गङ्गाकवचम् ३ दिव्यमङ्गलाख्यम् Ganga Kavacham Divyamangala

॥ श्रीगणेशाय नमः ॥ऋषय ऊचुःभगवन्! सर्वधर्मज्ञ! सर्वशास्त्रविशारद! ।श्रीगङ्गायास्तु कवचं ब्रूहि नो वदतां वर! ॥ १॥

|| śrīgaṇeśāya namaḥ ||ṛṣaya ūcuḥbhagavan! sarvadharmajña! sarvaśāstraviśārada! |śrīgaṅgāyāstu kavacaṃ brūhi no vadatāṃ vara! || 1||

गुप्तं सहस्रनामाख्यं स्तोत्रं परमपावनम् ।इदानीं श्रोतुमिच्छामि गङ्गायाः कवचं शुभम् ॥ २॥

guptaṃ sahasranāmākhyaṃ stotraṃ paramapāvanam |idānīṃ śrotumicchāmi gaṅgāyāḥ kavacaṃ śubham || 2||

यस्य श्रवणमात्रेण गङ्गादेवी प्रसीदति ।पापानि च विलीयन्ते वर्धन्ते धनसम्पदः ॥ ३॥

yasya śravaṇamātreṇa gaṅgādevī prasīdati |pāpāni ca vilīyante vardhante dhanasampadaḥ || 3||

सनत्कुमार उवाचशृणुध्वं मुनयः सर्वे गुह्याद्गुह्यतरं परम् ।जाह्नव्या दिव्यकवचं भुक्तिमुक्तिफलप्रदम् ॥ ४॥

sanatkumāra uvācaśṛṇudhvaṃ munayaḥ sarve guhyādguhyataraṃ param |jāhnavyā divyakavacaṃ bhuktimuktiphalapradam || 4||

ॐ अस्य श्रीगङ्गाकवचमन्त्रस्य श्रीसदाशिव ऋषिरनुष्टुप् छन्दःसंसारतारिणी श्रीगङ्गा देवता श्री बीजं गं शक्तिः गामिति कीलकंमम सकलपापक्षयपूर्वकं मोक्षसाधने जपे विनयोगः ॥अथ ध्यानं प्रवक्ष्यामि गङ्गायाः सुरदुर्लभम् ।यत् कृत्वा मुनयः सम्यक् परां सिद्धिमितो गताः ॥ ६॥

oṃ asya śrīgaṅgākavacamantrasya śrīsadāśiva ṛṣiranuṣṭup chandaḥsaṃsāratāriṇī śrīgaṅgā devatā śrī bījaṃ gaṃ śaktiḥ gāmiti kīlakaṃmama sakalapāpakṣayapūrvakaṃ mokṣasādhane jape vinayogaḥ ||atha dhyānaṃ pravakṣyāmi gaṅgāyāḥ suradurlabham |yat kṛtvā munayaḥ samyak parāṃ siddhimito gatāḥ || 6||

नेत्रत्रयोद्भासितचारुदेहां श्वेताम्बरां चन्द्रकलात्मिकां च ।माणिक्यमुक्ताफलभूषिताङ्गी श्वेतातपत्रां करुणारसार्द्राम् ॥ ७॥

netratrayodbhāsitacārudehāṃ śvetāmbarāṃ candrakalātmikāṃ ca |māṇikyamuktāphalabhūṣitāṅgī śvetātapatrāṃ karuṇārasārdrām || 7||

सूर्येन्दुकोटिद्युतिमङ्गनाभिः सचामराभिः परिवीज्यमानाम् ।चतुर्भुजां हस्तचतुष्टयेन वराभये पद्मयुगं दधानाम् ॥ ८॥

sūryendukoṭidyutimaṅganābhiḥ sacāmarābhiḥ parivījyamānām |caturbhujāṃ hastacatuṣṭayena varābhaye padmayugaṃ dadhānām || 8||

दिव्यानुलेपेन विभूषिताङ्गी दिव्यां दधानां स्रजमादिशक्तिम् ।सुरैरनेकैरृषिभिश्च दिव्यैर्निषेव्यमानामुपचारयोगैः ॥ ९॥

divyānulepena vibhūṣitāṅgī divyāṃ dadhānāṃ srajamādiśaktim |surairanekairṛṣibhiśca divyairniṣevyamānāmupacārayogaiḥ || 9||

नानाविधान्पातकिनः प्रपत्रान् सन्तारयन्ती करुणादृशार्द्राम् ।ध्यायेदिमां पूर्णशशांङ्कशुभ्रां नदैर्नदीभिः परिसेव्यमानाम् ॥ १०॥

nānāvidhānpātakinaḥ prapatrān santārayantī karuṇādṛśārdrām |dhyāyedimāṃ pūrṇaśaśāṃṅkaśubhrāṃ nadairnadībhiḥ parisevyamānām || 10||

एवं ध्यात्वा महादेवी गङ्गां त्रिभुवनेश्वरीम् ।जपेन्मन्त्रं महादेव्यास्तस्योद्धारो निरूप्यते ॥ ११॥

evaṃ dhyātvā mahādevī gaṅgāṃ tribhuvaneśvarīm |japenmantraṃ mahādevyāstasyoddhāro nirūpyate || 11||

प्रणवो वाग्भवं माया कामबीजं नमः पदम् ।भगवत्यम्बिके अम्बालिके पदमथोद्धरेत् ॥ १२॥

praṇavo vāgbhavaṃ māyā kāmabījaṃ namaḥ padam |bhagavatyambike ambālike padamathoddharet || 12||

महामालिनि तस्यान्त एह्योहि पदमुद्धरेत् ।अशेषतीर्थालवाले मायालक्ष्मीर्मनोभवः ॥ १३॥

mahāmālini tasyānta ehyohi padamuddharet |aśeṣatīrthālavāle māyālakṣmīrmanobhavaḥ || 13||

ततः शिवजटाजूटाधिरूढे पदमुद्धरेत् ।गङ्गे गङ्गाम्बिके स्वाहा मनुर्द्विकरणाक्षरः ॥ १४॥

tataḥ śivajaṭājūṭādhirūḍhe padamuddharet |gaṅge gaṅgāmbike svāhā manurdvikaraṇākṣaraḥ || 14||

सर्वसम्पत्प्रदः सर्वपातकौघविनाशनः ।सर्वकल्याणनिलयो गङ्गासान्निध्यकारकः ॥ १५॥

sarvasampatpradaḥ sarvapātakaughavināśanaḥ |sarvakalyāṇanilayo gaṅgāsānnidhyakārakaḥ || 15||

एतस्य मन्त्रराजस्य महादेव ऋषिः स्वयम् ।विराट् छन्दः स्मृतं देवी जाह्नवी देवता स्वयम् ॥ १६॥

etasya mantrarājasya mahādeva ṛṣiḥ svayam |virāṭ chandaḥ smṛtaṃ devī jāhnavī devatā svayam || 16||

तारो बीजं वाग्भवं च शक्तिर्माया च कीलकम् ।तारकं कामबीजं च मुक्तौ च विनियोगकः ॥ १७॥

tāro bījaṃ vāgbhavaṃ ca śaktirmāyā ca kīlakam |tārakaṃ kāmabījaṃ ca muktau ca viniyogakaḥ || 17||

कुर्यात् षडंङ्ग मन्त्रं स्वमायया प्रणवाद्यया ।षड्दीर्घभिनयात्पश्चाज्जपेन्मन्न्त्रं शताष्टकम् ॥ १८॥

kuryāt ṣaḍaṃṅga mantraṃ svamāyayā praṇavādyayā |ṣaḍdīrghabhinayātpaścājjapenmanntraṃ śatāṣṭakam || 18||

ततस्तु कवचं देव्याः पठेत् सर्वार्थसिद्धये ।तदहं संप्रवक्ष्यामि शृणुध्वं मुनिपुङ्गवाः ॥ १९॥

tatastu kavacaṃ devyāḥ paṭhet sarvārthasiddhaye |tadahaṃ saṃpravakṣyāmi śṛṇudhvaṃ munipuṅgavāḥ || 19||

प्राच्यां श्रीजाह्नवी पातु याम्यां गङ्गा सदाऽवतु ।भीष्मसूः पश्चिमायां मे उदीच्यां सुरनिम्नगा ॥ २०॥

prācyāṃ śrījāhnavī pātu yāmyāṃ gaṅgā sadā'vatu |bhīṣmasūḥ paścimāyāṃ me udīcyāṃ suranimnagā || 20||

भागीरथ्यग्निकोणे मां त्रिस्रोताः पातु नैरृते ।वायव्ये मां श्वेतवासा ईशाने त्रिपथस्थिता ॥ २१॥

bhāgīrathyagnikoṇe māṃ trisrotāḥ pātu nairṛte |vāyavye māṃ śvetavāsā īśāne tripathasthitā || 21||

ब्रह्मगङ्गा चोर्ध्द्वदेशमधः पातालजाह्नवी ।दिग्विदिक्प्रान्तराले मां गङ्गा स्वर्गगताऽवतु ॥ २२॥

brahmagaṅgā cordhdvadeśamadhaḥ pātālajāhnavī |digvidikprāntarāle māṃ gaṅgā svargagatā'vatu || 22||

हृदस्ते पातु मे केशानभयं मे शिरोऽवतु ।भालं मे कमलं पातु ध्रुवौ चन्द्रकलाऽवतु ॥नेत्रे पातु जगद्धात्री ममोष्ठं विजयाऽवतु ।विष्णुः पद्मधरं पातु श्रोत्रे पातु सुदर्शना ॥ २३॥

hṛdaste pātu me keśānabhayaṃ me śiro'vatu |bhālaṃ me kamalaṃ pātu dhruvau candrakalā'vatu ||netre pātu jagaddhātrī mamoṣṭhaṃ vijayā'vatu |viṣṇuḥ padmadharaṃ pātu śrotre pātu sudarśanā || 23||

मन्दाकिनी दन्तपङ्क्तिं स्वर्गगागण्डयुग्मकम् ।सुधाजला पातु जिह्वां वाणी पातु मुखं मम ॥ २४॥

mandākinī dantapaṅktiṃ svargagāgaṇḍayugmakam |sudhājalā pātu jihvāṃ vāṇī pātu mukhaṃ mama || 24||

तोतला तालुदेशं मे चिबुकं सर्वमङ्गला ।मन्दाकिनी वक्त्रवृत्तं व्योमगङ्गाजलं मम ॥ २५॥

totalā tāludeśaṃ me cibukaṃ sarvamaṅgalā |mandākinī vaktravṛttaṃ vyomagaṅgājalaṃ mama || 25||

कृकोटिकां कल्मषघ्नी स्कन्धयोः सुरनिम्नगा ।कौर्मी पातु भुजद्वन्द्वं पाण्योः फलकमीश्वरी ॥ २६॥

kṛkoṭikāṃ kalmaṣaghnī skandhayoḥ suranimnagā |kaurmī pātu bhujadvandvaṃ pāṇyoḥ phalakamīśvarī || 26||

कराङ्गुलीः पातु चान्द्री नखानाकाशचन्द्रिका ।सूर्यमण्डलगा पातु कक्षां सागरतारिणी ॥ २७॥

karāṅgulīḥ pātu cāndrī nakhānākāśacandrikā |sūryamaṇḍalagā pātu kakṣāṃ sāgaratāriṇī || 27||

वक्षःस्थलं पातु नित्यं देवी मेऽलकनन्दिका ।हृदयं पातु चक्षुमें सीता पातूदरं मम ॥ २८॥

vakṣaḥsthalaṃ pātu nityaṃ devī me'lakanandikā |hṛdayaṃ pātu cakṣumeṃ sītā pātūdaraṃ mama || 28||

पार्श्वयोः पर्वतद्रावा स्तनौ सोमेश्वरी तथा ।जगदुद्धारिणी नाभिं पृष्टं मकरवाहना ॥ २९॥

pārśvayoḥ parvatadrāvā stanau someśvarī tathā |jagaduddhāriṇī nābhiṃ pṛṣṭaṃ makaravāhanā || 29||

विष्णुशक्तिः कटिं पातु स्फिचौ पातु दयाम्बुधिः ।विष्णु पादाब्जसम्भूता गुह्यं मे परिरक्षतु ॥ ३०॥

viṣṇuśaktiḥ kaṭiṃ pātu sphicau pātu dayāmbudhiḥ |viṣṇu pādābjasambhūtā guhyaṃ me parirakṣatu || 30||

कृपाकोमलगात्री सा मूलाधारं ममावतु ।स्वाधिष्ठानं पातु नित्यं पापादथ दवानला ॥ ३१॥

kṛpākomalagātrī sā mūlādhāraṃ mamāvatu |svādhiṣṭhānaṃ pātu nityaṃ pāpādatha davānalā || 31||

पायान्मे मणिपूरं सा शान्तनोः सुखवर्धिनी ।अनाहतं सदा पायाद् भगीरथनिषेविता ॥ ३२॥

pāyānme maṇipūraṃ sā śāntanoḥ sukhavardhinī |anāhataṃ sadā pāyād bhagīrathaniṣevitā || 32||

विशुद्धचक्रं मे पातु वशिष्ठोपासिताम्बिका ।आज्ञाचक्रं मम प्रीत्या विश्वामित्रार्चिताऽवतु ॥ ३३॥

viśuddhacakraṃ me pātu vaśiṣṭhopāsitāmbikā |ājñācakraṃ mama prītyā viśvāmitrārcitā'vatu || 33||

ब्रह्मरन्ध्रं सदा पातु स्रवत्पीयूषमन्दिरम् ।स्वयम्भूलिङ्गिनी लिङ्गं कुण्डली परदेवता ॥ ३४॥

brahmarandhraṃ sadā pātu sravatpīyūṣamandiram |svayambhūliṅginī liṅgaṃ kuṇḍalī paradevatā || 34||

पतितोद्धारिणी पातु जठरं शङ्करप्रिया ।जटालङ्कारिणी शम्भोरुरूयुग्मं ममावतु ॥ ३५॥

patitoddhāriṇī pātu jaṭharaṃ śaṅkarapriyā |jaṭālaṅkāriṇī śambhorurūyugmaṃ mamāvatu || 35||

जानू मृडानी मे पातु जङ्घे पातु जगत्प्रसूः ।लावण्यशेवधिः पातु गुल्फो गगनमेखला ॥ ३६॥

jānū mṛḍānī me pātu jaṅghe pātu jagatprasūḥ |lāvaṇyaśevadhiḥ pātu gulpho gaganamekhalā || 36||

मत्स्यकक्षपहंसालिराजिता पातु पादयोः ।पादांङ्गुलीः पातु नित्यं निश्रेणी समनोहरे ॥ ३७॥

matsyakakṣapahaṃsālirājitā pātu pādayoḥ |pādāṃṅgulīḥ pātu nityaṃ niśreṇī samanohare || 37||

रसासृङ्मांसमेदांसि पातु मे भवतारिणी ।मनोबुद्धिमहन्तां मे पातु नारायणी सदा ॥ ३८॥

rasāsṛṅmāṃsamedāṃsi pātu me bhavatāriṇī |manobuddhimahantāṃ me pātu nārāyaṇī sadā || 38||

आयुः कल्याणदा पातु वयो रक्षतु वैष्णवी ।भार्यां वृद्धिकरी पातु पुत्रान् वंशकरी मम ॥ ३९॥

āyuḥ kalyāṇadā pātu vayo rakṣatu vaiṣṇavī |bhāryāṃ vṛddhikarī pātu putrān vaṃśakarī mama || 39||

गृहं रक्षतु लक्ष्मी में पातु क्षेत्रं शिवप्रिया ।धर्मकर्त्री यशः पातु धर्मं पातु मनःस्विनी ॥ ४०॥

gṛhaṃ rakṣatu lakṣmī meṃ pātu kṣetraṃ śivapriyā |dharmakartrī yaśaḥ pātu dharmaṃ pātu manaḥsvinī || 40||

कुलं कुलेशी मे पातु सद्गतिं पातु सद्गतिः ।जले स्थलेऽनलेऽरण्ये पाताले रणसङ्कटे ॥ ४१॥

kulaṃ kuleśī me pātu sadgatiṃ pātu sadgatiḥ |jale sthale'nale'raṇye pātāle raṇasaṅkaṭe || 41||

दुर्गे गृहे जगन्नाथा पातु सर्वनदीश्वरी ।अग्रतः पातु गङ्गोर्ध्वं पातु गङ्गा च पार्श्वयोः ॥ ४२॥

durge gṛhe jagannāthā pātu sarvanadīśvarī |agrataḥ pātu gaṅgordhvaṃ pātu gaṅgā ca pārśvayoḥ || 42||

गङ्गैव पृष्ठतः पातु तथाधः पातु मे वपुः ।इतीदं कवचं दिव्यं गङ्गायाः परमाद्भुतम् ॥ ४३॥

gaṅgaiva pṛṣṭhataḥ pātu tathādhaḥ pātu me vapuḥ |itīdaṃ kavacaṃ divyaṃ gaṅgāyāḥ paramādbhutam || 43||

ऋषयः कथितं साक्षान्महापातकनाशनम् ।एककालं द्विकालं वा त्रिकालं यः सदा पठेत् ॥ ४४॥

ṛṣayaḥ kathitaṃ sākṣānmahāpātakanāśanam |ekakālaṃ dvikālaṃ vā trikālaṃ yaḥ sadā paṭhet || 44||

गङ्गायाः श्रावयेद्वापि तस्य पापं प्रणश्यति ।वर्धन्ते सम्पदः सर्वाः सम्पद्यन्ते मनोरथाः ॥ ४५॥

gaṅgāyāḥ śrāvayedvāpi tasya pāpaṃ praṇaśyati |vardhante sampadaḥ sarvāḥ sampadyante manorathāḥ || 45||

जायते सिद्धयोऽष्टौ च नश्यन्ति विपदः क्षणात् ।कुष्ठात् प्रमुच्यते कुष्ठी व्याधिभ्यश्चापि मुच्यते ॥ ४६॥

jāyate siddhayo'ṣṭau ca naśyanti vipadaḥ kṣaṇāt |kuṣṭhāt pramucyate kuṣṭhī vyādhibhyaścāpi mucyate || 46||

निर्मलं स्यान्मनस्तस्य विशुद्धं स्फटिकोपमम् ।यस्य यस्य च देवस्य क्रियते पूजनं जपः ॥ ४७॥

nirmalaṃ syānmanastasya viśuddhaṃ sphaṭikopamam |yasya yasya ca devasya kriyate pūjanaṃ japaḥ || 47||

तस्य तस्य प्रसादं सा गङ्गादेवी प्रयच्छति ।पातकानामनेकानां प्रायश्चित्तं चिकीर्षुणा ॥ ४८॥

tasya tasya prasādaṃ sā gaṅgādevī prayacchati |pātakānāmanekānāṃ prāyaścittaṃ cikīrṣuṇā || 48||

पठनीयं तु गङ्गायाः कवचं पातकापहम् ।गङ्गामाहात्म्यविण्मन्त्री गङ्गाकवचमभ्यसेत् ॥ ४९॥

paṭhanīyaṃ tu gaṅgāyāḥ kavacaṃ pātakāpaham |gaṅgāmāhātmyaviṇmantrī gaṅgākavacamabhyaset || 49||

स स्नातः सर्वतीर्थेषु सर्वयज्ञेषु दीक्षितः ।सर्वाणि तेन दानानि दत्तानि मुनिपुङ्गवाः ॥ ५०॥

sa snātaḥ sarvatīrtheṣu sarvayajñeṣu dīkṣitaḥ |sarvāṇi tena dānāni dattāni munipuṅgavāḥ || 50||

श्रीविष्णुस्तोषितस्तेन तोषितस्तेन शङ्करः ।अर्घ्यदानेन सन्तुष्टः कृतस्तेन दिवाकरः ॥ ५२॥

śrīviṣṇustoṣitastena toṣitastena śaṅkaraḥ |arghyadānena santuṣṭaḥ kṛtastena divākaraḥ || 52||

तस्य पापानि नश्यन्ति महान्त्यपि न संशयः ।नाभिमात्रे जले स्थित्वा यो गङ्गाकवचं पठेत् ॥ ५३॥

tasya pāpāni naśyanti mahāntyapi na saṃśayaḥ |nābhimātre jale sthitvā yo gaṅgākavacaṃ paṭhet || 53||

स स्वप्ने पश्यति क्षिप्रं जाह्नवी पुरतः स्थिताम् ।इदं कवचमज्ञात्वा गङ्गामन्त्रं जपेन्नरः ॥ ५४॥

sa svapne paśyati kṣipraṃ jāhnavī purataḥ sthitām |idaṃ kavacamajñātvā gaṅgāmantraṃ japennaraḥ || 54||

सर्वविघ्नैः स बाध्यः स्याद्व्याघ्रैर्मृगंशिशुर्यथा ।गङ्गा गङ्गेति यो ब्रूयाद् योजनानां शतैरपि ।मुच्यते सर्वपापेभ्यो हरिसायुज्यमाप्नुयात् ॥ ५५॥

sarvavighnaiḥ sa bādhyaḥ syādvyāghrairmṛgaṃśiśuryathā |gaṅgā gaṅgeti yo brūyād yojanānāṃ śatairapi |mucyate sarvapāpebhyo harisāyujyamāpnuyāt || 55||

इदं गङ्गाजले स्थित्वा कवचं यः सकृज्जपेत् ।भूतप्रेतपिशाचादिबाधाभ्यो मुच्यते क्षणात् ॥ ५६॥

idaṃ gaṅgājale sthitvā kavacaṃ yaḥ sakṛjjapet |bhūtapretapiśācādibādhābhyo mucyate kṣaṇāt || 56||

पितरस्तृप्तिमायान्ति कवचस्यास्य पाठतः ।श्राद्धकाले पठेन्मर्त्यो नयेत्स्वर्गं पितामहान् ॥ ५७॥

pitarastṛptimāyānti kavacasyāsya pāṭhataḥ |śrāddhakāle paṭhenmartyo nayetsvargaṃ pitāmahān || 57||

भूर्जे लिखित्वा कवचं मस्तके धारयेद्यदि ।यत्र तत्र विपन्नोऽपि वाराणस्यां मृतो भवेत् ॥ ५८॥

bhūrje likhitvā kavacaṃ mastake dhārayedyadi |yatra tatra vipanno'pi vārāṇasyāṃ mṛto bhavet || 58||

मुनिभिः कथितं देव्याः जाह्नव्याः कवचोत्तमम् ।यूयं पठध्वं सततं सद्गतिं समवाप्स्यथ ॥ ५९॥

munibhiḥ kathitaṃ devyāḥ jāhnavyāḥ kavacottamam |yūyaṃ paṭhadhvaṃ satataṃ sadgatiṃ samavāpsyatha || 59||

॥ इति श्रीब्रह्माण्डपुराणे ऋषिसनत्कुमारसंवादेगङ्गाया दिव्यमङ्गलं नाम कवचं सम्पूर्णम् ॥शुभमस्तु ।शुभमस्तु सर्वजगतः ।॥ श्रीगङ्गायै नमः ॥

|| iti śrībrahmāṇḍapurāṇe ṛṣisanatkumārasaṃvādegaṅgāyā divyamaṅgalaṃ nāma kavacaṃ sampūrṇam ||śubhamastu |śubhamastu sarvajagataḥ ||| śrīgaṅgāyai namaḥ ||