गोपालस्तोत्रम् अथवा गोपालस्तवराजः Gopalastotram

श्री गणेशाय नमः ।श्रीमद्गोपीजनवल्लभाय नमः ।ॐ अस्य श्रीगोपालस्तवराजमन्त्रस्य श्रीनारद ऋषिः ।अनुष्टुप् छन्दः । श्रीकृष्णः परमात्मा देवता ।श्रीकृष्णप्रीत्यर्थे जपे विनोयोगः ॥अथ ध्यानम् ।सजलजलदनीलं दर्शितोदारशीलंकरतलधृतशैलं वेणुवाद्यै रसालम् ।व्रजजनकुलपालं कामिनीकेलिलोलंतरुणतुलसिमालं नौमि गोपालबालम् ॥श्रीनारद उवाच ।नवीननीरदश्यामं नीलेन्दीवरलोचनम् ।बल्लवीनन्दनं वन्दे कृष्णं गोपालरूपिणम् ॥ १॥

śrī gaṇeśāya namaḥ |śrīmadgopījanavallabhāya namaḥ |oṃ asya śrīgopālastavarājamantrasya śrīnārada ṛṣiḥ |anuṣṭup chandaḥ | śrīkṛṣṇaḥ paramātmā devatā |śrīkṛṣṇaprītyarthe jape vinoyogaḥ ||atha dhyānam |sajalajaladanīlaṃ darśitodāraśīlaṃkarataladhṛtaśailaṃ veṇuvādyai rasālam |vrajajanakulapālaṃ kāminīkelilolaṃtaruṇatulasimālaṃ naumi gopālabālam ||śrīnārada uvāca |navīnanīradaśyāmaṃ nīlendīvaralocanam |ballavīnandanaṃ vande kṛṣṇaṃ gopālarūpiṇam || 1||

स्फुरद्बर्हिदलोद्बद्धनीलकुञ्चितमूर्धजम् ।कदम्बकुसुमोद्बद्धवनमालाविभूषितम् ॥ २॥

sphuradbarhidalodbaddhanīlakuñcitamūrdhajam |kadambakusumodbaddhavanamālāvibhūṣitam || 2||

गण्डमण्डलसंसर्गिचलत्कुञ्चितकुन्तलम् ।स्थूलं मुक्ताफलोदारहारोद्योतितवक्षसम् ॥ ३॥

gaṇḍamaṇḍalasaṃsargicalatkuñcitakuntalam |sthūlaṃ muktāphalodārahārodyotitavakṣasam || 3||

हेमाङ्गदतुलाकोटिकिरीटोज्ज्वलविग्रहम् ।मन्दमारुतसंक्षोभचलिताम्बरसञ्चयम् ॥ ४॥

hemāṅgadatulākoṭikirīṭojjvalavigraham |mandamārutasaṃkṣobhacalitāmbarasañcayam || 4||

रुचिरौष्ठपुटन्यस्तवंशीमधुरनिःस्वनैः ।लसद्गोपालिकाचेतो मोहयन्तं पुनः पुनः ॥ ५॥

rucirauṣṭhapuṭanyastavaṃśīmadhuraniḥsvanaiḥ |lasadgopālikāceto mohayantaṃ punaḥ punaḥ || 5||

बल्लवीवदनाम्भोजमधुपानमधुव्रतम् ।क्षोभयन्तं मनस्तासां सस्मेरापाङ्गवीक्षणैः ॥ ६॥

ballavīvadanāmbhojamadhupānamadhuvratam |kṣobhayantaṃ manastāsāṃ sasmerāpāṅgavīkṣaṇaiḥ || 6||

यौवनोद्भिदेहाभिः संसक्ताभिः परस्परम् ।विचित्राम्बरभूषाभिर्गोपनारीभिरावृतम् ॥ ७॥

yauvanodbhidehābhiḥ saṃsaktābhiḥ parasparam |vicitrāmbarabhūṣābhirgopanārībhirāvṛtam || 7||

प्रभिन्नाञ्जनकालिन्दीजलकेलिकलोत्सुकम् ।योधयन्तं क्वचिद्गोपान् व्याहरन्तं गवां गणम् ॥ ८॥

prabhinnāñjanakālindījalakelikalotsukam |yodhayantaṃ kvacidgopān vyāharantaṃ gavāṃ gaṇam || 8||

कालिन्दीजलसंसर्गिशीतलानिलसेविते ।कदम्बपादपच्छाये स्थितं वृन्दावने क्वचित् ॥ ९॥

kālindījalasaṃsargiśītalānilasevite |kadambapādapacchāye sthitaṃ vṛndāvane kvacit || 9||

रत्नभूधरसंलग्नरत्नासनपरिग्रहम् ।कल्पपादपमध्यस्थहेममण्डपिकागतम् ॥ १०॥

ratnabhūdharasaṃlagnaratnāsanaparigraham |kalpapādapamadhyasthahemamaṇḍapikāgatam || 10||

वसन्तकुसुमामोदसुरभीकृतदिङ्मुखे ।गोवर्धनगिरौ रम्ये स्थितं रासरसोत्सुकम् ॥ ११॥

vasantakusumāmodasurabhīkṛtadiṅmukhe |govardhanagirau ramye sthitaṃ rāsarasotsukam || 11||

सव्यहस्ततलन्यस्तगिरिवर्यातपत्रकम् ।खण्डिताखण्डलोन्मुक्तमुक्तासारघनाघनम् ॥ १२॥

savyahastatalanyastagirivaryātapatrakam |khaṇḍitākhaṇḍalonmuktamuktāsāraghanāghanam || 12||

वेणुवाद्यमहोल्लासकृतहुङ्कारनिःस्वनैः ।सवत्सैरुन्मुखैः शश्वद्गोकुलैरभिवीक्षितम् ॥ १३॥

veṇuvādyamahollāsakṛtahuṅkāraniḥsvanaiḥ |savatsairunmukhaiḥ śaśvadgokulairabhivīkṣitam || 13||

कृष्णमेवानुगायद्भिस्तच्चेष्टावशवर्तिभिः ।दण्डपाशोद्यतकरैर्गोपालैरूपशोभितम् ॥ १४॥

kṛṣṇamevānugāyadbhistacceṣṭāvaśavartibhiḥ |daṇḍapāśodyatakarairgopālairūpaśobhitam || 14||

नारदाद्यैर्मुनिश्रेष्ठैर्वेदवेदाङ्गपारगैः ।प्रीतिसुस्निग्धया वाचा स्तूयमानं परात्परम् ॥ १५॥

nāradādyairmuniśreṣṭhairvedavedāṅgapāragaiḥ |prītisusnigdhayā vācā stūyamānaṃ parātparam || 15||

य एवं चिन्तयेद्देवं भक्त्या संस्तौति मानवः ।त्रिसन्ध्यं तस्य तुष्टोऽसौ ददाति वरमीप्सितम् ॥ १६॥

ya evaṃ cintayeddevaṃ bhaktyā saṃstauti mānavaḥ |trisandhyaṃ tasya tuṣṭo'sau dadāti varamīpsitam || 16||

राजवल्लभतामेति भवेत्सर्वजनप्रियः ।अचलां श्रियमाप्नोति स वाग्मी जायते ध्रुवम् ॥ १७॥

rājavallabhatāmeti bhavetsarvajanapriyaḥ |acalāṃ śriyamāpnoti sa vāgmī jāyate dhruvam || 17||

॥ इति श्रीनारदपञ्चरात्रे ज्ञानामृतसारेचतुर्थरात्रे गोपालस्तवराजः सम्पूर्णः ॥

|| iti śrīnāradapañcarātre jñānāmṛtasārecaturtharātre gopālastavarājaḥ sampūrṇaḥ ||