राघवेन्द्रपूजाविधानम् Shri Raghavendra Pujavidhanam

अथ पूजाविधिं वक्ष्ये राघवेन्द्रार्यसद्गुरोः ।यतस्तुष्टेन गुरुणा हरौ रुष्टोऽपि रक्ष्यते ॥ १॥

atha pūjāvidhiṃ vakṣye rāghavendrāryasadguroḥ |yatastuṣṭena guruṇā harau ruṣṭo'pi rakṣyate || 1||

कृतनित्याह्निकः शुद्धः स्वस्थचित्तः सुखासनः ।आदौ पूजाङ्गभूतं च जपं कुर्यात् गुरोन्मनोः ॥ २॥

kṛtanityāhnikaḥ śuddhaḥ svasthacittaḥ sukhāsanaḥ |ādau pūjāṅgabhūtaṃ ca japaṃ kuryāt guronmanoḥ || 2||

प्राणानायम्य मन्त्रेण संस्मरेन्मूर्ध्नि तं गुरुम् ।ऋषिछन्दो देवबीजशक्तिकीलान्यथोच्चरेत् ॥ ३॥

prāṇānāyamya mantreṇa saṃsmarenmūrdhni taṃ gurum |ṛṣichando devabījaśaktikīlānyathoccaret || 3||

न्यासं ध्यानं जपं कृत्वा गुरुपादे समर्पयेत् ॥ ४॥

nyāsaṃ dhyānaṃ japaṃ kṛtvā gurupāde samarpayet || 4||

राघवेन्द्रगुरं ध्यायेत् काषायाम्बरधारिणम् ।नीलाम्बुदसमाभासं भव्याङ्गं दीर्घबाहुकम् ॥ ५॥

rāghavendraguraṃ dhyāyet kāṣāyāmbaradhāriṇam |nīlāmbudasamābhāsaṃ bhavyāṅgaṃ dīrghabāhukam || 5||

रक्तराजीवपत्राक्षं ऊर्ध्वद्वादशपुण्ड्रकम् ।बद्धपद्मासनं देवस्वभावं दण्डधारिणम् ॥ ६॥

raktarājīvapatrākṣaṃ ūrdhvadvādaśapuṇḍrakam |baddhapadmāsanaṃ devasvabhāvaṃ daṇḍadhāriṇam || 6||

आनाभिलम्बितस्वच्छतुलसीदलमालिकम् ।ज्ञानमुद्राऽभयकरं प्रणतेष्टसुरद्रुमम् ॥ ७॥ (इति मन्त्रजपे ध्यानम्)

ānābhilambitasvacchatulasīdalamālikam |jñānamudrā'bhayakaraṃ praṇateṣṭasuradrumam || 7|| (iti mantrajape dhyānam)

ध्यायामि गुरुमब्जाक्षं महासाम्राज्यशोभिनम् ।प्रसन्नमप्पणाचार्ययोगीन्द्राद्यैः परीवृतम् ॥ ७॥ (इति ध्यानम्)

dhyāyāmi gurumabjākṣaṃ mahāsāmrājyaśobhinam |prasannamappaṇācāryayogīndrādyaiḥ parīvṛtam || 7|| (iti dhyānam)

आवाहयामि त्वामत्र सर्वदेवैरधिष्ठितम् ।शिष्यसङ्घैः परिवृतमिष्टदानोद्यतं प्रभुम् ॥ ८॥ (इत्यावाहनम्)

āvāhayāmi tvāmatra sarvadevairadhiṣṭhitam |śiṣyasaṅghaiḥ parivṛtamiṣṭadānodyataṃ prabhum || 8|| (ityāvāhanam)

गुरुराज महाराज द्विजराजादि सेवितः ।स्वर्णपीठासनं तुभ्यं ददामि स्वीकुरु प्रभो ॥ ९॥ (इत्यासनम्)

gururāja mahārāja dvijarājādi sevitaḥ |svarṇapīṭhāsanaṃ tubhyaṃ dadāmi svīkuru prabho || 9|| (ityāsanam)

आगच्छ श्रीमहाराज सार्वभौम गुरूत्तम ।यावत्पूजां करोम्यत्र तावत्सन्निहितो भव ॥ १०॥ (इति सन्निधापनम्)

āgaccha śrīmahārāja sārvabhauma gurūttama |yāvatpūjāṃ karomyatra tāvatsannihito bhava || 10|| (iti sannidhāpanam)

श्रीगुरो राघवेन्द्रार्य भक्तवत्सल भूसुर ।त्वदीयैस्सकलैः साकमत्रस्थः सुस्थिरो भव ॥ ११॥ (इति स्थिरीकरणम्)

śrīguro rāghavendrārya bhaktavatsala bhūsura |tvadīyaissakalaiḥ sākamatrasthaḥ susthiro bhava || 11|| (iti sthirīkaraṇam)

जय श्रीगुरुराजेन्द्र राघवेन्द्र यतीश्वर ।पूजां गृहीतुं भक्तस्य त्वं ममाभिमुखो भव ॥ १२॥ (इत्यभिमुखीकरणम्)

jaya śrīgururājendra rāghavendra yatīśvara |pūjāṃ gṛhītuṃ bhaktasya tvaṃ mamābhimukho bhava || 12|| (ityabhimukhīkaraṇam)

स्मृतिमात्रेण सन्तुष्ट प्रसिद्ध करुणानिधे ।प्रसन्नो भव ते पूजां यथाशक्ति करोम्यहम् ॥ १३॥ (इति प्रसन्नीकरणम्)

smṛtimātreṇa santuṣṭa prasiddha karuṇānidhe |prasanno bhava te pūjāṃ yathāśakti karomyaham || 13|| (iti prasannīkaraṇam)

अभिव्यक्तस्वस्वरूपज्ञानानन्द गरूत्तम ।मया दत्तं गृहाणार्घ्यं नमः सात्विक सात्विक ॥ १४॥ (इत्यर्घ्यम्)

abhivyaktasvasvarūpajñānānanda garūttama |mayā dattaṃ gṛhāṇārghyaṃ namaḥ sātvika sātvika || 14|| (ityarghyam)

भूलोकपावनार्थाय कृतावतरण प्रभो ।पाद्यं गृहाण राजर्षे पवित्रं कुरु मां प्रभो ॥ १५॥ (इति पाद्यम्)

bhūlokapāvanārthāya kṛtāvataraṇa prabho |pādyaṃ gṛhāṇa rājarṣe pavitraṃ kuru māṃ prabho || 15|| (iti pādyam)

सदा साक्षात्कृतश्रीश केशवादिकरूपिणे ।नमस्तुभ्यं मया दत्तं गृहाणाचमनं गुरो ॥ १६॥ (इत्याचमनम्)

sadā sākṣātkṛtaśrīśa keśavādikarūpiṇe |namastubhyaṃ mayā dattaṃ gṛhāṇācamanaṃ guro || 16|| (ityācamanam)

प्रह्लादस्यावताराय कल्याणोन्मुखरूपिणे ।मधुपर्कं गृहाणेदं राजराजाय ते नमः ॥ १७॥ (इति मधुपर्कम्)

prahlādasyāvatārāya kalyāṇonmukharūpiṇe |madhuparkaṃ gṛhāṇedaṃ rājarājāya te namaḥ || 17|| (iti madhuparkam)

गुरुराज महोदार स्नाने पाने च सर्वदा ।क्षीरप्रियस्य ते गव्यपयसा स्नापयाम्यहम् ॥ १८॥ (इति क्षीरस्नानम्)

gururāja mahodāra snāne pāne ca sarvadā |kṣīrapriyasya te gavyapayasā snāpayāmyaham || 18|| (iti kṣīrasnānam)

गुरुराघवराजेन्द्र त्वां दध्ना स्नापयाम्यहम् ।सदा मे त्वत्प्रसादेन शान्ताः स्युर्दुरुपद्रवाः ॥ १९॥ (इति दधिस्नानम्)

gururāghavarājendra tvāṃ dadhnā snāpayāmyaham |sadā me tvatprasādena śāntāḥ syurdurupadravāḥ || 19|| (iti dadhisnānam)

महाबलिमहाप्राज्ञ गुरुराज घृतप्रिय ।घृतेन स्नापयामि त्वां पुष्टिर्मे वर्धतां बलम् ॥ २०॥ (इति घृतस्नानम्)

mahābalimahāprājña gururāja ghṛtapriya |ghṛtena snāpayāmi tvāṃ puṣṭirme vardhatāṃ balam || 20|| (iti ghṛtasnānam)

मधुरं मधुरावारं मधुवाचं मधुव्रतम् ।मधुना स्नापयामि त्वां लोके मां मधुरं कुरु ॥ २१॥ (इति मधुस्नानम्)

madhuraṃ madhurāvāraṃ madhuvācaṃ madhuvratam |madhunā snāpayāmi tvāṃ loke māṃ madhuraṃ kuru || 21|| (iti madhusnānam)

शर्वरीश मनोहारिन् विषदोषनिवारण ।शर्कराभ स्नापये त्वां शर्कराभं कुरुष्व माम् ॥ २२॥ (इति शर्करास्नानम्)

śarvarīśa manohārin viṣadoṣanivāraṇa |śarkarābha snāpaye tvāṃ śarkarābhaṃ kuruṣva mām || 22|| (iti śarkarāsnānam)

बदरी कदली चूतफलैस्त्वां स्नापयाम्यहम् ।सफलं कुरु मे सर्वं तारकस्त्वं गुरुप्रभो ॥ २३॥ (इति फलस्नानम्)

badarī kadalī cūtaphalaistvāṃ snāpayāmyaham |saphalaṃ kuru me sarvaṃ tārakastvaṃ guruprabho || 23|| (iti phalasnānam)

शुद्धैः शुद्धिप्रदैः शान्तशीतलैः सुखदर्शन ।शुद्धस्नानं कारयिष्ये शुद्धं मां कुरु ते गुरो ॥ २४॥ (इति शुद्धोदकस्नानम्)

śuddhaiḥ śuddhipradaiḥ śāntaśītalaiḥ sukhadarśana |śuddhasnānaṃ kārayiṣye śuddhaṃ māṃ kuru te guro || 24|| (iti śuddhodakasnānam)

विधिबद्धसुतैलेन चम्पकाद्यैः सुगन्धिना ।कारये मङ्गलं स्नानं कुरु त्वं मम मङ्गलम् ॥ २५॥ (इति मङ्गलस्नानम्)

vidhibaddhasutailena campakādyaiḥ sugandhinā |kāraye maṅgalaṃ snānaṃ kuru tvaṃ mama maṅgalam || 25|| (iti maṅgalasnānam)

भूलोकमध्यसंसिद्धतीर्थपावनरूपिणम् ।स्नापयामि सुतीर्थोत्थैः जलैर्मां पावय प्रभो ॥ २६॥ (इति तीर्थस्नानम्)

bhūlokamadhyasaṃsiddhatīrthapāvanarūpiṇam |snāpayāmi sutīrthotthaiḥ jalairmāṃ pāvaya prabho || 26|| (iti tīrthasnānam)

स्वर्णप्रख्यं शशिप्रख्यं रविप्रख्यं सदम्बरम् ।कौपीनं यतिराजेन्द्र सव्यानं च गृहाण भोः ॥ २७॥ (इति वस्त्रम्)

svarṇaprakhyaṃ śaśiprakhyaṃ raviprakhyaṃ sadambaram |kaupīnaṃ yatirājendra savyānaṃ ca gṛhāṇa bhoḥ || 27|| (iti vastram)

ऊर्मिका मौक्तिकादि स्रक्कुण्डलादि सुभूषणम् ।गृहाण गुरुराजेन्द्र कुरु मां लोकभूषणम् ॥ २८॥ (इति आभरणम्)

ūrmikā mauktikādi srakkuṇḍalādi subhūṣaṇam |gṛhāṇa gururājendra kuru māṃ lokabhūṣaṇam || 28|| (iti ābharaṇam)

द्वादशाप्यूर्ध्वपुण्ड्राणि गोपीचन्दनगन्धतः ।विष्णुपादोदकं दास्ये साकं श्रीतुलसीदलैः ।गृहाण विष्णुभक्तानां सम्प्रदायप्रवर्तक ॥ २९॥ (इति ऊर्ध्वपुण्ड्रादिकम्)

dvādaśāpyūrdhvapuṇḍrāṇi gopīcandanagandhataḥ |viṣṇupādodakaṃ dāsye sākaṃ śrītulasīdalaiḥ |gṛhāṇa viṣṇubhaktānāṃ sampradāyapravartaka || 29|| (iti ūrdhvapuṇḍrādikam)

गन्धकक्कोलकस्तूरी कर्पूरागरुकुङ्कुमैः ।मिश्रितं चन्दनं तुभ्यं दास्यामि स्वीकुरु प्रभो ॥ ३०॥ (इति गन्धम्)

gandhakakkolakastūrī karpūrāgarukuṅkumaiḥ |miśritaṃ candanaṃ tubhyaṃ dāsyāmi svīkuru prabho || 30|| (iti gandham)

कस्तूरितिलकं चूर्णहरिद्रातण्डुलैर्युतान् ।गृहाण गुरुवर्य त्वमलङ्कारार्थमक्षतान् ॥ ३१॥ (इति अक्षतान्)

kastūritilakaṃ cūrṇaharidrātaṇḍulairyutān |gṛhāṇa guruvarya tvamalaṅkārārthamakṣatān || 31|| (iti akṣatān)

मल्लिकामालतीमालां तुलसीदलमालिकाम् ।केतकादीनि पुष्पाणि गृह्णीष्व गुरुसत्तम ॥ ३२॥ (इति पुष्पाणि)

mallikāmālatīmālāṃ tulasīdalamālikām |ketakādīni puṣpāṇi gṛhṇīṣva gurusattama || 32|| (iti puṣpāṇi)

वनस्पतिरसोत्पन्नं सुरभिं सुरभिप्रिय ।महाभोगिन्निमं धूपं गृहाण प्रीतिमान् भव ॥ ३३॥ (इति धूपम्)

vanaspatirasotpannaṃ surabhiṃ surabhipriya |mahābhoginnimaṃ dhūpaṃ gṛhāṇa prītimān bhava || 33|| (iti dhūpam)

वर्तिद्वययुतं साज्यं दीपद्वन्द्वं तमोऽपहम् ।निरन्तरप्रकाशोऽपि गृहाण कृपया मयि ॥ ३४॥ (इति दीपम्)

vartidvayayutaṃ sājyaṃ dīpadvandvaṃ tamo'paham |nirantaraprakāśo'pi gṛhāṇa kṛpayā mayi || 34|| (iti dīpam)

मयाऽऽनीतं यथाशक्ति यथाकालं यथाधनम् ।भक्ष्योपदंशदध्याज्यक्षीराद्यन्वितमोदनम् ॥ ३५॥

mayā''nītaṃ yathāśakti yathākālaṃ yathādhanam |bhakṣyopadaṃśadadhyājyakṣīrādyanvitamodanam || 35||

शुण्ठीरामठ जम्बीरलवणादिसमन्वितम् ।तक्रं च चन्दनोशीर कर्पूर घुसृणान्वितम् ॥ ३६॥

śuṇṭhīrāmaṭha jambīralavaṇādisamanvitam |takraṃ ca candanośīra karpūra ghusṛṇānvitam || 36||

पानीयं च हरौ वायौ निवेद्य त्वं गुरूत्तम ।भुक्त्वा परिजनैः साकं तुष्टो भव पितर्मम ॥ ३७॥ (इति नैवेद्यं ३५,३६,३७)

pānīyaṃ ca harau vāyau nivedya tvaṃ gurūttama |bhuktvā parijanaiḥ sākaṃ tuṣṭo bhava pitarmama || 37|| (iti naivedyaṃ 35,36,37)

श्रीतेत्यादिदशस्तोत्रपठनं ते करोम्यहम् ।साङ्गभोजनसाफल्यसिद्।ह्ध्यै स्वीकुरु सद्गुरो ॥ ३८॥ (इति दशस्तोत्रपाठम्)

śrītetyādidaśastotrapaṭhanaṃ te karomyaham |sāṅgabhojanasāphalyasid|hdhyai svīkuru sadguro || 38|| (iti daśastotrapāṭham)

वरदौ भक्तलोकस्य गरदौ सकलापदाम् ।उदकेन करौ पादौ प्रक्षालय यतीश्वर ॥ ३९॥ (इति हस्तप्रक्षालनम्)

varadau bhaktalokasya garadau sakalāpadām |udakena karau pādau prakṣālaya yatīśvara || 39|| (iti hastaprakṣālanam)

कुरुष्वाचमनं स्वामिन् मङ्गलार्थं मयाकृतम् ।त्वन्त्रस्तवराजेन सहितं स्वीकुरु प्रभो ॥कुरुष्वाचमनं स्वामिन् विष्णुपादोदकं पिब ।गृहाण तुलसीपत्रं गुरुराज प्रसीद मे ॥ ४०॥ (इति पुनराचमनम्)

kuruṣvācamanaṃ svāmin maṅgalārthaṃ mayākṛtam |tvantrastavarājena sahitaṃ svīkuru prabho ||kuruṣvācamanaṃ svāmin viṣṇupādodakaṃ piba |gṛhāṇa tulasīpatraṃ gururāja prasīda me || 40|| (iti punarācamanam)

अपरोक्षीकृतश्रीश विधिबन्धविवर्जित ।कामचार मयाऽऽनीतं ताम्बूलं प्रतिगृह्यताम् ॥ ४१॥ (इति ताम्बूलम्)

aparokṣīkṛtaśrīśa vidhibandhavivarjita |kāmacāra mayā''nītaṃ tāmbūlaṃ pratigṛhyatām || 41|| (iti tāmbūlam)

नीराजनाष्टकं स्वामिन् मङ्गलार्थं मयाकृतम् ।त्वन्मन्त्रस्तवराजेन सहितं स्वीकुरु प्रभो ॥ ४२॥

nīrājanāṣṭakaṃ svāmin maṅgalārthaṃ mayākṛtam |tvanmantrastavarājena sahitaṃ svīkuru prabho || 42||

राघवेन्द्रगुरुं राजसार्वभौमपदस्थितम् ।रामचन्द्रप्रियं वन्दे रां बीजप्रतिपादितम् ॥ ४३॥ (इति प्रथमनीराजनम्)

rāghavendraguruṃ rājasārvabhaumapadasthitam |rāmacandrapriyaṃ vande rāṃ bījapratipāditam || 43|| (iti prathamanīrājanam)

रामचन्द्रमहाभक्तं पापाटव्यग्निरूपिणम् ।राघवेन्द्रगुरुं वन्दे द्वितीयाक्षरवेदितम् ॥ ४४॥ (इति द्वितीयनीराजनम्)

rāmacandramahābhaktaṃ pāpāṭavyagnirūpiṇam |rāghavendraguruṃ vande dvitīyākṣaraveditam || 44|| (iti dvitīyanīrājanam)

घनाघनाभनीलाङ्गं घनरोगनिवारणम् ।घोरतापत्रयहरं तृतीयावेदितं भजे ॥ ४५॥ (इति तृतीय नीराजनं)

ghanāghanābhanīlāṅgaṃ ghanaroganivāraṇam |ghoratāpatrayaharaṃ tṛtīyāveditaṃ bhaje || 45|| (iti tṛtīya nīrājanaṃ)

वेदान्त सारसर्वज्ञं वेदव्यासपदार्चकम् ।प्रह्लादस्यांशसम्भूतं तुरीयार्णवगतं भजे ॥ ४६॥ (इति चतुर्थनीराजनं)

vedānta sārasarvajñaṃ vedavyāsapadārcakam |prahlādasyāṃśasambhūtaṃ turīyārṇavagataṃ bhaje || 46|| (iti caturthanīrājanaṃ)

द्रावयन्तं पिशाचादीन् द्राघिमामयहारकम् ।द्राग्भक्तेष्टप्रदं वन्दे पञ्चमाक्षर वेदितम् ॥ ४७॥ (इति पञ्चमनीराजनम्)

drāvayantaṃ piśācādīn drāghimāmayahārakam |drāgbhakteṣṭapradaṃ vande pañcamākṣara veditam || 47|| (iti pañcamanīrājanam)

यथाशक्ति यथाभक्ति सेवकानां फलप्रदम् ।यवनाद्यैश्च संसेव्यं वन्दे षष्ठप्रपञ्चितम् ॥ ४८॥ (इति षष्ठनीराजनम्)

yathāśakti yathābhakti sevakānāṃ phalapradam |yavanādyaiśca saṃsevyaṃ vande ṣaṣṭhaprapañcitam || 48|| (iti ṣaṣṭhanīrājanam)

नन्दतीर्थकृतानेकग्रन्थभावप्रकाशकम् ।अघविद्रावकं वन्दे सप्तमाक्षरवेदितम् ॥ ४९॥ (इति सप्तमनीराजनम्)

nandatīrthakṛtānekagranthabhāvaprakāśakam |aghavidrāvakaṃ vande saptamākṣaraveditam || 49|| (iti saptamanīrājanam)

मानदं मध्वभक्तानां शठानां मानहानिदम् ।मान्यं विरोधिनां चापि वन्दे वसुनिरूपितम् ॥ ५०॥ (इत्यष्टमनीराजनं)

mānadaṃ madhvabhaktānāṃ śaṭhānāṃ mānahānidam |mānyaṃ virodhināṃ cāpi vande vasunirūpitam || 50|| (ityaṣṭamanīrājanaṃ)

इति श्रीराघवेन्द्राष्टाक्षरमन्त्रात्मकस्तवम् ।नीराजनेषु पठतां राघवेन्द्रः प्रसीदति ॥ ५१॥

iti śrīrāghavendrāṣṭākṣaramantrātmakastavam |nīrājaneṣu paṭhatāṃ rāghavendraḥ prasīdati || 51||

सुवर्णरत्नखचितं पुष्पं पुष्पाञ्जलिं तव ।श्रीराघवेन्द्रगुरुराट् ददामि स्वीकुरु प्रभो ॥ ५२॥ (इति पुष्पाञ्जलिः)

suvarṇaratnakhacitaṃ puṣpaṃ puṣpāñjaliṃ tava |śrīrāghavendragururāṭ dadāmi svīkuru prabho || 52|| (iti puṣpāñjaliḥ)

जयशब्दैः पाहिशब्दैः गद्यैः पद्यैः प्रदक्षिणाम् ।करोमि राघवेन्द्रार्य सन्तुष्टो भव सर्वदा ॥ ५३॥ (इति प्रदक्षिणा)

jayaśabdaiḥ pāhiśabdaiḥ gadyaiḥ padyaiḥ pradakṣiṇām |karomi rāghavendrārya santuṣṭo bhava sarvadā || 53|| (iti pradakṣiṇā)

गुरुराड्राघवेन्द्रस्य एकैकस्मिन् प्रदक्षिणे ।सप्तद्वीपमहीयात्राफलं विन्दति मानवः ॥ ५४॥

gururāḍrāghavendrasya ekaikasmin pradakṣiṇe |saptadvīpamahīyātrāphalaṃ vindati mānavaḥ || 54||

बाहुभ्यामथ जानुभ्यां शिरसा मनसा हृदा ।पञ्चाङ्गकं प्रणामं ते कुर्वेऽभीष्टार्थदायिने ॥ ५५॥ (इति नमस्कारान्)

bāhubhyāmatha jānubhyāṃ śirasā manasā hṛdā |pañcāṅgakaṃ praṇāmaṃ te kurve'bhīṣṭārthadāyine || 55|| (iti namaskārān)

तव सेवारतान् कांश्चिद्भक्तान् प्रेषय मां प्रति ।तेषां मरोरथं तात मया पुत्रेण पूरय ॥ ५६॥

tava sevāratān kāṃścidbhaktān preṣaya māṃ prati |teṣāṃ marorathaṃ tāta mayā putreṇa pūraya || 56||

अथवा करुणासिन्धो मयि सन्निहितः सदा ।पुत्रस्य मम वाक्येन सर्वसर्वेष्टदो भव ॥ ५७॥

athavā karuṇāsindho mayi sannihitaḥ sadā |putrasya mama vākyena sarvasarveṣṭado bhava || 57||

येन केनाप्युपायेन दूने दुर्यशसा भुवि ।माहात्म्यं मयि विन्यस्य कुरुं मां लोकपूजितम् ॥ ५८॥

yena kenāpyupāyena dūne duryaśasā bhuvi |māhātmyaṃ mayi vinyasya kuruṃ māṃ lokapūjitam || 58||

युक्ताऽयुक्तमजानानो याचे त्वां बालवद्गुरो ।दाता त्राता दयालुस्त्वं यथेच्छसि तथा कुरु ॥ ५९॥

yuktā'yuktamajānāno yāce tvāṃ bālavadguro |dātā trātā dayālustvaṃ yathecchasi tathā kuru || 59||

सर्वज्ञाय स्वतन्त्राय भक्तक्लेशविनाशिने ।उदारचेतसे किं ते वदे मद्भारवाहिने ॥ ६०॥

sarvajñāya svatantrāya bhaktakleśavināśine |udāracetase kiṃ te vade madbhāravāhine || 60||

ब्राह्मे मुहूर्ते चोत्थाय शयनावधि यत्कृतम् ।मनोवाक्कायजनितं कर्म यद्वा शुभाशुभम् ।तत्सर्वं प्रीतये भूयात् पादयोस्ते समर्पये ॥ ६१॥ (इति समर्पणम्)

brāhme muhūrte cotthāya śayanāvadhi yatkṛtam |manovākkāyajanitaṃ karma yadvā śubhāśubham |tatsarvaṃ prītaye bhūyāt pādayoste samarpaye || 61|| (iti samarpaṇam)

क्षणे क्षणेऽपराधांस्तान् मत्कृतान् वै सहस्रशः ।क्षमस्व गुरुराजेन्द्र प्रसीद तनये मयि ॥ ६२॥ (इति क्षमापणम्)

kṣaṇe kṣaṇe'parādhāṃstān matkṛtān vai sahasraśaḥ |kṣamasva gururājendra prasīda tanaye mayi || 62|| (iti kṣamāpaṇam)

एवं यः कुरुते पूजां सकृद्वाऽपि बहिर्हृदि ।गुरुराजप्रसादेन भुक्तिं मुक्तिं च विन्दति ॥ ६३॥

evaṃ yaḥ kurute pūjāṃ sakṛdvā'pi bahirhṛdi |gururājaprasādena bhuktiṃ muktiṃ ca vindati || 63||

दिने दिने प्रकुर्वीत गुरुवारे विशेषतः ।पूजाकालेऽथवा भक्त्या गुरुराजस्य सन्निधौ ॥ ६४॥

dine dine prakurvīta guruvāre viśeṣataḥ |pūjākāle'thavā bhaktyā gururājasya sannidhau || 64||

इदं च पूजापटलं पठतां सकलापदः ।नश्यन्ति साङ्गपूजायाः फलं प्राप्नोत्यसंशयः ॥ ६५॥

idaṃ ca pūjāpaṭalaṃ paṭhatāṃ sakalāpadaḥ |naśyanti sāṅgapūjāyāḥ phalaṃ prāpnotyasaṃśayaḥ || 65||

इति श्रीमत्कृष्णावधूतपण्डितकृत श्रीमद्राघवेन्द्रतन्त्रेप्रत्यक्षसिद्धिप्रदे गुरुपूजाविधानं नाम चतुर्थः पटलः ॥

iti śrīmatkṛṣṇāvadhūtapaṇḍitakṛta śrīmadrāghavendratantrepratyakṣasiddhiprade gurupūjāvidhānaṃ nāma caturthaḥ paṭalaḥ ||