विनायक विनतिः Vinayaka Vinati

श्रीगणेशाय नमः ।हेरम्बमम्बामवलम्बमानं लम्बोदरं लम्बवितुण्डशुण्डम् ।उत्सङ्गमारोपयितुं ह्यपर्णां हसन्तमन्तर्हरिरूपमीडे ॥ १॥

śrīgaṇeśāya namaḥ |herambamambāmavalambamānaṃ lambodaraṃ lambavituṇḍaśuṇḍam |utsaṅgamāropayituṃ hyaparṇāṃ hasantamantarharirūpamīḍe || 1||

मिलिन्दवृन्दगुञ्जनोल्लसत्कपोलमण्डलंश्रुतिप्रचालनस्फुरत्समीरवीजिताननम् ।वितुण्डशुण्डमण्डलप्रसारशोभिविग्रहंनिवारिताघविघ्नराशिमङ्कलालपं भजे ॥ २॥

milindavṛndaguñjanollasatkapolamaṇḍalaṃśrutipracālanasphuratsamīravījitānanam |vituṇḍaśuṇḍamaṇḍalaprasāraśobhivigrahaṃnivāritāghavighnarāśimaṅkalālapaṃ bhaje || 2||

गजेन्द्रमौक्तिकालिलग्नकम्बुकण्ठपीठकंसुवर्णवल्लिमण्डलीविधानबद्धदन्तकम् ।प्रमोदिमोदकाञ्चितं करण्डकं कराम्बुजेदधानमम्बिकामनो विनोदमोददायकम् ॥ ३॥

gajendramauktikālilagnakambukaṇṭhapīṭhakaṃsuvarṇavallimaṇḍalīvidhānabaddhadantakam |pramodimodakāñcitaṃ karaṇḍakaṃ karāmbujedadhānamambikāmano vinodamodadāyakam || 3||

गभीरनाभितुन्दिलं सुपीतपाटधौतकंप्रतप्तहाटकोपवीतशोभिताङ्गसङ्ग्रहम् ।सुराऽसुरार्चितांघ्रिकं शुभक्रिया सहायकंमहेशचित्तचायकं विनायकं नमाम्यहम् ॥ ४॥

gabhīranābhitundilaṃ supītapāṭadhautakaṃprataptahāṭakopavītaśobhitāṅgasaṅgraham |surā'surārcitāṃghrikaṃ śubhakriyā sahāyakaṃmaheśacittacāyakaṃ vināyakaṃ namāmyaham || 4||

गजाननं गणेश्वरं गिरीशजाकुमारकंमहेश्वरात्मजं मुनीन्द्रमानसाधिधावकम् ।मतिप्रकर्षमण्डितं सुभक्तचित्तमोदकंभजज्जनालिघोरविघ्नघातकं भजाम्यहम् ॥ ५॥

gajānanaṃ gaṇeśvaraṃ girīśajākumārakaṃmaheśvarātmajaṃ munīndramānasādhidhāvakam |matiprakarṣamaṇḍitaṃ subhaktacittamodakaṃbhajajjanālighoravighnaghātakaṃ bhajāmyaham || 5||

लसल्ललाटचन्द्रकं क्रियाकृतेऽस्ततन्द्रकंमहेन्द्रवन्द्यपादुकं षडाननाग्रजानुजम् ।अहिं निवार्य मूषकाधिरक्षकं मयूरकंविलोक्य सुप्रसन्नमानसं गणाधिपं भजे ॥हरिं निरीक्ष्य भीतिचञ्चलाक्षमेत्य मातरंनिजावनाय पार्श्वमागतां विलोक्य सत्वरम् ।तदीयवक्षसि प्रविश्य सुस्थिरं परे वरेनमामि सेवकालिशोकशोषकं निरन्तरम् ॥ ७॥

lasallalāṭacandrakaṃ kriyākṛte'statandrakaṃmahendravandyapādukaṃ ṣaḍānanāgrajānujam |ahiṃ nivārya mūṣakādhirakṣakaṃ mayūrakaṃvilokya suprasannamānasaṃ gaṇādhipaṃ bhaje ||hariṃ nirīkṣya bhīticañcalākṣametya mātaraṃnijāvanāya pārśvamāgatāṃ vilokya satvaram |tadīyavakṣasi praviśya susthiraṃ pare varenamāmi sevakāliśokaśoṣakaṃ nirantaram || 7||

निलिम्पलोकमण्डलोप्रपूर्णपूजनीयकंसुभक्त भक्तिभावना विभाविताखिलप्रदम् ।प्रभूत भूति भावकं दुरूह दुःख पावकंव्रजेश्वरांशसम्भवं विद्युप्रभासितालिकम् ॥ ८॥

nilimpalokamaṇḍaloprapūrṇapūjanīyakaṃsubhakta bhaktibhāvanā vibhāvitākhilapradam |prabhūta bhūti bhāvakaṃ durūha duḥkha pāvakaṃvrajeśvarāṃśasambhavaṃ vidyuprabhāsitālikam || 8||

गिरीन्द्रनन्दिनीकराम्बुजप्रसाधिताऽलकम्विलोलशुण्डचुम्बितोग्रभालचन्द्रबालकम् ।निजाखुखेलनापरं कखन्तमस्तचापलंनमामि सिद्धिबुद्धिहस्तचालिपञ्चचामरम् ॥ ९॥

girīndranandinīkarāmbujaprasādhitā'lakamvilolaśuṇḍacumbitograbhālacandrabālakam |nijākhukhelanāparaṃ kakhantamastacāpalaṃnamāmi siddhibuddhihastacālipañcacāmaram || 9||

विनायकस्य विनतिं पठतां शृण्वतां सताम् ।सिद्धिबुद्धिप्रदां सन्ति मङ्गलानि पदे पदे ॥ १०॥

vināyakasya vinatiṃ paṭhatāṃ śṛṇvatāṃ satām |siddhibuddhipradāṃ santi maṅgalāni pade pade || 10||

॥ इति पण्डितश्रीशिवप्रसादद्विवेदिविरचिता विनायकविनतिः समाप्तः ॥

|| iti paṇḍitaśrīśivaprasādadvivediviracitā vināyakavinatiḥ samāptaḥ ||