महागणपतिपञ्चावरणस्तोत्रम् १ Shri Mahaganapati Panchavarana Stotram 1

अधस्तान्मानुषाकारं पुरस्तात्कुञ्जराकृति ।निरस्ताशेषदुरितं पुरस्तादस्तु वस्तु नः ॥अनाद्यायाखिलाद्याय मायिने गतमायिने ।अरूपाय स्वरूपाय शिवाय गुरवे नमः ॥श्रीशिवःसृष्टिस्थितिविनाशानां विश्वस्यास्यैककारणम् ।महागणपतिं वन्दे पञ्चावरणसंयुतम् ॥ १॥

adhastānmānuṣākāraṃ purastātkuñjarākṛti |nirastāśeṣaduritaṃ purastādastu vastu naḥ ||anādyāyākhilādyāya māyine gatamāyine |arūpāya svarūpāya śivāya gurave namaḥ ||śrīśivaḥsṛṣṭisthitivināśānāṃ viśvasyāsyaikakāraṇam |mahāgaṇapatiṃ vande pañcāvaraṇasaṃyutam || 1||

क्रीडासक्तगणाधीश करशीकरपूरितम् ।ऐक्षवाम्भोनिधिं वन्दे तरङ्गकुलसङ्कुलम् ॥ २॥

krīḍāsaktagaṇādhīśa karaśīkarapūritam |aikṣavāmbhonidhiṃ vande taraṅgakulasaṅkulam || 2||

तस्य मध्ये द्वीपवर्यं नौमि रत्नशिलातलम् ।सेवागतामराधीश दैत्यसिद्धसमाकुलम् ॥ ३॥

tasya madhye dvīpavaryaṃ naumi ratnaśilātalam |sevāgatāmarādhīśa daityasiddhasamākulam || 3||

पारिजातकसन्तान मन्दारहरिचन्दनान् ।सकल्पवृक्षान् तत्रस्थान् संश्रितेष्टवरप्रदान् ॥ ४॥

pārijātakasantāna mandāraharicandanān |sakalpavṛkṣān tatrasthān saṃśriteṣṭavarapradān || 4||

पलाशपल्लवफल प्रसूनर्तुवरव्रजैः ।युगपत्सेव्यमानस्य महतः कल्पशाखिनः ॥ ५॥

palāśapallavaphala prasūnartuvaravrajaiḥ |yugapatsevyamānasya mahataḥ kalpaśākhinaḥ || 5||

तेषां ज्वलन्मरकत प्रवालकमणिव्रजात् ।अधस्तात्कौमुदीबालातपाभ्यां सङ्कुलस्थलीम् ॥ ६॥

teṣāṃ jvalanmarakata pravālakamaṇivrajāt |adhastātkaumudībālātapābhyāṃ saṅkulasthalīm || 6||

रत्नवेदीं यजेत्पूर्णकुम्भदीपोपशोभिताम् ।लसद्वितानसंयुक्तां चतुःस्तम्भविराजिताम् ॥ ७॥

ratnavedīṃ yajetpūrṇakumbhadīpopaśobhitām |lasadvitānasaṃyuktāṃ catuḥstambhavirājitām || 7||

मुक्ताप्रवालशोभाढ्यां नानारत्नैश्च शोभिताम् ।तत्र धर्मादिसिंहास्य चतुष्पादसमन्वितम् ॥ ८॥

muktāpravālaśobhāḍhyāṃ nānāratnaiśca śobhitām |tatra dharmādisiṃhāsya catuṣpādasamanvitam || 8||

पूजयामि विभोः पीठमधर्माद्युपशोभितम् ।तन्मध्ये लिपिसंयुक्तं दलाष्टकमनोहरम् ॥ ९॥

pūjayāmi vibhoḥ pīṭhamadharmādyupaśobhitam |tanmadhye lipisaṃyuktaṃ dalāṣṭakamanoharam || 9||

षट्कोणचक्रमध्यस्थं त्रिकोणाङ्कितकर्णिकम् ।वृत्तभूवलयोपेतं विलसत्केसरान्वितम् ॥ १०॥

ṣaṭkoṇacakramadhyasthaṃ trikoṇāṅkitakarṇikam |vṛttabhūvalayopetaṃ vilasatkesarānvitam || 10||

सर्वशक्त्याख्यकमलं पूजयाम्यासनात्मकम् ।तीव्रा च ज्वालिनी नन्दा भोगदा कामरूपिणी ॥ ११॥

sarvaśaktyākhyakamalaṃ pūjayāmyāsanātmakam |tīvrā ca jvālinī nandā bhogadā kāmarūpiṇī || 11||

उग्रा तेजोवती सत्या नवमी विघ्ननाशिनी ।किञ्जल्ककर्णिकासीना यास्ताः शोणाङ्गवाससः ॥ १२॥

ugrā tejovatī satyā navamī vighnanāśinī |kiñjalkakarṇikāsīnā yāstāḥ śoṇāṅgavāsasaḥ || 12||

वन्दे वराभयकराः पीठशक्तीर्गणेशितुः ।त्रिकोणकर्णिकायां तु सुखासीनं सुरार्चितम् ॥ १३॥

vande varābhayakarāḥ pīṭhaśaktīrgaṇeśituḥ |trikoṇakarṇikāyāṃ tu sukhāsīnaṃ surārcitam || 13||

जपाकुसुमसङ्काशं दीप्तिरञ्जितदिङ्मुखम् ।गजाननं जगद्वन्द्यं तुन्दिलं चन्द्रशेखरम् ॥ १४॥

japākusumasaṅkāśaṃ dīptirañjitadiṅmukham |gajānanaṃ jagadvandyaṃ tundilaṃ candraśekharam || 14||

एकदन्तं त्रिणयनं नागयज्ञोपवीतिनम् ।रक्तमाल्याम्बरधरं रक्तगन्धानुलेपनम् ॥ १५॥

ekadantaṃ triṇayanaṃ nāgayajñopavītinam |raktamālyāmbaradharaṃ raktagandhānulepanam || 15||

फणामणिलसद्भोग भोगिभूषणभूषितम् ।वामनाङ्घ्रिकराम्भोजं दशदोर्दण्डमण्डितम् ॥ १६॥

phaṇāmaṇilasadbhoga bhogibhūṣaṇabhūṣitam |vāmanāṅghrikarāmbhojaṃ daśadordaṇḍamaṇḍitam || 16||

रमाविष्ण्वादिमिथुन हेत्यलङ्कृतविग्रहम् ।दक्षवामकराग्रेषु बीजापूरं गदां धनुः ॥ १७॥

ramāviṣṇvādimithuna hetyalaṅkṛtavigraham |dakṣavāmakarāgreṣu bījāpūraṃ gadāṃ dhanuḥ || 17||

ऐक्षवं त्रिशिखं चक्रं कमलं पाशमुत्पलम् ।कलमाग्रं स्वरदनं पुष्करे कलशं शुभम् ॥ १८॥

aikṣavaṃ triśikhaṃ cakraṃ kamalaṃ pāśamutpalam |kalamāgraṃ svaradanaṃ puṣkare kalaśaṃ śubham || 18||

दधानं कलशस्थानि नानारत्नानि सर्वदा ।वितरन्तं स्वभक्तेभ्योऽभितःसंसृतिधारया ॥ १९॥

dadhānaṃ kalaśasthāni nānāratnāni sarvadā |vitarantaṃ svabhaktebhyo'bhitaḥsaṃsṛtidhārayā || 19||

गण्डस्थलगलद्दान गन्धलुब्धान्मुहुर्मुहुः ।निवारयन्तं मधुपान् कर्णतालनघट्टनैः ॥ २०॥

gaṇḍasthalagaladdāna gandhalubdhānmuhurmuhuḥ |nivārayantaṃ madhupān karṇatālanaghaṭṭanaiḥ || 20||

महागणपतिं वन्दे वरदं शक्तिसंयुतम् ।वामाङ्के गणनाथस्य सुखासीनां शुचिस्मिताम् ॥ २१॥

mahāgaṇapatiṃ vande varadaṃ śaktisaṃyutam |vāmāṅke gaṇanāthasya sukhāsīnāṃ śucismitām || 21||

करेण पतिमालिङ्ग्य दक्षिणेनेतरेण तु ।बिभ्रतीं फुल्लकमलं कृपाविस्तृतवीक्षणाम् ॥ २२॥

kareṇa patimāliṅgya dakṣiṇenetareṇa tu |bibhratīṃ phullakamalaṃ kṛpāvistṛtavīkṣaṇām || 22||

दिव्यमाल्याम्बरालेपां दिव्याभरणभूषिताम् ।साधकाभीष्टसर्वार्थ सिद्धिदानैकतत्पराम् ॥ २३॥

divyamālyāmbarālepāṃ divyābharaṇabhūṣitām |sādhakābhīṣṭasarvārtha siddhidānaikatatparām || 23||

गौराङ्गीं गणनाथस्य शक्तिं भक्त्याऽभिवादये ।अग्रे बिल्वतरोर्मूले दिव्यसिंहासनस्थितौ ॥ २४॥

gaurāṅgīṃ gaṇanāthasya śaktiṃ bhaktyā'bhivādaye |agre bilvatarormūle divyasiṃhāsanasthitau || 24||

विद्युन्नीलाम्बुदनिभौ द्विचतुर्बाहुशालिनौ ।पद्मद्वयगदाखड्गशङ्खचक्रायुधान्वितौ ॥ २५॥

vidyunnīlāmbudanibhau dvicaturbāhuśālinau |padmadvayagadākhaḍgaśaṅkhacakrāyudhānvitau || 25||

श्वेतपीताम्बरधरौ दिव्यालेपनभूषितौ ।रमारमेशौ संस्तौमि गणेशाभिमुखस्थितौ ॥ २६॥

śvetapītāmbaradharau divyālepanabhūṣitau |ramārameśau saṃstaumi gaṇeśābhimukhasthitau || 26||

गणेशदक्षिणे भागे वटवृक्षस्थले स्थितौ ।त्र्यक्षौ सिंहासनासीनौ सुरासुरनिषेवितौ ॥ २७॥

gaṇeśadakṣiṇe bhāge vaṭavṛkṣasthale sthitau |tryakṣau siṃhāsanāsīnau surāsuraniṣevitau || 27||

हाटकस्फटिकप्रख्यौ पृथग्बाहुचतुष्टयौ ।पाशाङ्कुशवराभीति द्वयशूलपरश्वधौ ॥ २८॥

hāṭakasphaṭikaprakhyau pṛthagbāhucatuṣṭayau |pāśāṅkuśavarābhīti dvayaśūlaparaśvadhau || 28||

दिव्यमालाम्बरालेप भूषणाविन्दुशेखरौ ।गणेशाभिमुखासीनौ नौम्युमावृषभध्वजौ ॥ २९॥

divyamālāmbarālepa bhūṣaṇāvinduśekharau |gaṇeśābhimukhāsīnau naumyumāvṛṣabhadhvajau || 29||

गणेशोत्तरभागस्थौ बोधिवृक्षस्थले स्थितौ ।दिव्यसिंहासनारूढौ हेमविद्रुमसन्निभौ ॥ ३०॥

gaṇeśottarabhāgasthau bodhivṛkṣasthale sthitau |divyasiṃhāsanārūḍhau hemavidrumasannibhau || 30||

दिव्यमाल्याम्बरालेपभूषणौ द्विद्विबाहुकौ ।उत्पलद्वयपुण्ड्रेक्षु चापपुष्पशरायुधौ ॥ ३१॥

divyamālyāmbarālepabhūṣaṇau dvidvibāhukau |utpaladvayapuṇḍrekṣu cāpapuṣpaśarāyudhau || 31||

गणेशाभिमुखासीनौ प्रस्तौमि रतिमन्मथौ ।गणेशवाम भागस्थौ प्रियङ्गुद्रुममूलगौ ॥ ३२॥

gaṇeśābhimukhāsīnau prastaumi ratimanmathau |gaṇeśavāma bhāgasthau priyaṅgudrumamūlagau || 32||

नीलोत्पलद्युतिनिभौ दिव्यसिंहासनाश्रितौ ।शुकव्रीह्यग्रचक्रोद्यद्गदाभीतिवरान्वितौ ॥ ३३॥

nīlotpaladyutinibhau divyasiṃhāsanāśritau |śukavrīhyagracakrodyadgadābhītivarānvitau || 33||

श्वेतपीताम्बरौ दिव्यमाल्यालेपनभूषितौ ।गणेशाभिमुखासीनौ द्विचतुर्बाहुशालिनौ ॥ ३४॥

śvetapītāmbarau divyamālyālepanabhūṣitau |gaṇeśābhimukhāsīnau dvicaturbāhuśālinau || 34||

आधारभूतौ भूतानां भूवराहौ समाश्रये ।षट्कोणस्थानगामोद प्रमोदोन्मुखदुर्मुखान् ॥ ३५॥

ādhārabhūtau bhūtānāṃ bhūvarāhau samāśraye |ṣaṭkoṇasthānagāmoda pramodonmukhadurmukhān || 35||

अविघ्नं विघ्नकर्तारं गणेशाभिमुखस्थितान् ।शोणाङ्गान् शुभ्रमाल्यांश्च त्रिणेत्रान् भोगिभूषणान् ॥ ३६॥

avighnaṃ vighnakartāraṃ gaṇeśābhimukhasthitān |śoṇāṅgān śubhramālyāṃśca triṇetrān bhogibhūṣaṇān || 36||

पाशाङ्कुशवराभीति हस्तानर्धेन्दुशेखरान् ।ऋद्।ह्ध्यादिशक्तिसहितान् गजवक्त्रान् समाश्रये ॥ ३७॥

pāśāṅkuśavarābhīti hastānardhenduśekharān |ṛd|hdhyādiśaktisahitān gajavaktrān samāśraye || 37||

ऋद्धिस्समृद्विश्च तथा कान्तिश्च मदनावती ।मदद्रवा द्राविणी च षडामोदादिशक्तयः ॥ ३८॥

ṛddhissamṛdviśca tathā kāntiśca madanāvatī |madadravā drāviṇī ca ṣaḍāmodādiśaktayaḥ || 38||

यास्ताश्चामीकरनिभाः सम्फुल्लाम्बुजधारिणीः ।दिव्याभरणमाल्यानुलेपनांशुकभूषणाः ॥ ३९॥

yāstāścāmīkaranibhāḥ samphullāmbujadhāriṇīḥ |divyābharaṇamālyānulepanāṃśukabhūṣaṇāḥ || 39||

आत्मेशाङ्कस्थिताः सौम्याः सिद्धिदाः शरणं भजे ।गणेशोभयपार्श्वस्थौ मुक्तामाणिक्यसन्निभौ ॥ ४०॥

ātmeśāṅkasthitāḥ saumyāḥ siddhidāḥ śaraṇaṃ bhaje |gaṇeśobhayapārśvasthau muktāmāṇikyasannibhau || 40||

सदा धनानि वर्षन्तौ स्वशक्तिभ्यां समन्वितौ ।वसुधारावसुमतीभ्यां श्रये शङ्खाख्यपद्मकौ ॥ ४१॥

sadā dhanāni varṣantau svaśaktibhyāṃ samanvitau |vasudhārāvasumatībhyāṃ śraye śaṅkhākhyapadmakau || 41||

वह्नीशरक्षो वाय्वग्र पृष्ठेष्वङ्गानि षड्विभोः ।हृदादीनि प्रसन्नानि नानावर्णाकृतीनि च ॥ ४२॥

vahnīśarakṣo vāyvagra pṛṣṭheṣvaṅgāni ṣaḍvibhoḥ |hṛdādīni prasannāni nānāvarṇākṛtīni ca || 42||

गणेशाभिमुखस्थानि नतिमुद्राणि संश्रये ।दिव्यांशुकालेपमाल्याः पृथग्वर्णाननाकृतीः ॥ ४३॥

gaṇeśābhimukhasthāni natimudrāṇi saṃśraye |divyāṃśukālepamālyāḥ pṛthagvarṇānanākṛtīḥ || 43||

स्वहेतिवाहनोपेताः स्तौमि ब्राह्म्यादिमातृकाः ।प्रागादिदिक्पतीन् स्वस्वहेतिवाहनसंयुतान् ।नानावर्णाकृतीन् सौम्यानिन्द्रादीन् शरणं भजे ॥ ४४॥

svahetivāhanopetāḥ staumi brāhmyādimātṛkāḥ |prāgādidikpatīn svasvahetivāhanasaṃyutān |nānāvarṇākṛtīn saumyānindrādīn śaraṇaṃ bhaje || 44||

चतुश्चत्वारिंशत्परिगणितपद्यैर्विरचितंगणेशस्तोत्रं यः पठति नियतात्मा स लभते ।धनं धान्यं पुत्रान् जननृपवशित्वं पशुचयंचिरायुस्सद्विद्यां विपुलतरकीर्तिं शिवपदम् ॥ ४५॥

catuścatvāriṃśatparigaṇitapadyairviracitaṃgaṇeśastotraṃ yaḥ paṭhati niyatātmā sa labhate |dhanaṃ dhānyaṃ putrān jananṛpavaśitvaṃ paśucayaṃcirāyussadvidyāṃ vipulatarakīrtiṃ śivapadam || 45||

चतुश्चत्वारिंशत्परिगणितमेतत्प्रतिदिनंजपेदष्टद्रव्यैर्गणपतिसमाराधनपरः ।चतुश्चत्वारिंशद्दिवसमिति जप्त्वा स लभतेसकृच्छ्रानिष्टार्थानपि जपदिनेष्वेव सुलभान् ॥ ४६॥

catuścatvāriṃśatparigaṇitametatpratidinaṃjapedaṣṭadravyairgaṇapatisamārādhanaparaḥ |catuścatvāriṃśaddivasamiti japtvā sa labhatesakṛcchrāniṣṭārthānapi japadineṣveva sulabhān || 46||

नारिकेलकदलीफललाजान्मोदकान्पृथुकसक्तुतिलेक्षून् ।सन्निवेद्य परितर्प्य गणेशं कीर्तयेत्स्तवमिमं पुमर्थदम् ॥ ४७॥

nārikelakadalīphalalājānmodakānpṛthukasaktutilekṣūn |sannivedya paritarpya gaṇeśaṃ kīrtayetstavamimaṃ pumarthadam || 47||

यदक्षरपदभ्रष्टं मात्राहीनं तु यद्भवेत् ।तत्सर्वं वल्लभायुक्तो गणेशः क्षन्तुमर्हति ॥ ४८॥

yadakṣarapadabhraṣṭaṃ mātrāhīnaṃ tu yadbhavet |tatsarvaṃ vallabhāyukto gaṇeśaḥ kṣantumarhati || 48||

इति श्रीमहाशैवतन्त्रान्तर्गतं महागणपतिपञ्चावरणस्तोत्रं सम्पूर्णम् ।

iti śrīmahāśaivatantrāntargataṃ mahāgaṇapatipañcāvaraṇastotraṃ sampūrṇam |