महागणपतिपञ्चकम् Shri Mahaganapati Panchakam

प्रातः स्मरामि गणनाथमुखारविन्दंनेत्रत्रयं मदसुगन्धितगण्डयुग्मम् ।शुण्डञ्च रत्नघटमण्डितमेकदन्तंध्यानेन चिन्तितफलं वितरन्नमीक्ष्णम् ॥ १॥

prātaḥ smarāmi gaṇanāthamukhāravindaṃnetratrayaṃ madasugandhitagaṇḍayugmam |śuṇḍañca ratnaghaṭamaṇḍitamekadantaṃdhyānena cintitaphalaṃ vitarannamīkṣṇam || 1||

प्रातः स्मरामि गणनाथभुजानशेषानब्जादिभिर्विलसितान् लसिताङ्गदैश्च ।उद्दण्डविघ्नपरिखण्डनचण्डदण्डान्वाञ्छाधिकं प्रतिदिनं वरदानदक्षान् ॥ २॥

prātaḥ smarāmi gaṇanāthabhujānaśeṣānabjādibhirvilasitān lasitāṅgadaiśca |uddaṇḍavighnaparikhaṇḍanacaṇḍadaṇḍānvāñchādhikaṃ pratidinaṃ varadānadakṣān || 2||

प्रातः स्मरामि गणनाथविशालदेहंसिन्दूरपुञ्जपरिरञ्जितकान्तिकान्तम् ।मुक्ताफलैर्मणिगणैर्लसितं समन्तात्श्लिष्टं मुदा दयितया किल सिद्धलक्ष्म्या ॥ ३॥

prātaḥ smarāmi gaṇanāthaviśāladehaṃsindūrapuñjaparirañjitakāntikāntam |muktāphalairmaṇigaṇairlasitaṃ samantātśliṣṭaṃ mudā dayitayā kila siddhalakṣmyā || 3||

प्रातः स्तुवे गणपतिं गणराजराजंमोदप्रमोदसुमुखादिगणैश्च जुष्टम् ।शक्त्यष्टभिर्विलसितं नतलोकपालंभक्तार्तिभञ्जनपरं वरदं वरेण्यम् ॥ ४॥

prātaḥ stuve gaṇapatiṃ gaṇarājarājaṃmodapramodasumukhādigaṇaiśca juṣṭam |śaktyaṣṭabhirvilasitaṃ natalokapālaṃbhaktārtibhañjanaparaṃ varadaṃ vareṇyam || 4||

प्रातः स्मरामि गणनायकनामरूपंलम्बोदरं परमसुन्दरमेकदन्तम् ।सिद्धिप्रदं गजमुखं सुमुखं शरण्यंश्रेयस्करं भुवनमङ्गलमादिदेवम् ॥ ५॥

prātaḥ smarāmi gaṇanāyakanāmarūpaṃlambodaraṃ paramasundaramekadantam |siddhipradaṃ gajamukhaṃ sumukhaṃ śaraṇyaṃśreyaskaraṃ bhuvanamaṅgalamādidevam || 5||

यः श्लोकपञ्चकमिदं पठति प्रभातेभक्त्या गृहीतचरणो गणनायकस्य ।तस्मै ददाति मुदितो वरदानदक्षःचिन्तामणिर्निखिलचिन्तितमर्थकामम् ॥ ६॥

yaḥ ślokapañcakamidaṃ paṭhati prabhātebhaktyā gṛhītacaraṇo gaṇanāyakasya |tasmai dadāti mudito varadānadakṣaḥcintāmaṇirnikhilacintitamarthakāmam || 6||

इति श्रीदत्तात्रेयानन्दनाथविरचितं श्रीमहागणपतिपञ्चकं सम्पूर्णम् ॥

iti śrīdattātreyānandanāthaviracitaṃ śrīmahāgaṇapatipañcakaṃ sampūrṇam ||