गणेशस्तुतिः पञ्चदेवैः कृता Ganesha Stuti by Panchadevas

श्रीगणेशाय नमः ।पञ्चदेवा ऊचुः ॥नमस्ते विघ्नराजाय भक्तानां विघ्नहारिणे ।विघ्नकर्त्रे ह्यभक्तानां गणेशाय नमो नमः ॥ २६॥

śrīgaṇeśāya namaḥ |pañcadevā ūcuḥ ||namaste vighnarājāya bhaktānāṃ vighnahāriṇe |vighnakartre hyabhaktānāṃ gaṇeśāya namo namaḥ || 26||

हेरंबाय नमस्तुभ्यं ढुण्ढिराजाय ते नमः ।विनायकाय देवाय ब्रह्मणां नायकाय च ॥ २७॥

heraṃbāya namastubhyaṃ ḍhuṇḍhirājāya te namaḥ |vināyakāya devāya brahmaṇāṃ nāyakāya ca || 27||

लम्बोदराय सिद्धेश गजाननधराय च ।शूर्पकर्णाय गूढाय चतुर्हस्त नमोऽस्तु ते ॥ २८॥

lambodarāya siddheśa gajānanadharāya ca |śūrpakarṇāya gūḍhāya caturhasta namo'stu te || 28||

लम्बोष्ठायैकदन्ताय सर्वेशाय गणाधिप ।अनन्तमहिमाधार धरणीधर ते नमः ॥ २९॥

lamboṣṭhāyaikadantāya sarveśāya gaṇādhipa |anantamahimādhāra dharaṇīdhara te namaḥ || 29||

नमो मायामयायैव मायाहीनाय ते नमः ।मोहदाय नमस्तुभ्यं मोहहन्त्रे नमो नमः ॥ ३०॥

namo māyāmayāyaiva māyāhīnāya te namaḥ |mohadāya namastubhyaṃ mohahantre namo namaḥ || 30||

पञ्चभूतमयायैव पञ्चभूतधराय च ।इन्द्रियाणां चाधिपायेन्द्रियज्ञानप्रकारिणे ॥ ३१॥

pañcabhūtamayāyaiva pañcabhūtadharāya ca |indriyāṇāṃ cādhipāyendriyajñānaprakāriṇe || 31||

अध्यात्मनेऽधिभूतायाधिदैवाय च ते नमः ।अन्नायान्नपते तुभ्यमन्नान्नाय नमो नमः ॥ ३२॥

adhyātmane'dhibhūtāyādhidaivāya ca te namaḥ |annāyānnapate tubhyamannānnāya namo namaḥ || 32||

प्राणाय प्राणनाथाय प्राणानां प्राणरूपिणे ।चित्ताय चित्तहीनाय चित्तेभ्यश्चित्तदायिने ॥ ३३॥

prāṇāya prāṇanāthāya prāṇānāṃ prāṇarūpiṇe |cittāya cittahīnāya cittebhyaścittadāyine || 33||

विज्ञानाय च विज्ञानपतये द्वन्द्वधारिणे ।विज्ञानेभ्यः स्वविज्ञानदायिने ते नमो नमः ॥ ३४॥

vijñānāya ca vijñānapataye dvandvadhāriṇe |vijñānebhyaḥ svavijñānadāyine te namo namaḥ || 34||

आनन्दाय नमस्तुभ्यमानन्दपतये नमः ।आनन्दानन्ददात्रे च कारणाय नमो नमः ॥ ३५॥

ānandāya namastubhyamānandapataye namaḥ |ānandānandadātre ca kāraṇāya namo namaḥ || 35||

चैतन्याय च यत्नाय चेतनाधारिणे नमः ।चैतन्येभ्यः स्वचैतन्यदायिने नादरूपिणे ॥ ३६॥

caitanyāya ca yatnāya cetanādhāriṇe namaḥ |caitanyebhyaḥ svacaitanyadāyine nādarūpiṇe || 36||

बिन्दुमात्राय बिन्दूनां पतये प्राकृताय च ।भेदाभेदमयायैव ज्योतीरूपाय ते नमः ॥ ३७॥

bindumātrāya bindūnāṃ pataye prākṛtāya ca |bhedābhedamayāyaiva jyotīrūpāya te namaḥ || 37||

सोऽहंमात्राय शून्याय शुन्याधाराय देहिने ।शून्यानां शून्यरूपाय पुरुषाय नमो नमः ॥ ३८॥

so'haṃmātrāya śūnyāya śunyādhārāya dehine |śūnyānāṃ śūnyarūpāya puruṣāya namo namaḥ || 38||

ज्ञानाय बोधनाथाय बोधानां बोधकारिणे ।मनोवाणीविहीनाय सर्वात्मक नमो नमः ॥ ३९॥

jñānāya bodhanāthāya bodhānāṃ bodhakāriṇe |manovāṇīvihīnāya sarvātmaka namo namaḥ || 39||

विदेहाय नमस्तुभ्यं विदेहाधारकाय च ।विदेहानां विदेहाय साङ्ख्यरूपाय ते नमः ॥ ४०॥

videhāya namastubhyaṃ videhādhārakāya ca |videhānāṃ videhāya sāṅkhyarūpāya te namaḥ || 40||

नानाभेदधरायैव चैकानेकादिमूर्तये ।असत्स्वानन्दरूपाय शक्तिरूपाय ते नमः ॥ ४१॥

nānābhedadharāyaiva caikānekādimūrtaye |asatsvānandarūpāya śaktirūpāya te namaḥ || 41||

अमृताय सदाखण्डभेदाभेदविवर्जित ।सदात्मरूपिणे सूर्यरूपाधाराय ते नमः ॥ ४२॥

amṛtāya sadākhaṇḍabhedābhedavivarjita |sadātmarūpiṇe sūryarūpādhārāya te namaḥ || 42||

सत्यासत्यविहीनाय समस्वानन्दमूर्तये ।आनन्दानन्दकन्दाय विष्णवे ते नमो नमः ॥ ४३॥

satyāsatyavihīnāya samasvānandamūrtaye |ānandānandakandāya viṣṇave te namo namaḥ || 43||

अव्यक्ताय परेशाय नेतिनेतिमयाय च ।शिवाय शाश्वतायैव मोहहीनाय ते नमः ॥ ४४॥

avyaktāya pareśāya netinetimayāya ca |śivāya śāśvatāyaiva mohahīnāya te namaḥ || 44||

संयोगेन च सर्वत्र समाधौ रूपधारिणे ।स्वानन्दाय नमस्तुभ्यं मौनभावप्रदायिने ॥ ४५॥

saṃyogena ca sarvatra samādhau rūpadhāriṇe |svānandāya namastubhyaṃ maunabhāvapradāyine || 45||

अयोगाय नमस्तुभ्यं निरालम्बस्वरूपिणे ।मायाहीनाय देवाय नमस्ते ह्यसमाधये ॥ ४६॥

ayogāya namastubhyaṃ nirālambasvarūpiṇe |māyāhīnāya devāya namaste hyasamādhaye || 46||

शान्तिदाय नमस्तुभ्यं पूर्णशान्तिप्रदाय ते ।योगानां पतये चैव योगरूपाय ते नमः ॥ ४७॥

śāntidāya namastubhyaṃ pūrṇaśāntipradāya te |yogānāṃ pataye caiva yogarūpāya te namaḥ || 47||

गणेशाय परेशाय ह्यपारगुणकीर्तये ।योगशान्तिप्रदात्रे च महायोगाय ते नमः ॥ ४८॥

gaṇeśāya pareśāya hyapāraguṇakīrtaye |yogaśāntipradātre ca mahāyogāya te namaḥ || 48||

गुणान्तं न ययुर्यस्य वेदाद्या वेदकारकाः ।स कस्य स्तवनीयः स्याद्यथामति तथा स्तुतः ॥ ४९॥

guṇāntaṃ na yayuryasya vedādyā vedakārakāḥ |sa kasya stavanīyaḥ syādyathāmati tathā stutaḥ || 49||

तेन वै भगवान् साक्षाच्चिन्तामणिगजाननः ।प्रसन्नो भवतु त्राताऽस्माकं त्वं परमा गतिः ॥ ५०॥

tena vai bhagavān sākṣāccintāmaṇigajānanaḥ |prasanno bhavatu trātā'smākaṃ tvaṃ paramā gatiḥ || 50||

इत्येवमुक्त्वा देवेशास्तूष्णीं भूतास्तथा शिवे ।गणेशोऽपि प्रसन्नात्मा हृष्टः सन् प्रत्युवाच तान् ॥ ५१॥

ityevamuktvā deveśāstūṣṇīṃ bhūtāstathā śive |gaṇeśo'pi prasannātmā hṛṣṭaḥ san pratyuvāca tān || 51||

श्रीगणेश उवाच ।पञ्चदेवा महाभागाः प्रसन्नो भवतां स्तवैः ।तपसा च तथा भक्त्या वाञ्छितं ब्रूत वै वरम् ॥ ५२॥

śrīgaṇeśa uvāca |pañcadevā mahābhāgāḥ prasanno bhavatāṃ stavaiḥ |tapasā ca tathā bhaktyā vāñchitaṃ brūta vai varam || 52||

भवत्कृतमिदं स्तोत्रं परमाह्लादवर्धनम् ।मम प्रीतिकरं भक्त्या सर्वदं प्रभविष्यति ॥ ५३॥

bhavatkṛtamidaṃ stotraṃ paramāhlādavardhanam |mama prītikaraṃ bhaktyā sarvadaṃ prabhaviṣyati || 53||

यः पठेद्भावपूर्वं स धर्मकामार्थमोक्षभाक् ।पुत्रपौत्रयुतः श्रीमानन्ते स्वानन्दमाप्नुयात् ॥ ५४॥

yaḥ paṭhedbhāvapūrvaṃ sa dharmakāmārthamokṣabhāk |putrapautrayutaḥ śrīmānante svānandamāpnuyāt || 54||

सप्तवारं पठेन्नित्यमेकविंशतिवासरम् ।कारागृहगतो वाऽपि मुच्यते बन्धनात् स्वयम् ॥ ५५॥

saptavāraṃ paṭhennityamekaviṃśativāsaram |kārāgṛhagato vā'pi mucyate bandhanāt svayam || 55||

एककालं द्विकालं वा त्रिकालमपि यः पठेत् ।स वै देवादिकैर्वन्द्यो भविष्यति न संशयः ॥ ५६॥

ekakālaṃ dvikālaṃ vā trikālamapi yaḥ paṭhet |sa vai devādikairvandyo bhaviṣyati na saṃśayaḥ || 56||

मारणोच्चाटनादिभ्य एकविंशतिवारतः ।तावद्दिनानि पाठेन तस्य नैव भयं भवेत् ॥ ५७॥

māraṇoccāṭanādibhya ekaviṃśativārataḥ |tāvaddināni pāṭhena tasya naiva bhayaṃ bhavet || 57||

धनधान्यादिकं सर्वमारोग्यं पशुवर्धनम् ।यं यं चिन्तयते कामं तं तं प्राप्नोति निश्चितम् ॥ ५८॥

dhanadhānyādikaṃ sarvamārogyaṃ paśuvardhanam |yaṃ yaṃ cintayate kāmaṃ taṃ taṃ prāpnoti niścitam || 58||

इति पञ्चदेवैः कृता गणेशस्तुतिः । १\।११

iti pañcadevaiḥ kṛtā gaṇeśastutiḥ | 1\|11