaktaikanātha bhakteṣṭa bhaktānugrahavigraha |bhaktavāñchākalpataro bhaktānāṃ prāṇavallabha || 7||

मायया बालरूपोऽसि ब्रह्मेशशेषवन्दितः ।मायया भुवि भूपाल भुवो भारक्षयाय च ॥ ८॥

māyayā bālarūpo'si brahmeśaśeṣavanditaḥ |māyayā bhuvi bhūpāla bhuvo bhārakṣayāya ca || 8||

योगिनो यं विदन्त्येवं ब्रह्मज्योतिः सनातनम् ।ध्यायन्ते भक्तनिवहा ज्योतिरभ्यन्तरे मुदा ॥ ९॥

yogino yaṃ vidantyevaṃ brahmajyotiḥ sanātanam |dhyāyante bhaktanivahā jyotirabhyantare mudā || 9||

द्विभुजं मुरलीहस्तं सुन्दरं श्यामरूपकम् ।चन्दनोक्षितसर्वाङ्गं सस्मितं भक्तवत्सलम् ॥ १०॥

dvibhujaṃ muralīhastaṃ sundaraṃ śyāmarūpakam |candanokṣitasarvāṅgaṃ sasmitaṃ bhaktavatsalam || 10||

पीताम्बरधरं देवं वनमालाविभूषितम् ।लीलापाङ्गतरङ्गैश्च निन्दितानङ्गमूर्च्छितम् ॥ ११॥

pītāmbaradharaṃ devaṃ vanamālāvibhūṣitam |līlāpāṅgataraṅgaiśca ninditānaṅgamūrcchitam || 11||

अलक्तभवनं तद्वत्पादपद्मं सुशोभनम् ।कौस्तुभोद्भासिताङ्गं च दिव्यमूर्तिं मनोहरम् ॥ १२॥

alaktabhavanaṃ tadvatpādapadmaṃ suśobhanam |kaustubhodbhāsitāṅgaṃ ca divyamūrtiṃ manoharam || 12||

ईषद्धास्यप्रसन्नं च सुवेषं प्रस्तुतं सुरैः ।देवदेवं जगन्नाथं त्रैलोक्यमोहनं परम् ॥ १३॥

īṣaddhāsyaprasannaṃ ca suveṣaṃ prastutaṃ suraiḥ |devadevaṃ jagannāthaṃ trailokyamohanaṃ param || 13||

कोटिकन्दर्पलीलाभं कमनीयमनीश्वरम् ।अमूल्यरत्ननिर्माणभूषणौघेन भूषितम् ॥ १४॥

koṭikandarpalīlābhaṃ kamanīyamanīśvaram |amūlyaratnanirmāṇabhūṣaṇaughena bhūṣitam || 14||

वरं वरण्यं वरदं वरदानामभीप्सितम् ।चतुर्णामपि वेदानां कारणानां च कारणम् ॥ १५॥

varaṃ varaṇyaṃ varadaṃ varadānāmabhīpsitam |caturṇāmapi vedānāṃ kāraṇānāṃ ca kāraṇam || 15||

पाठार्थ मत्प्रियस्थानमागतोऽसि च मायया ।पाठं ते लोकशिक्षार्थं रमणं गमनं रणम् ।स्वात्मारामस्य च विभोः परिपूर्णतमस्य च ॥ १६॥

pāṭhārtha matpriyasthānamāgato'si ca māyayā |pāṭhaṃ te lokaśikṣārthaṃ ramaṇaṃ gamanaṃ raṇam |svātmārāmasya ca vibhoḥ paripūrṇatamasya ca || 16||

इति श्रीब्रह्मवैवर्तपुराणे श्रीकृष्णजन्मखण्डे उत्तरेद्व्यधिकशाततमाध्यायान्तर्गतं सान्दीपनिकृतंश्रीकृष्णस्तोत्रं समाप्तम् ।ब्रह्मवैवर्तपुराण । श्रीकृष्णजन्म, उत्तरभाग । अध्याय १०२/६१५॥ब्रह्मवैवर्तपुराण । श्रीकृष्णजन्म, उत्तरभाग । अध्याय १०२/६-१५॥

iti śrībrahmavaivartapurāṇe śrīkṛṣṇajanmakhaṇḍe uttaredvyadhikaśātatamādhyāyāntargataṃ sāndīpanikṛtaṃśrīkṛṣṇastotraṃ samāptam |brahmavaivartapurāṇa | śrīkṛṣṇajanma, uttarabhāga | adhyāya 102/615||brahmavaivartapurāṇa | śrīkṛṣṇajanma, uttarabhāga | adhyāya 102/6-15||