गणेशस्तुतिः मुद्गलकृता Ganesha Stuti by Mudgala

श्रीगणेशाय नमः ।शौनक उवाच ।कथं स्तुतिः कृता तेन गणेशस्य महात्मनः ।तां मे वद महाभाग सर्वज्ञोऽसि मतो बुधैः ॥ १॥

śrīgaṇeśāya namaḥ |śaunaka uvāca |kathaṃ stutiḥ kṛtā tena gaṇeśasya mahātmanaḥ |tāṃ me vada mahābhāga sarvajño'si mato budhaiḥ || 1||

सूत उवाच ।भवते कथयिष्यामि भावयुक्तेन चेतसा ।स्तुतिं कृतां गणेशस्य मुद्गलेन च तां मुने ॥ २॥

sūta uvāca |bhavate kathayiṣyāmi bhāvayuktena cetasā |stutiṃ kṛtāṃ gaṇeśasya mudgalena ca tāṃ mune || 2||

मुद्गल उवाच ।किं स्तौमि त्वां गणाध्यक्ष वेदैः स्तोतुं न शक्यते ।ब्रह्मादिभिश्च योगीन्द्रैर्यथामति च वच्मि भोः ॥ ३॥

mudgala uvāca |kiṃ staumi tvāṃ gaṇādhyakṣa vedaiḥ stotuṃ na śakyate |brahmādibhiśca yogīndrairyathāmati ca vacmi bhoḥ || 3||

त्वद्दर्शनप्रभावेण शक्तोऽस्मि न च संशयः ।त्वदनुग्रहतः सर्वे स्तोतुं शक्ता भवन्ति वै ॥ ४॥

tvaddarśanaprabhāveṇa śakto'smi na ca saṃśayaḥ |tvadanugrahataḥ sarve stotuṃ śaktā bhavanti vai || 4||

नमस्ते गणेशाय सर्वादिभूम्ने परेषां परेशाय वेदातिगाय ।परं मायिने मायिनां मोहदात्रे ह्यगण्याय गण्याय ते वै नमस्ते ॥ ५॥

namaste gaṇeśāya sarvādibhūmne pareṣāṃ pareśāya vedātigāya |paraṃ māyine māyināṃ mohadātre hyagaṇyāya gaṇyāya te vai namaste || 5||

पुराणादिशास्त्रैः सदा संस्तुताय शिवायैः सुरेन्द्रैर्नमस्ते स्तुताय ।अनाद्यन्तमध्यादिभेदैर्विहीनाय नानामयायास्तु सर्वेश्वराय ॥ ६॥

purāṇādiśāstraiḥ sadā saṃstutāya śivāyaiḥ surendrairnamaste stutāya |anādyantamadhyādibhedairvihīnāya nānāmayāyāstu sarveśvarāya || 6||

नमो लक्षवेदाष्टयोनिप्रचारतदाकाररूपाय योगेन योगिन् ।नमो ह्यन्नभूताय सर्वाकराय कलानन्तरूपाय पुष्टिप्रदाय ॥ ७॥

namo lakṣavedāṣṭayonipracāratadākārarūpāya yogena yogin |namo hyannabhūtāya sarvākarāya kalānantarūpāya puṣṭipradāya || 7||

नमो भूमिरूपाय नानाप्रभेदधरायाथ धाराय नित्याय तेऽस्तु ।जलाधिस्वरूपाय तृप्तिप्रदाय तदाकारहीनाय साराय धाम्ने ॥ ८॥

namo bhūmirūpāya nānāprabhedadharāyātha dhārāya nityāya te'stu |jalādhisvarūpāya tṛptipradāya tadākārahīnāya sārāya dhāmne || 8||

नमस्तेजसां द्योतरूपाय ढुण्ढे प्रकाशाय भोक्त्रे च सर्वस्थिताय ।नमो वायुरूपाय ते चालकाय प्रचारस्वरूपाय भिन्नाय तस्मात् ॥ ९॥

namastejasāṃ dyotarūpāya ḍhuṇḍhe prakāśāya bhoktre ca sarvasthitāya |namo vāyurūpāya te cālakāya pracārasvarūpāya bhinnāya tasmāt || 9||

नमः स्वस्वरूपाय दीप्ताय पूर्णप्रकाशाय भूतादिकब्रह्मदात्रे ।नमः स्थूलभोगस्वरूपाय जाग्रन्मयाय प्रभो राजसायाथ तेऽस्तु ॥ १०॥

namaḥ svasvarūpāya dīptāya pūrṇaprakāśāya bhūtādikabrahmadātre |namaḥ sthūlabhogasvarūpāya jāgranmayāya prabho rājasāyātha te'stu || 10||

नमः स्वममायामयायापि सूक्ष्मस्वरूपाय सर्वान्तरे संस्थिताय ।नमः कारणायोभयब्रह्मदाय समायापि सौषुप्तभोगिन्नमस्ते ॥ ११॥

namaḥ svamamāyāmayāyāpi sūkṣmasvarūpāya sarvāntare saṃsthitāya |namaḥ kāraṇāyobhayabrahmadāya samāyāpi sauṣuptabhoginnamaste || 11||

नमश्चेतनाधाररूपाय तेऽस्तु प्रयत्नप्रदाय त्रिभोगप्रदाय ।गुणेशाय चैतन्यधाराय तेऽस्तु नमो नादरूपाय कालाय चात्मन् ॥ १२॥

namaścetanādhārarūpāya te'stu prayatnapradāya tribhogapradāya |guṇeśāya caitanyadhārāya te'stu namo nādarūpāya kālāya cātman || 12||

नमो बिन्दुरूपाय वक्राननाय नमो देहमायाविहाराय तुभ्यम् ।नमश्चित्स्वरूपाय सोऽहंप्रदाय निराकारदेहिस्वरूपाय तेऽस्तु ॥ १३॥

namo bindurūpāya vakrānanāya namo dehamāyāvihārāya tubhyam |namaścitsvarūpāya so'haṃpradāya nirākāradehisvarūpāya te'stu || 13||

सदा ह्येकदन्ताय जन्मातिगाय परायाथ शून्याय दैत्यान्तकाय ।मदादेश्च शत्रो महाग्बुध्वजाय नमोऽनादिसिद्धाय मायाधराय ॥ १४॥

sadā hyekadantāya janmātigāya parāyātha śūnyāya daityāntakāya |madādeśca śatro mahāgbudhvajāya namo'nādisiddhāya māyādharāya || 14||

नमो ज्ञानरूपाय नानाविहारप्रदायाथ पूर्णाय सर्वत्रगाय ।नमो मायिमायादिभेदाकराय सदा बोधरूपाय ते वै महात्मन् ॥ १५॥

namo jñānarūpāya nānāvihārapradāyātha pūrṇāya sarvatragāya |namo māyimāyādibhedākarāya sadā bodharūpāya te vai mahātman || 15||

नमः साङ्ख्यरूपाय वै देहिनां वै पराय स्वसम्भोगहीनाय देव ।सदा केवलब्रह्मभूताय तेऽस्तु नमो ज्ञानहीनाय मेधामयाय ॥ १६॥

namaḥ sāṅkhyarūpāya vai dehināṃ vai parāya svasambhogahīnāya deva |sadā kevalabrahmabhūtāya te'stu namo jñānahīnāya medhāmayāya || 16||

नमः स्वस्वरूपाय चानन्ददाय समाधिस्वरूपाय मौनात्मकाय ।स्वसंवेद्ययोगेन लभ्याय तेऽस्तु विनात्मप्रबोधाय सर्वाधिपाय ॥ १७॥

namaḥ svasvarūpāya cānandadāya samādhisvarūpāya maunātmakāya |svasaṃvedyayogena labhyāya te'stu vinātmaprabodhāya sarvādhipāya || 17||

नमः पञ्चपञ्चादिमायाकराय चतुर्धा चतुर्धा विभिन्नाय धर्मिन् ।असद्रूपकायाऽथ शक्त्यात्मकाय नमोऽभेदभेदादिनानात्मकाय ॥ १८॥

namaḥ pañcapañcādimāyākarāya caturdhā caturdhā vibhinnāya dharmin |asadrūpakāyā'tha śaktyātmakāya namo'bhedabhedādinānātmakāya || 18||

नमः सत्स्वरूपाय सूर्यात्मकाय सदात्मप्रबोधाय मायाधराय ।अखण्डामृतायाद्वितीयाय तेऽस्तु सदा कालकालाय मोक्षप्रदाय ॥ १९॥

namaḥ satsvarūpāya sūryātmakāya sadātmaprabodhāya māyādharāya |akhaṇḍāmṛtāyādvitīyāya te'stu sadā kālakālāya mokṣapradāya || 19||

नमो विष्णुरूपाय चानन्ददाय समाय स्वमायोभयस्रष्ट्र एव ।अनन्ताय भेदादिहीनाय भृम्ने सदा भेदरूपाय सर्वात्मकाय ॥ २०॥

namo viṣṇurūpāya cānandadāya samāya svamāyobhayasraṣṭra eva |anantāya bhedādihīnāya bhṛmne sadā bhedarūpāya sarvātmakāya || 20||

नमः शम्भुरूपाय नेतिप्रदाय सदा मोहहीनाय च त्र्यम्बकाय ।त्रिधा मायया भासितुर्यस्वरूपपरब्रह्मरूपाय ते धूम्रवर्ण ॥ २१॥

namaḥ śambhurūpāya netipradāya sadā mohahīnāya ca tryambakāya |tridhā māyayā bhāsituryasvarūpaparabrahmarūpāya te dhūmravarṇa || 21||

चतुर्णामभेदाय संयोगकारिन् स्वसंवेद्यभावेन विघ्नाधिपाय ।स्वभक्तम्य पक्षे सदा संस्थिताय गणाधीश हन्त्रे महादैत्यकानाम् ॥ २२॥

caturṇāmabhedāya saṃyogakārin svasaṃvedyabhāvena vighnādhipāya |svabhaktamya pakṣe sadā saṃsthitāya gaṇādhīśa hantre mahādaityakānām || 22||

नमः कर्मरूपाय कर्मादिकर्त्रे जनानां स्वकर्मादिना भोगदात्रे ।नमो ज्ञानरूपाय निःसङ्गदाय सदा कर्महीनाय ते केवलाय ॥ २३॥

namaḥ karmarūpāya karmādikartre janānāṃ svakarmādinā bhogadātre |namo jñānarūpāya niḥsaṅgadāya sadā karmahīnāya te kevalāya || 23||

नमस्ते समानप्रदायोभयाय समायाऽथ योगेन चानन्ददाय ।नमः साहजब्रह्मभूयप्रदाय त्रिधाम्ने त्रिहीनाय सन्तोषदाय ॥ २४॥

namaste samānapradāyobhayāya samāyā'tha yogena cānandadāya |namaḥ sāhajabrahmabhūyapradāya tridhāmne trihīnāya santoṣadāya || 24||

चतुर्धा स्थितीनां सदा पालकाय निजात्मस्वरूपाय संयोगकाग्नि ।अपाराय नाना चतुर्णां समूहेष्वधीशाय हेरम्ब तुभ्यं नमस्ते ॥ २५॥

caturdhā sthitīnāṃ sadā pālakāya nijātmasvarūpāya saṃyogakāgni |apārāya nānā caturṇāṃ samūheṣvadhīśāya heramba tubhyaṃ namaste || 25||

अयोगाय मायाविहीनाय तुभ्यं नमस्ते निरानन्दरूपाय नित्यम् ।निवृत्तिस्वरूपाय भिन्नाय तेऽस्तु नमो योगरूपासमाधिस्थिताय ॥ २६॥

ayogāya māyāvihīnāya tubhyaṃ namaste nirānandarūpāya nityam |nivṛttisvarūpāya bhinnāya te'stu namo yogarūpāsamādhisthitāya || 26||

नमो योगशान्तिस्वरूपाय शान्तिप्रदात्रे गणेशाय योगाय तुभ्यम् ।सदा ब्रह्मणां ब्रह्मदात्रेऽखिलेश गणानां पते ज्येष्ठराजाय तेऽस्तु ॥ २७॥

namo yogaśāntisvarūpāya śāntipradātre gaṇeśāya yogāya tubhyam |sadā brahmaṇāṃ brahmadātre'khileśa gaṇānāṃ pate jyeṣṭharājāya te'stu || 27||

नमो ब्रह्मणे सृष्टिकर्त्रे सदा वै रजोधारिणे वेदशास्त्रादिकर्त्रे ।सदा सृष्टिहीनाय साम्याय धाम्ने नमो मायिने मध्यवृत्तिस्थिताय ॥ २८॥

namo brahmaṇe sṛṣṭikartre sadā vai rajodhāriṇe vedaśāstrādikartre |sadā sṛṣṭihīnāya sāmyāya dhāmne namo māyine madhyavṛttisthitāya || 28||

नमः सत्त्वरूपाय विष्णुप्रभेदाज्जगत्पालकायाथ मायाधराय ।नमः सत्त्वहीनाय सर्वातिगाय कवीनां पते विघ्नहन्त्रे नमस्ते ॥ २९॥

namaḥ sattvarūpāya viṣṇuprabhedājjagatpālakāyātha māyādharāya |namaḥ sattvahīnāya sarvātigāya kavīnāṃ pate vighnahantre namaste || 29||

नमस्तामसायाऽथ संहारकर्त्रे त्रिनेत्रप्रदीपाय शक्तेर्धराय ।सदा कालरूपाय कैलासदाय तमोहीनरूपाय लम्बोदराय ॥ ३०॥

namastāmasāyā'tha saṃhārakartre trinetrapradīpāya śakterdharāya |sadā kālarūpāya kailāsadāya tamohīnarūpāya lambodarāya || 30||

नमः कर्मणां मूलबीजाय तेऽस्तु नमो भानुरूपाय तेजोमयाय ।त्रिकालादिबोधाय सूर्याय भूम्ने प्रकाशैविहीनाय हेरम्ब तेऽस्तु ॥ ३१॥

namaḥ karmaṇāṃ mūlabījāya te'stu namo bhānurūpāya tejomayāya |trikālādibodhāya sūryāya bhūmne prakāśaivihīnāya heramba te'stu || 31||

नमः शक्तिरूपाय मोहप्रदाय क्रियाधारभूताय नानाभ्रमाय ।अनन्तस्वरूपाधिलीलाधराय नमः शक्तिहीनाय सिद्धीश तुभ्यम् ॥ ३२॥

namaḥ śaktirūpāya mohapradāya kriyādhārabhūtāya nānābhramāya |anantasvarūpādhilīlādharāya namaḥ śaktihīnāya siddhīśa tubhyam || 32||

नमश्चन्द्ररूपाय पुष्टिप्रदाय कलाभिस्त्रिलोकस्थभूतादिकेभ्यः ।सुधाधारकायाऽथ नक्षत्रकादिप्रकाशाय ते ह्यन्नहीनाय ढुण्ढे ॥ ३३॥

namaścandrarūpāya puṣṭipradāya kalābhistrilokasthabhūtādikebhyaḥ |sudhādhārakāyā'tha nakṣatrakādiprakāśāya te hyannahīnāya ḍhuṇḍhe || 33||

नमः कामरूपाय कामारये ते नमस्ते गजाकारतुण्डाय तुभ्यम् ।हरीन्द्रादिदेवैः सदा संस्तुताय शुकाद्यैर्महद्भिश्च वन्द्याय तेऽस्तु ॥ ३४॥

namaḥ kāmarūpāya kāmāraye te namaste gajākāratuṇḍāya tubhyam |harīndrādidevaiḥ sadā saṃstutāya śukādyairmahadbhiśca vandyāya te'stu || 34||

अनित्याय नित्याय देवेश देव सकामाय निष्कामभावप्रदाय ।सदा सर्वपूज्याय सर्वाधिपाय जलेशेन्द्रशेषादिभिः संस्तुताय ॥ ३५॥

anityāya nityāya deveśa deva sakāmāya niṣkāmabhāvapradāya |sadā sarvapūjyāya sarvādhipāya jaleśendraśeṣādibhiḥ saṃstutāya || 35||

नमः काश्यपायाऽथ वै कापिलाय वरेण्यस्य पुत्राय पाराशराय ।नमः शम्भुपुत्राय पार्श्वात्मजाय नमो भक्तिभोक्त्रे गणाधीश तेऽस्तु ॥ ३६॥

namaḥ kāśyapāyā'tha vai kāpilāya vareṇyasya putrāya pārāśarāya |namaḥ śambhuputrāya pārśvātmajāya namo bhaktibhoktre gaṇādhīśa te'stu || 36||

नमो माधवस्त्रीसुतायाऽथ तुभ्यं नमः सर्वमात्रे नमः सर्वपित्रे ।नमः सर्वपुत्राय सर्वात्मकाय नमः सर्वसर्वाय नानामयाय ॥ ३७॥

namo mādhavastrīsutāyā'tha tubhyaṃ namaḥ sarvamātre namaḥ sarvapitre |namaḥ sarvaputrāya sarvātmakāya namaḥ sarvasarvāya nānāmayāya || 37||

नमः पाशधारिन् नमो दन्तधारिन् सृणिं बिभृते वै सदानन्ददायिन् ।नमः पुत्रपौत्रादि राज्यप्रदात्रे नमो भुक्तिमुक्तिप्रदायाऽथ तुभ्यम् ॥ ३८॥

namaḥ pāśadhārin namo dantadhārin sṛṇiṃ bibhṛte vai sadānandadāyin |namaḥ putrapautrādi rājyapradātre namo bhuktimuktipradāyā'tha tubhyam || 38||

नमोऽनन्तशक्ते गुणानामधीश मयूरेश योगेश मायेश तुभ्यम् ।नमोऽव्यक्तसुव्यक्तरूपाय दन्तिन् गजाकारसाकारमोहाय तेऽस्तु ॥ ३९॥

namo'nantaśakte guṇānāmadhīśa mayūreśa yogeśa māyeśa tubhyam |namo'vyaktasuvyaktarūpāya dantin gajākārasākāramohāya te'stu || 39||

नमो ह्येकरूपाय नानाप्रभेदादये विघ्नपालाय शुण्डाधराय ।अनाथाय नाथाय देवादिकानां निवासाय सर्वात्मनां ते नमो वै ॥ ४०॥

namo hyekarūpāya nānāprabhedādaye vighnapālāya śuṇḍādharāya |anāthāya nāthāya devādikānāṃ nivāsāya sarvātmanāṃ te namo vai || 40||

नमस्त्वंपदाकारदेहाय तुभ्यं नमस्तत्पदाकारतुण्डाय तेऽस्तु ।तयोरेकभावाऽसिरूपप्रयुक्तशरीराय साक्षात् सुधाम्ने नमस्ते ॥ ४१॥

namastvaṃpadākāradehāya tubhyaṃ namastatpadākāratuṇḍāya te'stu |tayorekabhāvā'sirūpaprayuktaśarīrāya sākṣāt sudhāmne namaste || 41||

नमो वामभागेन सिद्धिस्वरूपाधृतामोहमायाजनानां जनित्री ।सदा बुद्धिरूपा धृता दक्षिणाङ्गे न पुंस्त्रीस्वरूपाऽसिरूपाय तेऽस्तु ॥ ४२॥

namo vāmabhāgena siddhisvarūpādhṛtāmohamāyājanānāṃ janitrī |sadā buddhirūpā dhṛtā dakṣiṇāṅge na puṃstrīsvarūpā'sirūpāya te'stu || 42||

नमो भ्रामरी त्वंपदाधारशक्तिः सदा तत्पदा कामदात्री ह्यभेदा ।तयोरेकभावे स्वसंवेद्यनाम्नि पुरे मस्तके वासकारिंश्च तासाम् ॥ ४३॥

namo bhrāmarī tvaṃpadādhāraśaktiḥ sadā tatpadā kāmadātrī hyabhedā |tayorekabhāve svasaṃvedyanāmni pure mastake vāsakāriṃśca tāsām || 43||

अखण्डामृतं यत्र तोयं सुताम्रं समुद्रे स्थितं चेक्षुसंज्ञे नमस्ते ।निराधाररूपे च पानेन तस्य न पुंस्त्रीप्रदायाऽत्र खेलंश्च तेऽस्तु ॥ ४४॥

akhaṇḍāmṛtaṃ yatra toyaṃ sutāmraṃ samudre sthitaṃ cekṣusaṃjñe namaste |nirādhārarūpe ca pānena tasya na puṃstrīpradāyā'tra khelaṃśca te'stu || 44||

जनानां सदा त्र्यक्षरं शृण्वतां च गणेशेति चानन्ददायिन्नमस्ते ।सकृज्जल्पतां जन्ममृत्यू न तेषामपारप्रधाम्ने च ढुण्ढीश्वराय ॥ ४५॥

janānāṃ sadā tryakṣaraṃ śṛṇvatāṃ ca gaṇeśeti cānandadāyinnamaste |sakṛjjalpatāṃ janmamṛtyū na teṣāmapārapradhāmne ca ḍhuṇḍhīśvarāya || 45||

तवोपासका ब्रह्मभूता न चित्रं जनेभ्यश्च संस्पर्शनैर्ब्रह्मदा वै ।सुरेन्द्रादिपूज्या गणेशस्वरूपा भवयुर्नमस्ते नमस्ते गणेश ॥ ४६॥

tavopāsakā brahmabhūtā na citraṃ janebhyaśca saṃsparśanairbrahmadā vai |surendrādipūjyā gaṇeśasvarūpā bhavayurnamaste namaste gaṇeśa || 46||

सूत उवाच ।इति स्तुत्वा गणेशानं मुद्गलो मौनधारकः ।पादौ धृत्वा गणेशस्य पतितो दण्डवत् क्षितौ ॥ ४७॥

sūta uvāca |iti stutvā gaṇeśānaṃ mudgalo maunadhārakaḥ |pādau dhṛtvā gaṇeśasya patito daṇḍavat kṣitau || 47||

समुत्थाप्य स्वभक्तं तं सस्वजे परमादरात् ।गजाननः प्रसन्नात्मा तमुवाच महामुनिम् ॥ ४८॥

samutthāpya svabhaktaṃ taṃ sasvaje paramādarāt |gajānanaḥ prasannātmā tamuvāca mahāmunim || 48||

(फलश्रुतिः ।)गणेश उवाच ।त्वया स्तोत्रं कृतं यच्च मदीयं मम सन्निधौ ।स्तोत्रोत्तमं प्रविख्यातं भविष्यति न संशयः ॥ ४९॥

(phalaśrutiḥ |)gaṇeśa uvāca |tvayā stotraṃ kṛtaṃ yacca madīyaṃ mama sannidhau |stotrottamaṃ pravikhyātaṃ bhaviṣyati na saṃśayaḥ || 49||

स्तोत्रोत्तमेन मां स्तौति तस्मै मुक्तिं सभुक्तिकाम् ।ददामि दृढभक्तिं च मदीयां नात्र संशयः ॥ ५०॥

stotrottamena māṃ stauti tasmai muktiṃ sabhuktikām |dadāmi dṛḍhabhaktiṃ ca madīyāṃ nātra saṃśayaḥ || 50||

न सङ्कटं न रोगं च प्राप्नोति स नरोत्तमः ।पुत्रपौत्रादिकं सर्वं धनं धान्यं ददामि वै ॥ ५१॥

na saṅkaṭaṃ na rogaṃ ca prāpnoti sa narottamaḥ |putrapautrādikaṃ sarvaṃ dhanaṃ dhānyaṃ dadāmi vai || 51||

मारणोच्चाटनादीनि नश्यन्ति पठनेन च ।एकविंशतिवारं च तथा नावद्दिनावधि ॥ ५२॥

māraṇoccāṭanādīni naśyanti paṭhanena ca |ekaviṃśativāraṃ ca tathā nāvaddināvadhi || 52||

कारागृहादिजाः पीडा नश्यन्ति पठनेन च ।मनसेप्सितमाप्नोति नरो मे परमप्रियः ॥ ५३॥

kārāgṛhādijāḥ pīḍā naśyanti paṭhanena ca |manasepsitamāpnoti naro me paramapriyaḥ || 53||

त्वं तु मत्तो वरान् ब्रूहि दास्येऽहं भक्तियन्त्रितः ।त्वत्समो नास्ति भावज्ञो वशे तेऽहं सदा स्थितः ॥ ५४॥

tvaṃ tu matto varān brūhi dāsye'haṃ bhaktiyantritaḥ |tvatsamo nāsti bhāvajño vaśe te'haṃ sadā sthitaḥ || 54||

इति श्रीमुद्गलकृता गणेशस्तुतिः समाप्ता । १\।२१॥ मुद्गलपुराणं प्रथमः खण्डः । अध्यायः २१ । १\।२१ ५५४॥– ॥ मुद्गलपुराणं प्रथमः खण्डः । अध्यायः २१ । १।२१ ५-५४॥

iti śrīmudgalakṛtā gaṇeśastutiḥ samāptā | 1\|21|| mudgalapurāṇaṃ prathamaḥ khaṇḍaḥ | adhyāyaḥ 21 | 1\|21 554||– || mudgalapurāṇaṃ prathamaḥ khaṇḍaḥ | adhyāyaḥ 21 | 1|21 5-54||