वल्लभस्तोत्रम् Shrivallabhastotram

पुरुषोत्तममुखाब्जाधिकसौभाग्यपद्रजाः ।गोकुलेन्दुमुखीवृन्दजीवनं यन्नतोऽस्म्यहम् ॥ १॥

puruṣottamamukhābjādhikasaubhāgyapadrajāḥ |gokulendumukhīvṛndajīvanaṃ yannato'smyaham || 1||

निजप्रकाशप्रसरावधूततमःकृतार्थीकृतजीववृन्दम् ।स्फुरन्मुखश्रीजितशारदेन्दुं श्रीगोकुलेन्दुं शरणं प्रपद्ये ॥ २॥

nijaprakāśaprasarāvadhūtatamaḥkṛtārthīkṛtajīvavṛndam |sphuranmukhaśrījitaśāradenduṃ śrīgokulenduṃ śaraṇaṃ prapadye || 2||

श्रीमद्वल्लभसत्कुलनिर्मलकमलप्रकाशमार्तण्डः ।सज्जनकुमुदकुलेन्दुर्गोकुलनाथो हरिर्जयति ॥ ३॥

śrīmadvallabhasatkulanirmalakamalaprakāśamārtaṇḍaḥ |sajjanakumudakulendurgokulanātho harirjayati || 3||

सम्पूर्णः पुरुषोत्तमभावाभिव्यक्तिसुखदमधुरश्रीः ।अङ्गीकृतद्विजवपुर्गोकुलनाथो हरिर्जयति ॥ ४॥

sampūrṇaḥ puruṣottamabhāvābhivyaktisukhadamadhuraśrīḥ |aṅgīkṛtadvijavapurgokulanātho harirjayati || 4||

चन्द्रमुखो नलिनाक्षस्तुलसीमणिमालिकां दधत्कण्ठे ।स्मितमधुराधरबिम्बो गोकुलनाथो हरिर्जयति ॥ ५॥

candramukho nalinākṣastulasīmaṇimālikāṃ dadhatkaṇṭhe |smitamadhurādharabimbo gokulanātho harirjayati || 5||

निर्मलशारदहिमकरकरनिकरक्षीरहीरसत्कीर्तिः ।श्रीविठ्ठलेशतनुजो गोकुलनाथो हरिर्जयति ॥ ६॥

nirmalaśāradahimakarakaranikarakṣīrahīrasatkīrtiḥ |śrīviṭhṭhaleśatanujo gokulanātho harirjayati || 6||

आहृतवरवेदगणो मथितक्षीरनीरधिः परमः ।उद्धृतवरगिरिराजो गोकुलनाथो हरिर्जयति ॥ ७॥

āhṛtavaravedagaṇo mathitakṣīranīradhiḥ paramaḥ |uddhṛtavaragirirājo gokulanātho harirjayati || 7||

श्रवणेन स्मरणेन च नमनेन च सङ्कथावलोकाभ्याम् ।स्वयमेव च स्वरसदो गोकुलनाथो हरिर्जयेति ॥ ८॥

śravaṇena smaraṇena ca namanena ca saṅkathāvalokābhyām |svayameva ca svarasado gokulanātho harirjayeti || 8||

सन्न्यासिवेशमोहितसाधुगणः सोऽसुरो हरिद्रोही ।येन निराक्रियतासौ गोकुलनाथो हरिर्जयति ॥ ९॥

sannyāsiveśamohitasādhugaṇaḥ so'suro haridrohī |yena nirākriyatāsau gokulanātho harirjayati || 9||

क्लेशमहोदधिमग्नः कल्याणो नाममात्रकल्याणः ।स्वयमुदधारि स येन गोकुलनाथो हरिर्जयति ॥ १०॥

kleśamahodadhimagnaḥ kalyāṇo nāmamātrakalyāṇaḥ |svayamudadhāri sa yena gokulanātho harirjayati || 10||

इति श्रीमठपतिकल्याणभट्टविरचितं श्रीवल्लभस्तोत्रं समाप्तम् ।

iti śrīmaṭhapatikalyāṇabhaṭṭaviracitaṃ śrīvallabhastotraṃ samāptam |