स्त्रीगुरु ध्यानस्तुतिकवचं गीता विविध तन्त्रे Striguru Dhyanam Stuti Kavacha and Gita from various tantras

॥ अथ स्त्रीगुरुध्यानं गुप्तसाधनतन्त्रे द्वितीयपटले ॥पार्वत्युवाच ॥गुरुध्यानं श्रुतं नाथ \! सर्वतन्त्रेषु गोपितम् ।स्त्रिया दीक्षा शुभा प्रोक्ता सर्वकामफलप्रदा ॥ १॥

|| atha strīgurudhyānaṃ guptasādhanatantre dvitīyapaṭale ||pārvatyuvāca ||gurudhyānaṃ śrutaṃ nātha \! sarvatantreṣu gopitam |striyā dīkṣā śubhā proktā sarvakāmaphalapradā || 1||

बहुजन्मार्जितात् पुण्यात् बहुभग्यवशाद् यदि ।स्त्रीगुरुर्लभ्यते नाथ \! तस्या ध्यानन्तु कीदृशम् ॥ २॥

bahujanmārjitāt puṇyāt bahubhagyavaśād yadi |strīgururlabhyate nātha \! tasyā dhyānantu kīdṛśam || 2||

कुत्र वा सा गुरुर्ध्येया श्रोतुमिच्छामि साम्प्रतम् ।कथयस्व महादेव \! यद्यहं तव वल्लभा ॥ ३॥

kutra vā sā gururdhyeyā śrotumicchāmi sāmpratam |kathayasva mahādeva \! yadyahaṃ tava vallabhā || 3||

शिव उवाच ॥शृणु पार्वति \! वक्ष्यामि तव स्नेहपरिप्लुतः ।रहस्यं स्त्रीगुरोर्ध्यानं यथा ध्येया च सा गुरुः ॥ ४॥

śiva uvāca ||śṛṇu pārvati \! vakṣyāmi tava snehapariplutaḥ |rahasyaṃ strīgurordhyānaṃ yathā dhyeyā ca sā guruḥ || 4||

सहस्रारे महापद्मे किञ्जल्कगणशोभिते ।प्रफुल्लपद्मपत्राक्षी घनपीनपयोधरा ॥ ५॥

sahasrāre mahāpadme kiñjalkagaṇaśobhite |praphullapadmapatrākṣī ghanapīnapayodharā || 5||

प्रसन्नवदना क्षीणमध्या ध्यायेच्छिवां गुरुम् ।पद्मरागसमाभासां रक्तवस्त्रसुशोभनाम् ॥ ६॥

prasannavadanā kṣīṇamadhyā dhyāyecchivāṃ gurum |padmarāgasamābhāsāṃ raktavastrasuśobhanām || 6||

रक्तकङ्कणपाणिञ्च रक्तनूपुरशोभिताम् ।शरदिन्दुप्रतीकाशां रक्तोद्भासितकुण्डलाम् ॥ ७॥

raktakaṅkaṇapāṇiñca raktanūpuraśobhitām |śaradindupratīkāśāṃ raktodbhāsitakuṇḍalām || 7||

स्वनाथवामभागस्थां वराभयकराम्बुजाम् ।इति ते कथितं देवि \! स्त्रीगुरोर्ध्यानमुत्तमम् ।गोपनीयं प्रयत्नेन न प्रकाश्यं कदाचन ॥ ८॥

svanāthavāmabhāgasthāṃ varābhayakarāmbujām |iti te kathitaṃ devi \! strīgurordhyānamuttamam |gopanīyaṃ prayatnena na prakāśyaṃ kadācana || 8||

अथ स्तुतिः ॥ मातृकाभेदतन्त्रे सप्तपटले ॥देव्युवाच ॥स्तुतिञ्च कवचं नाथ \! श्रोतुमिच्छामि साम्प्रतम् ।श्रीगुरोः कवचं प्रोक्तं त्वया नाथ \! पुरा प्रभो \! ॥ १॥

atha stutiḥ || mātṛkābhedatantre saptapaṭale ||devyuvāca ||stutiñca kavacaṃ nātha \! śrotumicchāmi sāmpratam |śrīguroḥ kavacaṃ proktaṃ tvayā nātha \! purā prabho \! || 1||

इदानीं स्त्रीगुरोः स्तोत्रं कवचं मयि कथ्यताम् ।यस्य विज्ञानमात्रेण पुनर्जन्म न जायते ॥ २॥

idānīṃ strīguroḥ stotraṃ kavacaṃ mayi kathyatām |yasya vijñānamātreṇa punarjanma na jāyate || 2||

श्रीशिव उवाच ॥शृणु देवि \! प्रवक्ष्यामि स्तोत्रं परमगोपनम् ।यस्य श्रवणमात्रेण संसारान्मुच्यते नरः ॥ १॥

śrīśiva uvāca ||śṛṇu devi \! pravakṣyāmi stotraṃ paramagopanam |yasya śravaṇamātreṇa saṃsārānmucyate naraḥ || 1||

नमस्ते देवदेवेशि \! नमस्ते हरपूजिते \! ।ब्रह्मविद्यास्वरूपायै तस्यै नित्यं नमो नमः ॥ २॥

namaste devadeveśi \! namaste harapūjite \! |brahmavidyāsvarūpāyai tasyai nityaṃ namo namaḥ || 2||

अज्ञानतिमिरान्धस्य ज्ञानाञ्जनशलाकया ।यया चक्षुरुन्मीलितं तस्यै नित्यं नमो नमः ॥ ३॥

ajñānatimirāndhasya jñānāñjanaśalākayā |yayā cakṣurunmīlitaṃ tasyai nityaṃ namo namaḥ || 3||

भवबन्धनपारस्य तारिणी जननी परा ।ज्ञानदा मोक्षदा नित्यं तस्यै नित्यं नमो नमः ॥ ४॥

bhavabandhanapārasya tāriṇī jananī parā |jñānadā mokṣadā nityaṃ tasyai nityaṃ namo namaḥ || 4||

श्रीनाथवामभागस्था सदया सुरपूजिता ।सदा विज्ञानदात्री च तस्यै नित्यं नमो नमः ॥ ५॥

śrīnāthavāmabhāgasthā sadayā surapūjitā |sadā vijñānadātrī ca tasyai nityaṃ namo namaḥ || 5||

सहस्रारे महापद्मे सदानन्दस्वरूपिणी ।महामोक्षप्रदा देवी तस्यै नित्यं नमो नमः ॥ ६॥

sahasrāre mahāpadme sadānandasvarūpiṇī |mahāmokṣapradā devī tasyai nityaṃ namo namaḥ || 6||

ब्रह्मविष्णुस्वरूपा च महारुद्रस्वरूपिणी ।त्रिगुणात्मस्वरूपा च तस्यै नित्यं नमो नमः ॥ ७॥

brahmaviṣṇusvarūpā ca mahārudrasvarūpiṇī |triguṇātmasvarūpā ca tasyai nityaṃ namo namaḥ || 7||

चन्द्रसूर्य्याग्निरूपा च मदाघूर्णितलोचना ।स्वनाथञ्च समालिङ्ग्य तस्यै नित्यं नमो नमः ॥ ८॥

candrasūryyāgnirūpā ca madāghūrṇitalocanā |svanāthañca samāliṅgya tasyai nityaṃ namo namaḥ || 8||

ब्रह्मविष्णुशिवत्वादिजीवन्मुक्तिप्रदायिनी ।ज्ञानविज्ञानयोर्दात्री तस्यै श्रीगुरवे नमः ॥ ९॥

brahmaviṣṇuśivatvādijīvanmuktipradāyinī |jñānavijñānayordātrī tasyai śrīgurave namaḥ || 9||

इदं स्तोत्रं महेशानि \! यः पठेद्भक्तिसंयुतः ।स सिद्धिं लभते नित्यं सत्यं सत्यं न संशयः ॥ १०॥

idaṃ stotraṃ maheśāni \! yaḥ paṭhedbhaktisaṃyutaḥ |sa siddhiṃ labhate nityaṃ satyaṃ satyaṃ na saṃśayaḥ || 10||

प्रातःकाले पठेद् यस्तु गुरुपूजापुरःसरम् ।स एव धन्यो लोकेशो देवीपुत्र इव क्षितौ ।इति मातृकाभेदतन्त्रे स्त्रीगुरोः स्तोत्रं सम्पूर्णम् ॥ ११॥

prātaḥkāle paṭhed yastu gurupūjāpuraḥsaram |sa eva dhanyo lokeśo devīputra iva kṣitau |iti mātṛkābhedatantre strīguroḥ stotraṃ sampūrṇam || 11||

स्तोत्रं समाप्तं देवेशि \! कवचं शृणु सादरम् ।यस्य स्मरणमात्रेण वागीशसमतां व्रजेत् ।॥स्त्रीगुरुकवचम् ॥विनियोगःस्त्रीगुरोः कवचस्यास्य सदाशिव ऋषिः स्मृतः ।ताराख्या देवता ख्याता चतुर्वर्गफलप्रदा ॥ १॥

stotraṃ samāptaṃ deveśi \! kavacaṃ śṛṇu sādaram |yasya smaraṇamātreṇa vāgīśasamatāṃ vrajet |||strīgurukavacam ||viniyogaḥstrīguroḥ kavacasyāsya sadāśiva ṛṣiḥ smṛtaḥ |tārākhyā devatā khyātā caturvargaphalapradā || 1||

क्लीं बीजं चक्षुषोर्मध्ये सर्वाङ्गं मे सदावतु ।ऐं बीजं मे मुखं पातु ह्रीं जिह्वां परिरक्षतु ॥ २॥

klīṃ bījaṃ cakṣuṣormadhye sarvāṅgaṃ me sadāvatu |aiṃ bījaṃ me mukhaṃ pātu hrīṃ jihvāṃ parirakṣatu || 2||

श्रीं बीजं स्कन्धदेशं मे हसखफ्रें भुजद्वयम् ।हकारः कण्ठदेशं मे सकारः षोडशं दलम् ॥ ३॥

śrīṃ bījaṃ skandhadeśaṃ me hasakhaphreṃ bhujadvayam |hakāraḥ kaṇṭhadeśaṃ me sakāraḥ ṣoḍaśaṃ dalam || 3||

क्षवर्णस्तदधः पातु लकारो हृदयं मम ।वकारः पृष्ठदेशञ्च रकारो दक्षपार्श्वकम् ॥ ४॥

kṣavarṇastadadhaḥ pātu lakāro hṛdayaṃ mama |vakāraḥ pṛṣṭhadeśañca rakāro dakṣapārśvakam || 4||

यूङ्कारो वामपार्श्वञ्च सकारो मेरुमेव च ।हकारो मे दक्षभुजं क्षकारो वामहस्तकम् ॥ ५॥

yūṅkāro vāmapārśvañca sakāro merumeva ca |hakāro me dakṣabhujaṃ kṣakāro vāmahastakam || 5||

मकारश्चाङ्गुलीं पातु लकारो मे नखं वतु ।वकारो मे नितम्बञ्च रकारो जठरं वतु ॥ ६॥

makāraścāṅgulīṃ pātu lakāro me nakhaṃ vatu |vakāro me nitambañca rakāro jaṭharaṃ vatu || 6||

षीङ्कारः पादयुगलं हेसौः सर्वाङ्गं मेऽवतु ।हेसौर्लिङ्गञ्च लोमानि केशञ्च परिरक्षतु ॥ ७॥

ṣīṅkāraḥ pādayugalaṃ hesauḥ sarvāṅgaṃ me'vatu |hesaurliṅgañca lomāni keśañca parirakṣatu || 7||

ऐं बीजं पातु पूर्वे मे ह्रीं बीजं दक्षिणेऽवतु ।श्रीं बीजं पश्चिमे पातु उत्तरे भूतसम्भवम् ॥ ८॥

aiṃ bījaṃ pātu pūrve me hrīṃ bījaṃ dakṣiṇe'vatu |śrīṃ bījaṃ paścime pātu uttare bhūtasambhavam || 8||

श्रीं पातु चाग्निकोणे च वेदाख्या नैरृतेऽवतु ।देवाम्बा पातु वायव्यां शम्भौ श्रीपादुकां तथा ॥ ९॥

śrīṃ pātu cāgnikoṇe ca vedākhyā nairṛte'vatu |devāmbā pātu vāyavyāṃ śambhau śrīpādukāṃ tathā || 9||

पूजयामि तथा चोर्द्ध्वं नमश्चाधः सदाऽवतु ।इति ते कथितं कान्ते \! कवचं परमाद्भुतम् ॥ १०॥

pūjayāmi tathā corddhvaṃ namaścādhaḥ sadā'vatu |iti te kathitaṃ kānte \! kavacaṃ paramādbhutam || 10||

गुरुमन्त्रं जपित्वा तु कवचं प्रफठेद्यदि ।ससिद्धः सगणः सोऽपि शिव एव न संशयः ॥ ११॥

gurumantraṃ japitvā tu kavacaṃ praphaṭhedyadi |sasiddhaḥ sagaṇaḥ so'pi śiva eva na saṃśayaḥ || 11||

पूजाकाले पठेद् यस्तु कवचं मन्त्रविग्रहम् ।पूजाफलं भवेत्तस्य सत्यं सत्यं सुरेश्वरि \! ॥ १२॥

pūjākāle paṭhed yastu kavacaṃ mantravigraham |pūjāphalaṃ bhavettasya satyaṃ satyaṃ sureśvari \! || 12||

त्रिसन्ध्यं यः पठेद्देवि \! स सिद्धो नात्र संशयः ।भूर्जे विलिख्य गुलिकां स्वर्णस्थां धारयेद् यदि ॥ १३॥

trisandhyaṃ yaḥ paṭheddevi \! sa siddho nātra saṃśayaḥ |bhūrje vilikhya gulikāṃ svarṇasthāṃ dhārayed yadi || 13||

तस्य दर्शनमात्रेण वादिनो निष्प्रभां गताः ।विवादे जयमाप्नोति रणे च निरृतेः समः ॥ १४॥

tasya darśanamātreṇa vādino niṣprabhāṃ gatāḥ |vivāde jayamāpnoti raṇe ca nirṛteḥ samaḥ || 14||

सभायां जयमाप्नोति मम तुल्यो न संशयः ।सहस्रारे भावयन् यस्त्रिसन्ध्यं प्रपठेद् यदि ॥ १५॥

sabhāyāṃ jayamāpnoti mama tulyo na saṃśayaḥ |sahasrāre bhāvayan yastrisandhyaṃ prapaṭhed yadi || 15||

स एव सिद्धो लोकेशो निर्वाणपदमीयते ।समस्तमङ्गलं नाम कवचं परमाद्भुतम् ॥ १६॥

sa eva siddho lokeśo nirvāṇapadamīyate |samastamaṅgalaṃ nāma kavacaṃ paramādbhutam || 16||

यस्मै कस्मै न दातव्यं न प्रकाश्यं कदाचन ।देयं शिष्याय शान्ताय चान्यथा पतनं भवेत् ॥ १७॥

yasmai kasmai na dātavyaṃ na prakāśyaṃ kadācana |deyaṃ śiṣyāya śāntāya cānyathā patanaṃ bhavet || 17||

अभक्तेभ्यश्च देवेशि \! पुत्रेभ्योऽपि न दर्शयेत् ।इदं कवचमज्ञात्वा दशविद्याश्च यो जपेत् ॥ १८॥

abhaktebhyaśca deveśi \! putrebhyo'pi na darśayet |idaṃ kavacamajñātvā daśavidyāśca yo japet || 18||

स नाप्नोति फलं तस्य चान्ते च नरकं व्रजेत् ।समाप्तं कवचं देवि \! किमन्यत् श्रोतुमिच्छसि ।तव स्नेहानुबन्धेन किं मया न प्रकाशितम् ॥ १९॥

sa nāpnoti phalaṃ tasya cānte ca narakaṃ vrajet |samāptaṃ kavacaṃ devi \! kimanyat śrotumicchasi |tava snehānubandhena kiṃ mayā na prakāśitam || 19||

॥ इति मातृकाभेदतन्त्रे स्त्रीगुरुकवचं समाप्तम् ॥॥ अथ स्त्रीगुरुगीता । कङ्कालमालिनीतन्त्रे द्वितीयपटले ॥पार्वत्युवाच ॥लोकेश \! कथ्यतां देव \! गुरुगीता मयि प्रभो \! ।श्रीभगवानुवाच ॥शृणु तारिणि \! वक्ष्यामि गीतां ब्रह्ममयीं पराम् ।गुरुस्त्वं सर्वशास्त्राणामहमेव प्रकाशकः ॥ १॥

|| iti mātṛkābhedatantre strīgurukavacaṃ samāptam |||| atha strīgurugītā | kaṅkālamālinītantre dvitīyapaṭale ||pārvatyuvāca ||lokeśa \! kathyatāṃ deva \! gurugītā mayi prabho \! |śrībhagavānuvāca ||śṛṇu tāriṇi \! vakṣyāmi gītāṃ brahmamayīṃ parām |gurustvaṃ sarvaśāstrāṇāmahameva prakāśakaḥ || 1||

त्वमेव गुरुरूपेण लोकानां त्राणकारिणी ।गया गङ्गा काशिका च त्वमेव सकलं जगत् ॥ २॥

tvameva gururūpeṇa lokānāṃ trāṇakāriṇī |gayā gaṅgā kāśikā ca tvameva sakalaṃ jagat || 2||

कावेरी यमुना रेवा करतोया सरस्वती ।गोमती चन्द्रभागा च त्वमेव कुलपालिके \! ॥ ३॥

kāverī yamunā revā karatoyā sarasvatī |gomatī candrabhāgā ca tvameva kulapālike \! || 3||

ब्रह्माण्डं सकलं देवि \! कोटिब्रह्माण्डमेव च ।न हि ते वक्तुमर्हामि क्रियाजालं महेश्वरि \! ॥ ४॥

brahmāṇḍaṃ sakalaṃ devi \! koṭibrahmāṇḍameva ca |na hi te vaktumarhāmi kriyājālaṃ maheśvari \! || 4||

उक्त्वा चोक्त्वा भावयित्वा भिक्षुकोऽहं नगात्मजे \! ।कथं त्वं जननी भूत्वा बधूस्त्वं मम देहिनाम् ॥ ५॥

uktvā coktvā bhāvayitvā bhikṣuko'haṃ nagātmaje \! |kathaṃ tvaṃ jananī bhūtvā badhūstvaṃ mama dehinām || 5||

तव चक्रं महेशानि \! अतीतं परमात्मनि ।इति ते कथिता गीता गुरुदेवस्य ब्रह्मणः ॥ ६॥

tava cakraṃ maheśāni \! atītaṃ paramātmani |iti te kathitā gītā gurudevasya brahmaṇaḥ || 6||

सङ्क्षेपेण महेशानि \! प्रभुरेव गुरुः स्वयम् ।जगत् समस्तमास्थाय गुरुस्त्वेको हि केवलम् ॥ ७॥

saṅkṣepeṇa maheśāni \! prabhureva guruḥ svayam |jagat samastamāsthāya gurustveko hi kevalam || 7||

इति तं तोषयित्वा च नुतिभिः स्तुतिभिस्तथा ।नानाविधद्रव्यदानैः सिद्धः स्यात् साधकोत्तमः ॥ ८॥

iti taṃ toṣayitvā ca nutibhiḥ stutibhistathā |nānāvidhadravyadānaiḥ siddhaḥ syāt sādhakottamaḥ || 8||

॥ इति स्त्रीगुरुगीता समाप्ता ॥

|| iti strīgurugītā samāptā ||