सन्नामभूषणस्तोत्रम् Sannamabhushanastotram

गोपालाय धराधरेन्द्रपतये स्वीयार्तिहत्रे सुरत्रासाम्भोधिनिमग्नदेवनिचयोद्धर्त्रे यशोदात्मने ।श्रीमन्नन्दसुताय गोपवनितासंलालिताय ध्रुवंकण्ठस्थापितकौस्तुभाय जलदश्यामाय तुभ्यं नमः ॥ १॥

gopālāya dharādharendrapataye svīyārtihatre suratrāsāmbhodhinimagnadevanicayoddhartre yaśodātmane |śrīmannandasutāya gopavanitāsaṃlālitāya dhruvaṃkaṇṭhasthāpitakaustubhāya jaladaśyāmāya tubhyaṃ namaḥ || 1||

यन्नामलवसंस्पर्शान्न तिष्ठति पराश्रयः ।तं गोपीहृदयानन्ददायकं प्रभुमाश्रये ॥ २॥

yannāmalavasaṃsparśānna tiṣṭhati parāśrayaḥ |taṃ gopīhṛdayānandadāyakaṃ prabhumāśraye || 2||

यन्नामसम्भावनया गजेन्द्रो ग्राहाद्विमुक्तः परमं पदं च ।जगाम तन्नामशतं च साष्टकं वदाम्यहं भक्तियुतो यथामति ॥ ३॥

yannāmasambhāvanayā gajendro grāhādvimuktaḥ paramaṃ padaṃ ca |jagāma tannāmaśataṃ ca sāṣṭakaṃ vadāmyahaṃ bhaktiyuto yathāmati || 3||

पूर्वं श्रीवासुदेवेन नाम्नामष्टोत्तरं शतम् ।कृतं यस्य क्रमात्तस्य तत्तन्नामानुसारतः ॥ ४॥

pūrvaṃ śrīvāsudevena nāmnāmaṣṭottaraṃ śatam |kṛtaṃ yasya kramāttasya tattannāmānusārataḥ || 4||

छन्दोऽनुष्टुबृषिः कर्त्ता देवो गोवर्द्धनाधिपः ।सर्वेष्टफलसिद्ध्यर्थे विनियोग उदाहृतः ॥ ५॥

chando'nuṣṭubṛṣiḥ karttā devo govarddhanādhipaḥ |sarveṣṭaphalasiddhyarthe viniyoga udāhṛtaḥ || 5||

गोपालः परमानन्दो यशोदानन्दनन्दनः ।वसुदेवात्मजः श्रीशो वासुदेवः सनातनः ॥ ६। ।

gopālaḥ paramānando yaśodānandanandanaḥ |vasudevātmajaḥ śrīśo vāsudevaḥ sanātanaḥ || 6| |

पीताम्बरो जगत्त्राता माधवो भक्तवत्सलः ।अनन्तकीर्तिर्यज्ञेशः सर्वज्ञः सर्वमङ्गलः ॥ ७॥

pītāmbaro jagattrātā mādhavo bhaktavatsalaḥ |anantakīrtiryajñeśaḥ sarvajñaḥ sarvamaṅgalaḥ || 7||

वनमाली सूर्यकोटिप्रतीकाशो महाबलः ।विश्वम्भरः कृपासिन्धुः पुरुषः पुरुषोत्तमः ॥ ८॥

vanamālī sūryakoṭipratīkāśo mahābalaḥ |viśvambharaḥ kṛpāsindhuḥ puruṣaḥ puruṣottamaḥ || 8||

कौस्तुभोद्भासितोरस्कः कृपालुर्जगतां पतिः ।मथुरागमनोद्भूतमङ्गलाक्रान्तगोकुलः ॥ ९॥

kaustubhodbhāsitoraskaḥ kṛpālurjagatāṃ patiḥ |mathurāgamanodbhūtamaṅgalākrāntagokulaḥ || 9||

कालीयस्य फणोत्पन्नमणिभूषितविग्रहः ।पद्मनाभः शेषशायी गोगोपगोपिकापतिः ॥ १०॥

kālīyasya phaṇotpannamaṇibhūṣitavigrahaḥ |padmanābhaḥ śeṣaśāyī gogopagopikāpatiḥ || 10||

निरञ्जनः प्रतापी च जगदानन्दकारकः ।नटाकृतिर्यदूनां च कुलचूडामणिर्विभुः ॥ ११॥

nirañjanaḥ pratāpī ca jagadānandakārakaḥ |naṭākṛtiryadūnāṃ ca kulacūḍāmaṇirvibhuḥ || 11||

कन्दर्पकोटिलावण्यः परमाद्भुतरूपधृक् ।कमलाधिपतिः स्वामी सर्वदेवेशनायकः ॥ १२॥

kandarpakoṭilāvaṇyaḥ paramādbhutarūpadhṛk |kamalādhipatiḥ svāmī sarvadeveśanāyakaḥ || 12||

चतुर्भुजश्चतुर्मूर्तिश्चतुर्वर्गविशारदः ।नारायणः सर्वरूपः सर्वदा पूतमानसः ॥ १३॥

caturbhujaścaturmūrtiścaturvargaviśāradaḥ |nārāyaṇaḥ sarvarūpaḥ sarvadā pūtamānasaḥ || 13||

श्रीकृष्णः केशिसंहर्त्ता मुरारिर्देवकीसुतः ।सर्वारिष्टान्तकः सर्वपूरकः सर्वभाववित् ॥ १४॥

śrīkṛṣṇaḥ keśisaṃharttā murārirdevakīsutaḥ |sarvāriṣṭāntakaḥ sarvapūrakaḥ sarvabhāvavit || 14||

खरदुष्टिनिराकर्त्ता तुलसीदासवल्लभः ।पूरिताखिलभक्तादिहृद्युत्पन्नमनोरथः ॥ १५॥

kharaduṣṭinirākarttā tulasīdāsavallabhaḥ |pūritākhilabhaktādihṛdyutpannamanorathaḥ || 15||

उपेन्द्रः सर्वशक्तिश्च वरदेशो महोदधिः ।सोमवंशोद्भवो विष्णुः सर्वात्मा सद्गुणार्णवः ॥ १६॥

upendraḥ sarvaśaktiśca varadeśo mahodadhiḥ |somavaṃśodbhavo viṣṇuḥ sarvātmā sadguṇārṇavaḥ || 16||

गोपिकागृहसम्भूतनवनीतलवप्रियः ।धूलिधूसरिताङ्गश्च कमलारुणलोचनः ॥ १७॥

gopikāgṛhasambhūtanavanītalavapriyaḥ |dhūlidhūsaritāṅgaśca kamalāruṇalocanaḥ || 17||

गोवर्द्धनाद्रिधारी च तत्स्थिताखिलरक्षकः ।प्रमेयोत्पन्नसद्भावसफलीकृतगोपिकः ॥ १८॥

govarddhanādridhārī ca tatsthitākhilarakṣakaḥ |prameyotpannasadbhāvasaphalīkṛtagopikaḥ || 18||

तिरस्कृतहरीणाक्षः पूतनाप्राणघातकः ।देवोऽच्युतो व्रजेशश्च सर्वधर्मपरायणः ॥ १९॥

tiraskṛtaharīṇākṣaḥ pūtanāprāṇaghātakaḥ |devo'cyuto vrajeśaśca sarvadharmaparāyaṇaḥ || 19||

वृन्दावनप्राणपतिः सत्यवक्ता धुरन्धरः ।कृतरासादिसन्नृत्यसादीभूतवपुर्जनः ॥ २०॥

vṛndāvanaprāṇapatiḥ satyavaktā dhurandharaḥ |kṛtarāsādisannṛtyasādībhūtavapurjanaḥ || 20||

नन्दापदश्च संहर्त्ता बालगोपालचेष्टितः ।दामोदरो विश्वमूर्तिर्धेनुकारिः प्रलम्बहा ॥ २१॥

nandāpadaśca saṃharttā bālagopālaceṣṭitaḥ |dāmodaro viśvamūrtirdhenukāriḥ pralambahā || 21||

वातासुरारिर्गोविन्दः कंसघ्नो गोकुलोत्सवः ।देवेन्द्रदर्पसंहर्त्ता रुक्मिणीप्राणवल्लभः ॥ २२॥

vātāsurārirgovindaḥ kaṃsaghno gokulotsavaḥ |devendradarpasaṃharttā rukmiṇīprāṇavallabhaḥ || 22||

समस्तदुष्टहर्त्ता च मोक्षदो गरुडध्वजः ।योगीश्वरो जगत्पूज्यो महोदारचरित्रवान् ॥ २३॥

samastaduṣṭaharttā ca mokṣado garuḍadhvajaḥ |yogīśvaro jagatpūjyo mahodāracaritravān || 23||

उद्वहः श्रीयशोदादिलालितो मधुसूदनः ।समुद्रकोटिगम्भीरः सप्तलोकैकमण्डनः ॥ २४॥

udvahaḥ śrīyaśodādilālito madhusūdanaḥ |samudrakoṭigambhīraḥ saptalokaikamaṇḍanaḥ || 24||

जगदेकस्फुरत्ख्यातिर्धरासद्गतिनाशनः ।सत्यभामाप्राणपतिर्यमुनाजलकौतुकी ॥ २५॥

jagadekasphuratkhyātirdharāsadgatināśanaḥ |satyabhāmāprāṇapatiryamunājalakautukī || 25||

सन्नामभूषणाख्यं वै स्तोत्रं यः प्रपठेत्सुधीः ।कण्ठे लिखित्वा संस्थाप्य सोऽपि विष्णुर्न संशयः ॥ २६॥

sannāmabhūṣaṇākhyaṃ vai stotraṃ yaḥ prapaṭhetsudhīḥ |kaṇṭhe likhitvā saṃsthāpya so'pi viṣṇurna saṃśayaḥ || 26||

गोकुलेशं नमस्कृत्य स्तुत्वा भक्त्या विचारितम् ।तस्माद्गोपालभक्तानामस्तु बुद्धिप्रसारणम् ॥ २७॥

gokuleśaṃ namaskṛtya stutvā bhaktyā vicāritam |tasmādgopālabhaktānāmastu buddhiprasāraṇam || 27||

प्रोक्तानि यानि नामानि भूषारूपाणि तानि सः ।दध्यादङ्गेषु सर्वेषु त्रैलोक्यविजयी भवेत् ॥ २८॥

proktāni yāni nāmāni bhūṣārūpāṇi tāni saḥ |dadhyādaṅgeṣu sarveṣu trailokyavijayī bhavet || 28||

इति सन्नामभूषणं स्तोत्रं समाप्तम् ।

iti sannāmabhūṣaṇaṃ stotraṃ samāptam |