गणेशपञ्चचामरस्तोत्रम् १ Shri Ganesha Panchachamara Stotram 1

श्रीगणेशाय नमः ।ललाटपट्टलुण्ठितामलेन्दुरोचिरुद्भटेवृतातिवर्चरस्वरोत्सररत्किरीटतेजसि ।फटाफटत्फटत्स्फुरत्फणाभयेन भोगिनांशिवाङ्कतः शिवाङ्कमाश्रयच्छिशौ रतिर्मम ॥ १॥

śrīgaṇeśāya namaḥ |lalāṭapaṭṭaluṇṭhitāmalendurocirudbhaṭevṛtātivarcarasvarotsararatkirīṭatejasi |phaṭāphaṭatphaṭatsphuratphaṇābhayena bhogināṃśivāṅkataḥ śivāṅkamāśrayacchiśau ratirmama || 1||

अदभ्रविभ्रमभ्रमद्भुजाभुजङ्गफूत्कृतीर्निजाङ्कमानिनीषतो निशम्य नन्दिनः पितुः ।त्रसत्सुसङ्कुचन्तमम्बिकाकुचान्तरं यथाविशन्तमद्य बालचन्द्रभालबालकं भजे ॥ २॥

adabhravibhramabhramadbhujābhujaṅgaphūtkṛtīrnijāṅkamāninīṣato niśamya nandinaḥ pituḥ |trasatsusaṅkucantamambikākucāntaraṃ yathāviśantamadya bālacandrabhālabālakaṃ bhaje || 2||

विनादिनन्दिने सविभ्रमं पराभ्रमन्मुखस्वमातृवेणिमागतां स्तनं निरीक्ष्य सम्भ्रमात् ।भुजङ्गशङ्कया परेत्यपित्र्यमङ्कमागतंततोऽपि शेषफूत्कृतैः कृतातिचीत्कृतं नमः ॥ ३॥

vinādinandine savibhramaṃ parābhramanmukhasvamātṛveṇimāgatāṃ stanaṃ nirīkṣya sambhramāt |bhujaṅgaśaṅkayā paretyapitryamaṅkamāgataṃtato'pi śeṣaphūtkṛtaiḥ kṛtāticītkṛtaṃ namaḥ || 3||

विजृम्भमाणनन्दिघोरघोणघुर्घुरध्वनिप्रहासभासिताशमम्बिकासमृद्धिवर्धिनम् ।उदित्वरप्रसृत्वरक्षरत्तरप्रभाभरप्रभातभानुभास्वरं भवस्वसम्भवं भजे ॥ ४॥

vijṛmbhamāṇanandighoraghoṇaghurghuradhvaniprahāsabhāsitāśamambikāsamṛddhivardhinam |uditvaraprasṛtvarakṣarattaraprabhābharaprabhātabhānubhāsvaraṃ bhavasvasambhavaṃ bhaje || 4||

अलङ्गृहीतचामरामरी जनातिवीजनप्रवातलोलितालकं नवेन्दुभालबालकम् ।विलोलदुल्ललल्ललामशुण्डदण्डमण्डितंसतुण्डमुण्डमालिवक्रतुण्डमीड्यमाश्रये ॥ ५॥

alaṅgṛhītacāmarāmarī janātivījanapravātalolitālakaṃ navendubhālabālakam |viloladullalallalāmaśuṇḍadaṇḍamaṇḍitaṃsatuṇḍamuṇḍamālivakratuṇḍamīḍyamāśraye || 5||

प्रफुल्लमौलिमाल्यमल्लिकामरन्दलेलिहामिलन् निलिन्दमण्डलीच्छलेन यं स्तवीत्यमम् ।त्रयीसमस्तवर्णमालिका शरीरिणीव तंसुतं महेशितुर्मतङ्गजाननं भजाम्यहम् ॥ ६॥

praphullamaulimālyamallikāmarandalelihāmilan nilindamaṇḍalīcchalena yaṃ stavītyamam |trayīsamastavarṇamālikā śarīriṇīva taṃsutaṃ maheśiturmataṅgajānanaṃ bhajāmyaham || 6||

प्रचण्डविघ्नखण्डनैः प्रबोधने सदोद्धुरःसमर्द्धिसिद्धिसाधनाविधाविधानबन्धुरः ।सबन्धुरस्तु मे विभूतये विभूतिपाण्डुरःपुरस्सरः सुरावलेर्मुखानुकारिसिन्धुरः ॥ ७॥

pracaṇḍavighnakhaṇḍanaiḥ prabodhane sadoddhuraḥsamarddhisiddhisādhanāvidhāvidhānabandhuraḥ |sabandhurastu me vibhūtaye vibhūtipāṇḍuraḥpurassaraḥ surāvalermukhānukārisindhuraḥ || 7||

अरालशैलबालिकाऽलकान्तकान्तचन्द्रमोजकान्तिसौधमाधयन् मनोऽनुराधयन् गुरोः ।सुसाध्यसाधवं धियां धनानि साधयन्नयनशेषलेखनायको विनायको मुदेऽस्तु नः ॥ ८॥

arālaśailabālikā'lakāntakāntacandramojakāntisaudhamādhayan mano'nurādhayan guroḥ |susādhyasādhavaṃ dhiyāṃ dhanāni sādhayannayanaśeṣalekhanāyako vināyako mude'stu naḥ || 8||

रसाङ्गयुङ्गनवेन्दुवत्सरे शुभे गणेशितुस्तिथौ गणेशपञ्चचामरं व्यधादुमापतिः ।पतिः कविव्रजस्य यः पठेत् प्रतिप्रभातकंस पूर्णकामनो भवेदिभाननप्रसादभाक् ॥ ९॥

rasāṅgayuṅganavenduvatsare śubhe gaṇeśitustithau gaṇeśapañcacāmaraṃ vyadhādumāpatiḥ |patiḥ kavivrajasya yaḥ paṭhet pratiprabhātakaṃsa pūrṇakāmano bhavedibhānanaprasādabhāk || 9||

छात्रत्वे वसता काश्यां विहितेयं यतः स्तुतिः ।ततश्छात्रैरधीतेयं वैदुष्यं वर्द्धयेद्धिया ॥ १०॥

chātratve vasatā kāśyāṃ vihiteyaṃ yataḥ stutiḥ |tataśchātrairadhīteyaṃ vaiduṣyaṃ varddhayeddhiyā || 10||

॥ इति श्रीकविपत्युपनामकौमापतिशर्मद्विवेदिविरचितंगणेशपञ्चचामरस्तोत्रं सम्पूर्णम् ॥

|| iti śrīkavipatyupanāmakaumāpatiśarmadvivediviracitaṃgaṇeśapañcacāmarastotraṃ sampūrṇam ||