गणेशस्तोत्रम् (प्रह्लादकृतम्) Shriprahladakritam Ganeshastotram

श्री गणेशाय नमः ।अधुना शृणु देवस्य साधनं योगदं परम् ।साधयित्वा स्वयं योगी भविष्यसि न संशयः ॥ १॥

śrī gaṇeśāya namaḥ |adhunā śṛṇu devasya sādhanaṃ yogadaṃ param |sādhayitvā svayaṃ yogī bhaviṣyasi na saṃśayaḥ || 1||

स्वानन्दः स्वविहारेण संयुक्तश्च विशेषतः ।सर्वसंयोगकारित्वाद् गणेशो मायया युतः ॥ २॥

svānandaḥ svavihāreṇa saṃyuktaśca viśeṣataḥ |sarvasaṃyogakāritvād gaṇeśo māyayā yutaḥ || 2||

विहारेण विहीनश्चाऽयोगो निर्मायिकः स्मृतः ।संयोगाभेद हीनत्वाद् भवहा गणनायकः ॥ ३॥

vihāreṇa vihīnaścā'yogo nirmāyikaḥ smṛtaḥ |saṃyogābheda hīnatvād bhavahā gaṇanāyakaḥ || 3||

संयोगाऽयोगयोर्योगः पूर्णयोगस्त्वयोगिनः ।प्रह्लाद गणनाथस्तु पूर्णो ब्रह्ममयः परः ॥ ४॥

saṃyogā'yogayoryogaḥ pūrṇayogastvayoginaḥ |prahlāda gaṇanāthastu pūrṇo brahmamayaḥ paraḥ || 4||

योगेन तं गणाधीशं प्राप्नुवन्तश्च दैत्यप ।बुद्धिः सा पञ्चधा जाता चित्तरूपा स्वभावतः ॥ ५॥

yogena taṃ gaṇādhīśaṃ prāpnuvantaśca daityapa |buddhiḥ sā pañcadhā jātā cittarūpā svabhāvataḥ || 5||

तस्य माया द्विधा प्रोक्ता प्राप्नुवन्तीह योगिनः ।तं विद्धि पूर्णभावेन संयोगाऽयोगर्वजितः ॥ ६॥

tasya māyā dvidhā proktā prāpnuvantīha yoginaḥ |taṃ viddhi pūrṇabhāvena saṃyogā'yogarvajitaḥ || 6||

क्षिप्तं मूढं च विक्षिप्तमेकाग्रं च निरोधकम् ।पञ्चधा चित्तवृत्तिश्च सा माया गणपस्य वै ॥ ७॥

kṣiptaṃ mūḍhaṃ ca vikṣiptamekāgraṃ ca nirodhakam |pañcadhā cittavṛttiśca sā māyā gaṇapasya vai || 7||

क्षिप्तं मूढं च चित्तं च यत्कर्मणि च विकर्मणि ।संस्थितं तेन विश्वं वै चलति स्वस्वभावतः ॥ ८॥

kṣiptaṃ mūḍhaṃ ca cittaṃ ca yatkarmaṇi ca vikarmaṇi |saṃsthitaṃ tena viśvaṃ vai calati svasvabhāvataḥ || 8||

अकर्मणि च विक्षिप्तं चित्तं जानीहि मानद!।तेन मोक्षमवाप्नोति शुक्लगत्या न संशयः ॥ ९॥

akarmaṇi ca vikṣiptaṃ cittaṃ jānīhi mānada!|tena mokṣamavāpnoti śuklagatyā na saṃśayaḥ || 9||

एकाग्रमष्टधा चित्तं तदेवैकात्मधारकम् ।सम्प्रज्ञात समाधिस्थम् जानीहि साधुसत्तम ॥ १०॥

ekāgramaṣṭadhā cittaṃ tadevaikātmadhārakam |samprajñāta samādhistham jānīhi sādhusattama || 10||

निरोधसंज्ञितं चित्तं निवृत्तिरूपधारकम् ।असम्प्रज्ञातयोगस्थं जानीहि योगसेवया ॥ ११॥

nirodhasaṃjñitaṃ cittaṃ nivṛttirūpadhārakam |asamprajñātayogasthaṃ jānīhi yogasevayā || 11||

सिद्धिर्नानाविधा प्रोक्ता भ्रान्तिदा तत्र सम्मता ।माया सा गणनाथस्य त्यक्तव्या योगसेवया ॥ १२॥

siddhirnānāvidhā proktā bhrāntidā tatra sammatā |māyā sā gaṇanāthasya tyaktavyā yogasevayā || 12||

पञ्चधा चित्तवृत्तिश्च बुद्धिरूपा प्रकीर्तिता ।सिद्ध्यर्थं सर्वलोकाश्च भ्रमयुक्ता भवन्त्यतः ॥ १३॥

pañcadhā cittavṛttiśca buddhirūpā prakīrtitā |siddhyarthaṃ sarvalokāśca bhramayuktā bhavantyataḥ || 13||

धर्माऽर्थकाममोक्षाणां सिद्धिर्भिन्ना प्रकीर्तिता ।ब्रह्मभूतकरी सिद्धिस्त्यक्तव्या पंचधा सदा ॥ १४॥

dharmā'rthakāmamokṣāṇāṃ siddhirbhinnā prakīrtitā |brahmabhūtakarī siddhistyaktavyā paṃcadhā sadā || 14||

मोहदा सिद्धिरत्यन्तमोहधारकतां गता ।बुद्धिश्चैव स सर्वत्र ताभ्यां खेलति विघ्नपः ॥ १५॥

mohadā siddhiratyantamohadhārakatāṃ gatā |buddhiścaiva sa sarvatra tābhyāṃ khelati vighnapaḥ || 15||

बुद्ध्या यद् बुद्ध्यते तत्र पश्चान् मोहः प्रवर्तते ।अतो गणेशभक्त्या स मायया वर्जितो भवेत् ॥ १६॥

buddhyā yad buddhyate tatra paścān mohaḥ pravartate |ato gaṇeśabhaktyā sa māyayā varjito bhavet || 16||

पञ्चधा चित्तवृत्तिश्च पञ्चधा सिद्धिमादरात् ।त्यक्वा गणेशयोगेन गणेशं भज भावतः ॥ १७॥

pañcadhā cittavṛttiśca pañcadhā siddhimādarāt |tyakvā gaṇeśayogena gaṇeśaṃ bhaja bhāvataḥ || 17||

ततः स गणराजस्य मन्त्रं तस्मै ददौ स्वयम् ।गणानां त्वेति वेदोक्तं स विधिं मुनिसत्तम ॥ १८॥

tataḥ sa gaṇarājasya mantraṃ tasmai dadau svayam |gaṇānāṃ tveti vedoktaṃ sa vidhiṃ munisattama || 18||

तेन सम्पूजितो योगी प्रह्लादेन महात्मना ।ययौ गृत्समदो दक्षः स्वर्गलोकं विहायसा ॥ १९॥

tena sampūjito yogī prahlādena mahātmanā |yayau gṛtsamado dakṣaḥ svargalokaṃ vihāyasā || 19||

प्रह्लादश्च तथा साधुः साधयित्वा विशेषतः ।योगं योगीन्द्रमुख्यं स शान्तिसद्धारकोऽभवत् ॥ २०॥

prahlādaśca tathā sādhuḥ sādhayitvā viśeṣataḥ |yogaṃ yogīndramukhyaṃ sa śāntisaddhārako'bhavat || 20||

विरोचनाय राज्यं स ददौ पुत्राय दैत्यपः ।गणेशभजने योगी स सक्तः सर्वदाऽभवत् ॥ २१॥

virocanāya rājyaṃ sa dadau putrāya daityapaḥ |gaṇeśabhajane yogī sa saktaḥ sarvadā'bhavat || 21||

सगुणं विष्णु रूपं च निर्गुणं ब्रह्मवाचकम् ।गणेशेन धृतं सर्वं कलांशेन न संशयः ॥ २२॥

saguṇaṃ viṣṇu rūpaṃ ca nirguṇaṃ brahmavācakam |gaṇeśena dhṛtaṃ sarvaṃ kalāṃśena na saṃśayaḥ || 22||

एवं ज्ञात्वा महायोगी प्रह्लादोऽभेदमाश्रितः ।हृदि चिन्तामणिम् ज्ञात्वाऽभजदनन्यभावनः ॥ २३॥

evaṃ jñātvā mahāyogī prahlādo'bhedamāśritaḥ |hṛdi cintāmaṇim jñātvā'bhajadananyabhāvanaḥ || 23||

स्वल्पकालेन दैत्येन्द्रः शान्तियोगपरायणः ।शान्तिं प्राप्तो गणेशेनैकभावोऽभवतत्परः ॥ २४॥

svalpakālena daityendraḥ śāntiyogaparāyaṇaḥ |śāntiṃ prāpto gaṇeśenaikabhāvo'bhavatatparaḥ || 24||

शापश्चैव गणेशेन प्रह्लादस्य निराकृतः ।न पुनर्दुष्टसंगेन भ्रान्तोऽभून्मयि मानद!॥ २५॥

śāpaścaiva gaṇeśena prahlādasya nirākṛtaḥ |na punarduṣṭasaṃgena bhrānto'bhūnmayi mānada!|| 25||

एवं मदं परित्यज ह्येकदन्तसमाश्रयात् ।असुरोऽपि महायोगी प्रह्लादः स बभूव ह ॥ २६॥

evaṃ madaṃ parityaja hyekadantasamāśrayāt |asuro'pi mahāyogī prahlādaḥ sa babhūva ha || 26||

एतत् प्रह्लादमाहात्म्यं यः शृणोति नरोत्तमः ।पठेद् वा तस्य सततं भवेदोप्सितदायकम् ॥ २७॥

etat prahlādamāhātmyaṃ yaḥ śṛṇoti narottamaḥ |paṭhed vā tasya satataṃ bhavedopsitadāyakam || 27||

॥ इति मुद्गलपुराणोक्तं प्रह्लादकृतं गणेशस्तोत्रं सम्पूर्णम् ॥

|| iti mudgalapurāṇoktaṃ prahlādakṛtaṃ gaṇeśastotraṃ sampūrṇam ||